Josué muxujiobiaya napëjioba Israel-pijinë pemomoxi petëpaewajënaeya
24
Josué itoroba penacaetuatsinexa Siquem tomarajawata daxita Israel-pijinë pemomoxi. Junata daxita Israel-pijinë pemomoxi pija-ancianowi, daxita penamatacaitorobiwi-ata, pamonae-ata liwaisi pecanaëjëbiwi. Nexata, daxita bajarapatuxanewi naitajëba Dioso pitabarata.a 2 Bajarajota, Josué jumaitsi daxita Israel-pijinë pemomoxijawabelia:—Marapacuenia pacajumaitsi Jehová, Israel-pijinë papemomoximë panijaDioso: «Bajayatami panijasalinainëmi Taré pexënatobeje yajawa, Abraham, Nacor-beje, bajarapamonaemi jinawanapa picani Éufrates mene-itapajawa. Bajarapamonae asiwaya siwanajamatabëcuenecopababiaba picani itsawiriadiosowi, jumapecataeya pexanaenëanëjawabelia. 3 Itsiata, capitsapajë panijasalinainëmi Abraham-pijinë, Éufrates mene-itapajawa peponaponaenëmi, pepatsinexa Canaán nacuajawaberena. Daxita bajarapanacuajawab matacaponajë bajaraponë. Bajarapacuenia pemomoxi tonawiatsia-exanajë. Tocopatajënua pexainaenexa pexënato Isaac. 4 Bajarapacuenia tocopatajë Isaac pexainaenexa anijanëbeje pexënatobeje, Jacob, Esaúbeje. Esaúpijinëjawabelia rajutajë petsutonënacua, Seir nacua, bajaraponë pemomoxi pecanacopatsinexa, bajarapanacuajawa pejinawanapaenexa. Jacob-pijinë juya, pijamonae yajawa, pona Egipto nacuajawabelia. 5 Bajarapanacuata pejinawanapaecujinae bajayajebi, belia to-itorobajë Moisés-pijinë, Aarón-pijinëbeje, Jacob-pijinë pemomoxi pecapitsapaenexabeje Egipto nacuawecua. Egipto nacuapijiwijawabelia tsi-itorobajë piayaicuenejawanë, petëpaenexa ayaibitsaëto. Bajarapacuenia tatsita-exanaecujinae bajarapamonaetuatuajëta, panijasalinaiwimi, paxamë papeximë-ata, bajarapamatacabi pacajutatsi Egipto nacuawecua. 6 Panijasalinaiwimi pepitsapaecujinae Egipto nacuawecua, Egiptopijiwajabitsaë pëbarajinatsi Mar Rojo manuamenejawabelia pecanawajabitsaëtsimonëta, caballo peyarobobocaecarrozamonë, bajarapacuenia caballuanë pejumaponaewinua icatsia papecataicaenexa. 7 Bajarajota, panijasalinaiwimi newajëca xanëjawaberena. Nexata, yacaranatsiaya rutajë bitso pequirijaijawa bajarapabitsaëtobejetuatuajëta Egipto nacuapijiwajabitsaëwiwecua, bajarapamonae xaniawaetsia penatsiwajënaetaeyaniwa. Xuacujinae, manuamene petsatsimeneyenepanabeje icatsia matacënëbia-exanajë, Egipto nacuapijiwajabitsaëwimi tawerebiabinexa. Daxitaxua exanajë Egipto nacuapijiwijawabelia, paxamë panijacuata pataneme cajena. Nexata, bajaraxuacujinae paxamë bajarapamonae papeximë, papemomoximë-ata, bajayajebi pajinawanapame petsewitusatonacuata. 8 Bexëajawabelia pacamatacaponatsi amorreowi pejinawanapaenacuamijawabelia Jordán mene itsapanawetsina, juameto pepitsapaenenia. Bajarajota xanë, Jehovánë, pacayawenonatsi panecuene-amoneyabinexa bajarapanacuapijiwimi, bajarapamonae pijanacuanëmi panepitaponaenexa, panejinawanapaenacuanexa. Baitsi, yawenonaeya pacatowerebiabaponatsi bajarapamonaemi panebarënawajabitsaëtanajetarubenaejawata. 9 Xuacujinae, moabitawi pepopeyanacua-ewetsinë, Balac, Zipor pexënato, pacatsimaxëpata picani papecabarënawajabitsaëtsinexa. Nexata, itoroba pijamonae petojunatsinexatsi Balaam,c Beor pexënato, papecacuene-itajëtsinexa picani pibisiacuene panetaewanapaenexa. 10 Itsiata, bajarapacuenia canaëjëtsi-ata Balaam papecacuene-itajëtsinexa Jehovánë tawënëta, xanë aponamuxuna-ewetsinë. Nexata, papecacuene-itajëtsijawaminexa pibisiacuenia, pacatopitsapabiabia-exanatsi ëpexaniacuene panetaewanapaenexa. Bajarapacuenia xanë, Jehovánë, pacacapanepatsi Balac pesaëwecua. 11 Belia, panicabame Jordán mene itsapanabetsina, mapanacuajawabetsina, matapania panepatsinexa Jericó tomarajawata. Nexata, bajarapatomarapijiwimi pacabarënawajabitsaëta. Bajarapacuenia itsamonae-ata amorreowi, ferezeowi, cananeowi, heteowi, gergeseowi, heveowi, jebuseowi-ata, Canaán nacuata pejinawanapaewimi, pacabarënawajabitsaëta. Daxita bajarapamonae itsiata pacatocopatatsi jamatejema panewerebiabinexa. Nexata, pacuene-amoneyabame baja. 12 Itsiata, paxamë apopayorotsimë bajarapamonae panija-espadanëta, panijabitsabianëtanua. ¡Jume! Biji rajane, xanë Jehovánë tajamatabëcuene, tsipaji pacuenia jiwi bawecuanajetabijirawa enemanëd pecacuatsiyaniwatsi, bajarapacuenia exanajë bajarapamonae panepatsiwajënaeya papecawecuarëcëpecaenexa pecajunawi. 13 Bajarapacuenia pacato-exanatsi, patacarajutatsi itsamonae pecanacuenebi-iranëmi. Nexata, maparucaeje pabianë pa-ubinejewamë, paxamë paxaewanapame itsamonae pe-ubijawanëmi uvacuai, olivocuaitoxi-ata. Bajarapijinia pacuenia itsamonae pexanaetomaranëmijawata jamatejema pajinawanapame, bajarapabonë panacuenebinejewamë», pacajai Jehová, panijaDioso papecanajamatabënapitsia-exanaenexa papecato-exanaecuenemi.
14 »Nexata xuata, ajenaconoxaeta jane baja, pacatoxanepana paneyaiyataejawa Jehová, caejamatabëcuene panexainaenexa, panewajëcaponaenexa caenë Jehovájawabelia, yaiyataeya paneto-exanawanapaenexanua pejitsipaecuenia. ¡Panayajiwitsarenua baja jumapecataeya pexanaenëanëjawabelia panesiwanajamatabëcuenecopabiyaniwa, ponëanëjawabelia panijasalinaiwimi asiwaya wajëcabiaba, pacujinae jinawanapa Éufrates mene-itapajawa, bajarapacuenia-ata Egiptojawata! ¡Itsiata, paxamë ajenaconoxaeta patonacuenebawanapare Jehová ëpejitsipaecuenia! 15 ¡Itsa baja paxamë pacatsi-abeje asiwaya paneto-exanawanapaejawa Jehová pejitsipaecuenia, nexata panato-itapere ajena pawiriadiosowijawabelia asiwaya patonacuenebawanapaejitsiamë! ¡Panato-itapere itsa pajumecowënëtsijitsiamë padiosowi, jumapecataeya pexanaenëanëjawabelia, bajayatami panijamonaemi asiwaya nawajëcabiaba itsa abaxë jinawanapa Jordán mene itsapanawerena, Éufrates mene-itapata, itsa jume, padiosowijawabelia amorreowi asiwaya nawajëcabiaba, pamonaemi jinawanapa mapanacuataje picani itsajota pajinawanapame! Itsiata baitsi jane, xanë, Josuénë, daxita tajamonae, taxi yajawa-ata, pajumecowënëtawanapaenajë Jehová, pejitsipaecuenia patato-exanawanapaenexa —jai Josué.
16 Nexata, Israel-pijinë pemomoxi jumaitsi:
—Acuenebi caeto-ata bajarapitsicuene pata-exanaejawa Jehováwecua. Paxanë apopajitsipaenë tsane Jehová patawecuanatsatsijawa, asiwaya patasiwanajamatabëcuenecopababiabinexa itsadiosowijawabelia, jumapecataeya pexanaenëanëjawabelia, yaiyataeyanua patajumecowënëtsinexa. 17 Payapëtaniji rabaja bajaraPonë wajanacajutsijawa waxaitsi, wajamonaemi-ata pejutsijawatsi, Egipto nacuajawawerena, itsajota picani jinawanapatsi amoneya wajatonacuenebiwi. Bajaraponë Jehová wajaDioso baja cajena nacatsita-exanabiaba bitso pinijicuenejawanë waja-itabëta. Bajarapacuenia naca-ewetabiaba. Nacayapijiwinawajabitsaëtanua, pacujinae najetarubenatsi namutua Egipto nacuajawawerena, imoxoyo xenebabuataponae-atatsi patomaranëpijiwi wajanaca-itoyawimi. 18 Bajarapacuenianua bajaraPonë cajena wajanajetarubenaejawata nacatsiwajënaetorota mapanacuapijiwimi, amorreowi-ata, pamonaemi jinawanapa picani mapanacuataje. Nexata xuata, paxanë-ata ajenaconoxae patawajënaeyabelia pajitsipajë patajumecowënëtawanapaejawa Jehová, pejitsipaecuenia pata-exanawanapaenexa, tsipaji bajaraponë wajaDioso —jai Israel-pijinë pemomoxi.
19 Itsiata baitsi jane, Josué jumaitsi bajarapamonaejawabelia:
—Paxamë pacato-acuenebi asiwaya panejumecowënëtawanapaejawa Jehová, jumapecataeya pexanaenëanë yajawa, tsipaji Jehová saicaya daxita pibisiacuene pexanaewi pewecuanatsatsinë. Icatsianua, wajanacacuene-asiwanë wajasiwanajamatabëcuenecopatsiyaniwa itsanëanëjawabelia bajaraPonëwecua. Nexata, bajaraPonë apo-ajamatabëcuenesaë tsane papecananeconitsia-exanaeyaniwa apopanejumecowënëtsixae, bajarapacuenia daxita papibisiacuene patsita-exanawanapame. 20 Bajaraxuata, itsa paxamë pacopatsipame Jehová pane-itaxutuajamatejemajawa, juya panesiwanajamatabëcopababiabinexa jumapecataeya pexanaenëanëjawabelia, bajaraPonë juya pacatocopiapatsia-exanaejitsipa pibisiacuenejawanë. Nexata, pacawerebiabijitsipa, pexaniacuene papecatopua-exanae ayaicuenia picani —jai Josué Israel-pijinë pemomoxijawabelia.
21 Nexata, bajarapamonae jumecanawiatatsi Josué:
—¡Jume! BajaraPonëwecua apopawajëcaenë tsane itsanëjawabelia. ËJehovájawabelia pasiwanajamatabëcuenecopatsianajë, patatonacuenebawanapaenexa jumecowënëtsiaya —jai bajarapamonae.
22 Icatsia, Josué jumaitsi:
—Paxamë rabaja panato-itapetame Jehová jumecowënëtsiaya panetonacuenebawanapaenexa. Bajarapacuenia panejumaitsijawata namata-enetsia panajumetanemenua bajarapacuenia panenajuanajumeliwaisicajonejawa bajaraPonëjawabelia panejumecowënëtabiabinexa —jai Josué.
Bajarapamonae jumecanawiatatsi:
—Paxaniajanë cajena. Paxanë bajarapacuenia pa-exanaenajë, tsipaji panajuanajumetaniji xua pajumaitsinë patajumecowënëtawanapaenexa —jai bajarapamonae.
23 Icatsia, Josué jumaitsi bajarapamonaejawabelia:
—¡Nexata, panawecuapenere baja daxita padiosowi, jumapecataeya pexanaenëanë, paxamë paxainawanapame. Caewëarena panajamatabëcuenepënëyorore Jehovájawaberena, bajarapacuenia daxita panejamatabëcuenesaëta bajara-ëPonëjawabelia panesiwanajamatabëcuenecopatawanapaenexa, Ponë waxaitsi Israel-pijinë pemomoxitsi wajaDiosojawabelia! —jai Josué.
24 Icatsia, bajarapamonae jumecanawiata:
—Paxanë raja Jehovájawabelia patonacuenebawanapaenajë. Bajaraponë wajaDiosowajanacatonajumecopatsiliwaisianë pajumecowënëtabiabianajë —jai bajarapamonae.
25 Bajarapacuenia pejumaitsixae, bajarapamatacabita Josué barënajuanaliwaisicajunua bajarapamonae Diosojawabelia Siquem tomarajawata. Bajaraponë tocaëjëba daxita paliwaisianëcuenia jumecowënëtawanapaejitsia, bajarapanajumecajoneliwaisi xaniawaetsia pejumecowënëtsinexa. 26 Daxita bajarapaliwaisianë yaquinaruba Moisés-pijinëjawabelia Dioso petonajumecopatsiliwaisianë peyaquinaebaxutomita. Bajaraxuacujinae, iboto pita penutsinexa encinanaejawayo pebëxëpanata, ponae nuca Jehová pijacarpabo imoxoyojawata. 27 Nexata, jumaitsi daxita bajarapamonaejawabelia:
—Mapa-ibotoje nacatoxanepanaena bewajanacaliwaisitaenucaenë, bajarapacuenia bepejumetaenucaenënua Jehová wajanacajumaitsiliwaisianë. Nexata, bajarapa-iboto wajataeyabiabijawata, wajanajamatabënapitabiabinexa wajanajumeliwaisicajonejawa, bajarapacuenia waja-exanabiabinexa wajajumaitsicowëya. Bajarapacuenia pacanajamatabënapitsia-exanaena, pane-exanaenexa panejumaitsicowëya, panenajumetsënëtsiyaniwa panijaDiosojawabelia —jai Josué.
28 Daxita bajarapacuenia pexanaecujinae, Josué napëjioba. Itorobanua penawiabinexa pijanacuanëjawabelia caenë pemomoxibitsaëto canacujitsia.
Josué baja tëpa
(Jue. 2:6-10)
29 Bajarapacuenia penajuanajumeliwaisicajonecujinae, itsajuametonëcujinae Josué, Nun pexënato, baja tëpa itsa xaina ciento diez pawaibeje, ponë Jehová pijajiwitonëmi. 30 Bajaraponë mëthëtatsi pija-irata, Timnat-sera tomarata, patomara eca Gaas-tsutonë canacujitsita, Efraín nacuata penucaetsuto. 31 Nexata, Israel-pijinë pemomoxi to-exanawanapa picani Jehová pejitsipaecuenia daxita Josué piasaëtsaponaponaematacabianëjawa, bajarapacuenia daxita piasaëtsawanapaematacabianë pa-ancianowi nacopaba Josué petëpaecujinae, daxita pamonae petaewi pacuenia Jehová peto-exanaejawamitsi Israel-pijinë pemomoxi. Itsiata, pewënamuto bajarapamonae itsacuenia exana.
Israel-pijinë pemomoxi mëthëta Josépijinëmi pesi Egipto nacuawerena pecaponaejawa
32 Josépijinëmi pesi xua capona Egipto nacuajawawerena, nexata bajarapamonae mëthëta Siquem-jawata, pa-irayojawata comuata Jacob-pijinëmi cien ponëtabeje palatanëanëta Hamor-pijinë pemomoxijawabelia, Siquem-wënënë paxa. Bajarapa-irami canacopata pija-iracuenia Josépijinë pemomoxi.
Eleazar tëpa, ponë sacerdotewi pepopenamatacaitorobinë
33 Belia Eleazar-ata baja tëpa, Aarón pexënato. Nexata, bajaraponë mëthëtatsi pexënato Finees pija-irata, Gabaa tomarata, pa-irayo rajutatsi Efraín nacuata.