Dioso itoroba Moisés pematacaponaenexa Israel-pijinë pemomoxi Canaán nacuajawabelia
3
Pamatacabijawa Israel-pijinë pemomoxi bejiobia-exanawanapatsi Egipto nacuapijiwi, Moisés bajarapamatacabijawa paxuyo Jetroa to-ewetaponapona pija-ovejabitsaëto. Bajaraponë Jetro sacerdotenë tsaponaponae Madián nacuajawata. Nexata, itsamatacabi Moisés oveja pewetaponaponaenë najetaruca petusatonacuajawa. Belia baja, patajopa Dioso pijatsutojawabelia. Bajarapatsuto pewënë Horeb.b 2 Nexata, bajarajota tsitanaitajëtatsi Jehová pija-ángelnë bepetajueyecaenaemëyotuatuajëjawata. Moisés xaniawaetsia tane bajarapanaemëyo petajueyecaejawa. Itsiata, tajuenucae-ata, apoweriajawi bajarapanaemëyo. 3 Nexata, Moisés jamatabë-itsi: «¿Detsa xuajitsia meta naemëyo apoweriajawi tajueyecae-ata? Wetaejopaliajë nexata, xaniawaetsia tayapëtaenexa», jamatabëjai.4 Itsa nexata Jehová tane Moisés pecujitanajetarucaejawa petaenexa, junataxuabatsi Moisés pewënëta, petajueyecaenaemëyotuatuajëjawawerena:
—¡Moisés, Moisés! —jai tsaxuabi.
Nexata, Moisés jumecanawiata:
—Marajota nucajëje —jai.
5 Nexata, Dioso jumaitsi:
—¡Pëtsa matatoxenetsia nimoxoyoremena! ¡Nataxujonore nenataxuxatatsijawa taneyaiyataenexamë, tsipaji pa-irata nucame, xanë imoxoyojawata nucame! —jaitsi Moisés. Nexata baja, Moisés jejai.
6 Icatsia xuacujinae, Dioso jumaitsi:
—Xanë raja Diosonë, pijaDiosonë nijasalinaiwi. PijaDiosonë tsaponaponae Abraham, Isaac, Jacob-ata —jai Moisés-jawabelia.
Bajaraxua pejumetaejawata, Moisés na-itabaracaranataxuaba petaeyaniwa Dioso, tsipaji bitso cujunawa. 7 Bajaraxuacujinae, icatsia orijibia Jehová jumaitsi:
—Xanë raja xaniawaetsia taniji pacuenia bitso bejiobia-exanaponatsi tajajiwi Egipto nacuata pejinawanapaewi. Jumetanijinua tanewajëcaponaejawata tanejumaitsijawa pacuenia penamatacaitorobiwitsi bejiobia-exanaponatsi penacuenebia-exanaejawatatsi. Xanë xaniawaetsia yapëtaniji penabejiobitsicuenia pejinawanapaejawa. Nexata, xanë jumecowënëtsianajë tanewajëcaejawa. 8 Bajaraxuata, xanë runaicajë bajarapamonae tacapanepaenexa Egipto nacuapijiwi pecobewecua. Bajarapamonae raja jutsianajë Egipto nacuawecua tacaponaenexa itsa-irajawabelia. Bajarapa-ira piniji-iraxaneto. Pexania-ira itsajota daxitacuene naxaniababiaba pexaniacuenia, daxita pexaejawacuene-ata penawitsinacua. Rajutsianajë pejinawanapaenacuanexa itsajota jinawanapa maparucaeje: cananeomonae, heteomonae, amorreomonae, ferezeomonae, heveomonae, jebuseomonae-ata. 9 ¡Xamë taema mapacueneje! Xanë raja jumetaniji napëna tanewajëcaponaejawa Israel-pijinë pemomoxi. Tanijinua pacuenia Egipto nacuapijiwi bejiobia-exanabiaba ayaicuenia. 10 ¡Naxatsia baja! ¡Xamë bepijiayo ponare bajarabelia! Xanë ca-itorobatsi neponaenexa Egipto nacua pewetsinëjawabelia, nejutsinexa Egipto nacuawecua tajajiwi, Israel-pijinë pemomoxi —jai Jehová.
11 Nexata, Moisés jumaitsi Diosojawabelia:
—¿Detsa nexata xanë ponënë taneca-itorobimë taponaenexa faraón-jawabelia, tawecuajutsinexa Israel-pijinë pemomoxi? —jai Moisés.
12 Itsiata, Dioso jumecanawiata mapacueniaje:
—Xanë raja cayajawa tsanetsi. Pamatacabi netojutsianame Israel-pijinë pemomoxi Egipto nacuawecua, xamë matacarenamë tsane bajarapamonae mapatsutojawaberenaje. Nexata, mapatsutojawataje padaxitamë asiwaya panewajëcaename xanë Diosonë tawënëta yaiyataecuenia. Bajarapacuenia yapëtaename pexaniajaijawa taca-itorobijawa, tacayajawajawanua —jaiDioso.
13 Itsiata baitsi jane, Moisés jumecanawiata. Jumaitsi:
—Itsa baitsi jane, xanë ponaejitsipajë, itsa jumaitsinë tsipae Israel-pijinë pemomoxijawabelia: «Jehová, panijasalinaiwi pijaDioso, nitoroba paxamëjawaberena», itsa janë tsipae, nexata bajarapamonae itsa neyanijobijitsipa: «¿Detsa pawënë bajaraponë?», itsa nejai tsipae, nexata xanë, ¿depacuenia jumaitsinë tsipae bajarapamonaejawabelia? —jai Moisés.
14 Nexata, Dioso jumecanawiata:
—Xanë rabaja daxita matacabi tayamatacabitsitecaponaponaenë cajumaitsitsi. Nexata, jumaitsimë tsane bajarapamonaejawabelia: «Ponë pewënë, ‘Xanë rabaja tsaponaponae,’ pejaiwënënë, bajaraponë raja xanë nitoroba paxamëjawaberena», jamë tsane —jai Dioso.
15 Nexata, bajaraxuacujinae, icatsia Dioso jumaitsi Moisés-jawabelia:
—Xanë raja tawënë Jehová. Nexata, bajarapawënëta jiwi nejunatsiana daxitamatacabijawabelianexa. Nexata, jumaitsimë tsane Israel-pijinë pemomoxijawabelia: «Jehová Dioso, panijasalinaiwimi Abraham, Isaac, Jacob pijaDiosonë tsaponaponae, nitoroba paxamëjawaberena», jamë tsane. 16 ¡Nexata, ponare baja Egiptojawabelia necaetuatsinexa daxita pamonae ancianowi, Israel-pijinë pemomoxi pewetsiwi! Jumaitsimë tsane: «Jehová Dioso raja, wajasalinaiwimi Abraham, Isaac, Jacob pijaDioso, netsitanaitajëta. BajaraPonë yapëtane baja pacuenia Egipto nacuapijiwi pacabejiobia-exanawanapa. Nexata, pepacuene pacayawenonaena. 17 Paxamë papecabejiobia-exanaejawami Egipto nacuapijiwi bajaraPonë pacawecuajutsiana, papecacaponaenexa bitso pexanianacuajawabelia itsajota daxitacuene naxaniababiaba, pexaejawacuenenua penawitsinacua. Pacarajutsiana pijanacuami cananeomonae, heteomonae, amorreomonae, ferezeomonae, heveomonae, jebuseomonae-ata», jamë tsane —jai Dioso Moisés-jawabelia Israel-pijinë pemomoxi yabara.
18 Bajaraxuacujinae, Dioso jumaitsi:
—Bajarapacuenia netsipaebicujinae, nexata Israel-pijinë pemomoxi pija-ancianowi cajumecowënëtsiana. Nexata, bajarapamonae cayajawaponaena panetaenexalia Egipto nacua pewetsinë, panejumaitsinexa bajaraponëjawabelia: «Jehová Dioso raja, paxanë pahebreowinë patajaDioso, panetsitanaitajëta. Bajaraxuata, pajitsipajë patanecopatsinexamë pataponaenexa petusato nacuayabelia acueyabi pamatacabibejecuenia, bajarajotalia dajubi tajuitsiaya patarajutsinexa Jehová patajaDiosojawabelia», pajamë tsane faraón-jawabelia. 19 Xanë itsiata yapëtaniji bajaraponë xaniawaetsia jamatabëcuenexanepanaeya apopapecacopatsijawanexa, Egipto nacuawecua panepitsapaeyaniwa. Saya matapania xanë tacuenesaëta pacajutsianatsi. 20 Itsiata baitsi jane, xanë nacuene-itajëtsianajë pinijisaë taxainaenëcuene bajarapamonaejawabelia pinijicuenejawanë tatsita-exanaejawata. Nexata, tocopatsianajë Egipto nacuapijiwi petëpaenexa bajaraxuanëta. Bajaraxuacujinae, matapania pacacopatsiana panepitsapaenexa. 21 Itsiata baitsi jane, tajajiwi apocapitsapaenë tsane bepejiobiwicuenia. Xanë tocopatsianajë Israel-pijinë pemomoxijawabelia asiwayacuenia petaenexatsi, jamatejema perajutsinexatsi pexainaeyajuwënëjawanë, pepitsapaeyaniwa cobesac Egipto nacuawecua. 22 Nexata, caewa canacujitsia wajëcaena xuanë exana palatananitota, xuanë-ata exana oronanitota, penaxatabijawanë-ata, bajaraxuanë pejumaxatabaponaenexa pexi. Bajaraxuanë wajëcaena pewënapetiriawijawabelia Egipto nacuapijiwi, pamonae pijabomuxuneneta pejinawanapaewi, peyajawajinawanapaewinua caebota. Bajarapacuenia jamatejema Israel-pijinë pemomoxi wecuanotsiana pexainaejawanë Egipto nacuapijiwi, bepecuene-amoneyabiwicueniad penawajabitsaëtsijawata —jai Dioso Moisés-jawabelia.