Jacob barëwarapa pijamonae yajawa Egipto nacuajawabelia
46
Israel pitsapa daxita pecobecowë yajawa. Nexata, najetaruca pepatsinexa Beersebajawata, namuto-epatua Egipto nacuajawabelia peponaenë.a Daxita pijajiwi yajawanajetaruca, pecobecowë-ata. Bajaraponë itsa pata Beersebajawata, nexata dajubi tajuita altar-jumata paxa Isaac pijaDiosojawabelia. 2 Bajarapamerawi Dioso tsitanaitajëtatsi majitsinaebocuenia. Junatatsi pewënëta:—Jacob —jai.
Nexata, bajaraponë jumecanawiata:
—Marajota nucajëje —jai.
3 Nexata, Dioso jumaitsi:
—Xanë ra Diosonë, axa pijaDiosonë tsaponaponae. ¡Pëtsa junawame neponaejawa Egiptojawabelia! Bajarajota raja, xanë ayaibitsaëtoxaneto capitsapaponaenajë nemomoxi. 4 Xanë cayajawa tsanetsi Egipto nacuajawabelia neponaenë. Bajarapacuenia icatsia xanë jutsianajë nemomoxi bajarapanacuawerena, penawiatsinexa mapaCanaán nacuajawaberena. Nexata, xamë bajarabelia nepatsicujinae, itsamatacabijawabelia itsa tëpaename José nucaena nemuxuneneta pecataenexa netëpaejawa —jai Dioso majitsinaebocuenia Jacob-jawabelia.
5 Nexata, bajaraxuacujinae Jacob barënaropota Beersebawecua. Jacob pexi junaeya-exanatsi bueyu perobobocaemonëjawatsia, faraón peto-itorobimonëtsi peyacaponaemonënexatsi. Bajarapacuenia pexi-ata junaeya-exana, pijawaxi-ata. 6 Jacob nexata daxita peyajawaponaponaewi najetarubena Egiptojawabelia. Caponanua pijadajubibitsaëtonë, daxitaxua xainapona pecobecowë Canaán nacuajawata. Bajarapacuenia yajawanajetaruca peyajawaponaewi. 7 Nexata, daxita pexi pebijiwi, petiriawinua, pemomoxi-ata yajawanajetaruca Egiptojawabelia.
8 Marapamonaeje Israel-pijinëjawawerena pepitsapaewi pewënëanë, pamonae pebarëwarapaewitsi Egipto nacuajawabelia. Israel-pijinë itsawënë Jacob. Nexata, Jacob yajawapata Egipto nacuajawabelia mapamonaeje:
10 Jacob pexënato Simeón. Bajaraponë pexi mapamonaeje: Jemuel, Jamín, Ohad, Jaquín, Zohar, Saúl-ata. Simeón xaina Saúl Canaán nacuapijipetiriwata.
11 Jacob pexënato Leví. Bajaraponë pexi mapamonaeje: Gersón, Coat, Merari-ata.
12 Jacob pexënato Judá. Bajaraponë pexi mapamonaeje: Er, Onán, Sela, Fares, Zara-ata. Itsiata baitsi jane, Er, Onánbeje tëpabeje Canaán nacuata, Judá pebarëwarapaewajënaeya Egipto nacuajawabelia. Fares pexijiwibeje pijinia: Hezrón, Hamul-beje.
13 Jacob pexënato Isacar. Bajaraponë pexi mapamonaeje: Tola, Fúa, Job, Simrón-ata.
14 Jacob pexënato Zabulón. Bajaraponë pexi mapamonaeje: Sered, Elón, Jahleel-ata.
15 Daxita bajarapamonae Leajawawerena pepitsapaewi. Powa toxaina Jacob Padán-aram nacuata itsa jinawanapa. Pexënatoyo pijinia toxaina, pewënë Dina. Nexata, Jacob, Leabejejawawerena, pitsapa daxitata treinta y tres pajiwibeje pexi, pemomoxi yajawa, pebijiwi, petiriawa-ata.
16 Jacob pexënato Gad. Bajaraponë pexi mapamonaeje: Zifión, Hagui, Ezbón, Suni, Eri, Arodi, Areli-ata.
17 Jacob pexënato Aser. Bajaraponë pexi mapamonaeje: Imna, Isúa, Isúi, Bería, Serawënëwa-ata. Bajarapowa petiriwa bajarapamonae pejuyapijiwa. Bería pijinia pexijiwibeje: Heber, Malquiel-beje.
18 Daxita bajarapamonae Zilpajawawerena pepitsapaewi, powa Lea pijajiwitowa, amoneyacuenia perajutsiwatsi paxa Labán. Bajarapowa toxaina pexi Jacob-jawabelia, daxitata diez y seis pajiwibeje, pemomoxi yajawa.
19 Jacob xaina anijanëbeje Raquel-jawabelia: José, Benjamín-beje. 20 José pijinia xaina pexijiwibeje Egipto nacuajawatalia: Manasés, Efraín-beje. Bajarapajiwibeje tonaitajëtatsi Asenat-wënëwata, Potifera pexënatoyo. Potifera tonacuenebaponapona On-wënë, jumapecataenë sacerdotenëcuenia Egipto nacuata.
21 Jacob pexënato Benjamín. Bajaraponë pexi mapamonaeje: Bela, Bequer, Asbel, Gera, Naamán, Ehi, Ros, Mupim, Hupim, Ard-ata.
22 Daxita bajarapamonae Jacob Raquel-bejejawawerena pepitsapaponaewi. Daxitata catorce pajiwibeje, pexi, pemomoxi yajawa.
23 Jacob pexënato Dan. Bajaraponë pexënato pewënë Husim.
24 Jacob pexënato Neftalí. Bajaraponë pexi mapamonaeje: Jahzeel, Guni, Jezer, Silem-ata.
25 Daxita bajarapamonae pepitsapaponaewi Bilhajawawerena, powa Labán amoneyacuenia rajuta pexënatoyo Raquel-jawabelia, petonacuenebaponaponaewanexatsi. Nexata, Jacob, Bilhabejejawawerena, pitsapa siete pajiwibeje daxitata, pexi, pemomoxi yajawa.
26-27 Pamonae israelitawi Jacob pepopijamonae yajawapata Egipto nacuata namata-ëjëta setenta pajiwiyobeje, Jacob pexi, pemomoxi yajawa, namata-ëjëtsinejewa pecopenawaxi.b Jacob barënajetaruca sesenta y seis pajiwiyobeje pexi, pemomoxi yajawa. Bajarapamatacabijawa pijinia José pewajënaeya ponapona Egipto nacuata pexënato anijanëbeje yajawa, ponëbeje naexana Egipto nacuata. Nexata, bajarapacuenia daxita penamata-ëjëtsijawata, Jacob, peyajawapatsiwi, José, pexënatobeje yajawa namata-ëjëta setenta pajiwiyobeje israelitawi pepatsijawa Egipto nacuata.
28 Jacob itoroba copiaya Judá petsipaebinexalia José, jamatejema pecopiapitsinexatsirena Gosén nacuajawaberena. Bajarapamonae itsa baja pata Gosén nacuata, 29 José nexata itoroba petonacuenebiwitsi petoxaniawaetsinexatsi carrozawënëmo, perobobocaemo caballo, peponaenexa paxajawabelia pecopiapitsinexa. Nexata, bajaraponë paepatota tsitanaitajëta paxa, nexata bajaraponë wëwaetaba. Wëyanuenuca bajayajebi paxa. 30 Nexata, bajaraxuacujinae Israel jumaitsi Joséjawabelia:
—Ajena tacataecujinae xanë tajacujaya, tacacaxitajarabijawa abaxë niasaëtsaponaponaenë, nexata xanë baja tëpae-atanë apo-itsacuene tacataecujinae —jai jamatabëcuenebarëyaya pexënatojawabelia.
31 José nexata jumaitsi pematapijiwijawabelia, daxita paxa peyajawapatsiwijawabelia-ata:
—Nexata, ponaenajë tatsipaebinexa faraón, tayapëtaeya-exanaenexa panepatsijawa, tajumaitsinexa: «taxa, pexi, pemomoxi-ata yajawapata pejinawanapaewimi Canaán nacuajawatalia. Pata maberenaje xanë imoxoyojawata pejinawanapaenexa. 32 Bajarapamonae capata pija-ovejabitsaëtonë, pijavacabitsaëtonë-ata, daxitaxuanë xaina pecobecowë bajarapamonae, tsipaji penacuenebicuene pewetsijawa dajubimonae, oveja, vacanua», tajainexa bajaraponëjawabelia. 33 Nexata, itsa faraón pacajunatsiana papecayanijobinexa panenacuenebijawa yabara, 34 nexata pajumaitsimë tsane: «Paxanë patajanacuenebicuene pata-ewetsijawa oveja. Bajarapacuenianua patajamonaemi bajayata nacuenebawanapa. Bajarapacuenia paxanë-ata panacuenebaponajë», pajamë tsane. Nexata, bajarapacuenia itsa pajumaitsimë tsane, faraón pacatocopatsiana panejinawanapaenexa mapaGosén nacuajawataje, Egipto nacuayajuwënë-ira, saicaya panejinawanapaenexa Egipto nacuapijiwiwecua. Bajarapamonae Egipto nacuapijiwi apojitsipabiabi peyajawajinawanapaejawa oveja pewetsiwi, tsipaji bajarapamonaenexa tsitapiacuenebejejawatsi bitso oveja pewetawanapaejawa —jai José.