Benjamín caponatsi pematapijiwi Egipto nacuajawabelia
43
Itsa bitso Canaán nacuata janibo tsaponae pewajënaeyalia, 2 nexata itsa baja werenepona Jacob pexi pecomuatsijawami trigo Egipto nacuayabelia, Jacob jumaitsi pexijawabelia:—¡Paponare icatsia panecomuacaenexa itsajawa trigo wajaxaejawanexa waxaitsi! —jai.
3 Nexata, Judá jumecanawiata:
—Bajarajotalia ponë, pewetsinë, pepacuene pexaniajaicuenia panejumaitsi: «¡Itsa apopacapatsimërena tsane panejuyapijinë maberenaje, nexata, pëtsa paponaremena patanetaenexamë!», panejai. 4 Nexata, itsa paneyajawacopatsianame patajuyapijinë, matapania bajarapacuenia paxanë paponaenajë patacatocomuatsinexa trigo. 5 Itsa baitsi jane, itsa apopaneyajawacopatsimë tsane, nexata apopaponaenë tsane, tsipaji bajaraponë panejumaitsi: «¡Itsa apopacaponaemërena tsane panejuyapijinë, nexata, pëtsa paponaremena maberenaje patanetaenexamë!», panejai —jai Judá.
6 Nexata, bajarapaepatota bajarapamonae paxa jumaitsi:
—¿Dexuajitsia bajarapitsicuene, bitso pibisiacuene, paneto-exaname? ¿Dexuajitsia payapëtaeya-exaname panexainaejawa itsanë panejuyapijinë bajaraponëjawabelia? —jai Israel pexijawabelia.
7 Nexata, pexi jumecanawiatatsi:
—Bajaraponë bitso paneyanijobapona paxanë yabara, patajamonaemë-ata yabara. Panejumaitsi: «¿Abaxë ponapona pane-axanëyo? ¿Paxainamenua itsamonae panejuyapijiwi?», panejai. Nexata, paxanë xaniawaetsia pajumaitsinë tsaponae pataneyanijobicowëya, tsipaji ajibi baja patajumaitsitsaponaejawa. ¿Depacuenia paxanë payapëtaejitsipajë patanejumaitsinexa: «Pacaponaeremena panejuyapijinë», patanejainexa? —jaitsi pexi.
8 Nexata, Judá jumaitsi paxa Israel-jawabelia:
—Tajuyapijinë netocopatsianame xanë tayajawaponaenexa, ta-ewetsinexa-ata. Bajarapacuenia matapania paponaenajë. ¡Nexata, itsa jitsipame waja-asaëtsawanapaejawa, panetocopare patayajawaponaenexa, wajatëpaeyaniwa wajani, xamë-ata, paxanë-ata, bajarapacuenia wajaxi-ata! 9 Nexata, xanë natsijumaxuabianajë tajuyapijinë yabara. Xua tocopiapatsianatsi netsijumajopaena. Itsa apocatocanawiatsi tsanetsi caewëarena, nexata xanë naneconitsianajë xamëjawabelia daxitamatacabijawabelianexa. 10 Itsa cajena apopanewecua-asiwamë tsaponae tsipae patajuyapijinë patabarëponaeyaniwa, panecuenecaëjëpaejitsipa baja picani anijatobeje patacapatsijawa pexaejawa bajarawerena —jai Judá.
11 Nexata, Israel jumecanawiata pexi mapacueniaje:
—Je. Itsa baja pepacuene ajibi itsacuenejawalia waja-exanaejawa, nexata maxua pa-exanareje. ¡Pacaponaremelia panijadoruanëta wajarajutsijawanexa bajaraponë xuanë xainatsi mapanacuataje pexaniajawanë, bálsamojawa, jabërajawanë, petuxujuwijawanë, mirrajawanë, daxitawiria pexutunaxu pexaejawanë,a bajaraxuanë panerajutsinexa bajaraponëjawabelia nacua pewetsinë! 12 ¡Patocaponarenua orijibia palata webeliayo! ¡Patsimatabuare anijatobeje pematatsënëyo! Caejawa bajaraponë panetocanawiatsinexa papalata pacapata-othoparemena, tsipaji raẽta belia bajarapamonae nacobe-itaxanaejitsipa, itsajawa pijinia panecomuatsinexa trigo. 13 ¡Nexata baja, paponare panejuyapijinë yajawa, panetaenexa bajaraponë! 14 Dioso daxitawecua piacuenesaënëb tsaponaponae. Nexata, bajaraPonëjawabelia pacatowajëcabiabianatsi papecayawenonaenexa, bajarapanacua pewetsinë papeca-itaxutotsoniataenexa. Nexata, papeca-itaxutotsoniataexae, bajaraponë papecatocopatsinexarena Simeón, bajarapacuenia paneyajawapatsinexarena-ata panejuyapijinë Benjamín. Xanë picani apojitsipaenë tanacopatsijawa taxinejewa. Belia baja, neto-ajibi tsaponae. Itsa Dioso bajarapacuenia netocopiapatsia-exanaena, apo-itsacuene tsane, tsipaji baja ajibi itsacuenejawayo ta-exanaenexa taxënatobeje yabara —jai Israel siwajamatabëcuenebëjaiya.
15 Nexata jane baja, bajarapamonae nota xuanë caponaejitsia perajutsijawanënexa amoneya. Notanua palata orijibia ayaijawa pecomuatsinexa trigo, pematamotsinexanua copiayapijitrigojamatabëcuene. Nexata, bajarapacuenia Benjamín barëponatsi Egiptojawabelia. Itsa baja pata Egiptojawata, nexata naitajëbalia Joséjawabelia. 16 Nexata, José tane Benjamín peyajawanajetarubenaejawa bajarapamonae. Nexata, jumaitsi pijabojawata petonacuenebaponaponaenëtsijawabelia:
—¡Mapamonaeje caponare tajaboyabelia! ¡Beyaxuabare caenë vaca nexanaenexa pexaejawa, tsipaji bajarapamonae xanë yajawaxaejitsianë matonejepijipexaejawata! —jai José.
17 Nexata, José pijajiwitonë jejai, pebarëponaenexa bajarapamonae José pijabojawabelia. 18 Itsiata, bajarapamonae jamatabëcuenenabenajaca. Junawanua bajarapaepatota, tsipaji apoyapëtae xua yabara bajaraponë caponatsi José pijabojawabelia. Nexata, najumaitsi bajarapamonae:
—Maraẽta imata papalataje nacatotsiwëjeba wajatrigodoruanëwëwereca, jamatabëcuenenacacapona nacaxaniabiaya maberenaje, wajanacayanijobinexa bewajanacobetoxotsijawacuenia paepatowajëto cajinawanapatsi. Nexata, waxaitsi wajananeconitsiwicuenia wajanacataexae, nacataicaejitsia wajanacaxainaenexa, wajanacanacuenebia-exanaenexa amoneya majotaje wajadajubi yajawa —najai tsabuataponae peponaejawata José pijabojawabelia.
19 Nexata, itsa baja pata baupajawata, José petonacuenebinëtsi cujibalia peyanijobinexa. 20 Nexata jumaitsi:
—¡Abaxë raja, patajatuxanenë! Imata xua papatajë patacomuacaenexa trigo copiayapijinamuto, bajarapacujinae apopapatsinë cajena pata-ajamatabëcuenebejewicuenia. Papatajë saya patacomuacaenexa trigo. 21 Bajarapacujinae, itsa panawiabaponaliajë, itsa papatajë itsajota pamajitsijitsianë, bajarajota nexata caenë canacujitsia pawë-isicajë patajatrigodoruanë. Bajarajota, pacaxibajarabajë patajatrigodoruanëwëjawawereca patamatamobipalatami trigojamatabëcuene. Aeconoxae nexata, pacatocaponatsi patacatocanawiatsinexa bajarapapalatami. 22 Orijibianua, pacanajetarubenajë pematatsënëa itsapalata patacomuacaenexa trigo. Itsiata, apopayapëtaenë bajarapacujinaeta pajiwiyo panetotsiwëjia patajapalatajawanëmi patajadoruanëwëjawawereca —jai bajarapamonae José petonacuenebinëtsijawabelia.
23 Nexata, bajarapaepatota jumecanawiatatsi:
—¡Pajamatejemamëre saya! ¡Pëtsa pajunawame! Itsiata raja, apopaca-itsacueniabi tsanetsi. Panija Dioso, panijamonae-ata pijaDioso pacatotsicuaibojeba bajarapapalata panijatrigodoruanëwëjawawereca. Xanë raja bajarapapalata picani pitajë xuanë picani pamatamobame trigojamatabëcuenemi —jai.
Nexata, bajarapaepatota José petonacuenebabiabinë juta baja Simeón penaneconitsiwi pejebabiabibowecua. Caponatsi itsajotalia pijamonae nubena José pijabo baupajawabelia. 24 Xuacujinae, joneya-exanatsi José pijabojawabelia. Bajarajotalia, mera rajutatsi penataxuquiatsinexa. Torajutatsinua pijaburro pexaejawa. 25 Nexata, bajarapamonae matapania yapëtane, bajarajota penaxaejawanexa, José pijabota. Nexata, bajarajota jane baja, xua tocapona perajutsijawanexa amoneya Joséjawabelia, bajarapamonae wecuajuca bajaraxuanë pijadoruanëwecua pexaniawaetsinexa, José pepatsiwajënaeya matonejepijipexaejawatanexa.
26 Itsa baja José pata pijabojawata, nexata jane baja, rajuta bajarapamonae xuanë tocapona Josénexa. Nexata, bajarapamonae irataeya pitabarata bobenajunua yaiyataeyacuenia. 27 Nexata, José yanijoba bajarapamonaejawabelia pejinawanapaecuene yabara. Jumaitsi:
—¿Jica, depa-itsimë? ¿Depacuenia pajinawanapame? ¿Depacuenia pane-axanëyo ponapona, imata paperujunëyo yabara panewajunupaebame? ¿Abaxë bajaraponëyo ponapona? —jai.
28 Nexata, bajarapamonae jumecanawiata:
—Pataxanëyo, pecayaiyataenëyo, abaxë itsiata, jamatejema. Abaxë itsiata, ecaponapona —jai. Pejumaitsicujinae, icatsia irataeya bobenajunua yaiyataeya.
29 José nexata itsa naëcolia matatoyorotsia, taeyeta Benjamín, caenëta, caewata penaitajëtsinëbeje. Nexata jumaitsi:
—¿Matsaja ponë yabara panejuyapijinë imata panejumaitsimëje? —jai.
Bajarapaepatota, José jumaitsi Benjamín-jawabelia:
—Catojitsipatsi Dioso pecayawenonabiabijawa —jai.
30 Nexata, bajarapejumaitsijawata, José itsa tane pejuyapijinë, jamatabëcuenebarëya petaejawata. Bajarapaepatota, bajaraponë bitso jamatabë-itaxutua-aëjai pecajamatabëcuenebarëya. Nexata, bepijiayo junua pijacuartojawabelia. Nexata, bajarajotalia bajaraponë aëaëjai. 31 Nexata baja, itsa naitaxutonuewereta, paepatota icatsia cuenecaëjëpatsi pecuaicuaijaijawa, nexata bajaraponë naitabaraquiata merata. Bajaraxuacujinae, pitaxutonuetaeyaniwatsi najamatabëcuenecataitsiaya pitsaparena. Jumaitsi petonacuenebiwitsijawabelia:
—¡Patsanare baja pexaejawa pataxaenexa! —jai. Bajarapamonae jejai.
32 Bajaraxuacujinae, José nexata to-etatsi pexaejawa pijamesajumata, itsamesa pijinia Egipto nacuapijiwinexa saicaya. Itsamesajumata pijinia tojeba pexaejawa Jacob pexinexa, saicaya José pijamonaenexa. Nexata, bajarapacuenia bajarapamonae saicaya nawecuaxane José pijamonae, tsipaji Egipto nacuapijiwi apojitsipae penajuaxaejawa hebreomonaejawabelia. Bajarapamonaenexa topibisiacuenetsi.c 33 Nexata, José pijamonae enaeya-exana itsajota to-itajëtapona. Bajarapamonae ena matapijinëjawaweliacujinae pijawainë canacujitsia juyapijinëjawabelia. Nexata, bajarapamonae bitso jamatabëcuenenajunawiaca itsa bajarapacuenia exanatsi. Ëpamonae nanaëcoba. «¿Depacuenia meta patajanetoyapëtae patajawai caejiwi canacujitsia?», jamatabëjai tsenae jamatabëcuenenabenajacaeya. 34 José bitso asiwaya tane pejuyapijinë Benjamín pematapijiwiwecua. Nexata, José pijamesajumata pexaejawayajuwënëjawa perajutaponaejawata pijamonaejawabelia, Benjamín rajutatsi ayaijawa daxita pematapijiwiwecua. Nexata, José barëxane pijamonae, yajawa-apanua pematawëjëa-apaeranë. Najuabarëyanua bitso, penaxaejawata.