Éxodo
Israel-pijinë pemomoxi pepitsapaejawa Egipto nacuawecua
Egipto nacuapijiwi bejiobia-exanaponapona Israel-pijinë pemomoxi
1
Mapamonaeje Jacob-pijinë pexi pewënëanë, peyajawajonewi bajaraponë Egipto nacuajawabelia. Jacob itsawënë pijinia Israel. Caenë canacujitsia bajarapamonae pexi yajawa najetarubena pejinawanapaenexa Egipto nacuajawatalia. 2 Jacob-pijinëa pexi mapamonaeje: Rubén, Simeón, Leví, Judá, 3 Isacar, Zabulón, Benjamín, 4 Dan, Neftalí, Gad, Aser. 5 Bajarapamonae Jacob-pijinë pexi tsaponaerena. Daxita pamonae Jacob-pijinëjawawerena pepitsapaponaewi, Egipto nacuayabelia pepatsiwi, namata-ëjëta setenta ponëbeje pemomoxi yajawa, tsipaji bajarapacujinaeta pexënato, José, pexi yajawa baja cajena, ponapona Egipto nacuatalia paxa patsinejewalia.6 Bexëajawabelia José tëpa. Bajarapacuenia pijamonae-ata, daxita pamonae Jacob-pijinë peyajawapatsiwi Egipto nacuajawabelia, bajarapamonaemi tëpa bajarapanacuatalia. 7 Itsiata baitsi jane, bajarapamonaemi pemomoxi ayaibitsaëto nacopata. Nexata, bajarapamonae pexi xainapona. Orijibia, ayaibitsaëto naexanapona pewajënaeyabelia. Nexata, belia bajarapamonae Israel-pijinë pemomoxi naexana pinijibitsaëtoxaneto. Wënëcanua bitso bajarapanacua. Pinijibitsaëtoxae pewajënaeyabelia, bitso pinijicuenesaë xainabuatapona.
8 Bexëajawabelia Josépijinëmi petëpaecujinae, pijamonaemi-ata pecowëta, icatsia itsapejanayanacua-ewetsinë naexana Egipto nacuajawata. Bajaraponë-ata apoyapëtae Josépijinëmi. Nexata, Egipto pepopeyanacua-ewetsinë Israel-pijinë pemomoxi yabara jumaitsi peyajawanacuenebiwijawabelia:
9 —¡Panejumetaema! Israel-pijinë pemomoxi waxaitsiwecua bitso ayaibitsaëto naexanapona pewajënaeyabelia. Bajarapacuenianua bitso pinijicuenesaë xainapona. 10 Nexata, waxaitsi bajarapamonae yabara yapëtaeya besiwacanaëjëtatsi, wajacuenecaranatsinexa ayaibitsaëtoyaniwa. Belia, cuenecaëjëpaejitsipatsi wajanacabarënawajabitsaëtsinexa, itsa naliwaisicajunua itsamonaejawabelia wajanacabarënabenexa, bajarapacuenia wajanacawecuapitsapaenexa mapanacuawecuaje —jai Egipto nacua pewetsinë peyajawanacuenebiwijawabelia.
11 Bajarapacuenia pejumaitsicujinae, Egipto nacuapijiwi itapeta itsamonae pijawiriayajuwënëwi penamatacaitorobiwinexa penacuenebijawata. Nexata, bajarapapenamatacaitorobiwi Israel-pijinë pemomoxi nacuenebia-exanabiaba ayaicuenia. Bejiobia-exanabiabanua penacuenebijawata. Bajarapamonae nacuenebia-exanatsi anijatomaraxanetobeje, itsajota faraónb caetuatsijitsia daxitacuene pecobecowë. Bajarapatomarabeje pewënë Pitón, Ramesés tomarabeje. 12 Itsiata baitsi jane, bajarapamonae bitso pibisiacuenia bejiobia-exanaponae-atatsi tsiquiribitsaëtoyo penacopataponaenexa picani, caranata, orijibia ayaibitsaëto pewajënaeyabelia tsanajetarubenae. Nexata, Egipto nacuapijiwi bitso cujunawapona Israel-pijinë pemomoxi.
13 Nexata, bajarapacuenia petaexae, amoneya bitso nacuenebia-exana pibisiacuenia Israel-pijinë pemomoxi. Asaëya itorobabiaba penacuenebinexa. 14 Nexata, bajarapamonae bitso jamatabëcuenebëjaiya-exanatsi penacuenebia-exanaejawatsi. Bajarapamonae nacuenebia-exanabiabatsi atsata pebacamësic pematajërëabijawanë pexanaenexa adobejawanë. Nacuenebia-exanabiabatsinua wayafuabelia, panacuenebicuene xaina. Nexata, bajarapacuenia Israel-pijinë pemomoxi itsa nacuenebia-exanabiabatsi, bitso nacueratsiaya nacuenebabiaba.
15 Bajarapamatacabijawa anijawabeje, Sifra, Fúabeje, ya-ewetabiababeje penacoxitsiwi pexanaematacabinexa Israel-pijinë pemomoxipijipetiriawi. Nexata, Egipto nacua pewetsinë itoroba bajarapowabeje pecoxibeyaxuabaponaenexabeje Israel-pijinë pemomoxi pebinëxi penaexanaecujinae. Bajarapapetiriwabejejawabelia faraón jumaitsi:
16 —Pamatacabi paxamëbeje pa-ewetabiabianamebeje pexanaejawa hebreopijipetiriawi,d nexata panaitaxutoca-ewetabiabianamebeje penaexanaejawa pejewaxi. Nexata, itsa petiriwayo naexana, pacopatabiabianamebeje piasaënexa. Itsa pijinia pebinëyo naexana, nexata pabeyaxuababiabianamebeje —jai Egipto nacua pewetsinë.
17 Itsiata baitsi jane, bajarapowabeje asiwaya yaiyatanebeje Dioso. Nexata, pacuenia itorobatsibeje Egipto nacua pewetsinë, itsiata bajarapowabeje apo-exanaebeje. Nexata, apobeyaxuabaponaebeje pebinëxi. Copataponabeje piasaënexa. 18 Nexata, xuacujinae Egipto nacua pewetsinë junatsia-exanatsibeje peyanijobinexatsibeje pecuene yabara. Jumaitsitsibeje:
—¿Detsa xuajitsia bajarapacuenia pa-exanaponaponamebeje? ¿Dexuajitsia paxamëbeje pacopataponamebeje pebinëxi piasaënexa? —jai faraón.
19 Bajarapowabeje jumaitsi:
—Apopanecuenecaëjëpaebeje, tsipaji hebreopijipetiriawi apobe-Egipto nacuapijipetiriawi. Bajarapapetiriawi bitso asaë. Nexata, bepijiayo exanabiaba penacueto papatsinejewanëbeje patataenexabeje —jaibeje. 20-21 Nexata, bajaraxuata bajarapowabeje Dioso pexaniacuenia tanetsibeje, bajaraPonë asiwaya peyaiyataexaebeje. Nexata, tocopatatsibeje pexainaenexabeje pexi, pemomoxi-ata ayaibitsaëto. Bajarapacuenianua Israel-pijinë pemomoxi orijibia pewajënaeyabelia bitso ayaibitsaëto tsaponae. Bitso pinijisaë xainabuataponanua, bepenawajabitsaëtsiwi penaexanaenexa.
22 Nexata, bajaraxuacujinae faraón icatsia itoroba daxita Egipto nacuata pejinawanapaewijawabelia. Jumaitsi:
—¡Meniareca papenetsiaremeca ëpebinëxi, pamonae naexanapona Israel-pijinë pemomoxituatuajëta. Petiriwaxi juya pacopabianame piasaëtsaponaenexa! —jai faraón pijanacuapijiwijawabelia.