Itsamonae Adán pemomoxi Caín pemomoxiwecua
5
Marapamonaeje Adán-jawawerena penaexanaponaewi. Itsa Dioso exana jiwi, exana nacuenecataeya. 2 Dioso exana pebi, petiriwa-ata. Nexata, pexaniacuenia cuenecaëjëpaeya-exanatsibeje, penayawiataponaenexabeje pewajënaeyabelia. Bajarapajiwibeje Dioso wënëruba jiwi.a3 Adán itsa xaina ciento treinta pawaibeje, bajarapawaita naexana pexënato Set. Ponë naexana, pijamonaejiwibeje daxitacuenejawalia pejamatabëcueneliwaisijëpaenë. 4 Bajaraxuacujinae, Adán ponapona ochocientos pawaibeje pematatsënëa. Xainaponanua itsamonae pexi, pebijiwi, petiriawi-ata, bajarapawainëjawalia. 5 Nexata, Adán itsa xaina novecientos treinta pawaibeje, bajaraxuacujinae, bajaraponë tëpa bajarapawaijawalia.
6 Set pijinia itsa xaina ciento cinco pawaibeje, bajarapawaita naexana pexënato Enós. 7 Bajaraxuacujinae, bajaraponë Set ponapona ochocientos siete pawaibeje pematatsënëa. Bajarapawainëjawalia xainapona pexib pebijiwi, petiriawi-ata. 8 Nexata, bajaraponë, daxitata, asaë tsaponaponae novecientos doce pawaibeje. Bajaraxuacujinae, tëpa.
9 Enós itsa xaina noventa pawaibeje, bajarapawaita naexana pexënato Cainán. 10 Bajaraxuacujinae, Enós ponapona ochocientos quince pawaibeje pematatsënëa. Itsamonae bajarapawainëjawalia xainapona pexi, pebijiwi, petiriawi-ata. 11 Nexata, Enós ponapona novecientos cinco pawaibeje. Bajarapawaijawalia bajaraponë tëpa.
12 Cainán itsa xaina setenta pawaibeje, bajarapawaita naexana pexënato Mahalaleel. 13 Bajaraxuacujinae, Mahalaleel penaexanaecujinae, Cainán ponapona ochocientos cuarenta pawaibeje pematatsënëa. Bajarapawainëjawalia xaina itsamonae pexi, pebijiwi, petiriawi-ata. 14 Nexata, Cainán novecientos diez pawaibeje asaë tsaponaponae. Bajarapawaita bajaraponë tëpa.
15 Mahalaleel itsa xaina sesenta y cinco pawaibeje, pexënato naexana Jared. 16 Bajaraxuacujinae, bajaraponë Mahalaleel ponapona ochocientos treinta pawaibeje pematatsënëa. Bajarapawainëjawalia xaina itsamonae pexi, pebijiwi, petiriawi-ata. 17 Nexata, bajaraponë, Mahalaleel, ponapona ochocientos noventa y cinco pawaibeje. Bajarapawaita bajaraponë tëpa.
18 Jared itsa xaina ciento sesenta y dos pawaibeje, bajarapawaita naexana pexënato Enoc. 19 Bajaraxuacujinae, Jared ponapona ochocientos pawaibeje pematatsënëa. Bajarapawainëjawalia xaina itsamonae pexi, pebijiwi, petiriawi-ata. 20 Nexata, Jared asaë tsaponaponae novecientos sesenta y dos pawaibeje. Bajarapawaita bajaraponë tëpa.
21 Enoc itsa xaina sesenta y cinco pawaibeje, bajarapawaita pexënato naexana Matusalén. 22 Enoc raja ponapona Dioso pejitsipaecuenia. Nexata, Matusalén penaexanaecujinae, Enoc ponapona Dioso pejitsipaecuenia trescientos pawaibeje pematatsënëa. Bajarapawainëjawalia xaina itsamonae pexi, pebijiwi, petiriawi-ata. 23 Nexata, bajaraponë asaë tsaponaponae trescientos sesenta y cinco pawaibeje. 24 Enoc peponaponaexae Dioso pejitsipaecuenia, nexata itsamatacabi bajaraponë ajibi tsarucae, tsipajiDioso baja caponatsi.
25 Matusalén itsa xaina ciento ochenta y siete pawaibeje, bajarapacujinaeta naexana pexënato Lamec. 26 Bajaraxuacujinae, Matusalén ponapona setecientos ochenta y dos pawaibeje pematatsënëa, penaexanaecujinae pexënato Lamec. Xainapona orijibia itsamonae pexi, pebijiwi, petiriawi-ata bajarapawainëjawalia. 27 Nexata, Matusalén asaë tsaponaponae novecientos sesenta y nueve pawaibeje. Bajarapawaita bajaraponë tëpa.
28 Lamec itsa xaina ciento ochenta y dos pawaibeje, bajarapawaita naexana pexënato. 29 Bajaraponëyo yabara jumaitsi: «Jehová bajayata naneconitsiaya pibisiacuenia copata ira, bajaraxuata waxaitsi namatawenonatsi ayaicuenia wajanacuenebijawa waja-ubijawanë. Itsiata baitsi jane, mapanacuetonëyo nacanacuera-ewetsia-exanaena», jai. Bajaraxuata, bajaraponëyo wënëruba Noé.c 30 Noé penaexanaecujinae, Lamec ponapona quinientos noventa y cinco pawaibeje pematatsënëa. Orijibia, itsamonae xainapona pexi, pebijiwi, petiriawi-ata. 31 Nexata, ponapona setecientos setenta y siete pawaibeje. Bajarapawaita bajaraponë tëpa.
32 Noé itsa xaina quinientos pawaibeje, bajarapawainëjawalia xainapona pexi acueyabi ponëbeje: Sem, Cam, Jafet. Bajaraponëbeje raja Noé pexi.