José nayapëtaeya-exana pijamonaejawabelia pejuyapijinëcuene
45
Pejumetaejawata José xua Judá tsipaebatsi, nexata apojamatabëcuenecaëjëpaetsi penajamatabëcuenecataitsijawa daxita pamonae petonacuenebiwitsi pitabarata. Nexata, bajaraponë asaëya ayaijumeta jumaitsi:—¡Papitsapare daxita majotawecuaje! —jai petonacuenebiwitsijawabelia. Nexata, daxita pitsapeca. Caejiwi-ata aponacopatsi bajarapamonaeyajuwënënë Joséjawata, paepatota nayapëtaeya-exanaejitsia pijamonaejawabelia. 2 Bajarapamonae pija-epato penubenaejawata, José aëaëjai bitso ayaijumeta. Belia, Egipto nacuapijiwi wayafuabelia penubenaewi jumetanetsi. Bajarapacuenia faraón pe-ecabiabibojawabelia jumepata. 3 José nexata jumaitsi pematapijiwijawabelia pijamonae pejumeta:
—Xanë raja Josénë. ¿Abaxë ponapona waxa? —jai.
Nexata, bajarapamonae, José pematapijiwi, bitso jamatabëcuenenabenajacaeya nubena bajaraponë pitabarata. Apocaëjëpaetsinua pejumecanawiatsijawa. 4 Nexata, José jumaitsi:
—¡Pëtsa panecujunawame! ¡Pexaniacuene paneto-exanare! ¡Panecujibaremena orijibia! —jai.
Bajarapamonae itsa cujibalia, José icatsia jumaitsi bajarapamonaejawabelia:
—Xanë raja panejuyapijinë Josénë, ponë pacanajetaxuabame Egipto nacuapijiwijawabelia. 5 ¡Itsiata, pexaniacuene paneto-exanare! ¡Pëtsa panasiwajamatabëbëjamë bajaraxua yabara! ¡Pëtsanua panabara-anaepaname ëpaxamë patanecanajetaxuabixaemë Dioso raja nitoroba panewajënaeya maberenaje patacacapanepaenexa, panijani panetëpaeyaniwa! 6 Bajaramaje anijawaibeje najetarucaje janibocuene mapanacuataje. Abaxë raja saica cinco pawaibeje janibocuene. Jiwi ubi-ata tsane, itsiata, apotopitsapae tsanetsi pe-ubijawanë. 7 Xanë itsiata, Dioso nitoroba maberenaje panewajënaeya, jamatejema papecacapanepaenexa pinijicuenia xanë tajamatabëcuene, pane-asaëtsawanapaenexa janibomatacabi, penacopatsinexa orijibia panemomoxi pewajënaeyabelia mapanacuataje. 8 Bajarapacuenia Dioso xanë nitoroba maberenaje taponaponaenexa. Paxamë apopanejamatabëcuene. Bajaraponënua netocopata betamuxujiobinëcuenia faraón taponaponaenexa. Tato-ewetaponaponaenënua daxita pexainaejawa pijabojawata, bajarapacuenia tanamatacaitorobaponaponaenë daxita Egipto nacuajawata. 9 ¡Paponare bepijiayo itsajotalia ponapona waxa! Patsipaebianame mapacueniaje: «Cajumaitsirena raja nexënato José: ‘Dioso raja majotaje netocopata daxita Egipto nacuapijiwi xanë tayanacua-ewetsinexa. Rena tsane bepijia maberenaje tataenexa. ¡Pëtsa bitso cuenenajemata! 10 Ponaponaena raja Gosén nacuayojawata, imoxoyo peponaponaenexa xanëwecua. Bajarajota, barëponaponaena daxita pexi, pemomoxi-ata yajawa, bajarapacuenia daxita pijadajubi-ata yajawa; daxitaxua xaina pecobecowë. 11 Bajarajota, rajutsianajë pexaejawanexa, daxita pijajiwi yajawa, daxita pamonae yajawaponapona, petosajinaeyaniwatsi itsacuenejawayo-ata, tsipaji abaxë sajina janibocuene cinco pawaibeje pematatsënëa,’ cajai rena raja José», pajamë tsane —jai.
12 Itsajawanua jumaitsi José:
—Paxamë, tajuyapijinë Benjamín-ata panejumetaenubename baja pacuenia xanë tajacuaibocujaya patacajumaitsijawa pepowajajumeta. 13 ¡Nexata, xaniawaetsia patsipaebare bajarapacuenia waxa daxita tanetocopiapatsicuene; pacuenia xanë ewetaponaponajë Egipto nacuajawata! Daxitanua xua paxamë pataneme majotaje, bajarapacuenia patsipaebianame. ¡Nexata, bepijiayo paponaremelia panecaponaenexarena waxa! —jai José pematapijiwijawabelia.
14 José nexata pejumaitsicujinae, pejuyapijinë Benjamín wëwaetabalia. Bajarapacuenia pewëwaetabijawata aëaëjai. Bajarapacuenia Benjamín-ata pewëwaetabijawata pematapijinë bitso aëaëjai. 15 Bajaraxuacujinae, José pijamonaenëcuenia daxita pematapijiwi itabaratsutsunepona pebajacobicuenia. Nexata, bajaraponë wëya-aëaëjai pijamonae. Bajaraxuacujinae, matapania pematapijiwi ajamatabëcuenesaëya barëcuaicuaijai.
16 Nexata, bajarapaepatota itsamonae wënëpaebatsi faraón pe-ecabiabibojawabelia pepatsijawa José pijamonae. Nexata, faraón bitso jamatabëcuenebarëya, daxita pamonae-ata peyajawanacuenebiwi. 17 Nexata, xuacujinae jumaitsi faraón Joséjawabelia:
—Nematapijiwi jumaitsimërë: «Nexata, ponae baja penawiabinexa Canaán-jawabelia, pijaburromonae tsijumacëbitrigodoruanë, pecaponaenexa. 18 Ponae pecapatsinexarena pane-axa, daxita pijamonae yajawa. Xanë raja rajutsianajë pexania-ira Egipto nacuayajuwënë-ira; bitso pexania-ira daxitawecua. Rajutsianajënua pexaewanapaejawanexa bitso pexaniapexaejawa daxita Egipto nacuajawa pecapitsapaeyajuwënëjawanë. 19 ¡Nexata, itorobare pecaponaenexa Egipto nacuata pejotsimonë, bueyu perobobocaemonë, pecaponaenexarena pijawaxi, pejewaxi yajawa, pane-axa-ata! ¡Nexata, junare peponaenexarena bepijia! 20 ¡Pëtsa siwajamatabëcuenebëjai pecobecowë xua xaina, tsipaji daxitaxua Egipto nacuata xaina pexanepanaejawanë bajarapamonae pijajawa tsane!», jamë tsane —jai faraón Joséjawabelia, petsipaebinexa pijamonae.
21 Nexata, Israel pexi bajarapacuenia exana. José nexata rajuta dajubi perobobocaemonë pacuenia faraón tonajumecopatatsi. Bajarapacuenia rajutatsi pemarue namuto-epatua pexaejawanexa. 22 Bajarapacuenianua rajutatsi penaxatabijawanë caejiwi canacujitsia. Benjamín pijinia rajutatsi trescientos papalatanëbeje. Bajarapacuenia penaxatabijawa rajutatsi cinco panaxatatsijawabeje. 23 Pijinia paxanexa to-itoroba maxuabeje: diez ponëbeje burromonae pejumaponaewi daxitaxuanë pexaniacuene pexainaejawanë Egipto nacuata, itsadiez pijinia ponëbeje pecaponaewi trigo, bajarapacuenia pan-cuene, itsacuenepexaejawaxi pexaenajetarucaejawarenanexa namuto-epatua. 24 Nexata, paepatota José napëjioba pematapijiwi, jumaitsi:
—¡Pëtsa namuto-epatualia panabijataenajetarubename! —jai.
Nexata baja, pona bajarapamonae. 25 Pitsapa Egipto nacuawecua, pepatsinexa Canaán-jawabelia itsajota ponapona paxa Jacob. 26 Pepatsicujinae Canaán nacuayabelia, taxuxuaba paxa petsipaebijawa José peponaponaejawa abaxë, pacuenianua bajaraponë pe-ewetaponaponaenë bajarapanacuata. Nexata, Jacob ajamatabëcuenecowëbi pacuenia exanaejitsia, pacuenianua jumaitsijitsia. Apocaëjëpaetsinua pejumexaniataejawa xua tsipaebatsi. 27 Bajarapamonae tsipaeba daxitajumexi pacuenia jumaitsi José pebarëcuaicuaijaijawatatsi. Icatsianua, itsa tane xua peto-itorobijawatsi, bueyu perobobocaemonë peyacaponaemonënexatsi, nexata matapania bajaraponë jamatabëcuenebarëya bitso. 28 Nexata jumaitsi:
—¡Pexaniacuene cajena! Netoxanepana abaxë tataejawa taxënato José piasaëtsaponaponaejawa. Nexata, taeliajë tatëpaewajënaeya —jai jamatabëcuenebarëyaya.