1 Samuel
Jehová tocopata Ana, mawecowa-ata, pexainaenexa pexënato Samuel
1
Efraín-pijinë pemomoxi pejinawanapaenacuata, petsutonënacuajawata eca Ramá tomarayo. Bajarapatomarata ponapona Elcana, Jeroboam pexënato. Bajaraponë raja Zuf pijawiriamaëtonë, tsipaji paxa Jeroboam pamo pewënë Eliú, Tohu pexënato. Bajaraponë Tohu Zuf-pijinë pexënato, Efraín-pijinë pemomoxibitsaëtoyajuwënënë. 2 Elcana xaina anijawabeje pijawabeje. Caewa pewënë Ana. Itsawa pijinia pewënë Penina. Penina pijinia xaina pexi, itsiata baitsi jane, bajarapamatacabita Ana apotoxainae pexi. Mawecowa picani tsaponaponae. 3 Daxitawai canacujitsia Elcana pijamonae barëponabiaba pijatomarawecua Silo tomarajawabetsia,a bajarajota asiwaya pewajëcabiabinexa yaiyataeya Jehovájawabelia, paDiosonë daxitawecua bitso piacuenesaënë tsaponaponae. Tajuitabiabanua dajubi altar-jumata bajaraPonëjawabelia. Bajarapamatacabi Elí sacerdotewi pepopenamatacaitorobinë tsaponaponae. Pexënatobeje pijinia, Ofni, Fineesbeje sacerdotenëbeje tsaponaponae.4 Pacujinae Elcana tajuitabiaba dajubi penajamatabëcuene-itajëtsinexa caejamatabëcueneb pexainaejawa Jehovájawabelia, nexata pewi penacopatsijawa tajuitsinejewa totsatabiaba bajaraponë pijawabejejawabelia. Peninajawabelia rajutabiaba peyacaëjëpaecueniatsi daxita pexi yajawa. 5 Itsiata baitsi jane, Anajawabelia rajutabiaba pematatsënëyo Peninawecua pexaniapitapetsiwijawa bajarapawiyajuwënëjawa, tsipaji bitso asiwa bajarapowa, Jehová apotocopatsi-atatsi abaxë pexi pexainaenexa. 6 Ana pexi apopexainaexae, nexata Penina jamatabë-itonotsiaya capo̱capo̱nabiaba. Tsimuxunajumejematabiaba pianaeya-exanaenexa bajarapowa Jehová piacoxibiaya-exanaexaetsi.
7 Caewai canacujitsia itsa ponabiaba Jehová pijacarpabojawabetsia, Penina bajarapacuenia tsimuxunajumejematabiaba bajarapowajawabelia. Belia Ana bitso natsinueyabiaba. Itsajawata, pexaejawa apoxaeyabiabi, penajamatabëxainaecobexae. 8 Nexata bajarapacuenia itsa apoxae pexaejawa, Elcana pijawajawabelia jumaitsi tsabiabi:
—Ana, ¿detsa xuajitsia nuame? ¿Detsa xuajitsia bitso najamatabëxainaeya ponaponame nexaejawa xaenejewamë? ¿Xanë tsaja taca-asiwajawa apocatonamatamotsi taxi diez ponëbeje ta-asiwajawawecua? —jai tsabiabi bajaraponë pijawajawabelia.
9 Itsawaita pepatsicujinae Silo tomarajawata, Ana nonotapuna penajaniwerenecujinae. Abaxë pijamonae puenebejeba pexaeyenaejawata, bajarapowa peponaenexa Jehová pijacarpabojawabelia. Bajarajota, baupamuxuneneta, wajëca Jehovájawabelia perajutsinexatsi pexënato. Bajarapaepatota pijinia, sacerdotewi pepopenamatacaitorobinë Elí eca pijasillajawata, bajarapacarpabopijibaupamuxuneneta. 10 Ana petsi-atanejawatsi bajarapaliwaisi, nexata bajarajota wajëca bitso jamatabëcuenenueya Jehovájawabelia. 11 Pewajëtsijawata, mapacueniaje bajarapowa naliwaisicajoneya jumaitsi Jehovájawabelia: «Jehovámë, xamë bitso daxitawecua niacuenesaënë tsaponaponae. Pexaniacuenia cawajëtatsi tanebejiobiataenexamë. Xamë yapëtaneme pacuenia xanë betajiobicueneta najamatabëxainaeya ponaponabiabajë taxi xainaenejewanë. Nexata, pexaniacuenia cawajëtatsi tanerajutsinexamë taxënatonëyo. Nexata xanë, bajaraponëyo itsa xainaenajë, juya catocanawiatsianatsi nijajiwitonënexa, pecatonacuenebaponaponaenënexa nijacuene. Peneta bajaraponë itsamatacabi-ata aponamataxunae tsane. ¡Nenajamatabënapire tane-itaxutotsoniataenexamë, taxainaenexa taxënatonëyo!», jai bajarapowa najumeliwaisicajoneya pewajëtsijawata.
12-13 Bajarapacuenia bajarapowa bajayajebi ajumejibia pewajëcanucaejawata Jehovájawabelia. Nexata bajarapaepatota, Elí taeyeca pe-upicuaicuaijaitsanucaejawa jumepitsapaenejewa. Bajarapacuenia apojumetae, tsipaji bajarapowa wëpaxapaxajaicuenia nawajëcanuca jumepitsapaenejewa. Nexata Elí jamatabëcuene-itsi bajarapowa piaitajibijawa yabara. 14 Nexata jumaitsi bajarapowajawabelia:
—¿Detsa paepatojebijawabelia ajamatabëcuenesaëmë tsane niaitajibijawa? ¡Copare baja niapaejawa piatanevinora! —jai.
15 Nexata Ana jumecanawiata:
—Apo-aitajibinë raja, tajatuxanenë. Xanë raja apo-apaenë itsapiatanera tanaitajibiaxuabinexa. Xanë raja bitso jamatabëcuenebëjaiya ponaponajë. Nexata bajaraxuata, Jehovájawabelia wajëcajë tajamatabëcuenecaewinexa, tanawecuapaebinexa bitso tanasiwanajamatabëxainaecuene. 16 ¡Pëtsa nesiwajamatabëcuenejumaitsimë xamë bepibisiacuene ta-exanaponaponaewacuene! Xanë raja saya wajëcajë Jehovájawabelia mapa-epatojebi, tsipaji xanë bitso jamatabëcuenebëjanë. Bitso najamatabëxainajënua —jai.
17 Nexata Elí jumecanawiata:
—Je, xanepana. ¡Ponare baja jamatabëcuenebëjainejewamë, tsipaji Dioso, Israel-pijinë pemomoxi pijaDioso, carajutsiana xua xamë wajëcame! —jai bajarapowajawabelia.
18 Nexata bajarapowa jumecanawiata:
—¡Bitso xanepana! Pexaniacuenia nitaxutotsoniataneme —jai. Bajaraxuacujinae, Ana nawiataponalia itsajotalia pijamonae tsitecaeya naxaeyena. Bajaraxuacujinae, barëyaya najuaxane. Bajarapowa baja pematatsënëa najamatabëxainaeya apoponaponae. 19-20 Itsamatacabijawabelia pepobajayacunua, bajarapamonae namatacoba penawajëcaenexa Jehovájawabelia pematabacabëta nubenaeya, penajamatabëcuene-itajëtsinexa yaiyataeya piasiwacuene. Nexata xuacujinae, nawiabaponalia Silo tomarawecua pijanacuayabelia, Ramá tomarajawabelia. Bajaraxuacujinae, Elcana pijawa barëmajita. Nexata Ana Jehová najamatabënapitatsi pitaxutotsoniataenexatsi, penacoxitsinexa. Itsa bajarapowa baja tocopiapatatsi pewecuanaexanaejawanexatsi, nexata baja wecuanaexanatsi pebinëyo. Nexata, bajaraponëyo wënëruba Samuel,c pewajëtsixae Jehovájawabelia pexainaenexa bajaraponëyo.
21 Bajaraxuacujinae, Elcana, daxita pijamonae yajawa, icatsia pona Silo tomarajawabetsia, pacuenia exanabiaba caewai canacujitsia. Bajarajotatsia, pona petajuitsinexa dajubi altar-jumata Jehovájawabelia, bajarapacuenianua xua najumecapanepaeya pejumaitsijawa peto-exanaenexa Jehovájawabelia. 22 Itsiata baitsi jane, Ana bajarapacujinaeta aponaponae. Nexata bajarapowa jumaitsi pamonajawabelia:
—Aponaponaenë tsane mapawaita abaxë, tsipaji tsiquirinëyo aponamicopatsinë. Matapania itsa namicopatsianajë, bajarapawaijawabelia caponaenajë bajaraponëyo, tatocanawiatsinexa Jehovájawabelia. Bajarajota nexata, nacopatsiana daxitamatacabijawabelianexa, petonacuenebaponaponaenënexa Jehová —jai.
23 Nexata, Elcana jumecanawiata pijawa mapacueniaje:
—Je, xanepana. ¡Exanare pacuenia xamë catsitaxanepana! ¡Nexata, nacopare abaxë tsiquirinëyo yajawa, nenamicopatsijawabelia! Bajaraxuacujinae nexata, to-exanaename Jehová najumecapanepaeya nejumaitsicowëya —jai.
Nexata, bajarapowa bajarapacuenia exana. Nacopata tsiquirinëyo yajawa penamicopatsijawabelia. 24 Itsawainë pepanepaecujinae penamicopatsicujinae baja tsiquirinëyo, nexata bajarapowa, pamonabeje caponabeje Jehová pijacarpabojawabetsia, Silo tomarajawabetsia. Bajarapamatacabijawa itsiata abaxë bajaraponëyo tsiquirinëyo tsecae. Bajarapamonae pijinia capona acueyabi ponëbeje becerrowi, bajarapacuenia veintidos palítrobeje pecaëjëtsijawa trigobeno, bajarapijinia pacuenia caedoroyo pewënëtsijawa vinora. 25 Nexata bajarapamonae capata caenë becerro Jehová pijacarpabopanabota, itsajota sacerdotenë jane baja totajuitatsi Jehovájawabelia. Bajaraxuacujinae, tsitajëta tsiquirinëyo sacerdotenë Elíjawabelia. 26 Nexata Ana bajarajota jumaitsi Elíjawabelia:
—¡Tajatuxanenë, pexaniacuene abaxë ne-exanare! Imatami pacujinaeta xamë majotaje ecame, xanë bajarapacujinaeta pijinia nemuxuneneta wajëcanucajë Jehovájawabelia. 27 Nexata, xanë bajaraponëyo yabara wajëcajë Jehovájawabelia. Tawajëtsixae Jehovájawabelia, bajaraponëyo baja xanë xainajë. 28 Xanë juya tajumaitsicuenia tawajëtsijawata, bajaraponëyo juya tocanawiatajë Jehovájawabelia. Nexata, paepatowajëto bajaraponëyo asaë tsaponaponae, tonacuenebaponaponaena Jehová pijajiwitonëcuenia —jai.
Nexata, bajarapaepatota Elí sacerdotenë irataeya bocajunua irabelia yaiyataeya Jehová pitabarata pexaniajamatabëcuene perajutsinexa.