José pematapijiwi siwapona trigo Egipto nacuajawabelia
42
Pamatacabi Jacob jumetane trigo pexainaejawa Egipto nacuajawata, jumaitsi pexijawabelia mapacueniaje:—¿Dexua pa-exaname majotaje, itsa saya ëpaxamë panataeyename? 2 Nejumaitsi raja itsamonae Egipto nacuajawatalia pexainaejawa trigo. ¡Bajarabelia paponare, panecomuatsinexa trigo wajani wajatëpaeyaniwa, waja-asaëtsawanapaenexa! —jai.
3 Nexata, diez ponëbeje José pematapijiwi pona Egipto nacuajawabelia pecomuacaenexa trigo. 4 Itsiata baitsi jane, Jacob apocopatsi peyajawaponaenexatsi pematapijiwi Benjamín, José pejuyapijinë, tsipaji Jacob najamatabëxaina mapacueniaje: «Belia, itsacuene tocopiapatsipatsi piabejecuene namuto-epatualia», jamatabëjai. 5 Nexata jane baja, Israela pexi pona Egipto nacuajawabelia pecomuacaenexa trigo. Bajarapamonae yajawapona itsamonae Canaán nacuapijiwi trigo penacomuacaenexa, tsipaji daxita Canaán nacuajawa janibo tsanucae.
6 José nexata, bajarapacujinaeta gobernadornë tsaponaponae bajarapanacuata, Egipto nacuajawata. Bajaraponë canajetabiaba trigoxu jiwijawabelia, pamonae patabiaba daxita nacuanëjawawerena. José pematapijiwi itsa jane baja pata Egipto nacuajawaberena, nubenajunua José pitabarata irataeya pematabacabëta. Nubenajunua pijacuenecuenia peyaiyataenexatsi nacua pewetsinëxae. 7 Pijamonae apoyapëtae-atatsi pejuyapijinëcuene, José itsiata, itsa tane, yapëtane pijamonaecuene. Itsiata baitsi jane, bajaraponë exana apobepeyapëtaenëcueniatsi. Nexata, bajaraponë yanijobapona liwaisixi apobepejitsipaenëcuenia itajara pecuene-ëjëbinexa pematapijiwi. Jumaitsi:
—¿Detsa werena paxamë paneponaewi? —jai.
Bajarapamonae jumaitsi:
—Paxanë raja paponajë Canaán nacuajawawerena patacomuacaenexa trigoxu —jai.
8 Itsiata, José yapëtae-ata pematapijiwicuene, bajarapamonae juya apoyapëtaetsi Josécuene. 9 Nexata, José bajarapaepatota najamatabënapita piamajitsinaejawami bajarapamonae yabara. Nexata jumaitsi:
—Paxamë tsaena pataneya-enebiwimë. Paxamë saya maberenaje papatame paneyapëtaenexa xua mapanacuata patajinawanapaewije apopanecuenecaëjëpae pata-exanaejawa, itsamatacabi panenawajabitsaëtsinexa paxanëjawaberena —jai.
10 Nexata jumecanawiatatsi:
—¡Jume raja, patajatuxanenë! Paxanë cajena patayaiyataewi. Papatajë saya maberenaje patacomuacaenexa trigo. 11 Paxanë raja caenë papexinë. Paxanë raja apopata-ajamatabëcuenebejewi. Patayaiyataewi. Caeto-ata paxanë apopataya-enebiwi itsamonae —jai.
12 Icatsia, José jumaitsi:
—¡Jume! Apopaxaniajamë. Paxamë papatame maberenaje paneyapëtaenexa xua mapanacuapijiwi tsisajinatsije —jai José.
13 Icatsia, bajarapamonae jumecanawiata:
—Patajatuxanenë, paxanë raja doce paponënëbeje caenë papexinë, patajinawanapaewi Canaán nacuata. Paxanë caenë patayajuwënë, pepojuyapijinë, yajawanacopata pataxa. Itsanë pijinia baja cajena apopayajawajinawanapaenë. Tëpa tsaena —jai.
14 Nexata, bajarapaepatota José icatsia napëna jumaitsi:
—Xaniajanë baja pacuenia pacajumaitsitsi. Paxamë tsaena pataneya-enebiwimë —jai.
15 Icatsia, jumaitsi:
—Mapacueniaje pacajumexaniataenatsi panexaniajaicuene pepacuene. Faraón pewënëta pacajumaitsitsi majotawecuaje apopapitsapaemë baja tsane, itsa abaxë maberena apopacapatsimërena tsane panejuyapijinë. 16 Nexata, pa-itorobianame itsanë paxamëyajuwënënë pesiwaponaenexa panejuyapijinë. Paxamë panenacopabiwi panacopatsianame penaneconitsiwi pejebabiabibota, pepatsimatacabijawabelianexa panejuyapijinë. Nexata, bajarapacuenia pacajumexaniataenatsi panijaliwaisi, itsa paxaniajamë. Itsa pijinia apopatsi tsane panejuyapijinë, nexata pepacuene faraón pewënëta xaniajanë cajena. Pepacujiru paxamë saya pataneya-enebiwimë tsawanapae —jai José.
17 Bajarapacuenia pejumaitsicujinae José, xaniajai baja. Jeba daxitajiwiyobeje penaneconitsiwi pejebibota acueyabi pamatacabibejecuenia. 18 Itsiata baja, acueyabimatacabita José jumaitsi:
—Xanë raja tayaiyataenë Dioso. Mapacuenia pa-exanaenameje panetëpaeyaniwa. 19 Itsa pepacujiru paneyaiyataewi, nexata caenë nacopatsiana majotaje penaneconitsiwi pejebabiabibojawata. Pacacopatsianatsi paneponaenexa, panecaponaenexa pexaejawa panijabopijiwijawabelia. 20 Itsiata baitsi jane, panetocapatsiaremena panejuyapijinë, tayapëtaenexa panexaniajaicuene xua panejumaitsimë. Itsa jume, nexata patëpaename —jai José.
Nexata, bajarapamonae jejai, bajarapacuenia pexanaenexa. 21 Bajarapaepatota, najumaitsi tsaponae bajarapamonae José yabara:
—Pepacuene waxaitsi bitso pibisiacuene exanatsi wajajuyapijinëmijawabelia wajabejiobia-exanaejawata. Yapëtae-atatsi bitso napëna wajanacajumaitsijawa pejamatabëcuenebëjaijawata, itsiata, namuxujematatsi wajamonaenë. Bajarapacuenia tae-atatsi bitso pejunawijawa, waxaitsi bejiobia-exanatsi. Bajaraxuata, ajenaconoxaeta juya nacanajamatabëcuenematamota wajajamatabëcuenebëjainexa, wajajuyapijinëmi wajabejiobia-exanaejamatabëcuene —najai bajarapamonae.
22 Matapijinë Rubén nexata jumecanawiata mapacueniaje:
—Xanë baja cajena picani paca-itawetatsi pane-itsacueniabiyaniwa bajaraponëyo, wajaneconi wajanacatsijumajopaeyaniwa. Itsiata, apopanejumecowënëtsimë. Nexata xuata, wajaneconi bajaraponëyo wajabeyaxuabijamatabëcuene yamatamotsiaya juya nacatsijumajopa ajena —jai Rubén pejuyapijiwijawabelia.
23 Nexata, bajarapamonae jamatabëjumaitsi: «Apopanejumetae meta», jamatabëjai, tsipaji José barëcuaicuaijai pijamonae Egipto nacuapijiwi pijajumeta. Nexata, itsanë, peyajawanucaenë jumewajunupaebaponatsi José xua jumaitsi pematapijiwijawabelia. 24 José jumetaenuca picani. Bajaraxua José itsa jumetane bajarapamonae penajumaitsitsaponaejawa, itsabo-ënëjawabelia wecuanatsata, pija-epato penuenexa. Paepatota baja nuewereta, bajaraponë icatsia rena bajarapamonaejawaberena itsajotarena nubena. Icatsia, bajaraponë barëcuaicuaijai. Nexata, bajaraxuacujinae tsata Simeón pijamonaewecua. Bajarapamonae pitabarata itoroba pijajiwi pecëtsinexatsi. 25 Xuacujinae, José itoroba pijajiwi petowënëbinexa trigoxu pijadoruanëjawabelia. Itorobanua papalata matamota trigoxu petocanawiabinexa, caedoro canacujitsia petotsicuaibojebaponaenexa. Nexata, José pijajiwitonë muetsia jia bajarapapalata. Orijibia, itoroba perajutsinexa pexaejawa namuto-epatualia pexaejawanexa. Bajarapacuenia exana José pijajiwitonë. 26 Nexata, xuacujinae bajarapamonae jane baja caponalia pijatrigodoruanë petsijumacëbinexa pijaburronëxijawabelia. Bajarapamonae baja naropoba bajarajotawecua.
27 Itsa bajarapamonae pata itsajota majitsijitsia, nexata itsanë pijatrigodoro yawë-isica perajutsinexa pexaejawa pijaburro. Bajarajota, caxitajaraba pijapalata petotsicuaibobocaejawatsi pijadorowëwereca. 28 Nexata, pijamonaejawabelia jumaitsi:
—¡Maxuaje pataema! Xanë netotsiwëbuata tajatrigodorowëwereca tamatamotsipalatami trigo —jai.
Nexata, bajarapamonae jamatabëcuenenajunawiaca. Ayaicuenia bitso junawa. Nexata, bajarapamonae najumaitsi:
—¿Detsa xua Dioso manacato-exanaje? —najai.
29 Nexata, itsa baja pata Canaán nacuata, tsipaeba paxa Jacob-jawabelia daxita pacuenia tocopiapatatsi. Jumaitsi:
30 —Ponë pewetsinë bajarapanacua apopataneyaiyataewicuenia panejumaitsi: «¿Paxamë tsaja paneya-enebiwi paxanëjawaberena?», panejai pataponaexae bajarabelia. 31 Paxanë mapacuenia pajumecanawiatajëje: «Paxanë raja pepacuene jiwi patayaiyataewi. Paxanë cajena caeto-ata apopataya-enebiwi patanawajabitsaëtsiwajënaeya. 32 Paxanë raja doce papajiwinëbeje panacaemonaenë. Caenë papexinë. Itsanë raja paxanëjawata apoponaponae. Pepojuyapijinë raja yajawanacopata pataxa Canaán nacuajawatalia», pajanë baja. 33 Nexata, bajaraponë panejumaitsi: «Itsa pepacuene paxaniajamë jiwi paneyaiyataewi, nexata pepacuene pacopatsianame caenë xanëjawata penacopatsinënexa. Itsamonae baja paponaename panecaponaenexa trigo panijamonaenexa. 34 Jane baitsi, panetocaponaeremena panejuyapijinë. Nexata, pepacuene bajarapacuenia paxaniajamë tsane paxamë, itsa pepacuene paneyaiyataewi jiwi, itsanua apopataneya-enebiwimë. Bajarapacuenia matapania pacatocopatsianatsi panijamonaenë peponaenexa. Icatsianua pacacopatsianatsi, jamatejema panepatabiabinexa panecomuacaewi trigo», panejai Egipto nacua pewetsinë —jai paxajawabelia.
35 Nexata, bajarapacuenia petsipaebicujinae paxajawabelia, caenë canacujitsia, wecua-othoca pijatrigodoruanë. Bajarapaepatota, tane pijapalatadoroxi, caenë canacujitsia, papalatata picani matamoba trigomatamo Egipto nacuata. Bajarapacuenia petaexae palatadoroxi, nexata daxita najunawiaca bajarapaepatota. Junawa bitso paxa Jacob yajawa, Egipto nacua pewetsinë petaeyaniwatsi penacobetoxotsiwicuenia. 36 Jacob yabara bëjainua pexënato Benjamín, nexata jumaitsi pexijawabelia mapacueniaje:
—Paxamë baja panewecua-ajibia-exanaponame taxi. Bajarapitsinë José apoyajawajinawanapaetsi. Icatsia baja maje, Simeón-ata ajenaconoxae neto-ajibi. Panecopataponame baja taxinejewa. Aeconoxae baja icatsia pajitsipame patanewecuacapitsapaejawamë Benjamín. Nexata, paxamë bajarapacuenia patane-exanaejamatabëcuenemë, xanë bajaraxua najamatabëxainabiabajë —jai pexijawabelia.
37 Nexata, Rubén jumaitsi paxajawabelia:
—¡Jume! Xanë netocopatsianame tacato-ewetsinexa Benjamín pitsacueneyaniwa. Nexata, Benjamín itsa naponaena, xanë bajaraxua netsicarucaena ta-ewetsinexa. Itsa apocatocanawiatsi tsanetsi, nexata juya catocopatsianatsi nebeyaxuabinexa taxënatonëyobeje yamatamotsiaya —jai Rubén.
38 Itsiata, Jacob jumecanawiata mapacueniaje:
—Taxënato panejuyapijinë apocopatsinë tsane panecaponaenexa, tsipaji bajarapitsinë panejuyapijinë José tëpa, Benjamín pematapijinë. Aeconoxae Benjamín caenëyo netonacopata caewa pexënatobeje. Itsa naponaejitsipa, belia itsacuene tsipae namuto-epatualia. ¿Jica itsa itsacuene tsipae? ¿Dexua pa-exanaejitsipame? Paxamë baja payapëtaneme xanë baja perujunëyonëjawanë. Nexata, paxamë pacatsijumarucaejitsipa tanajamatabëxainaecobexae itsa yatëpaejitsipajë —jai Jacob.