31
Filisteomonae nexata barënawajabitsaëta Israel-pijinë pemomoxijawabelia. Bajarapamonae israelitawi bitso yajunutëpa ayaibitsaëto Gilboatsutojawata, nexata rëcëpeca bajarapamonaewecua. 2 Nexata filisteomonae pëbarajina bajarapamonae, pebeyajebinexa. Bajaraparëcëpecaewituatuajëta yajawanajetaruca Saúl, acueyabi ponëbeje pexi yajawa. Itsa baja barëpëcaxinatsi Saúl pexi yajawa, nexata wecuabeyaxuabatsi pexi acueyabi ponëbeje, Jonatán, Abinadab, Malquisúa-ata. 3 Pexi petobeyejebicujinaetsi, filisteomonae ayaicuenia Saúl tsimaxënacaetuatatsi pebeyaxuabinexatsi juya. Nexata itsamonae filisteomonae bixabajarabaponatsi xuatabonëta. Belia Saúl upaxuabatsi. Nexata, Saúl yacueranapona pewajënë. Bitso bajarapaepatota Saúl cujunawa bajarapamonae. 4 Bajarapaepatota nexata, Saúl jumaitsi pijajiwitonëjawabelia, ponë yawenonaeya tocaponabiabatsi penayajiwicaranatsi-escudopana pijawajabitsaëwecua. Jumaitsi mapacueniaje:—¡Nawemarajonore nija-espada tanebeyaxuabinexamë bajaraxuata! Nexata, neyacacuatsianame bajaraxuata, filisteomonae taneyabeyaxuabiyaniwa, Jehová pijacuene apopeyaiyataewi. Nexata itsa neyacaxitajaraba tanebijiapaitsinë, necapo̱capo̱naeya nebejiobia-exanaejitsipa, taneyacacuataponaejawata tanebeyaxuabijawabelia —jai Saúl.
Itsiata baitsi jane, pijajiwitonë bajarapacuenia apojitsipae pexanaejawa, tsipaji bitso bajaraponë junawa peyabeyaxuabinexa Dioso pitapetsinëtsi.a Nexata Saúl pijacueneta nawemarajonota pija-espada. Nexata pijacueneta nacacuata pejopaejawata piupijawawereca. 5 Itsa baja tane pijajiwitonë bajarapacuenia Saúl penabeyaxuabijawa pijacuata, nexata bajaraponë-ata pijacueneta nabeyaxuaba pija-espadata pijatuxanenë pecuenecowëya. Bajarapacuenia bajaraponë yajawatëpa pijatuxanenë caetaxunaeta. 6 Nexata, bajarapacuenia caematacabita Saúl yajawatëpa pexi acueyabi ponëbeje, Saúl pijajiwitonë-ata, bajarapacuenia pijajiwi yajawa-ata, daxita pamonae yajawanawajabitsaëta. 7 Pamonae israelitawi, pejinawanapaewi Jezreel-tusatota, pamonae-ata Jordán-mene itsapanawetsina pejinawanapaewi, itsa bajarapamonae tane Israel-pijinë pemomoxi penawajabitsaëtsiwi perëcëpecaejawa pijawajabitsaëwecua, itsa jumetanenua Saúl pebeyaxuabijawatsi, pexi acueyabi ponëbeje yajawa, nexata bajarapamonae petaenubenaewi narëcëpeca. Xuabeca bajarapamonae pijatomaranë. Nexata bajarapataxunaeta juya filisteomonae pata. Bajarapamonae juya bajarajota jinawanapa bajarapatomaranëjawata.
8 Itsamatacabi bajayacunuajawabelia icatsia filisteowi pona itsajota bajarapamonae barënatsecona pecaetuatsinexa petëpaewi penaxatatsijawanëmi, xuanë-ata canamaxëwanita. Nexata bajarajota, caxitajarabajeba Saúl, acueyabi ponëbeje pexi yajawa, petëpaewi Gilboatsutojawata. 9 Nexata bajarapamonae Saúl wësi-ucubiabatsi. Wejumajonatatsinua pecanawajabitsaëtsijawa itsamonae pewajunupaebinexa daxita filisteowi pejinawanapaenacuajawa, peyapëtaeya-exanaenexa pijanacuapijiwi, pamonae-ata nacaetuata pijadiosowi pijatemplobojawata. 10 Nexata bajarapamonae, filisteowi, Saúl-pijinë pecanawajabitsaëtsijawanëmi jeba Astarot-wënë jumapecataeya pexanaenë pijatemplobojawata. Saúl-pijinë pijinia pewësi-ucutsinëtsi rutatsi Bet-sán tomara matatoyorotsia penaya-itacaranatanutsi-ibopanajawata.
11 Nexata itsa wënëtane daxita filisteomonae xua exana Saúl-jawabelia, nexata israelitawi, Jabes tomarata pejinawanapaewi, Galaad nacuajawata pe-ecaetomarayo, 12 nacaetuata daxita pamonae piacuene-itatsacawi pesiwaponaenexa Saúl petëpaenë. Nexata bajarapamonae merawijebi pona Bet-sán tomarajawabelia, pewecuapitsinexa Saúl petëpaenë tomara peyacaranatanutsi-ibopanajawawecua, bajarapacuenia acueyabi ponëbeje pexi petëpaewi peyajawarutsiwitsi. Itsa baja isinaica pecëbarutsiwitsi petëpaewi, bajarapamonae canawiabarena icatsia Jabes tomarayojawaberena, itsajota bajarapamonae petëpaewimi tajuita. 13 Bajaraxuacujinae, bajarapamonae bajarapatajuitsisijawanëmi mëthëta naejawabëxëpanata Jabes-jawata. Bajarapamonae nexata siete pamatacabibeje pexaejawa xaenejewa, atsobiaya jinawanapa.