José waetabia-exana Benjamín penaneconitsinëcuenia
44
Bajarapamonae penaxaecujinae, José icatsia tonajumecopata petonacuenebinëtsijawabelia. Jumaitsi:—Tojema baja trigoxu mapamonae pijadoruanëtaje. ¡Towënëbare xaniawaetsia daxitadoruanë, pacuenia cuenecaëjëpatsi pecaponaenexa! ¡Caenë canacujitsia pijadorocuaibojawawereca pijapalata toyajawajebaponare! 2 Bajarapacuenia tojema juyapijinë Benjamín pijadorocuaibojawawereca tajacopa, palatananitota pexanaejawa. Bajarapacuenia palata tojema pematamotsijawa trigojamatabëcuenemi —jai José pijajiwitonëjawabelia.
Nexata, bajarapacuenia exana petonacuenebabiabinëtsi José pejumaitsicowëya. 3 A̱jena̱ baja juameto pitsapaina, pepabajayacunua, José ponaeya-exana bajarapamonae. Nexata, bajarapamonae pijaburroxi nota peponaenexa. 4 Bajarapamonae peponaecujinae, abaxë bitso tajë apowecuaponae bajarapatomara, nexata xuacujinae, José jumaitsi petonacuenebinëtsijawabelia:
—¡Pëbaraponare bajarapamonae! Itsa pëcaxiname bajarapamonae, jumaitsimë tsane: «¿Dexuajitsia pibisiacuene panejamatabëcuenecanawiatame, pexaniacuene pacato-exanae-atatsi? ¿Detsa xuajitsia patonacobetoxotame pijacopa tajatuxanenë palatananitota pexanaejawa? 5 ¿Apopayapëtaemë tsaja tajatuxanenë bajaraxuata peca-apaeyabiabijawa, pecanacuenebabiabijawanua pecanaëjëbicuenia? Nexata, paxamë bitso pa-exaname pibisiacuene», jamë tsane bajarapamonaejawabelia —jai José.
6 Nexata, bajaraponë pëbarajina bajarapamonae. Itsa baja pëcaxina, nexata bajaraponë jumaitsi tsanajetarucae pacuenia itorobatsi José. 7 Nexata, bajarapamonae jumecanawiata:
—¿Dexuajitsia bajarapacuenia panejumaitsimë? Paxanë cajena caeto-ata bajarapitsicuene apopatanajamatabëxainaewi pata-exanaenexa. 8 Paxanë imata papalata pacaxitajarabajë patajadorocuaibojawata pacatocaponarenatsi Canaán nacuajawawerena patacatocanawiatsinexa. Itsa peneta patanacobetoxotsiwi tsipae, bajarapacuenia apopacatocanawiatsitsi tsipae. ¿Depacuenia nexata paxanë panacobetoxotsipajë nijatuxanenë pijabo pijajawa palatananitota pexanaejawa, orojawanëta pexanaejawa? 9 Nexata, pabeyaxuabianame paxanëyajuwënënë, ponë pijadorota patocaxitajarabianame bajarapacopa. Paxanë juya apopataxainaewi bajarapacopa, panacopatsianajë patacatonacuenebiwinexa, patayajawananeconitsiwicuenia nijatuxanenëjawabelia —jai.
10 Nexata, ponë José petonacuenebabiabinëtsi jumaitsi:
—Nexata, paxamë pacuenia panejumaitsimë, bajarapacuenia exanaenatsi. Ponë matapania pijadorota nacaxitajarabiana bajarapacopa, bajaraponë amoneya patanetonacuenebaponaponaenë tsane. Itsiata, paxamë panacopatsianame aneconijibia —jai.
11 Nexata, caejiwi canacujitsia, irabetsica jebica bepijiayocuenia pijadoruanë. Xuacujinae, pijadoruanë wë-isica, jamatejema piënëjaitsinexa. 12 Nexata, José petonacuenebabiabinë tojaita caejiwi canacujitsia pijadoro. Taxuxuaba matapijinëjawawerenacujinae pejaitsijawa, juyapijinëjawabelia. Belia, caxitajaraba bajarapacopa Benjamín pijadorocuaibojawata. 13 Nexata, bajarapamonae pijacuenecuenia pijacamisanëmi mipatitica, penajamatabëcuene-itajëtsinexa peyabarabëjaijawa pejuyapijinë. Bajaraxuacujinae, bajarapamonae caenë canacujitsia pijaburroxijawabelia icatsia tsijumacëba pijadoruanë. Nexata, icatsia nawiabalia tomarabelia. 14 Itsa baja Judá palia pijamonae yajawa José pijabojawabelia, nexata José abaxë caxitajaraba pijabojawata. Nexata, bajarapamonae pijacuenecuenia bobenajunua irataeya peyaiyataecuenia. 15 Nexata, José jumaitsi:
—¿Detsa pitsicuene nexata pa-exaname? ¿Apopayapëtaemë tsaja cajena paxamë pacuenia xanë cuene-itsinë, tayapëtaenëcuene tacanaëjëbabiabijawata? —jai.
16 Nexata, Judá jumecanawiata:
—Tajatuxanenë, ¿Depacuenia paxanë pacajumecanawiatsipatsi? ¿Depacuenia paxanë pepacuene paxaniajanë tsipae patananeconitsijawa, aneconijibia patanetaenexamë? Ajibi. Dioso raja paneyapëtaeya-exana patajaneconi pataxainaewicuene. Majotaje panexainame paxanë panijajiwicuenianë amoneya patacatonacuenebiwinexa. Ponëjawata-ata pacaxitajarabame nijacopa bajaraponë yajawa pacatonacuenebawanapaenatsi —jai Judá.
17 Nexata, José jumecanawiatatsi:
—¡Jume raja! Saya caenë, ponë tajacopa netopita, bajaraponë caenë tajajiwitonë amoneya tanetonacuenebinë tsane. ¡Nexata, paxamë panawiabaremelia jamatejema pane-axa pijaboyabelia! Itsajiwiyo-ata apopacajamatabë-itonotaponae tsane —jai José.
Judá yapijiwicuaicuaijai Joséjawabelia, Benjamín pitaxutotsoniataenexatsi
18 Judá jumaitsi pecujitsijawatalia Joséjawabelia:
—Xanë orijibia cajumaitsitsi. ¡Netocopare abaxë tacajumaitsinexa itsajawayo muetsiacuenia! ¡Pëtsa jane itsiata, niamuxujitsibimë tacajumaitsijawa, tsipaji baja xamë cacuenecaëjëpa patanenaneconitsia-exanaenexamë pacuenia cuenecaëjëpatsi faraón! 19 Xamë imata paneyanijobame pataxainaejawa yabara patajuyapijinë, bajarapacuenia itsa paxainajë pataxa-ata. 20 Nexata, paxanë pacajumaitsitsi pataxainaejawa pataxa perujunëyo, bajarapacuenia patajuyapijinë yabara, penaexanaenëyo pataxa itsa baja bitso penaweretsinë tsaponae. Pacatsipaebatsinua bitso piasiwajawa pataxa bajaraponëyo. Nexata, bajaraponënua bitso caenëyo pena cotocaewi pexanaenëyotsi, tsipaji itsanë penaexanaenë copiaya bajarapowata tëpa baja. 21 Nexata, xamë panecajunatame patacapatsinexa bajaraponë xamëjawaberena. 22 Paxanënua pacajumaitsitsi bajaraponëyo yabara: «Pataxa apojitsipae pewecuapitsapaejawatsi, tsipaji itsa wecuaponaejitsipa itsajawabelia, nexata belia penajamatabëxainaecuenia pexënato wëtëpaejitsipa», pacajaitsi. 23 Bajarapacuenia patacatsipaebicujinae, xamë itsiata, panejumaitsimë mapacueniaje: «Bajaraponë itsa apopayajawapatsimërena tsane, apojitsipaenë panepatsijawarena patanetaenexamë», panejamë —jai Judá.
24 Itsajawanua jumaitsi Joséjawabelia:
—Pamatacabi panawiabaponaliajë pataxajawabelia, bajaraxua patsipaebajë daxitaxua panejumaitsimë. Nexata, itsamatacabijawabelia pataxa pane-itoroba mapacueniaje: 25 «¡Paponare, icatsia panecomuacaenexa orijibia trigo waxaitsinexa!», panejai. 26 Nexata, paxanë pajumaitsinë mapacueniaje: «Apopanetoxanepanae tsane pataponaejawa ëpaxanë patajuyapijinënejewa, tsipaji itsa bajaraponë apopaneyajawacopatsimë tsane, nexata apopanetoxanepanae pataponaenexalia bajaraponë patataenexa. Apopanecopiapitsi tsane», pajanë pataxajawabelia. 27 Nexata, bajaraponë panejumaitsi: «Paxamë payapëtaneme tajawa tanerajutsijawa anijanëyobeje saya taxijiwibeje. 28 Itsanë tanewecuaponaecujinae, aponetopatajopae baja. Aeconoxaeta apotaenë. Nexata, xaniajanë pepacuene patacajumaitsijawami: ‘Belia meta xaejitsipatsi itsacuenenë unupijinë bajaraponëyomi.’ 29 Nexata, icatsia ajenaconoxae itsa panewecuacaponaename maponëyoje, itsa itsacuene tocopiapatsipatsi, nexata paxamë tatëpaejawa pacatsijumarucaejitsipa, tsipaji baja xanë perujunënë wecuatëpaejitsipajë tanajamatabëxainaecuenia», panejai.
30-31 »Pataxa bitso bajaraponë yabara siwajamatabëcuenebëjai tsabiabi. Nexata, itsa maponëje apopayajawanawiabinëlia tsane, pataxa tëpaena itsa yapëtane apopatayajawapatsijawa. Nexata, bajarapacuenia paxanë panetsijumarucaena pataxa bitso itsa tëpaena penajamatabëxainaecobexae. 32 Xanë raja netsijumajopa taxajawabelia bajaraponë ta-ewetsinexa itsacueneyaniwa, tsipaji jumaitsinë taxajawabelia: «Itsa apocatocanawiatsitsi tsane, nexata xanë netsijumajopaena daxitamatacabijawabelianexa bajarapaneconi», janë. 33 Bajaraxuata, xanë cajumaitsitsi orijibia bajaraponë penacopatsiyaniwa majotaje amoneya pecatonacuenebinënexaje. Xanë juya nacopatsianajë, bajaraponë pejamatabëcuene. Nexata, copatsianame bajaraponë peponaenexa pematapijiwi yajawa. 34 ¿Detsa nexata xuajitsia xanë lianë tsipae taxajawabelia, itsa maponë apoyajawalianëje? Xanë apojitsipaenë tsane taxa bitso pewënajamatabëxainaejawa pexënato —jai Judá Joséjawabelia.