José tocopata bitso pexanianacua pijamonaejawabelia
47
1-2 José yajawapona cinco ponëbeje pematapijiwiyajuwënëwi petsipaebinexa faraón-jawabelia pijamonae pepatsijawa yabara. Jumaitsi:—Taxa, daxita tajamonae yajawaparena Canaán nacuajawawerena. Yajawapata daxita pijadajubi, daxita pecobecowë-ata. Pata-othopa raja Gosén nacuajawata —jai. Bajaraxuacujinae, bajaraponë tsitajëta pematapijiwi faraón-jawabelia.
3 Faraón yanijobiaya jumaitsi pematapijiwijawabelia:
—¿Depitsicuene paxamë panenacuenebawanapaewi? —jai.
Bajarapamonae jumecanawiata faraón-jawabelia:
—Paxanë raja ovejamonae pata-ewetawanapaewi. Pacuenia patajasalinai ewetawanapa, bajarapacuenia juya paxanë bajarapa-itsinë tsawanapae. 4 Paxanë panajetarubenajë mapaEgipto nacuayaberenaje patajinawanapaenexa, tsipaji patajinawanapaenacuami bitso janibo. Paneto-ajibinua po̱na patajadajubinexa. Bajaraxuata, pexaniacuenia pacawajëtatsi patanecopatsinexamë nijanacuayajuwënëjawata patajinawanapaenexa, Gosén nacuata —jai bajarapamonae faraón-jawabelia.
5 Faraón nexata jumaitsi Joséjawabelia:
—Axa rabaja maje catopatajopa, daxita nijamonae yajawa xamëjawaberena. 6 ¡Taema! Xamë rabaja yapëtaneme daxita Egipto nacua. ¡Nexata, axa, daxita nijamonae yajawa rajure pejinawanapaenexa Gosén nacua, pa-ira daxitawecua bitso pexanianacua! Itsa yapëtaneme bajarapamonaeyajuwënëwi pecuenecaëjëpaejawatsi dajubi pewetsicuene, nexata netotsicopatsianame tajadajubi taneto-ewetawanapaenexa —jai.
7 Bajaraxuacujinae, José capata paxa Jacob penucaenexa faraón pitabarata. Bajarajota, Jacob yaiyataeya pexaniacuenia faraón wënëxaniatsiaya bajacoba.
8 Faraón yanijobatsi:
—¿Detsa pawaibeje xainame neponaponaecujinae? —jai.
9 Jacob jumecanawiata:
—Caewaixi saya. Pacuenia tajasalinaiwimi bajayajebi jinawanapa mapanacuataje, apo-itsinë xanë. Xanë baja saya xainaponaponajë ciento treinta pawaibeje tajinarutsijawa. Daxita tajinarutsi-epato neto-ayapëbeje picani tsabiabi —jai faraón-jawabelia.
10 Jacob yaiyataeya penapëjiobicujinae faraón, wecuapona baja. 11 José nexata tocopata pijamonaejawabelia Egipto nacuayajuwënë-ira, bajarapanacuata pejinawanapaenexa, pacuenia baja faraón tonajumecopatatsi. Tocopata bitso pexanianacua daxita irawecua Egipto nacuata. Nexata, bajarapamonae naxainaeyaba Gosén nacuajawata, Ramesés tomara imoxoyojawata pebocae-ira. 12 José nexata paxa rajutabiaba pexaejawa, bajarapacuenia pematapijiwi-ata. Caebopijiwi canacujitsia rajutabiaba penamatawenonaecuenia pexaejawa.
Egipto nacuapijiwi canajeta pija-iraximi faraón-jawabelia, pexaejawanexa
13 Nexata, bajarapanacuata bitso pewajënaeyabelia, caematacabi canacujitsia, janibo tsaponae; bajarapacuenia Egiptojawata, bajarapacuenia-ata pijinia Canaán-jawata. Nexata, jiwi bitso piajani. Itsamonae yatëpapona. 14 José nexata belia, caetuatapona daxita palatanëmi Egipto nacuapijiwi, Canaán nacuapijiwibeje, pecomuacaponaexae trigo Joséjawabelia. Nexata, bajaraponë xaniawaetanajetaruca bajarapapalata faraón pijabota. 15 Pamatacabianëjawa baja to-ajibitsi tsaponae palatacuene Egipto nacuapijiwi, bajarapacuenia Canaán nacuapijiwi-ata. Nexata, bajarapaepatota Egipto nacuapijiwi pona Joséjawabelia pejumaitsinexa:
—¡Panerajure pataxaejawanexa! Apoxanepanae cajena paxanë patanetëpaeya-exanaenexamë patajani, apopataxainaejamatabëcuene palata patacacomuatsinexa trigo —jai.
16 Nexata, José jumecanawiata mapacueniaje:
—¡Itsa baja apopaxainaemë palata, nexata, pacapare panijadajubi patanerajutsinexamë, juya patacarajutsinexa trigo panijadajubimatamo! —jai José.
17 Bajarapamonae jejai. Nexata, capata pijavaca, pijacaballo, pija-oveja, pijaburro-ata Joséjawabelia, bajarapadajubi pejamatabëcuene perajutsinexatsi pexaejawa daxita wai-epato. 18-19 Itsiata baitsi jane baja, itsa panepa bajarapawai, icatsia cotocaewiwaita pona bajarapamonae Joséjawabelia pejumaitsinexa:
—Paxanë raja apopanecaëjëpae baja pepacuene patacayamaxë-itojorobinexa. Apopaxainaenë baja pepacuene palata, bajarapacuenia dajubi-ata, tsipaji baja daxitajawaxi pacarajutaponatsi. Apopaxainaenë baja itsacuenejawa pematatsënëa patacarajutsinexa trigomatamo. Saya caejawabeje paxainajë: ira, paxanë pajiwi-atanë patanacanajetsinexa-ata faraón-jawabelia patatonacuenebiwinexa amoneya. Nexata, panecomuacaename pataja-irami, bajarapacuenia pajiwinë-ata, juya patanerajutsinexamë trigo. Nexata, xamë panerajutaponaename pexu pata-ubijawanexa janibocujinae, jamatejema pataja-iranëta patatonacuenebinexa faraón, iranë penapenetanubenaeyaniwa. Acuenebi xamë patanetëpaeyabia-exanaejawamë patajajanijawata, bajarapijinia pacuenia, pataja-iranë-ata penapenetanubenaeyaniwa —jai Joséjawabelia.
20 Nexata, José jejai. Tocomuaca faraón daxita iranë Egipto nacuapijiwijawabelia, pamonae canajetapona pexaejawanexa. Egipto nacuapijiwi canajeta pija-iraxi piajanicobexae, tsipaji bitso namatawenona pexaejawa. Nexata, bajarapacuenia belia daxita iraxi naxainaeyabapona faraón Egipto nacuata. 21 Nexata, pamonae nacanajeta pijacujaya amoneya petonacuenebiwinexa, bajarapamonae baja yacaëjëpa daxita Egipto nacuajawata. 22 Itsiata, José caejawa apocomuatsi pamonae jumapecataeya pexanaenëanë pijisacerdotewia pija-iranë, tsipaji bajarapamonae faraón rajutanajetaruca pexaejawa trigojawanë. Nexata, bajarapacuenia bajarapamonae aponamatawenonae pecanajetsijawa pija-iranë.
23 José xuacujinae, jumaitsi daxitajiwijawabelia:
—Nexata, ajenaconoxaeta paxamë pajiwimë, bajarapacuenia panija-iranëmi patacacomuatsiwi faraón-nexa. Faraón baja papijajawamë, panija-iranënua-ata, tsipaji xanë tocomuataponajë bajaraponënexa. Bajaramaje pacarajutatsi pane-ubixunexa bajarapa-irata. 24 Jane baitsi, faraón parajutaponaename caejawayo cinco xuabejeyajuwënëjawami caenacuaitsi canacujitsia papecatonacuaitsijawanë. Itsacuatro xuabeje pijinia pacatonacopatsiana paxamë pane-ubinexa, panexaenexa-ata panexi yajawa, daxita paneyajawajinawanapaewi paxamëjawata —jai.
25 Nexata, bajarapamonae jumecanawiata:
—Bitso cajena xamë pexaniacuenia panesiwanajamatabëxainame. Panejamatabëcueneyawenoname patawecuapanepaenexa patajani patayatëpaewiminexa. Nexata, ajenaconoxaeta amoneya paxanë patatonacuenebiwi tsane faraón —jai bajarapamonae.
26 Nexata, José tocaëjëta daxita Egipto nacuapijiwi perajutabiabinexa faraón-jawabelia caejawayo cinco xuabejeyajuwënëjawami caenacuaitsi canacujitsia. Bajarapacuenia exanawanapa abaxë maparucae-ataje tsitecaeya. Itsiata baitsi jane, pamonae jumapecataeya pexanaenëanëpijisacerdotemonae, bajarapamonae apotsicarucaetsi perajutsinexa, tsipaji bajarapamonae pija-ira, caeto-ata, apoxainae faraón pesaëta, tsipaji apocanajetsi bajaraponëjawabelia.
Israel tonaliwaisicopata José pemëthëtsiyaniwatsi Egipto nacuata.
27 Nexata, Israel pijamonae nacopata Egipto nacuajawata pejinawanapaenexa. Bajarapamonae naxainaeyaba Gosén nacuapiji-ira. Bajarajota nexata, bajarapamonae bitso ayaibitsaëto tsaponae. 28 Jacob ponapona diecisiete pawaibeje Egipto nacuajawata. Bajarajota baja, xaina ciento cuarenta y siete pawaibeje.
29 Pamatacabijawa Israel nayapëtane baja imoxoyo pewajënae petëpaejawa, nexata itoroba petojunatsinexatsi José pejumaitsinexa:
—¡Itsa pepacuene xamë pexaniacuene jitsipame taneto-exanaejawamë, nexata, nacobebuare tathaëbëxëpanayota tanenaliwaisicajonenexamë! ¡Nejumaitsimëre pepacuene najumecapanepaeya xua xanë cajumaitsijitsiatsi taneto-exanaenexamë! ¡Pëtsa majotaje nemëthëtame Egipto nacuajawataje! 30 Itsa xanë tëpaenajë, nexata nejutsianame Egipto nacuawecua, tanemëthëtsinexamë tajamonaemi pijamëthëwajujawata —jai Israel.
Nexata, José nacobebuata paxa pethaëbëxëpanayota. Bajaraxuacujinae, jumaitsi:
—Bajarapacuenia cato-exanaenatsi —jai.
31 Icatsia, jumaitsi Israel:
—¡Xaniajaiya nejumaitsimëre itsa xaniajamëjitsia! —jai.
Nexata, José najumecapanepaeya jumaitsi pexaniajaicuenia. Bajaraxuacujinae, Israel nexata nawëbuatanajereca pijacamajawabetsia pexaniajamatabëcuene perajutsinexa Diosojawabelia.