Jacob pexaniacuene cuenewajunupaeba Efraín, Manasés-bejejawabelia
48
Bajaraxuacujinae itsamatacabianëjawabelia, itsajiwiyo yapëtaeya-exanatsi José paxa peto-awitanejawatsi. Jumaitsitsi:—Taema. Axa rabaja bitso cato-awitane —jaitsi.
Nexata, José pona paxa petaenexa. Yajawapona pexënatobeje, Manasés, Efraín-beje. 2 José pepatsicujinae, Jacob tsipaebatsi pexënato pepatsijawa petaenexatsi. Nexata, nasaëta ayaicuenia, pe-ecaenexa pijacamajumata, pecopiapitsinexa, tsipaji asaëjibi tsanucae. 3 José pejonecujinaelia itsajota paxa boca, Jacob jumaitsi pexënatojawabelia:
—Dioso ayaijamatabëcuenenë netsitanaitajëta bajayatami Luz tomarata, Canaán nacuata pe-ecaetomarayo. Bajarajota, pexaniacuene necuenewajunu-itajëta tanetocopiapatsinexa. 4 Mapacuenia nejumaitsije: «Xanë raja carajutsianatsi ayaibitsaëto nexi, nemomoxi-ata, nexainaponaenexa, pejinawanapaenexa caenacuapijiwicuenia. Orijibia, nemomoxi rajutsianajë mapa-iraje, panacuata catsitanaitajëtatsi ajena, pijanacuanexa daxitamatacabijawabelia», nejai Dioso. 5 Nexata, aeconoxae cayapëtaeya-exanaenatsi nexënatobeje Efraín, Manasés yabara, ponëbeje naexana mapaEgipto nacuajawataje, patsinejewanërena abaxë. Bajaraponëbeje taniji bepepotaxënatobejecuenia, pacuenia taniji Rubén, Simeón-beje. 6 Itsiata, bajaraponëbejecujinae, pamonae nexi xainaponaename, bajarapamonae catonacopatsiana peponexicuenia. Itsiata baitsi jane, bajarapamonae-ata napitsiana pa-irayajuwënëjawa Dioso rajutsiana Efraín, Manasés-beje pemomoxijawabelia-ata. 7 Pamatacabijawa barënawiatanajetarucajë Padan-aram nacuajawawerena, namuto-epatua ena Raquel-pijiwami newecuatëpa, Canaán nacuata patapua-imoxoyotanajetarubenae patapatsinexa Efrata tomarajawabelia. Bajarajota, bitso nenajamatabëxainaeya-exana. Nexata, bajarapowami mëthëtajë namutomuxuneneta, imoxoyo Efrata tomarawecua, itsawënë pijinia Belén —jai Jacob.
8 Nexata, paepatota Jacob tane José pexënatobeje, yanijoba:
—¿Jipatsa maponëbeje? —jai.
9 José jumecanawiata paxajawabelia:
—Bajaraponëbeje Dioso tanerajutsinëbeje, mapanacuataje taponaponae-epato —jai.
Bajaraxuacujinae, Jacob jumaitsi:
—Pexaniacuene netocarenamëre bajaraponëbeje weberenayo, tsipaji xanë pexaniacuenia Dioso pewënëta cuenewajunupaebijitsianë —jai.
10 Jacob baja bitso perujunëxae, itaxutotsëcëna. Nexata baja, apocuenecaëjëpaetsi xaniawaetsia petaejawa. Nexata, paepatota José imoxoyotsia-exana pexënatobeje, bajarapaepatota, Jacob wëwaetaba pemomobeje. Itabaratsutsunebejenua. 11 Bajarajota, Jacob jumaitsi pexënato Joséjawabelia:
—Xanë aponajamatabëxainaenë picani pematatsënëa taca-itabarataejawa. Itsiata, Dioso netocopata tacataenexa, bajarapacuenia nexi-ata —jai Jacob.
12 Bajaraxuacujinae, José, pexënatobeje wecuarunaeya-exanabeje paxa pethaëtowecua,a penucaenexabeje pamo pitabarata. José pijinia irataeya nabëxëtsutsiaya nuca paxa pitabarata. 13 José pejewaxinëbeje itsa nutabeje paxa pitabarata, Efraín nutatsi José pecujuanenia, Manasés pijinia petsawenonenia. Itsiata baitsi jane, pamo Jacob pitabarata Efraín juya nuca petsawenojawanenia, Manasés, matapijinëxae, pijinia nuca pamo pecujuanenia, jamatejema Jacob petsimatanacobebuatsinexa pecujuacobe Manasés-jawabelia, pexaniacuene Dioso pewënëta pecuenewajunupaebijawata. 14 Itsiata, Israel penamaxëyotsijawatalia namaxë-epatsiaxuabiaya pecujuanenia tsimatanacobebuata juyapijinë Efraín-jawabelia. Bajaraxuacujinae, icatsia petsawenomaxë namaxëyolia. Tsimatanacobebuata matapijinë Manasés-jawabelia. Namaxë-epatsia tsimatanacobebuatatsibeje. 15 Israel nexata pexaniacuene cuenewajunupaeba, José, pemomobejejawabelia-ata yajawa. Jumaitsi:
—PaDioso jumecowënëtsiaya ponaponabeje tamo Abraham-pijinë, taxa Isaac-pijinëbeje, bajarapaDioso tsitecaeya ajena pamatacabijawaberena abaxë ne-ewetaponapona tanaexanaematacabijawawerenacujinae. 16 BajaraPonë neto-itoroba pija-ángelnë, tanecapanepaenexa xuanë netsi-ayaijitsia picani. Tojitsipajë bajaraPonë pexaniacuenia peyawenonaenexatsibeje mapapewëjëatobeje. Jitsipajënua pewajënaeyabelia jiwi tanenajamatabënapitabiabinexa, tamo Abraham-pijinë, taxa Isaac-pijinëmi-ata, Dioso pexaniacuenia peyawenonabiabijawatatsibeje. Tojitsipajënua ayaibitsaëtoxaneto pemomoxi pepitsapaponaenexa bajaraponëbejejawata, daxita iranëjawa peyacaëjëpaenexa —jai Jacob pecuenewajunupaebijawata José, pemomobejejawabelia-ata yajawa.
17 Jacob pexaniacuene pecuenewajunupaebijawatanexabeje pemomobejejawabelia, José itsa cuenetane petsimatanacobebuatsijawa pecujuanenia Efraín-jawabelia, nexata apotsitaxanepanaetsi. Nexata, maxëpita paxa, pecujuacobe pebuatsinexa Manasés pematabocotojawabelia. 18 Bajarapacuenia pexanaejawata, José jumaitsi paxajawabelia:
—Axa, apobajarapacuenia raja —jai—. Mara ponëje matapijinëje. Ponë jane tsinamatanacobebuare necujuacobe —jai paxajawabelia.
19 Itsiata baitsi jane, paxa apojitsipae bajarapacuenia pexanaejawa. Nexata jumaitsi:
—Yapëtaniji rabaja, taxënato. Yapëtaniji rabaja, matapijinë Manasés-jawata-ata pepitsapaenexa ayaibitsaëtoxaneto. Itsiata baitsi jane, juyapijinë, Efraín, ayaijamatabëcuenenë tsane matapijinëwecua. Bajaraponëjawawerena matatoxenetsia ayaibitsaëto pitsapaponaena, nawitsia itsanacuanëpijiwinexa. 20 Nexata, pexaniacuene Dioso pewënëta, pecuenewajunupaebijawata pemomobejejawabelia, Jacob jumaitsi mapacueniaje: «Dioso bitso pexaniacuenia papecayawenonabiabixaebeje tsane, nexata, xanë, Israelnë, daxita tamomoxi pexaniacuenia itsajiwijawabelia pecuenewajunupaebijawata, canacuenebabiabiana panewënëbeje. Nexata, jumaitsi tsabiabi tsane mapacueniaje: ‘Pacatojitsipatsi pexaniacuenia Dioso pecayawenonaejawa pacuenia to-exana Efraín, Manasés-bejejawabelia,’ jai tsabiabi tsane, pexaniacuenia pecuenewajunupaebijawata», —jai Jacob. Namataxainaeya wënëjona Efraín, Manasés-wecua, pecuene-itajëtsinexa Efraín pemomoxi pecuenenamatamotsiwinexa, Manasés pemomoxiwecua.
21 Bajaraxuacujinae, Israel icatsia jumaitsi pexënato Joséjawabelia:
—Taema. Xanë baja bitso netosajina caematacabibeje tatëpaejawanexa. Itsiata baitsi jane, Dioso pacayajawa tsane. Nexata, icatsia pacanawiabia-exanaena paxamë patamomoximë panacuajawata ponaponabeje panijasalinainëbeje. 22 Xamë itsiata, canacopatsianame ayai-ira pematatsënëa nematapijiwiwecua, pa-ira wecuapitajë amorreomonae, tacuene-amoneyabijawata tabarënawajabitsaëtsimatacabi. Carajutatsi baja necanacopatsinexa Siquem nacua —jai Israel.