Pacuenia Dioso bubutsia-exana mapanacuaje, yabara peliwaisi
7
Bajaraxuacujinae, barcoxaneto peweretsicujinae, icatsia Jehová jumaitsi Noéjawabelia:—Jonema jane baja, barcojawabelia daxitanijamonae yajawa, tsipaji daxita pejinawanapaewiwecua mapamatacabijawa, xamë caenëmë nejumecowënëtsiaya ponaponame tajitsipaecuenia. 2 Cajonename catorce ponëbeje tsaponae pamonae ta-itapetsiwi itsadajubiwiwecua, caewiria canacujitsia siete ponëbeje pebitonë, siete pijinia papesorowatobeje. Itsiata baitsi jane, pamonae apota-itapetsiwi, cajonename saya anijanëbeje; caenë pebito, caenë pesorowato yajawa caewiria canacujitsia. 3 Nexata, yajawapitsianame pepunaewi ta-itapetsiwi, caewiria canacujitsia siete ponëbeje pebitonë, siete pijinia ponëbeje pesorowabi, bajarapamonae jamatejema pepanepaenexa, penacoxiwiatsinexa mapanacua tawerebiabicujinaeje, 4 tsipaji siete pamatacabibejecujinae copatsianajë mapanacuataje perunaejawa emaxaneto cuarenta pamatacabibeje, cuarenta pamerawibeje yajawa, bajarapacuenia tawerebiabinexa baja daxitacuenewiria tacobecowëwi, pamonae jinawanapa mapa-irataje —jai Jehová.
5 Noé baja exana daxita pacuenia Jehová tonajumecopatatsi.
6 Pacujinaeta mapanacua bubutaje, Noé xaina seiscientos pawaibeje. 7 Nexata, Noé barëjunua pexi, pijawa-ata, pecopenaxi acueyabi powabeje yajawa, pewecuapanepaenexa bajarapa-ayaiwajubuaxaneto. 8 Yajawacajunua daxitacuenewiriawi matatsënëwereca pejinawanapaewi, pepunaewi-ata, Dioso pitapetsiwi itsamonaewecua, bajarapijinia pacuenia, daxitacuenewiriawi Dioso apopitapetsiwi-ata, pamonaenua pecotobëxëta penarobobocaewi. 9 Bajarapamonae yajawajunua Noé barcoxanetojawabelia, anijanëbeje tsaponae caewiria canacujitsia, caenë pebito, caenë pijinia pesorowato tsaponae, pacuenia Dioso itorobatsi.
10 Dioso petsipaebicujinae barcojawabelia peyajawajonenexa, siete matacabita copiapata jane baja, emaxaneto perunaejawa irajumawereca piawajubuajawanexa. 11 Pawaita Noé xaina seiscientos pawaibeje, cotocaewipijijuametotaa diecisiete matacabijawata, bajarapamatacabita jane baja, taxuxuaba piniji-emaxaneto perunaejawa. Bajarapijinia pacuenia, irabëxëpanawetsina meraxanetonë pitsaparubena menejawa. 12 Cuarenta pamatacabibeje, cuarenta pamerawibeje yajawa emaxaneto tsanucae daxitanacuajawa.
Noé pamonae yajawajunua barcoxanetojawabelia
13 Nexata, bajarapamatacabita Noé yajawajunua barcoxanetojawabelia acueyabi ponëbeje pexi, Sem, Cam, Jafet, acueyabi pijinia powabeje pecopenaxi, Noé pijawa-ata yajawa. 14 Bajarapamonae yajawajunua daxitawiriawi pamonae Dioso pexanaewi, daxita unupijiwi, dajubi-ata caewiria canacujitsia, daxita pamonae pecotobëxëta penarobobocaewi, bajarapacuenia pepunaewi-ata. 15 Nexata, daxita bajarapamonae Noé yajawajunua barcojawabelia anijanëbeje tsaponae, caewiria canacujitsia Dioso pexanaewi. 16 Daxita pamonae pata, jonepona caenë pebito, caenë pesorowato yajawa tsaponae caewiriawi canacujitsia, pacuenia Dioso itorobatsi. Nexata, bajaraxuacujinae jane baja, Jehová barëyabaupaxatatatsi bajarapabarcoxaneto-ënëalia.
17 Nexata, emaxaneto tsanucae cuarenta pamatacabibeje. Bajarapacuenia jane baja, itsa bubutanajetaruca, nexata barcoxaneto cotananajetaruca irajumawereca. 18 Caematacabi canacujitsia bepijiayo mera awajubua tsanajetarucae, nexata bajarapacuenia pinijibarco yacotanapona pewajënaeyabelia. 19 Bajarapacuenia itsa awajubua tsanajetarucae, daxita petsutonëmi pebubutsijawata matapëcaewapona. 20 Daxita piapiatsutonëmi bitso itsatsutonëwecua pematapëcaewicujinae, orijibia pematatsënëa awajubua siete pametrobeje athëbëabetsia. 21 Nexata, bajarapacuenia baja, tëpa daxitajiwi, pamonae jinawanapa mapanacuataje, daxita pepunaewi, daxita pamonae matatsënëwereca pejinawanapaewi, pacuenia unupijiwi, dajubi-ata, pamonae-ata pecotobëxëta penarobobocaewi irajumawereca. 22 Daxita pamonae penajumalinotsiwicuenia piasaëtsawanapaewi, mapanacuata irajumawereca pejinawanapaewije, bajarapamonaemi tëpa. 23 Bajarapacuenia Dioso werebiaba daxita mapanacuajawata pejinawanapaewije, jiwi, unupijiwi, dajubi, pecotobëxëta penarobobocaewi, pepunaewi-ata. Itsiata baitsi jane, caenë Noé pijamonae barëpanepa, pamonae yajawajunua barcojawabelia. Daxita pebarëjonewi, bajarapamonae barë-asaë. 24 Daxita apopejonewi barcojawajawabelia bubuna merata, tsipaji bejamatabëcuene ciento cincuenta pamatacabibeje mera awajubua tsanucae daxitanacuajawa.