Dioso baja capona Elías pijanacuajawabetsia
2
Itsa baja imoxoyo pewajënae pamatacabi Jehová siwanajamatabëcuenewereta Elías pecaponaenexa pinijicatuacuenia athëbëabetsia pijanacuajawabetsia, bajarapamatacabi Elías, Eliseobejea pitsapabeje Gilgal tomarawecua, peponaenexabeje itsabelia Dioso itorobatsibeje. 2 Elías nexata jumaitsi Eliseojawabelia:—Bajarajota, aeconoxae nacopatsianame, tsipaji raja xanë Jehová nitoroba taponaenexa Betel tomarajawabelia —jai.
Itsiata baitsi jane, Eliseo jumecanawiata:
—Jehová piasaënë tsaponaponaenë pitabarata cajumaitsitsi: Xamë abaxë niasaëtsaponaponae-epato, apocawecuanatsatsitsi tsane cajena —jai.
Nexata, bajarapacuenia najuaponabeje bajaraponëbeje Betel-jawabelia. 3 Itsa baja patabeje Betel tomarajawata, nexata profetawinexa penacujarubiwi pitsapa pemata-enenaenexatsibeje. Nexata bajarapamonae jumaitsi Eliseojawabelia:
—¿Xamë tsaja apoyapëtaemë ajena Jehová pecawecuapitsijawanexa nijatuxanenë? —jai bajarapamonae.
Nexata Eliseo jumecanawiata:
—Jãjã, yapëtaniji rabaja. Pëtsa baja paxamë pematatsënëa bajaraxua yabara panejumaitsimë tsaponae —jai Eliseo.
4 Bajaraxuacujinae, Elías icatsia jumaitsi Eliseojawabelia:
—Bajarajota, aeconoxae nacopatsianame, tsipaji raja xanë Jehová nitoroba taponaenexa Jericó tomarajawabelia —jai.
Itsiata baitsi jane, Eliseo icatsia jumecanawiata:
—Jehová piasaënë tsaponaponaenë pitabarata cajumaitsitsi: Xamë abaxë niasaëtsaponaponae-epato apocawecuanatsatsitsi tsane cajena —jai.
Nexata, bajarapacuenia najuaponabeje ebajaraponëbeje Jericó tomarajawabelia. 5 Itsa baja patabeje Jericójawata, bajarapatomarawecua pitsapa profetawinexa penacujarubiwi pemata-enenaenexatsibeje. Jumaitsi bajarapamonae Eliseojawabelia:
—¿Apoyapëtaemë tsaja ajena Jehová pecawecuapitsijawanexa nijatuxanenë? —jai bajarapamonae.
—Jãjã, yapëtaniji rabaja. Pëtsa baja paxamë pematatsënëa bajaraxua yabara panejumaitsimë tsaponae —jai Eliseo.
6 Bajaraxuacujinae, Elías jumaitsi Eliseojawabelia:
—Pexaniacuene cawajëtatsi, nenacopatsinexa majotaje, tsipaji raja Jehová nitoroba Jordán menejawabelia taponaenexa —jai Elías.
—Jehová piasaënë tsaponaponaenë pitabarata cajumaitsitsi: Xamë abaxë niasaëtsaponaponae-epato apocawecuanatsatsitsi tsane cajena —jai Eliseo.
Nexata, bajarapacuenia najuaponabeje bajaraponëbeje Jordán menejawabelia. 7 Bajarapacuenia pecowëwerena pënaponatsibeje cincuenta ponëbeje profetawinexa penacujarubiwi Jordán menejawabelia. Itsa patabeje Jordán mene-itapata, nucajopabeje. Pijinia bajarapabitsaëto nubena-othopa tajëyowerena. Pëtaenubena Elías, Eliseobeje, peyapëtaenexa xua exanaejitsiabeje. 8 Nexata Elías nawejumapita penajuma-acatabiabipanajawa. Bajaraponë quiona bajarapapana pemene-itaconitaxuabinexa Jordán mene. Nexata, bajarapamenemi natsata anijajawabeje. Bajarapajiwibeje nexata nicaba bajarapamenenatsatsijawatuatuajëjawalia petsewi-irajawalia. 9 Penicabicujinae, bajaraponëbeje penajetarucaejawatabeje, Elías nexata jumaitsi Eliseojawabelia:
—Newajëre xua jitsipame tacato-exanaejawa xamëjawabelia tanecaponaewajënaeya xamëwecua athëbëabetsia —jai.
Eliseo nexata jumecanawiata:
—Pexaniacuene ne-exanare. Jitsipajë nexainaecueneb tanetocopatsijawamë anijajawabejecuenia, xua Jehová cajamatabëcuenecaëjëpaeya-exana —jai.
10 —Bitso piayapëbejecuene pecunuajawa newajëtame. Itsiata baitsi jane, xamë itsa nepëtaejitsipame athëbëabetsia tacawecuaponaejawa, nexata matapania bajarajota Jehová carajutsipa xua newajëtame. Itsa pijinia aponepëtaemë tsane, bajarapacuenia apocarajutsi tsane —jai Elías.
11 Nexata paepatota bajaraponëbeje nucaponaeya namutua, cuaicuaijaibeje tsajanajetarucae. Jemata tane athëbëwetsica penajetarucaejawa pecotia pexainaecarrozamo, caballobeje pecotia pexainanëbeje yajawa. Nexata, Elías, Eliseobeje, penajuanucaponaejawatabeje nawecuatsatajarabatsibeje, pexenetsijawatatsibeje. Nexata, Elías caponatsi athëbëabetsia pinijicatuatuatuajëatsia. 12 Bajarapacuenia pepëtaejawata, Eliseo asiwaya Elías yabara ayaijumeta pëwabiaya jumaitsi:
—¡Taxamë, taxamë! Xamë neyapijiwinawajabitsaëtsinë tsaponaponae Israel nacuapijiwi pinijicuenia. Pacuenia pinijicuenesaë pexainaewajabitsaëwi caballo peyarobobocaecarrozamonëta peponaewi, caballojumata peponaewinua apocuenecaranatsitsi, bajaranecuene-itsinëmi —jai Eliseo.
Pinijicatuacuenia pecapëcaewicujinaetsi, Elías, bajaraxuacujinae pematatsënëa baja Eliseo apotae pijatuxanenë.
Elías pecowëta, Eliseo canacopata Diosojumepaebinëcuene
Nexata, Eliseo penajamatabëcuene-itajëtsinexa penajamatabëxainaejawa pijatuxanenë yabara, bajaraponë penaxatatsijawami tupatitinaxuaba anijajawabejecuenia. 13 Bajaraxuacujinae, bajaraponë pita Elías penajuma-acatabiabipanami, pewecuajopaepanatsi pecaponaejawatatsi. Nexata, bajaraponë baja nawiatanajetaruca Jordán menejawaberena. Bajaraponë itsa patajopa, nucajopa bajarapamene-itapajawata. 14 Bajaraxuacujinae, Eliseo pita Elías pewecuajopaepanatsi. Bajarapapanata pemene-itaconitaxuabijawata, ayaijumeta jumaitsi:
—¿Detsa jota ponapona Jehová, Elías pijaDioso? —jai bajaraponë.c
Nexata, Eliseo a̱jena̱ mene-itaconitaxuaba, mera bajarapaepatota natsatabeje anijajawabeje, pacuenia Elías exana pemene-itaconitaxuabijawata. Nexata, Eliseo icatsia baja nicaba bajarapamene petsewijawalia. 15 Jericó tomarata pejinawanapaewi, profetawinexa penacujarubiwi, pamonae taenubena abaxë bajarapamene imoxoyojawata, itsa cuenetanetsi bajarapacuenia pexanaejawa, nexata najumaitsi:
—Elías pexainaecuenemi Diosojawawerena, juya ajenaconoxae tsaena canacopata Eliseo —najai tsanubenae.
Nexata, bajarapamonae ponarena Eliseo pecaxitajarabinexatsi. Itsa parena baja, yaiyataeya pitabarata irataeya nubenajunua. 16 Nexata, bajarapamonae jumaitsitsi:
—¡Canaëjëre mapacueneje! Paxanëtuatuajëta raja jinawanapa cincuenta ponëbeje, bitso pecuene-aitatsacawi. Copare bajarapamonae aeconoxae pecatojaitsinexa nijatuxanenë. Jehová raẽta pija-Espíritu Santo belia caponaejitsipatsi itsajawabelia, pexuabinexatsi; petsutonëjawabelia, itsa jume, belia petsutobejetuatuajëta pebocae-irajawabelia —jai bajarapamonae.
Nexata bajaraponë jumaitsi:
—Jume, apoxanepanae pane-itorobijawa itsajiwi-ata pejaitsinexa —jai.
17 Itsiata baitsi jane, bajarapamonae bitso ajumesaë tsaponae pejumaitsinexa petocopatsinexatsi pitorobinexa bajarapacincuenta ponëbeje, pejaitsinexa Elías. Belia, Eliseo aura bajarapamonae pitabarata. Nexata jumaitsi:
—Je, pa-itorobare nexata pejaitsinexa —jai.
Nexata, bajarapamonae itoroba pejaitsinexa cincuenta ponëbeje. Bajarapamonae jaitawanapa picani, pecaxitajarabinexa Elías acueyabi pamatacabibejecuenia. Itsiata baitsi jane, apocaxitajarabi. 18 Nexata, bajarapamonae baja nawiababuatapona Jericó tomarajawaberena itsajota Eliseo ponapona.
Nexata bajaraponë jumaitsi bajarapamonaejawabelia:
—Yeera jane, xanë cajena baja picani pacajumaitsitsi paneponaeyaniwa —jai.
Eliseo mera xanepanaeya-exana Jericó tomarapijiwi pijameramëthë pepitsaparucaera
19 Eliseo peponaponaejawata Jericó tomarata, nexata bajarapatomarapijiwi pebijiwi pata bajaraponëjawabelia, pejumaitsinexatsi:
—Patajatuxanenëmë taema mapacueneje. Mapatomaraje itsajota eca picani xaina pexanianacua wajajinawanapaenexa. Bajaraxua xamë-ata baja taneme pexanianacuacuene. Itsiata baitsi jane, pexanianacua-ata, meranexa abeje. Bitso pibisiara. Nexata, irajawata apopanetoxanepanae pata-ubinexa itsacuenejawaxi-ata, tsipaji apopanetonaxaniababiabi bajarapamera pejamatabëcuene —jai bajarapamonae.
20 Nexata Eliseo jumecanawiata:
—Panetocaponaremena pejanawaxiyota yajo panewënëtsijawa —jai
21 Nexata baja, itsa tocaparenatsi, Eliseo capona bajaraxua mera pepitsaparucaemëthëjawabelia. Nexata bajarapayajo tsitapeneta merajawabelia. Pepenetsijawata, bajaraponë jumaitsi:
—Marapacuenia jumaitsi Jehováje: «Xanë baja xanepanaeya-exanajë mapameraje. Nexata, pamonae apaeyabiabiana pematatsënëa baja apotëpae tsane. Bajarapacuenia-ata petiriawi apowecua-othopaetsi tsane pejewaxinacuetoxi. Ira-ata baja apo-abeje tsane», jai raja Jehová —jai Eliseo.
22 Bajaraxuacujinae baja, mera xanepana. Pematatsënëa baja apo-abeje pacuenia Eliseo jumaitsi Jehová pejamatabëcueneta.
23 Bajaraxuacujinae, Eliseo pitsapa Jericó tomarawecua, peponaenexa baja Betel tomarajawabetsia. Bajaraponë itsa najetaruca namutua, abaxë patsinejewa Betel tomarajawabetsia, bajarapatomarawetsica pitsapa itsamonae pewëjëawinaweretsiwi. Nexata pimoxoyotanajetarubenaejawatatsi, bajarapamonae capo̱capo̱naeya carapuabatsi piamatatuna̱jibinëxae. Wawajaiya jumaitsi tsaponae:
—¡Niamatatuna̱jibinë, xamë-ata baja natsiamëre athëbëabetsia!d ¡Niamatatuna̱jibinë, xamë-ata natsiamëre athëbëabetsia! —jai tsaponaetsi carapuabiaya.
24 Nexata, Eliseo bajarapaepatota napënëyorotajopa. Asaëyata penaëcotanucaejawata bajarapamonaejawabelia, Jehová pewënëta pibisiacuene cuenewajunupaeba petocopiapatsinexatsi. Bajarapacuenia pejumaitsicujinae, pitsapa unuwetsina anijanëbeje pianaepanaenëbeje, osowirianëbeje pesorowatobeje. Nexata cuarenta y dos ponëbeje yajuwënëwi tupatiticatsi. 25 Bajaraxuacujinae, Eliseo wecuapona Betel tomara, icatsia peponaenexa Carmelotsutojawabetsia. Bajaraxuacujinae baja, nawiatsica icatsia Samaria tomarajawabereca.