Moisés penaexanaeliwaisi
2
Itsanë Leví pemomoxiyajuwënënë nacojioba pijawiriabitsaëtopijipetiriwayajuwënëwajawabelia. 2 Nexata, itsamatacabi bajarapowa nacoxita pebinëyo. Penaexanaematacabi itsa nacoxitane tsitapexanianëyotsi.a Nexata, pexënatonëyo muetsia bota nacoxiwitsataponapona acueyabi pajuametobejecuenia. 3 Itsiata baitsi jane, bajaraxuacujinae acuenebi matawëjëa muetsia pewitsataponaponaejawa bota. Nexata, itsamatacabi pexënatonëyo menejawata peyarutsinexa, pita beyoxobocuenia pecuejawaxaneto. Bajaraxua xaniawaetsia catsana pijawiriamawijawata, mera pejoneyaniwa. Bajaraxuacujinae, bajarapowa tsiquirinëyo buateta beyoxobo-ënëtuatuajëta. Nexata, bajarapowa yaruta Nilo mene-itapata, bethamanacuenejawanëtuatuajëta. 4 Nexata, xuacujinae bajarapowa jumaitsi pexënatoyo matapijiwajawabelia tsiquirinëyo petonaitaxutuaca-ewetaponaponaenexatsi muetsiacuenia, peyapëtaenexa xua tocopiapatsijitsiatsi bajarapanacuetonëyo.5 Peyarutsicujinae, bexëa faraón pexënatoyo nucaponareca Nilo mene-itapayabereca penawaenexa. Nexata, paepatota pijinia faraón pexënatoyo pewetsiwaxitsi bajarapamene-itapaya nubenaponaya, bajarapaepatota faraón pexënatoyo taeruta meneta beyoxobocuenia pecuejawaxaneto thamanatuatuajëjawata. Nexata, faraón pexënatoyo itoroba bajarapamonaeyajuwënëwa petocarenanexatsi. 6 Nexata, petocarenacujinaetsi, yamatapata. Tanenua peboquecaejawa tsiquirinëyo, penuenuquecaejawa-ata beyoxobojawa-ënëta. Nexata, faraón pexënatoyo tsitabejiobitsi bajarapanacuetonëyo. Jumaitsi:
—Marapanacuetonëyoje hebreowi pexënatonëyo. Bitso bejiobi tsanuquecae —jai.
7 Nexata, bajarapaepatota tsiquirinëyo pematapijiwa jumetaenuca faraón pexënatoyo pebejiobiataejawa. Nexata, cujirena pejumaitsinexa faraón pexënatoyojawabelia:
—¿Apocatsitaxanepanae tsaja tacatojunatsinexa hebreowiriawa pecatowitsatsiwanexa, jamatejema bajarapowa pecatonamirajutsinexa bajarapanacuetonëyo? —jai.
8 Faraón pexënatoyo pejumecanawiatsijawata jumaitsi:
—Je. ¡Siwaponare bajarapowa! —jai pejanawajawabelia.
Nexata, pejanawa siwapona tsiquirinëyo penajawabelia pejumaitsinexa. 9 Nexata, itsa barëpata baja, jumaitsi faraón pexënatoyo tsiquirinëyo penajawabelia:
—¡Mapanacuetonëyo pire! Netowitsatsianame. Xanë raja camatamotsianatsi taneto-ewetsijamatabëcuenemë —jai faraón pexënatoyo.
Nexata, bajarapacuenia tsiquirinëyo pena caponatsi petowitsatsinexa. 10 Itsa baja pejewaxinëyo witsabanajetaruca, itsa ayainëyo baja, nexata tocanawiata faraón pexënatoyojawabelia. Bajarapowa juya pita pexënatocuenia penacoxiyabinexa. Natowënëruba Moisés,b tsipaji bajaraponëyo yabara jumaitsi:
—Xanë raja jutajë menewecua —jai.
Moisés najetabijirawa Egipto nacua pewetsinëwecua
11 Itsa baja Moisés penaweretsinëc tsaponaponae, nexata itsamatacabi pitsapa pesiwaxainaenexa pijamonaewiriawi. Nexata, bajaraponë tane bajarapacujinaeta pijamonaewiriawi penacuenebia-exanabiabijawatsi ayaicuenia. Bajarapaepatota-ata, tane Egipto nacuapijinë pebeponaponaejawatsi hebreonë, Moisés pijamonaewirianë. 12 Nexata, bajaraponë Moisés xaniawaetsia nayajiwinaëcoba daxitayenepanajawa. Nexata, itsa bajaraponë apotae itsajiwiyo-ata bajarajota, nexata pijamonaenë yamatamotsiaya beyaxuaba Egipto nacuapijinëmi. Bajaraxuacujinae, mëthëta xuababuata tajetamaxëbëxëpana. 13 Icatsia xuacujinae, merawiapitsijawata Moisés pitsapa pesiwaxainaenexa pijamonaewiriawi. Nexata, bajarajota tane pijamonaenëbeje, nacaewirianëbeje, penabeponaponaejawabeje. Nexata, Moisés yanijoba penamaxëwanitsinë:
—¿Dexuajitsia xamë beponaponame nijawirianë? —jai Moisés.
14 Nexata, ponë beponapona jumecanawiatatsi:
—¿Jipatsa xamë cacopata majotaje nenamatacaitorobinënexa, patanenaneconitsia-exanaenexamë paxanëtuatuajëta? ¿Tsipaji tsaja icatsia najamatabëxainame tanebeyaxuabinexamë pacuenia beyaxuabame Egipto nacuapijinëmi? —jai bajaraponë Moisés-jawabelia.
Bajarapacuenia Moisés itsa jumetane, bitso junawa, tsipaji bajaraponë yapëtane baja pewënëtaejawatsi pebeyaxuabijawa Egipto nacuapijinëmi. 15 Nexata, Moisés pebeyaxuabijawa Egipto nacuapijinëmi belia wënëtanetsi faraón. Nexata, faraón itoroba pejaitsinexatsi Moisés, pebeyaxuabinexatsi juya. Itsiata, Moisés pewajënaeya najetabijirawa baja. Nexata, bajaraponë pona Madián nacuajawabelia. Nexata, bajaraponë itsa patanajetaruca baja Madián-jawata, ecajopa meramëthë imoxoyojawata.
Moisés napata Madián nacuatalia peponaponaenexa
16 Bajarapamatacabi pijinia Reueld ponapona Madián nacuata. Bajaraponë sacerdotenë. Xainaponaponanua siete powabeje pexi. Nexata, Moisés pepatsimatacabi, bajarapowaxi pona meramëthëjawabelia petowënëbinexa ovejabitsaëto mera piapaemonëjawata, paxa pija-ovejabitsaëto petorajutsinexa. 17 Itsiata bajarapijinia paepatota, bajarajotalia itsamonae oveja pewetawanapaewi bajarapowaxi wecuayorota, mera piabatsiyaniwa pija-ovejabitsaëto. Nexata itsiata, bajarapaepatota Moisés itsa tayeca, bajaraponë nonotabapuna, bajarapamonae pecuenecaranatsinexa. Bajaraxuacujinae, mera torajuta bajarapowaxi pija-ovejabitsaëto. 18 Bajaraxuacujinae, bajarapowaxi itsa baja nawiabaponalia paxajawabelia, nexata baja itsa palia, paxa yanijobatsi:
—¿Detsa xuajitsia ajena bitso bepijiayo paparemena? —jai.
19 Nexata, bajarapowaxi jumecanawiata paxajawabelia:
—Paxanë raja Egipto nacuapijinë paneyawenonaeya cueneyacaranata pamonae oveja pewetsiwi panetoyorota picani. Bajaraponë icatsia panetojuca mera, patanetorajutsinexa pataja-oveja piapaenexa —jai bajarapowaxi.
20 Nexata, Reuel jumaitsi pexënatowaxijawabelia:
¿Detsa jota nexata bajaraponë nuca? ¿Dexuajitsia nexata pacopatanuremelia pija-epato? ¡Naxatsia! ¡Pajunaremelia bajaraponë penaxaenexarena waxaitsita! —jai. Nexata, bajarapowaxi siwaponalia.
21 Bajarapacuenia Moisés bajarajota nacopatajopa, peponaponaenexa Reuel pijabojawata. Bajaraxuacujinae, Reuel rajuta pexënatoyo Séfora pepitsinexa pijawanexa. 22 Nexata, bajarapowa nacoxita. Xaina pexënatonëyo. Moisés bajaraponëyo wënëruba Gersón, tsipaji bajaraponëyo yabara jumaitsi: «Xanë raja taponaenë itsanacuajawawerena, tawarapaenëcuenia taponaponaenënexa apotayapëtaenacuata», jai.
23 Moisés baja pepuaponaponae bajayajebi Madián nacuata, bajarapamatacabianëjawa pijinia Egipto pepopeyanacua-ewetsinë baja tëpa. Itsiata, Israel-pijinë pemomoxi tsiteca amoneya tonacuenebawanapa ayaicuenia Egipto nacuapijiwi. Bajayajebi bajarapacuene petaeyabiabixae, bajarapamatacabijawa bajarapamonae wajëcabiaba Diosojawabelia penasiwajamatabëcuenebëjaijawa, pejamatabëcuenenuejawa-ata pecapanepaenexatsi bajarapapibisiacuenewecua. Nexata, Dioso jumetane bajaraxua, bitso najamatabëxainaeya pewajëcabiabijawa. 24 Nexata jane baja, bajaraPonë najamatabëcuenewereta peto-exanaenexa xua naliwaisicajunua Abraham, Isaac, Jacob-jawabelia. 25 Bejiobiatane Israel-pijinë pemomoxi pebejiobia-exanaejawatsi Egipto nacuapijiwi.