Jacob peyajawanajumecopatsiliwaisianë pexijawabelia petëpaewajënaeya
49
1-2 Jacob itsamatacabi junata pexi doce ponëbeje, tajëwelia pecuene-itajëtsinexa caenë canacujitsia Dioso pewënëta, pitsicuene pemomoxi tocopiapataponaejitsiatsi itsamatacabijawabelia.Nexata jumaitsi:
—Xanë, Jacobnë, pataximë pane-imoxoyoremena cujibaremena nacaetuatsiaya, patanejumetaenexamë. ¡Panenamuxuna-ewere xaniawaetsia pane-axanë, Israelnë, pacuenia pacajumaitsijitsiatsi! —jai.
3 Nexata, jumaitsi pexënato Rubén-jawabelia:
«Rubén, xamë taxënato matapijinëmë. Tajapewëjëatojamatabëcuenejawawerenacujinae copiaya tacaxainaenë. Necanacopatsinënexa picani, pecayaiyataejamatabëcuene, nenamatacaitorobisaë nexainaejamatabëcuene-ata, itsamonae taxiwecua. 4 Itsiata baitsi jane, bajarapajamatabëcuenemi baja apocanacopatsimëa tsane, tsipaji raja pacuenia mera penawotsijawata jiwi apocuenecaëjëpaetsi pecaranatsijawa, bajarapacuenia xamë-ata apocacuenecaëjëpae najamatabëcuenecataitsijawa pibisiacuene nexanaeyaniwa. Bajarapajamatabëcuene nexainaexae, xamë piuracuene neto-exaname, pibisiacuene ne-exanaejawata newitota tajawa, cotocaewi tapitsiwajawabelia»,b jai Jacob tajëwelia pecuene-itajëtsijawata Rubén-jawabelia.
5 Icatsia, Jacob jumaitsi Simeón, Levíbejejawabelia:
«Paxamëbeje, Simeón, Levíbeje, caejamatabëcuene panexainaenëbeje, bitso piabejecuene pane-exanaenexabeje.c 6 Caeto-ata xanë apojitsipaenë patacayajawanajumejaitsijawatabeje xua pa-exanaejitsiamëbeje, tsipaji pane-anaepanaejawatabeje, jiwi ayaibitsaëto pabeyaxuabamebeje, ayaibitsaëto dajubi-ata be-itacanicuenia pabejiobia-exanamebeje, panetaxunepecaucubijawatabeje. 7 Bitso pane-anaejamatabëcuenebeje yabara, pacacuene-itajëtatsibeje pibisiacuene panenatotaenexabeje. Bitso pibisiacuenia panebejiobia-exanaexaebeje yabara, pacacuene-itajëtatsibeje pibisiacuene papecatocopiapatsinexabeje. Bajarapajamatabëcuene panexainaexaebeje, nexata panemomoxibeje nacayajatsiayad jinawanapaena, daxita panacuanëjawa jinawanapa tamomoxi», jai Jacob tajëwelia pecuene-itajëtsijawata bajaraponëbejejawabelia.
8 Nexata, jumaitsi pexënato Judájawabelia:
«Xamë Judá, pecawënëbarëyataebiabinë tsane nijamonae. Necuene-amoneyabiabinë tsane nijawajabitsaë. Daxita nijamonae nematapijiwi, nejuyapijiwi-ata, yaiyataeya pematabacabëta nitabarata catonubenabiabiana.
9 »Xamë newëthë pejananëe necuenejëpaenë tsane necuenesaë yabara. Pacuenia newëthë pebeyaxuabinë baxaeyaxuaba, bajarapacuenia xamë nijawajabitsaë cuene-amoneyabianame. Pacuenia jiwi apojamatabë-itonotsi newëthë, perujunë, bajarapacuenia xamë apocajamatabë-itonotsi tsane, nijawajabitsaë necuene-amoneyabicujinae. Pacuenia jiwi cujunawijitsipa pejamatabë-itonotsijawa, newëthë penacuera-ewetanucaenë, pejananë-ata, bajarapacuenia jiwi cacujunawiana pecajamatabë-itonotsijawa. 10 Itsajiwi-ata apowecuapitsitsi tsane nemomoxi penamatacaitorobisaë, peyanacua-ewetsicuene-ata. Bajarapamonae canacopatsiana bajarapanamatacaitorobisaëcuene, pepatsimatacabijawabelia ponë pepopeyanacua-ewetsinënexa daxitamatacabijawabelia. Nexata, pepopeyanacua-ewetsinë pepatsicujinae, daxitanacuanëpijiwi jumecowënëtabiabianatsi.
11 »Nemomoxi pija-uvabacabonë petocuainawitsixaetsi tsane, bëjainejewa cëbanubiana pijaburroxi pija-uvabacabonëjawata, tsipaji pijaburroxi tocuaixae-atatsi tsipae, tsiteca nacopatsiana ayaijawa. Uvacuaibarëmenera petonawitsixaetsi tsane, aposiwajamatabëcuenebëjai tsane itaxutejema pecanacuenebinexa. Bemeracuenia canacuenebiana. Bajaraporata pija-ese quiatsi-ata tsipae, tsiteca nacopatsiana ayaijawa uvabarëmeneranë. 12 Bajarapamonae itaxutotsaujai tsabiabi tsane, bitso vinoranë piapaeyabiabixae. Lecheranë piapaeyabiabixae, wononiojai tsane. Bajarapacuenia vinoranë, lecheranë-ata, petonawitsixaetsi tsane, ayaijawa apaeyabiabiana», jai Jacob tajëwelia pecuene-itajëtsijawata Judájawabelia.
13 Nexata, jumaitsi pexënato Zabulón-jawabelia:
«Zabulón, nemomoxi jinawanapaena imoxoyo manuamene-itapajawa. Nexata, bajarapawëpanëjawa, barcomoxanetonë patabiabiana daxitanacuanëjawawerena. Nemomoxi pejinawanapaenacua tocopiarucaenatsi Sidón nacuajawabelia», jai Jacob tajëwelia pecuene-itajëtsijawata Zabulón-jawabelia.
14 Jumaitsi pexënato Isacar-jawabelia:
«Isacar, nemomoxi cuenejëpaena burro, petsijumacëbinëtsi piarewedorobeje. Nexata, apopeyotsixae, jumaboboca petsijumacëtsidorotsibeje. 15 Itsiata tsitapexaniataxunaexaetsi, pexaniapo̱na pexaeyabiabixaenua, jamatejema nacaewetabiaba pexainaenëtsijawabelia, petojotabiabinexa. Bajarapijinia pacuenia nemomoxi nacaewetsiana itsamonaejawabelia, piarewecuenejawanë petonacuenebabiabinexa, tsitapexanianacuaxaetsi pejinawanapaenexa», jai Jacob tajëwelia pecuene-itajëtsijawata Isacar-jawabelia.
16 Nexata, jumaitsi Dan-jawabelia:
«Dan, nemomoxi tsiquiribitsaëtoyo-ata tsane, bajarapamonae pijacuata nayanacua-ewetsiana. 17 Pacuenia jomo namutomuxuneneta pe-ecaenë, tsiquiriyo-ata, caballo, petaxusalibësinijawata, pejumaponaenë wejumaxuababiabica irabetsica, bajarapacuenia nemomoxi tsiquiribitsaëtoyo-ata tsane, cuene-amoneyabiana pijawajabitsaë, pija-ira pewecuapitsinexa», jai Jacob tajëwelia pecuene-itajëtsijawata Dan-jawabelia.
18 Nexata, Jacob jumaitsi Jehovájawabelia: «Jehovámë, tsiteca tawajënaejawabelia cajamatabëcuene-ewetaponatsi, tanecapanepaejawamënexa tajawajabitsaëwecua», jai Jehovájawabelia.
19 Bajaraxuacujinae, jumaitsi pexënato Gad-jawabelia:
«Gad, nemomoxi itsanacuawerena tsimaxëpatabiabianatsi penacobetoxotawanapaewi. Itsiata baitsi jane, nemomoxi pëbarajinaena, pebarënawajabitsaëtsinexa bajarapamonaejawabelia», jai Jacob tajëwelia pecuene-itajëtsijawata Gad-jawabelia.
20 Icatsia, jumaitsi pexënato Aser-jawabelia:
«Aser, nemomoxi pejinawanapaenacua capitsapabiabiana nawitsia pexaejawanë, bitso pexaniapexaejawanë, xuanë pepopeyanacua-ewetsiwi baxane», jai Jacob tajëwelia pecuene-itajëtsijawata Aser-jawabelia.
21 Nexata, jumaitsi pexënato Neftalíjawabelia:
«Neftalí, nemomoxi cuenejëpaena owebi pesorowato wayafopijinë, nexata jamatejemajinawanapaena. Capitsapabiabanua pexanianacuebi, pacuenia owebi pexi, pejananëxi», jai Jacob tajëwelia pecuene-itajëtsijawata Neftalíjawabelia.
22 Nexata, jumaitsi pexënato Joséjawabelia:
«José, nemomoxi cuenejëpaena banacali, mene-itapata penucaenae, ponae nawitsia pecuai capitsapabiaba. Bajarapacuenia nemomoxi ayaibitsaëto pexi xainaponaena. Pacuenia banacali pexanianaxaniabimaxërananë, peyacaranatsijawawecua yasipitsapabiaba itsapanabelia, bajarapacuenia nemomoxi, pinijibitsaëtoxae tsane, pijanacuawecua itsanacuanëjawa jinawanapaena. 23 Bajarapamonae pijawajabitsaë pitoyajamatabëcuenetsi bejiobia-exanaenatsi. Tsimaxëpatabiabianatsinua, xuatabonëta pebixabajarabinexatsi. 24 Itsiata baitsi jane, nemomoxi maxëcueranaenejewa, pebixabajarabiwi cuene-amoneyababiabiana pijawajabitsaë, tsipaji Jacobnë tajaDioso, piacuenesaënë, yawenonabiabianatsi. BajarapaDioso pewetsinë pijajiwi piayaicuenewecua. Peyacaranatsinënua be-iboto.
25 »Xanë, axanë, catojitsipatsi tajaDioso pexaniacuenia papecayawenonabiabinexa, xamë, nemomoxijawabelia-ata. Catojitsipatsi Dioso ayaijamatabëcuenenë daxitawecua, papecayawenonabiabinexa athëbëwetsica emajawanë papecatocopiapatabiabinexa, irabëxëpanawetsinanua mera papecatonawitsinexa, paxamë ayaibitsaëto panexi panexainaponaenexa, panijadajubimonae-ata. Tojitsipajënua Dioso peyawenonaenexatsi petiriawi pexi pexainaewi, dajubi pesorowabi-ata pemitsewiyaniwa.
26 »Xanë, axanë, xuanë ajena cacuenewajunupaebatsi Dioso pecayawenonaenexa, bitso pexaniacuenejawanë tajamonaemi tanecuenewajunupaebijawanëmi matatoxenetsia. Pacuenia petsutonë apowerewerecae pe-enaecujinae, bajarapacuenia catojitsipatsi bajarapapexaniacuenejawanë necanacopataponaenexa daxitamatacabijawabelia. Bajaraxuata, cacuenewajunupaebatsi pexaniacuenia, taca-itapetsixae daxita nijamonaewecua pecayaiyataenënexa», jai Jacob tajëwelia pecuene-itajëtsijawata Joséjawabelia.
27 Icatsia, jumaitsi pexënato Benjamín-jawabelia:
«Benjamín, nemomoxi cuenejëpaena lobomonaef pianaepanaewi. Pacuenia lobobitsaëto bajayacunua bepijiayo beyaxuaba pexaenënexa, bajarapacuenia nemomoxi bepijiayo werexuababiabiana pijawajabitsaë. Pacuenianua caniwiyo lobomonae najuaxane pebeyaxuabinëmi penacopatsijawa, bajarapacuenia nemomoxi natsicobetsanabiabiana pewecuanotsijawanë pijawajabitsaëwi», jai Jacob tajëwelia pecuene-itajëtsijawata Benjamín-jawabelia.
Jacob wecuatëpa pijamonae
28 Bexëajawabelia Israelg pexi doce ponëbeje pemomoxi nacopata doce papemomoxibitsaëtobejecuenia; baitsi doce papemomoxibitsaëtobejeh nacopata pijasalinaiwi pewënëcuenia. Bajarapacuenia Israel cuene-itajëtapona pexaniacuenia caenë pexënato canacujitsia pewënëta Dioso, peyawenonaenexatsi. Caenë canacujitsia saicayacuenia tsitajëtapona pacuenia taeponaejitsia bajaraponë pecuenejamatabëcuene. 29 Bajarapacuenia pecuenetsitajëtsicujinae, Jacob yajawanajumecopata pexi mapacueniaje:
—Netosajina rabaja caematacabibeje tatëpaenexa. Nexata, panemëthëtsianame tajamonaemi yajawa pa-ibowajumëthëjawata bajarapamonaemi namëthëcapona, pa-ibowaju boca petsutoyenepanata Efrón-pijinëmi, heteowirianë, pijanacuamita pecomuatsi-ira. 30 Pamëthë boca pemutowetsina Macpelawënë irajawata, Mamrepijinëmi pija-irami imoxoyojawata, pa-ira baitsi Canaán nacuata Abraham comuata Efrón-jawabelia penatsixaniawaetabuatsimëthënexa petëpaewi caewiriabitsaëto. 31 Bajarajota raja, mëthëtatsi tamo Abraham-pijinëmi, bajarapacuenia pijawami Sara-ata, bajaraxuacujinae, taxa Isaac-pijinëmi-ata, pijawami Rebeca-ata. Nexata, bajarajota xanë-ata mëthëtajë tajawami Lea. 32 Nexata, bajarapamëthë comuatabuata daxitanexa heteomonaejawabelia bajarapawayafotusato yajawa —jai Jacob pexijawabelia.
33 Itsa baja Jacob najumewereta bajarapacuenia pejumaitsijawa pexijawabelia, icatsia bajaraponë bocanajetsia pijacamajawabetsia. Bajarapacuenia bajaraponë baja tëpa.