GÉNESIS 6

Mapanacuapijiwije acuenebeje tsaponae Dioso pitabarata

Pamatacabijawa jiwi yacaëjëpapona daxita mapanacuajawa, xainapona bajarapamonae pexënatowaxi pexaniawaxi. 2 Bajarapamatacabijawa-ata jinawanapa pijinia Dioso pexi. Nexata, bajarapamonae Dioso pexi itaxutuajinapona bajarapapetiriawi, tsipaji bajarapapetiriawi pexaniawaxi. Nexata, bajarapapetiriawijawabelia nacojiobapona; powaxijawabelia tsitaxanepanatsi. 3 Itsiata baitsi jane, Jehová bajarapamatacabijawa jiwi yabara jumaitsi: «Aponajamatabëcuenecataitsinë tsane tananeconitsia-exanaejawa jiwi. Nexata, apocopatsinë tsane mapamonaeje piasaëtsawanapaenexa daxitamatacabijawabelia, tsipaji saya bajarapamonae peperabëto pexainawanapaewi. Nexata saya, tocopatsianajë piasaëtsawanapaenexa ciento veinte pawaibejejawalia», jai.

4 Bajarapamatacabinua Dioso pexi nacojiobapona itsamonae pexënatowaxijawabelia, Dioso apopexijawabelia. Nexata, bajarapamonae pexi naexana piapiawi. Naexananua ayaijamatabëcuenewi, pecuene-aitatsacawinua. Bajarapamonae nexata bitso pewënëliwaisipitsapaewi be-ayaijamatabëcuenewicuenia bajarapaperujumatacabijawa.

5 Nexata, Jehová tane mapanacuataje bitso pinijineconi pewajënaeyabelia jiwi pibisiacuene pexanaejamatabëcuene. Jiwinua baja cajena pewajënaeyabelia pejamatabë-ëthëtota najamatabëxainabiaba ëpibisiacuene pexanawanapaenexa. 6 Nexata, bajarapamatacabita Jehová bitso tsi-atanetsi jiwi pijaneconi yabara. Nexata, najamatabëxaina ayaicuenia. 7 Nexata, bajaraPonë petsi-atanexaetsi, bajarapamonae yabara jumaitsi: «Xanë werebiabianajë daxita mapanacuapijiwije, pamonae xanë exanajë. Yajawawerebiabianajënua daxita pamonae-ata matatsënëwereca pejinawanapaewi, unupijiwi, dajubi, pamonae-ata pecotobëxëta penarobobocaewi, pepunaewi-ata. Bajarapamonae daxita xanë werebiabianajë. Picani aponetsixanepanae jiwi ta-exanaejawami. Jiwi itsa apo-exanaenë tsipae, neconi aponatsi-exanae tsipae xanëjawaberena», jai Jehová siwajamatabëcuenebëjaiya.

8 Itsiata, bajarapamatacabijawa Jehová siwajamatabëcuenebarëya Noé.

Noé nacueneba barcoxaneto

9 Mara paliwaisi Noépijinë yabara pijaliwaisije. Bajayata itsa ponapona mapanacuataje, bajaraponë Dioso pitabarata pexaniajamatabëcuenenë, jumecowënëtsiaya-ata ponapona. Daxita mapanacuata pejinawanapaewije matatoxenetsia bajaraponë, caenë, exanaponapona Dioso pejitsipaecuenia.

10 Noé xaina acueyabi ponëbeje pexi; mapamonaeje: Sem, Cam, Jafet.

11 Mapanacuapijiwije bitso pibisiacuene exanawanapa Dioso pitabarata. Belia, yacaëjëpa daxitanacuajawa bitso piabejecuene pexanawanapaejawa itsamonaejawabelia bejiobiataenejewa. Bajaraxuata, Dioso tsitapiabejenacuatsi daxitanacua, tsipaji mapanacuapijiwije bitso ajamatabëcuenebeje tsawanapae pewajënaeyabelia. 12 Dioso tane mapanacuapijiwije bitso pibisiacuene pexanawanapaejawa; bitso piabejecuene pejaitaponaejawa pexanawanapaenexa pewajënaeyabelia. 13 Bajaraxuata, Dioso itsa tane, nexata itsamatacabi jumaitsi Noéjawabelia:

—Najamatabëcueneweretajë raja tawerebiabijawa daxita mapanacuata pejinawanapaewije, jiwi pijaneconi yabara, tsipaji bitso wënëca pibisiacuene pexanaejawa mapanacuataje. Nexata, yajawawerebiabijitsianë daxitanacua. 14 Nexata, nacuenebianame pinijimoxaneto barco. Canacuenebianame pejanejaitablapanë, piatajatablapanë-ata. Exanaename peya-ënë-ucubimo. Catsanaenamenua pecatsanaenanitonëta pepënëwelia, pe-ënëwerena-ata, mera pejoneyaniwa. 15 Bajarapamo nacuenebianame mapacueniaje: Piapiajawa xainaena ciento treinta y cinco pametrobeje. Epatajërëtsialia xainaena pijinia veinte y dos pametrobeje epatua. Athëbëabetsia xainaena pijinia piapiajawatsia trece pametrobeje epatua. 16 Bajarapamoyenepanajawata, caenenia xainaeya-exanaename baupa. ¡Nexata, exanare acueyabi pa-irabejecuenia bajarapamo-ënëjawata athëbëabetsia! Caeventanabaupa pijinia rutsianame bajarapamopijiboyenepanajawata athëbëyo. Nexata, bajarapaventanabaupa xainaena epatuametro. 17 Bajarapitsimo barcoxaneto exanaename, tsipaji raja merata bubutsia-exanaenajë mapanacuaje daxitanacua, tawerebiabinexa daxitacuenewiriawi, matatsënëta pejinawanapaewi. Nexata, daxita tëpaena. 18 Jane baitsi itsiata, xanë xamëjawabelia canaliwaisicajonejitsiatsi tacabarëcapanepaenexa, daxita nexi yajawa, nijawa-ata, necopenawaxi yajawa. Nexata, paxamë pajonename bajarapabarcoxanetojawabelia, bajarapacuenia panepanepaenexa. 19 Bajarapijinia pacuenia, cajonename bajarapabarcoxanetojawabelia caewiria canacujitsia matatsënëwereca pejinawanapaewi, bajarapamonae neyajawapanepaenexa xamë. Caewiria canacujitsia tsaponae cajonename anijanëbeje, caenë pebito, caenë pesorowato yajawa. 20 Nexata, xamë yajawajonename pepunaewi-ata caewiria canacujitsia, bajarapacuenianua pecotobëxëta penarobobocaewi irajumawereca caewiria canacujitsia. Nexata, cajonename anijanëbeje tsaponae, caenë pebito, caenë pesorowato yajawa, jamatejema bajarapamonae pepanepaenexa, bajarapacuenia penacopabinexa mapanacuataje pebubutsicujinae. 21 ¡Caetuataponarenua daxitawiria pexaejawa, nexaniawaetsinexa bajarapamo-ënëta, jamatejema panexainaenexa panexaejawa, paxamë-ata, bajarapacuenia pamonae-ata matatsënëwereca pejinawanapaewi! —jai Dioso Noéjawabelia.

22 Nexata, Noé exana daxita pacuenia Dioso tonajumecopatatsi pe-exanaenexa.