2 Reyes
Ocozías petëpaejawa yabara peliwaisi
1
Acab-pijinë baja petëpaecujinae, Ocozías naexana pepopeyanacua-ewetsinë Israel nacuata. Bajarapamatacabita, Moab nacuapijiwi jamatabëpitsapa Ocozías penamatacaitorobisaëtsiwecua. Nexata pewecuapitsapaenexa, barënawajabitsaëtapona Israel nacua, pepitsapaejawabelia peyanacua-ewetsijawamitsiwecua.2 Itsamatacabijawabelia, Ocozías pijabo athëbëyo-irajawawetsica jopanucaica ventanawojotojawawetsica, Samaria tomarajawata. Nexata, bitso bajaraponë ayaicuenia tsapatanucaicatsi. Bajaraxuata, itoroba pejumeliwaisicaponabiabiwitsi, petoyanijobinexatsi Baal-zebub-wënëa jumapecataeya pexanaenëjawabelia, Ecrón tomarapijiwi pijadiosonë. Jamatabëyapëtane itsa icatsia jamatejemajitsia caewëalia. 3 Itsiata baitsi jane, Jehová pija-ángelnë jumaitsi Elías-jawabelia, Tisbé tomarapijinë:
—Ponaename necaxitajarabinexa pamonae pijumeliwaisicaponabiabiwi pepopeyanacua-ewetsinë Ocozías, Samaria tomarapijinë, neyanijobinexa. Jumaitsimë tsane bajarapamonaejawabelia: «¿Tsipaji tsaja paxamë pacatsita ajibi Dioso Israel nacuata, panecayanijobijitsia Baal-zebub jumapecataenë, Ecrón tomarapijiwi pijadiosonëjawabelia? 4 Bajaraxuata, Jehová pacajumaitsi Ocozías yabara: ‘Bajarapacuenia ne-exanaexae, nijacamawecua aponamatacotsimë tsane. Pepacuene xamë tëpaename’, pacajai Jehová», jamë tsane —jai Jehová pija-ángelnë Elías-jawabelia. Elías nexata pona, pexanaenexa pejumaitsicueniatsi.
5 Bajarapacuenia Elías petsipaebicujinae, pamonae pijumeliwaisicaponaewitsi pepopeyanacua-ewetsinë Ocozías, caewëarena nawiatanajetarubena icatsia Ocozías-jawaberena.
Bajaraponë yanijoba bajarapamonaejawabelia:
—¿Dexuajitsia bepijiayo panawiabaremena? —jai.
6 Nexata bajarapamonae jumecanawiata Ocozías-jawabelia:
—Tsipaji paxanë itsanë panecaxitajaraba namuto-epatojawata. Bajaraponë panejumaitsi: «Panawiabaremelia papecayanacua-ewetsinëjawabelia, ponë paca-itorobarena, bajaraponëjawabelia panejumaitsinexa: Marapacuenia cajumaitsi Jehováje: ‘¿Tsipaji tsaja xamë catsita ajibi Dioso Israel nacuata, bajaraxuata neca-itorobi pecajumeliwaisicaponaewi pecatoyanijobinexa nejamatejemajawa yabara Baal-zebub jumapecataenë, Ecrón tomarapijiwi pijadiosonëjawabelia? Bajarapacuenia ne-exanaexae, nexata nijacamawecua aponamatacotsimë tsane. Pepacuene xamë tëpaename,’ cajai raja Jehová», panejai bajaraponë patacatsipaebinexa —jaitsi bajarapamonae.
7 Nexata pepopeyanacua-ewetsinë yanijoba bajarapamonaejawabelia:
—¿Detsa pitsicuene pexainaenë ponë pacacaxitajaraba, bajarapacuenia tanetonajumerutsinexa paxamëta? —jai.
8 Nexata bajarapamonae jumecanawiata:
—Bajaraponë raja penaxatatsinë pena̱juwibocotojawa. Na-epacëtanua dajubibocotota pexanaecorreajawa —jai.
Nexata peyanacua-ewetsinë Ocozías bajarapaepatota jumaitsi:
—¡Ãjã! Elías tsaena baitsi, Tisbé nacuapijinë —jai jamatabëcuenebëjaiya. 9 Nexata, caecuenia pepopeyanacua-ewetsinë itoroba wajabitsaë penamatacaitorobinë pijajiwi yajawa cincuenta ponëbeje, pecapatsinexarena Elías bajaraponëjawaberena.
Itsa bajarapamonae pata itsajotalia Elías eca petsutojumata, nexata wajabitsaë penamatacaitorobinë jumaitsi Elías-jawabelia:
—Xamë, Dioso pijajiwitonëmë, nijumewajunupaebinë, wajanacayanacua-ewetsinë raja catonajume-itoroba nerunaenexatsica neponaenexa bajaraponëjawabelia —jai.
10 Elías nexata jumecanawiata:
—Xanë pepacuene itsa Dioso pijajiwitonënë tsaponaponae, peneta athëbëwetsica pacatsi-othopaenica isotocotiajawanë, papecaweriajawinexa, nijajiwi cincuenta ponëbeje yajawa —jai Elías.
Bajarapejumaitsijawata, nexata athëbëwetsica othopaica isotocotiajawanë. Nexata, weriajawatsi bajarapamonae.
11 Bajaraxua pejumetaecujinae, pepopeyanacua-ewetsinë icatsia itoroba itsapenamatacaitorobinë wajabitsaë, itsa cincuenta ponëbeje yajawa wajabitsaëwi. Nexata bajarapamonae pona itsajotalia eca Elías. Icatsia, wajabitsaë penamatacaitorobinë jumaitsi Elías-jawabelia:
—Xamë, Dioso pijajiwitonëmë, nejumewajunupaebinë, pepopeyanacua-ewetsinë catonajume-itoroba nerunaenexatsica neponaenexa bepijiayo bajaraponëjawabelia —jai.
12 Elías icatsia jumecanawiata:
—Xanë pepacuene itsa Dioso pijajiwitonënë tsaponaponae, peneta athëbëwetsica pacatsi-othopaenica isotojawanë papecaweriajawinexa, daxita nijajiwi cincuenta ponëbeje yajawa —jai.
Bajarapejumaitsijawata, nexata athëbëwetsica othopaica isotocotiajawanë. Nexata, weriajawatsi bajarapamonae.
13 Bajaraxua pejumetaecujinae, icatsia pepopeyanacua-ewetsinë itoroba acueyabinë wajabitsaë penamatacaitorobinë, pijajiwi cincuenta ponëbeje yajawa. Nexata, bajarapa-acueyabinë wajabitsaë penamatacaitorobinë itsa patsijitsia Elías peponaponaejawata, junanajetaruca petsutojumabetsia itsajota Elías eca. Nexata bajarapaepatota, yaiyataeya pematabacabëta nucajunua Elías pitabarata. Jumaitsi Elías-jawabelia:
—Pexaniacuene paneto-exanare, xamë Dioso pijajiwitonëmë. Itsiata, panebejiobiataema. Pëtsa nebeyaxuabame, bajarapacuenia mapamonae cincuenta ponëbeje, tajajiwi yajawa. 14 Anijanëbeje penamatacaitorobinëbeje wajabitsaë copiaya pata baja xamëjawata. Bajaraponëbeje baja weriajawatsi isotota, pa-isotocotia-othopaica athëbëwetsica, daxita pijajiwibeje wajabitsaëwi yajawa. Xanë itsiata pexaniacuene cawajëtatsi tane-itaxutotsoniataenexamë, daxita tajajiwi yajawa —jai bajaraponë.
15 Nexata bajarapaepatota, Jehová pija-ángelnë jumaitsi Elías-jawabelia:
—Naponaename bajaraponë pepëta. Pëtsa junawame —jai ángelnë.
Nexata, Elías bajarapamonae pepëta napona bajarapawajabitsaë penamatacaitorobinë pepopeyanacua-ewetsinëjawabelia. 16 Nexata, Elías itsa patajopa, jumaitsi pepopeyanacua-ewetsinëjawabelia:
—Marapacueniaje cajumaitsi Jehová: «Xamë nijajiwi itorobame pecajumeliwaisicaponaewi, pecatoyanijobinexa nejamatejemajawa yabara jumapecataenë Baal-zebub-jawabelia, Ecrón tomarapijiwi pijadiosonë. Xamë nijajiwi itorobame bajarapacuenia apobepanexainaewi Dioso Israel nacuata, pecatoyanijobinexa jumapecataeya pexanaenë Baal-zebub-wënënëjawabelia. Nexata, xamë baja apojamatejemamë tsane. Caranata, pepacuene tëpaenaeme», cajai Jehová —jai Elías.
17 Nexata, bajarapawixaeta Ocozías baja tëpa, pacuenia Jehová jumaitsitsi profeta Elías-jawabelia. Ocozías apopexainaexae pexënato, pecanacopatsinexa peyanacua-ewetsinëcuenia pewënamuto, nexata Ocozías pejuyapijinë, Joram pecowëtaxunae pita, Israel nacuata peyanacua-ewetsinexa. Joram pacujinae taxuxuaba peyanacua-ewetsijawa Israel nacuata, bajarapamatacabijawa pijinia pexënato Josafat, Joram-wënënë anijawaibeje pewajënaeya yanacua-ewetaponapona Judá nacuata.
18 Itsaliwaisianë Ocozías yabara, daxitacuene pexanaecuene, bajarapaliwaisianë rubena baja Israel nacuapijiwi peyanacua-ewetsiwimi peliwaisianë peyaquinaebaxutota.