Adán, Evabeje, apojumecowënëtsibeje Dioso
3
Jehová Dioso daxita pexanaewi matatoxenetsia mapanacuataje unupijiwiwecuaje, bitso jomo pejamatabëcuenecaëjëpaenëtsi peyamaxë-itojorobijawa. Itsamatacabi bajarapajomo jumaitsi petiriwajawabelia:—¿Cowë Dioso pacajumaitsibeje panecuaixaeyaniwabeje ponaenë nubena pabita? —jai jomo.
2 Nexata, petiriwa jumecanawiata:
—Caëjëpa pataxaejawabeje daxitawirianaecuaitonë. 3 Jane baitsi, caenae apopanetocopatsibeje patacuaixaenexabeje; ponae pabituatuajëta nuca. Dioso panejumaitsibeje: «Itsa paxaejitsipamebeje, itsa pajayatsipamebejenua, nexata patëpaejitsipamebeje», panejaibeje Dioso —jai petiriwa.
4 Nexata, jomo jumaitsi petiriwajawabelia:
—Jemajai raja. Apopatëpaemëbeje tsipae. 5 Dioso raja yapëtane xaniawaetsia pamatacabi bajaraponaecuaito itsa paxaejitsipamebeje, nexata pajamatabëcuenejëpaejitsipamebeje Dioso paneyapëtaejawatabeje xua pexaniacuene, xua pibisiacuene-ata —jai jomo.
6 Nexata, petiriwa itsa tane bajaraponaecuaito, tsitapexaniacuaitotsi. Bitso tsitaxanepanatsi baja pexaenexa. Jitsipanua pejamatabëcuenejëpaenexa Dioso, peyapëtaewa penaexanaenexa. Nexata, bajarapowa bajaraponaecuaito ucuta baja pexaenexa. Xane baja. Bajaraxuacujinae, narajuta pamonaa penaxaenexa. Bajaraponë-ata nexata naxane baja. 7 Nexata, bajarapaepatota bajarapajiwibeje matapania nayapëtanebeje pejumasajawabeje. Aurabeje. Nexata, bajarapajiwibeje natsijumajorocabeje higueranaebaxumi penaperabëcaranatsinexabeje.
8 Nexata, caniwiyojawabelia, ajena juameto tabujuniya, paepatota jowibo tsabiabanucae, bajarapaepatota jumetanebeje Jehová Dioso peponaponaejawa pabijawata. Nexata, bajarapajiwibeje cujinaetabijirawabeje, penamatayabinexabeje naejawanëbëxëpanata, ponaenë nubena pabita. 9 Nexata, Jehová Dioso junata pebi. Jumaitsi:
—Adán, ¿detsa jota nucame? —jai.
10 Nexata, pebi jumecanawiata:
—Cajumetanetsi rabaja picani neponaponaejawa pabijawata. Xanë raja cacujunawatsi, tsipaji jumasanë. Bajaraxuata, namatayabajë —jai.
11 Nexata, Dioso yanijoba pebijawabelia:
—¿Jipatsa cayapëtaeya-exana jumasa neponaponaejawa? ¿Tsipaji tsaja xamë xaneme ponaecuaito ca-itawetatsi nexaeyaniwa? —jai Dioso.
12 Nexata, pebi jumecanawiata:
—Papetiriwa nerajutame taneyanabiwanexa, bajarapowa raja nerajuta bajarapacuaito. Nexata, xaniji —jai Adán.
13 Nexata, Jehová Dioso icatsia yanijoba petiriwajawabelia:
—¿Dexuajitsia bajaraxua exaname? —jai.
Nexata, bajarapowa jumecanawiata:
—Jomo raja neyamaxë-itojoroba. Bajaraxuata, xaniji bajaraponaecuaito —jai petiriwa.
14 Nexata, Jehová Dioso jumaitsi jomojawabelia:
—Bajaraxua nexanaexae, cananeconitsia-exanaenatsi mapacueniaje: Daxitawiriawi matatoxenetsia mapanacuataje xamë bitso nenabejiobitsinë tsane. Ajena pamatacabijawaweliacujinae, necotobëxëtab nenarobobocaenë tsane. Nexata, atsapërë pecatsicuaibojonenë tsane daxitamatacabijawabelia paepatowajëto asaëmë tsaponaponae. 15 Nexata, pacacopatsianatsibeje panena-itoyacuenia paneponaponaenexabeje petiriwabeje, bajarapijinia pacuenia, panemomoxibejejawabelia-ata. Petiriwajawawerena pijinia pepitsapaenëc itsamatacabi camatatsapanataxuabiana. Bajarapijinia pacuenia, xamë-ata itsamatacabi bajaraponë taxusalibësinianame —jai Jehová Dioso jomojawabelia.
16 Nexata, icatsia Jehová Dioso jumaitsi petiriwajawabelia:
—Xamë catocopatsianatsi ayaiwixae nenawixaetaewanexa pamatacabi xainaename nexi. Nenawixaetaecuenia exanaename nexinacueto. Itsiata baitsi jane, nejitsipaejamatabëcuene cajamatabëcuenecaponaena amonajawabelia. Bajaraponënua canamatacaitorobaponaponaena. Amona nejamatabëcuene-ewetsiwanua tsane, pacuenia amona ca-itoroba nejumecowënëtabiabinexa —jai Jehová Dioso petiriwajawabelia penaneconitsixae.
17 Icatsia, xuacujinae jumaitsi pebijawabelia:
—Nijawa nejumecowënëtsixae, nexaexaenua ponaecuaito picani apocatocopatsitsi nexaenexa, nexata bajarapajamatabëcuene ira ajenaconoxaeta bitso pibisiacuenia nacopatsiana. Nexata, ayaicuenia nenacuenebinë tsane irajumawereca, nexainaenexa nexaejawa daxita neponaponaematacabibeje mapanacuataje. 18 Irajawata pitsapaena daxita pejuwicuene piabejejawanë, pe-ejuwinaenënua. Nexata, xamë nexaenënua tsane daxitawiria unupijinaecuaijawanë. 19 Nexata, nenacuenebinë tsane ayaicuenia. Nenajanexuabinëcuenianua nexaenë tsane nexaejawa. Icatsia, nenawiatsinë tsane netëpaejawata irabelia. Pacuenia ca-exanatsi atsatomita, bajarapacuenia icatsia nawiatsianame atsatonexa, caewëalia atsato nenaexanaenexa —jai Dioso pebijawabelia penaneconitsixae.
20 Adán wënëruba pijawa Eva, tsipaji bajarapowa daxitajiwi penanexa tsaponaponae. 21 Jehová Dioso to-exana penaxatatsijawanexabeje dajubibocotomita. Nexata, bajarapajiwibeje Jehová Dioso jumaxatatatsibeje dajubibocotomi. 22 Xuacujinae, Jehová Dioso najumaitsi: «Jiwi ajenaconoxaeta baja canaëjëta pacuenia waxaitsi canaëjëtatsi. Yapëtane baja xua pexaniacuene, xua-ata pibisiacuene. ¡Pëtsa saya pona pe-ucutsinexa, pexaenexanua, ponaecuaito wëna-asaë tsaponaponaejitsia daxitamatacabijawabelianexa, tsipaji ajenaconoxaeta caëjëpatsi bajaraponaecuaito pexaenexa pewëna-asaëtsaponaponaenexa! Apoxanepanae bajarapacuenia pexanaejawa», najai JehováDioso.
23 Bajaraxuata, Jehová Dioso capitsapa pebi, pijawa yajawa, Edén nacuapijipabiwecua, bajaraponë penacuenebia-exanaenexatsi pe-ubijawanë irajumawereca, pa-irayajuwënëjawata exanatsi bajaraponë. 24 Pecapitsapaecujinaetsi bajarapajiwibeje, pemutowetsinad pabijawata Jehová Dioso nuba ángelewi querubinewi.e Bajarapijinia pacuenia, ruta espada, bitso pitatsajawijawa, peyacaranatsicuenia pabi matatoyorotsia penajetarucaenexa, pexaeyaniwabeje ponaecuaito picani wëna-asaëtsaponaponaejitsiabeje daxitamatacabijawabelianexa.