2
Nexata, daxitaxua xaina athëbëyo itaboxojawatatsia, xua-ata xaina mapanacuataje irawetsia, bajaraxua baja exanaewereta. Itsacuenejawa-ata aposajinae pexanaenexa. Daxitacuene baja wereta. 2 Siete matacabita, Dioso peweretsixae daxita pexanaejawa, bajarapamatacabita wemaxënacuera-eweta. 3 Nexata, Dioso pexaniacuenia itapeta siete matacabita daxitamatacabianëwecua jiwi peyaiyataematacabinexa. Najumecopatanua daxita bajarapamatacabi peyaiyataenexa, tsipaji bajarapamatacabita wemaxënacuera-eweta daxita pe-exanaejawa mapanacuataje petaxuxuabijawawerenacujinae. 4 Mapaliwaisije nacayapëtaeya-exana pacuenia exana petaxuxuabijawawerenacujinae, athëbë-itaboxopijicuene, mapanacuataje irapijicuene pijinia.Pacuenia Dioso exana jiwi
Pacujinae Jehováa Dioso exana athëbëpijicuene, irapijicuene-ata, 5 abaxë bajarapamatacabita ajibi pabita pe-ubijawanë,b bajarapacuenia itsawiria tsiquiricuenejawaxi pe-ubijawanë-ata, tsipaji ajibi abaxë itsajiwiyo-ata pabicuenia penacuenebinexa bajarapa-irata, Jehová Dioso apopecopatsixaenua athëbëwetsica perunaenexa ema irajumawereca. 6 Itsiata baitsi jane, ema aporunae-ata, bajarapamatacabita Jehová Dioso copata irabëxëpanawetsina mera pepitsapaenexatsina bepetsëxëbocuenia, pesucuetsinexa daxita irajawa. 7 Nexata, Jehová Dioso, itsamatacabi jiwitonënexa, atsatonëc xaniawaetsia nacuenebabuata. Bajaraxuacujinae, pumu-uxune. Bajarapacuenia atsatonëmi najumalipita. Nexata, asaë tsaponaponae.
Dioso nacuenebabuata pabixaneto
8 Xuacujinae, Jehová Dioso nacuenebabuata pinijipabi Edén nacuajawata pemutojawawetsina. Jehová Dioso bajarapapabijawata, jiwitonë nuta peponaponaenexa, ponë exana atsatomijawata. 9 Bajarapapabijawata, Jehová Dioso daxitawiria naejawanë juwia-exana irawetsina pexaniawirianaenë, ponaenë-ata xanepana pecuaixaenexa. Itsiata, bajarapapabituatuajëta nuta anijanaebeje. Caenae itsa cuaixaejitsipa, daxitamatacabijawabelia wëna-asaëtsaponaponae tsipae. Itsanae pijinia itsa cuaixaejitsipa, natoyapëtaejitsipa xua pexaniacuene, xua-ata pibisiacuene.
10 Edén nacuata xaina caemene. Bajarapamene najetaruca pabituatuajëjawa piracainejebia-exanaenexa. Bajarapapabicujinae bajarapamene natsanapona cuatro pamenebeje. 11 Copiayapijimenemaxërana pewënë Pisón. Bajarapamene najetaruca Havila nacuajawa, panacuata nawita oro-ibo. 12 Bajarapa-orocuene bitso pexaniawiria-orojawanë. Xainanua bajarajota pexaniawiriatuxujuwijawa, bedeliowënë naenani. Xainanua pexaniawiria ónice-ibowënëjawanë. 13 Itsamenemaxërana pijinia pewënë Gihón. Bajarapamene najetaruca Cus nacua-irajawa. 14 Itsamenemaxërana pijinia acueyabi mene pewënë Tigris. Bajarapamene najetaruca Asiria nacuayabereca. Itsamenemaxërana pijinia cuatro mene pewënë Éufrates.
15 Jehová Dioso nuta pebi pabijawata, Edén nacuapijipabi, bajaraponë penacuenebaponaponaenexa, pe-ewetsinexa-ata. 16 Nexata, Jehová Dioso yajawanajumecopatanuta mapacueniaje:
—Xanepana nexaenexa daxitawirianaecuai peyajawanubenaenaejawanë bajarapapabijawata. 17 ¡Itsiata baitsi jane, pëtsa xaneme ponaecuaito! Itsa xaejitsipame natoyapëtaejitsipame xua pexaniacuene, xua-ata pibisiacuene, tsipaji pamatacabi itsa xaejitsipame bajaraponaecuaito, nexata pepacuene tëpaejitsipame —jai Jehová Dioso pebijawabelia.
Dioso pexanaejawa petiriwa, yabara peliwaisi
18 Nexata, xuacujinae Jehová Dioso siwajamatabëjumaitsi Adán yabara: «Apoxanepanae caenë pebi peponaponaejawa. Nexata, to-exanaenajë pejamatabëcueneliwaisijëpaewatsi peyanabiwanexatsi», siwajamatabëjai bajaraponë. 19-20 Bajarapacuenia petiriwa pexanaewajënaeya, Jehová Dioso daxita pamonae exana baja atsatomita matatsënëpijiwinexa, pepunaewinexa-ata, bajarapamonae tocapona pebijawabelia petsitajëtsinexa, pewënërubinexa pijawiria canacujitsia. Nexata jane baja, Adán wënëruba. Bajarapawënëanëcuenia canacopata pacuenia wënëruba. Itsiata baitsi jane, caenëyo-ata bajarapamonaeyajuwënënë Adán apojamatabëcueneliwaisijëpaetsi xaniawaetsia. Apojamatabëcueneyawenonaetsinua peyanabijiwiyocueniatsi. 21 Bajaraxuata, Jehová Dioso tocopata pemajitsinexa pebi ayaicuenia. Pemajitsijawata, nexata yajuwënëyenesijutatsi. Peyenesijutsicujinae, bajaraponë icatsia xuacujinae, yenewajënë-acata. 22 Jehová Dioso peyenejutsisito pebijawawerena, bajarapayenesito exana petiriwa. Bajaraxuacujinae, tsitajëta pebijawabelia. 23 Itsa bajaraponë tane bajarapowa, jumaitsi:
—Pepacuene mapowaje tayajunusitowa, tayajunuwitowa-ata. Nexata, wënërubianajë petiriwa,d tsipaji Dioso exana pebijawawerena —jai Adán.
24 Bajaraxuata, pebi wecuapitsapaena paxa, pena-ata, pepitsinexa pijawa, pebarëponaponaenexa saicaya pijabota, bajarapacuenia anijajiwi-atabeje penaexanaenexa becaejiwi,e becaeperabëto-ata.
25 Abaxë bajarapajiwibeje jumasa ponaponabeje. Itsiata, aponaitaxutua-aurabeje bajarapamatacabita.