50
Bajaraxuacujinae, José paxa petëpaenë wëwaetabiaya aëaëjai, ya-itsaxutonueya itabaratsutsunenua. 2 Bajaraxuacujinae, itoroba petonacuenebiwitsijawabelia pamonae perabë-exababiaba petëjiwi pijacujirucuenia petuxujuwijawanëta, bepijiayo petsabanaeyaniwa. Nexata bajarapacuenia, bajarapamonae toperabë-exaba paxapijinë. 3 Cuenenajematawanapa cuarenta pamatacabibeje, tsipaji bajarapamatacabibejewajëto namatawenonabiaba xaniawaetsia peperabë-exabinexa.Egipto nacuapijiwi pijinia, José paxapijinë petëpaecujinae, pijacujirucuenia wënajamatabëxainaeya jinawanapa setenta pamatacabibejecuenia.
4 Itsa baja tocopiarucatsi pamatacabianë najamatabëxainaeya ponapona paxapijinë pewënamuto, bajaraxuacujinae José barëcuaicuaijai faraón peyajawanacuenebiwijawabelia. Jumaitsi:
—Itsa paxamë pacatsitaxanepanaponaponatsi patacayajawanacuenebijawa, nexata pexaniacuene pane-exanare, patanetojumaitsinexamëa faraón-jawabelia xua yabara cae-epatoyo ajibinë tsarucae tsane. 5 Xanë taxapijinë nitoroba najumecapanepaeya tato-exanaenexa mapacueniaje, itsa baja imoxoyo pewajënae petëpaejawa. Nejumaitsi: «Xanë rabaja tëpaejitsianë. Nexata, itsa tëpaenajë, panemëthëtsianame pamëthëjawabelia natsiwajënaeweretabuatajë petsutoyenepanata Canaán nacuajawatalia», nejai. Nexata, xanë najumecapanepaeya jumaitsinë bajarapacuenia tato-exanaenexa. Bajaraxuata, pexaniacuene pacawajëtatsi, patanecopatsinexamë taxapijinë tamëthëtsinexa tanejumaitsicuenia. Bajaraxuacujinae, icatsia xanë bepijiacuenia nawiataponaerenajë maberenaje —jai José bajarapamonaejawabelia.
6 Bajarapamonae petsipaebicujinaetsi, faraón juya jumecanawiatsiaya jumaitsi:
—Pacuenia axapijinë cawajëta, to-exanare. Nexata, ponare nemëthëtsinexa pecawajëtsicuenia —jai faraón pejumecanawiatsicuenia.
7 Nexata José pona, paxapijinë pemëthëtsinexa. José yanabatsi daxita pamonae faraón peyajawanacuenebiwi, pamonae penamatacaitorobiwi, itsamonae-ata pewetsiwi Egipto nacuata. 8 Bajarapacuenia José yanabatsi daxita pijamonae, pematapijiwi, pejuyapijinë, itsamonae pijamonae-ata. José pijamonae pueneba Gosén nacuajawata caemonae petiriawi, pejewaxi yajawa, pijadajubibitsaëtonë-ata. 9 Itsamonae Egipto nacuapijiwajabitsaë napona caballo peyarobobocaecarrozamonëta. Itsamonae pijinia yapona caballonëta. Nexata daxita bajarapamonae najuapona, bitso pinijibitsaëtoxaneto. 10 Itsa baja bajarapamonae pata-othopa Atad-taxunaeta,b itsajota trigo tanabataxuababiaba, Jordán-mene itsapanawetsina, bajarajota icatsia bajarapamonae wënua Jacob-pijinë siete pamatacabibejecuenia.
11 Nexata cananeomonae petaejawata, bitso najamatabëxainaeya pejinawanapaejawa Atad-jawata, bajarapamonae najumaitsi: «Egipto nacuapijiwi bajarajota bitso najamatabëxainaeya jinawanapa, petëpaenë pemëthëtsinexa», najai. Bajaraxuata, Atad-wënëmi wënëruba Abel-mizraim-wënë.c
12 Nexata Jacob-pijinë pexi exana pacuenia baja tonajumecopatatsi. 13 Nexata pexi caponatsi Canaán nacuajawabelia, bajarajotalia pemëthëtsinexatsi petsutoyenepanata pa-ibowajumëthë boca Macpela nacuajawata; pamëthë Abraham comuata Efrónta heteowirianëjawabelia, jamatejema penamëthëcaponaenexa bajarapabitsaëto. Bajarapamëthë boca pemutuabereca Mamrepijinë pija-iranacuajawata. 14 José pemëthëtsicujinae paxa, nawiarena baja Egiptojawaberena daxita pematapijiwi yajawa, pamonaenua yanabatsi bajarabelia pemëthëtsijawata.
José jamatejemaya-exana pematapijiwi, pecujunawixaetsi pijaneconimijamatabëcuene
15 Jacob baja itsa tëpa, nexata José pematapijiwi siwanajamatabëxainatsi mapacueniaje: «José meta waxaitsi naca-itoyanaëcotsiana, pibisiacuene wajasiwanajamatabëxainaejamatabëcuene bajayata», jamatabëjai tsawanapae pematapijiwi. 16 Nexata, bajarapamonae tonajumexuaba mapacueniaje: «Petëpaewajënae raja waxa paneyajawanajumecopata patacatsipaebinexa. 17 Pajumaitsimë tsane José mapacueniaje tawënëta: ‘Pexaniacuene cawajëtatsi neto-exanaenexa nematapijiwijawabelia. Jitsipajë nesiwajamatabëcuenecaewijawa pajamatabëcuenemi casiwanajamatabëxaina bajarapamonae, paneconi natsi-exana xamëjawabelia bajayatami, xua-ata pibisiacuenia catane,’ jai bajarapacuenia xamë yabara. Bajaraxuata, paxanë pacajumaitsitsi patanesiwajamatabëcuenecaewinexamë patajapibisiajamatabëcuene. Paxanë raja waxa pijaDioso patatonacuenebawanapaewi», jai petonajumexuabijawata.
Nexata, paepatowajëto cuaicuaijai liwaisicaponaewi, José bajarapaepatota aëaëjai, tsipaji pematapijiwi abaxë jamatabëtsiteca peto-exanaejawatsi bajayata. 18 Nexata, xuacujinae icatsia José pematapijiwi parena pebarëcuaicuaijainexa. Nexata, bajarapamonae pijacuenecuenia yaiyataeya irataeya bobenajunua José pitabarata. Bajarapamonae nexata jumaitsi:
—Xamë baja majotaje paxanë panexainameje nexata amoneya patacatonacuenebiwi tsane —jai.
19 Itsiata baitsi jane, José jumecanawiata mapacueniaje:
—¡Pëtsa pajunawame! ¿Xanë tsaja Diosonë patacananeconitsia-exanaenexa? Caenë Dioso tsicarucatsi bajaraxua pexanaenexa. 20 Paxamë picani panajamatabëxainame pibisiacuenia patane-exanaenexamë. Itsiata baitsi jane, Dioso bajaraxua pënëyorota bajarapapibisiacuenemi pexaniacuenejawabelia, wajanacato-exanaenexa xua ajena taewanapatsi, wajanacacapanepaenexanua wajani wajatëpaejawaminexa, bajarapacuenia itsamonae-ata ayaibitsaëtonë piasaëtsawanapaenexa. 21 ¡Pëtsa bitso panecujunawame! Xanë raja pacarajutaponaenatsi panexaejawanexa paxamë, panexi-ata —jai.
Nexata, bajarapacuenia José jamatabëcuenecaewia-exana bajarapamonae, tsipaji bitso cuaicuaijai piasiwacuenia.
José petëpaejawa, yabara peliwaisi
22 José, pijamonae yajawa barëponapona Egiptojawata. José ponapona ciento diez pawaibeje. 23 José abaxë coxitane pexënato Efraín pemomoxi, bajarapapemomoxi pexijawabelia.d Bajarapacuenia-ata coxitane Manasés pexënato, Maquir-wënënë. Bajarapamonae pexi José coxi-isapitapona pe-etaponaenexa pethaëtota pijacujirucuenia, penajamatabë-itajëtsinexa petaejawa pepopemomoxicuenia, bajarapamonae juya pecanacopataponaenexa paxapijinëmi pijacuenemi.
24 Nexata, itsamatacabi José jumaitsi pijamonaejawabelia:
—Caematacabibeje rabaja netosajina tatëpaenexa. Itsiata baitsi jane, Dioso paxamë pacayajawa tsane. Pacajutsiananua mapanacuawecuaje papecacaponaenexa pa-irajawabelia bajayata najumecapanepaeya jumaitsi papecarajutsinexa wajasalinaiwi Abraham, Isaac, Jacob-jawabelia-ata —jai José. 25 Nexata, bajaraponë itoroba Israel-pijinë pemomoxijawabelia najumecapanepaeya pejumaitsinexatsi, pemëthëtsiyaniwatsi Egipto nacuata. Jumaitsi:
—¡Xaniajanë cajena! Dioso pacayajawa tsane papecayawenonaenexa. Pacujinae pacajutsiana mapanacuawecuaje, panesicaponaename cajonita patanesimëthëtsinexamë bajarapanacuayabelia —jai José. Jejai bajarapamonae peto-exanaenexatsi.
26 José nexata tëpa Egiptojawata itsa xaina ciento diez pawaibeje. Bajaraponë perabë-exababuatatsi bálsamonanitsapatojawata peperabëtsabanaeyaniwa. Nexata, bajaraponë buatatsi petëpaewi pejebabiabicajonita.