Caín, Abel-beje, yabara peliwaisi
4
Nexata, Adán pijawa pimoxoyobicujinae, Eva nacoxita. Nexata, bajarapowa exana pebinëyo. Bajaraponëyo yabara Eva jumaitsi: «Ajenaconoxae baja xanë xainajë pebinëyo. Jehová pejitsipaecuenia nerajuta bajaraponëyo», jai. Bajaraxuata, bajaraponëyo wënëruba Caín.a 2 Bajaraxuacujinae, bajarapowa icatsia nacoxita Abel-nexa, pejuyapijinë Caín. Nexata, penaweretsicujinaebeje, Abel naexana pewetsinë oveja. Caín pijinia naexana penacuenebinë pe-ubicuene irajawata.3 Bajaraxuacujinae, itsamatacabijawabelia Caín capata petajuitsinexa Jehová pewënëta pe-ubiyajuwënëjawa. 4 Bajarapijinia pacuenia, Abel tocapata petajuitsinexa copiayapijicoxinëyo oveja pebito, bitso pexanianasitsinë, itsadajubinë penasitsito yajawa. Nexata, Jehová siwajamatabëcuenebarëyatsib Abel. Totanetsi pexaniacuenianua xua capata rajutsiaya petajuitsinexa. 5 Itsiata, Caín aposiwabarëyatsi. Xaniawaetsia apototaetsinua xua capata petajuitsinexa rajutsiaya. Nexata, bajarajota Caín bitso anaepana. Pibisiajamatabëcuene najamatabë-itajëta Jehovájawabelia pitabara-anaepanaejawata.
6 Nexata, Jehová jumaitsi Caín-jawabelia:
—¿Detsa xuajitsia bitso anaepaname? ¿Detsa xuajitsia pibisiajamatabëcuene najamatabëcuene-itajëtame? 7 Pexaniacuene itsa exanaejitsipame casiwabarëyatsi tsipae. Nexata, cacuenecaëjëpaejitsipa nenaitabarayotsijawa, tacasiwajamatabëcuenebarëyaxae nijapibisiajamatabëcuenewecua. Itsiata, itsa apo-exanaemë tsane, nexata pibisiacuene bitso xamë cawajënae-eweta pecajamatabëcuene-amoneyabijawanexa. Xamë picani itsiata, cacuenecaëjëpa bajarapajamatabëcuene nejamatabëcuene-amoneyabijawa, bitso pibisiacuene nexanaeyaniwa —jai Jehová Caín-jawabelia.
8 Nexata, itsamatacabi Caín junata pejuyapijinë Abel, peponaenexabeje petusatojawabelia. Nexata, bajarapajiwibeje itsa najetaruca petusatojawa, Caín jane baja, waetaba pejuyapijinë Abel pebeyaxuabinexa. Nexata baja, beyaxuaba.
9 Nexata, Jehová xuacujinae yanijoba Caín-jawabelia:
—¿Jica nexata nejuyapijinë Abel? —jai Jehová.
Caín jumecanawiata:
—Itsabo. Xanë apoyapëtaenë. ¿Xanë tsaja nexata bajaraponë ewetabiabajë? —jai.
10 Nexata, Jehová jumaitsi:
—¿Detsa xuajitsia bajarapitsicuene exaname? Apoxanepanae cajena. Pajana janacayajatame nejuyapijinë irajumawereca, bajarapajana tataejawata picani najamatabëxainajë tayamatamotsijamatabëcuene. 11 Ajenaconoxaeta, nexata xamë naneconitsiaya ponaponaename. Nexata, pitsapaename mapa-irawecuaje, pa-irajawata nejuyapijinë janacayajatame, ponë beyaxuabame. 12 Nacuenebi-atamë tsane irajawata, apocatonaxaniabi tsane ne-ubijawanë pexaniacuenia. Apocatonacuaitsinua tsane. Xamë ponaponaename saya daxitanacuajawa nacuera-ewetsinejewamë —jai Jehová.
13 Nexata, Caín jumecanawiata Jehovájawabelia:
—Xanë bitso bajarapaneconiwajëto aponecuenecaëjëpae tajamatabëcuenesaënexa tawajënaeyabelia, paneconiwajëto netocopatame. 14 Ajena baja necapitsapame mapa-irawecuaje. Nexata, xanë ponaponaenajë daxitanacuajawa xamëwecua nacuera-ewetsinejewanë. Nexata, pajiwi necaxitajarabiana, bajarapajiwi nebeyaxuabiana —jai Caín.
15 Jehová jumecanawiata Caín-jawabelia:
—Pajiwiyo cabeyaxuabijitsipa, nexata bajarapajiwi pepacuene naneconitsipa siete xuabeje pematatsënëa. Bajarapacuenia naneconitsia-exanaenajë pecabeyaxuabijiwi —jai.
Nexata, Jehová tsirutatsi itsacuenejawa Caín penayapëtaenexa, pajiwi caxitajarabatsi pebeyaxuabiyaniwatsi. 16 Caín nexata bajarapacuenia wecuapona itsajota Jehová barëcuaicuaijaitsi. Nexata, bajaraponë ponapona Nod nacuajawata, Edén ira pemutuabereca.
Caín pemomoxi, yabara peliwaisi
17 Caín pijawac pimoxoyobicujinae, nexata bajarapowa nacoxita. Exana pexënatonëyo. Bajaraponëyo wënëruba Enoc. Xuacujinae, Caín bajarajota exaneta tomarayo. Bajarapatomarayo wënëruba Enoc pexënato pewënëcuenia. 18 Nexata, Enoc pexënato xaina, pewënë Irad. Irad pijinia pexënato xaina, pewënë Mehujael. Mehujael-ata pexënato xaina, Metusael. Metusael pijinia pexënato xaina, pewënë Lamec. 19 Lamec xaina anijawabeje pijawabeje. Caewa pewënë Ada. Itsawa pijinia pewënë Zila. 20 Adajawabelia pijinia xaina pexënato, pewënë Jabal. Ponëjawawerena pitsapa pamonae pewaraparutsiwi carpaboxita, pewetsiwi vaca, oveja, chivo-ata. 21 Jabal xaina pejuyapijinë, pewënë Jubal. Bajaraponëjawawerena pitsapa bitso peyapëtaewi peracatsijawa arpa, piobijawanua pijinia flauta. 22 Pijinia Zila, itsawa Lamec pijawa, to-itajëta pexënato Tubal-caín. Bajaraponëjawawerena pitsapa pecanacuenebiwi broncenanitonë, hierronanitonë-ata. Tubal-caín xaina pejuyapijiwa, pewënë Naama.
23 Nexata, itsamatacabi Lamec jumaitsi pijawabejejawabelia, Ada, Zilabejejawabelia:
—¡Panejumetaemabeje xua pacatsipaebijitsiatsibeje! Ajena raja beyaxuabajë pewëjëato; ponë nebijiapaita tanebejawata. 24 Nexata, itsa Caín yabara jumaitsi: «Pajiwi beyaxuabatsi naneconitsiaya yamatamotsianatsi siete xuabeje pematatsënëa», itsa yabara jai, xanë pijinia itsa nebeyaxuabiana, nexata bajarapajiwi naneconitsiaya neyamatamotsiana setenta y siete xuabeje pematatsënëa —jai pijawabejejawabelia.
Adán, Evabeje, itsanë pexënato pexainaejawa, yabara peliwaisi
25 Adán xuacujinae, icatsia pijawa imoxoyoba. Nexata, bajarapowa icatsia, bajaraxuacujinae, nacoxita. Toxaina pexënato. Bajaraponëyo yabara Eva jumaitsi: «Dioso nerajuta itsanacueto Abel pejamatabëcuene, ponëmi beyaxuaba Caín», jai. Bajaraxuata, bajaraponëyo wënëruba Set.d
26 Itsamatacabi bexëajawabelia Set-ata xaina pexënato, pewënë Enós. Bajarapamatacabianëjawa jiwi taxuxuaba pewajëcaejawa Jehová pewënëta peyawenonaenexatsi, pejumecowënëtsijawanexanua petonajumecopatsiliwaisitsi.