Levítico
Dioso petonajumecopatsiliwaisianë pijasacerdotewinexa
Pacuenia exanaejitsia itsa totajuita dajubi Jehovájawabelia yabara peliwaisi
1
Jehová pijacarpabo-ënëwerena junataxuabatsi Moisés. Nexata, jumaitsi mapacueniaje:2 —¡Netsipaebijawata israelitamonaejawabelia, jumaitsimëre mapacueniaje: «Pajiwiyo paxamëyajuwënëjiwiyo capatsijitsia dajubi rajutsiaya petajuitsinexa xanë Jehovánëjawaberena, nexata capatsiana vaca, itsa jume, oveja-ata —jamëre!
3 »Nexata, itsa capata dajubi sacerdotenë daxitanë petotajuitsinexa altar-jumata pijaneconijamatabëcuene, capatsiana vaca pebito, daxitanë peperabëxanepanaenëyo.a Padajubi totajuitsijitsia tawënëta xaniawaetsia tasiwabarëyanexa, bajarapajiwiyo becapata bajaraponë tajacarpabo peyacaranatsijawa pejonebaupa imoxoyojawata. 4 Bajarajota, pecapatsinë tsimatanacobebuatsiana petotajuitsinënexa pijaneconimi petsijumaxuabinexa. Nexata, bajarapacuenia itsa exanaena, dajubi petajuitsijawata siwajamatabëbarëyanë tsane. Siwajamatabëcuenecaewianajënua pijaneconimi. 5 Bajarapadajubi pecapatsinë wësinepecaucutsiana pebeyaxuabinexa xanë taitabarata. Bajaraxuacujinae, Aarón pexi, sacerdotewi, waxiyota pejana caewetsiana. Bajarapajanata pa-altar-jawa nuca tajacarpabo panabota jumatsicabiana pecobeta daxitayenepanabeje matatoyorotsia. 6 Nexata, ponë capatajoparena dajubinë, daxitanë petotajuitsinexatsi, copiaya boconotsiana petajuitsiwajënaeya. Bajaraxuacujinae, xaniawaetsia icatsia thabiana. 7 Sacerdotenë pijinia itajurutsiana isotoxaneto altar-bëxëpanawetsina. Bajarapacuenia iso xaniawaetsia tsitaxatabiana. 8 Bajaraxuacujinae, Aarón pexi, sacerdotewi, najumajebiana xaniawaetsia pethabijawanë bajarapa-isotota petajuitsinexa. Mapacueniaje pajebaponaename: copiaya pematabocoto. Bajaraxuacujinae, daxita panasitsijawanë najetarubena piënëjawata. 9 Nexata, dajubicapatsinë bequiata xaniawaetsia piënëjawanë, bajarapacuenia petopabeje, pemaxëbeje yajawa. Bajaraxuacujinae, sacerdotenë totajuitsiana bajarapadajubiyo altar-jumawereca. Bajarapacuenia jiwi be-exana pacujinae capata vaca pebito petotajuitsinexatsi daxitanë pijaneconi yabara. Nexata, bajarapacuenia jiwi itsa exana petotajuitsijawata, pexaniatuxusi netonaexanaejitsia, tasiwabarëyanexa tanerajutsinë», —jai Jehová Moisés-jawabelia, petsipaebinexa israelitawijawabelia, vaca pebito petajuitsijawa yabara.
10 Icatsia, Jehová jumaitsi Moisés-jawabelia:
—Itsa pijinia capatsipa ovejayo, itsa jume, chivoyo sacerdotenë petotajuitsinexatsi, nexata bajarapajiwiyo capatsiana dajubi pebitoyo, daxitanë peperabëxanepanaenëyo. 11 Nexata, bajarapadajubinëyo wësinepecaucutsiana, pebeyaxuabinexa altar-muxuneneta pecujuanenia,b xanë, Jehovánë, taitabarata. Nexata, Aarón, pexi sacerdotewi, bajarapadajubijanata jumatsicabiana pecobeta daxita bajarapa-altar-jawa matatoyorotsia. 12 Nexata, xuacujinae dajubicapatsinë bajarapadajubinë thabiana pexaniacuenia. Nexata, sacerdotenë jebiana pethabijawanë altar-jumawereca, bajarapawi petajuitsinexa pa-iso tsibëxëpanaxataba. Bajarapacuenia copiaya buatsiana pematabocoto, xuacujinae piënënasitsijawanë yajawa. 13 Xuacujinae, dajubicapatsinë bequiata merata xaniawaetsia piënëjawanë, petopabeje, pemaxëbeje yajawa. Nexata, xuacujinae sacerdotenë bajarapacuenia totajuitsiana daxitanë altar-jumawereca. Bajarapacuenia jiwi be-exana pacujinae capatsijitsia oveja, chivo-ata pebito, petotajuitsinexatsi pijaneconi yabara. Nexata, bajarapacuenia jiwi itsa exana petotajuitsijawata, pexaniatuxusi netonaexanaejitsia, tasiwabarëyanexa tanerajutsinë —jai Jehová Moisés-jawabelia, petsipaebinexa israelitawijawabelia, oveja, chivo-ata, petajuitsijawa yabara.
14 Icatsia, Jehová jumaitsi:
—Itsa pijinia capatsipa pepunaenë petotajutsinexatsi Jehovájawabelia pijaneconi yabara, nexata becapata anijawiria-ucucutobeje, tsiquiriwiria-ucucutoyo,c pecunuawiria-ucucuto pejananë. 15 Nexata, bajarapa-ucucutoyo petajuitsinexa altar-jumata, sacerdotenë wësitananaena. Bajaraxuacujinae, janayujucaena, petsicabinexa altar-yenepanajawata caeyenepanajawabelia. Xuacujinae jane baja, totajuitsiana altar-jumata. 16 Petajuitsiwajënaeya bajarapa-ucucutoyo, daxita xua xaina pecuaibonaxaebëjawata jutsiana. Bajaraxua xuabiana altar-yenepana tabujawabereca, payenepananenia penetabiaba pejutsi-ipumana altar-jawawecua. 17 Xuacujinae, namata-enetsiabb eje pecobetabeje corafewaetabiaya tupatitinaponaereca, tupa tsatsinejewa daxitanëyo. Bajaraxuacuijinae, matapania jane baja, sacerdotenë totajuitsiana daxitanë patajueyecae-iso altar-jumata. Bajarapatajuitsijawa pexaniatuxusi netonaexanaejitsia, tasiwabarëyanexa tanerajutsinë —jai Jehová Moisés-jawabelia.
C2-C7 […]