Moisés jane baja caxatabiaya nacuenebanuta Dioso pijacarpabo
40
1-15 […] 16-17 Nexata, Israelitawi itsa baja xaina anijawaibeje pepitsapaecujinae Egipto nacuawecua, pejanawai petaxuxuabijuametota copiayamatacabijawata, Moisés jane baja, matapania xatabiaya tonacuenebanuta Jehová pijacarpabonexa. Daxita pitorobicueniatsi to-exana. 18 Nexata, Moisés jane baja, tobarënacuenebanuta Jehová pijabonexa. Tsiwajënaejebanajetaruca itsajota tabunubijitsia tablapanë. Bajaraxuacujinae, patablapanë nubapona bajarapatsiwajënaejebitabunëjawawereca, botabuyenepana pexanaenexa. Bajaraxuacujinae nexata, pe-epatajërëtsinaebonë ruba bajarapanubitablapanëyenepanata petsiwajënaerubiwojotualia, bajarapayenepananë piababanexa. Bajaraxuacujinae, naesiturutonë jane baja nuba bajarapacarpabo epatajërëtsialia yatu-ucutsiaya itsajota rutsijitsia peya-itacaranatsipanabeje. 19 Nexata, bajaraxuacujinae bajaraponë daxita carpabo juma-acata bëpënëa pexaniawiriapananëta. Bajarapacuenianua jane baja, daxita carpabo pejumawereca juma-acata dajubibocotonëmi pejorocaepananë. Daxita pacuenia Jehová itorobatsi, bajarapacuenia Moisés exana.20 Bajaraxuacujinae, Moisés pita jane baja bajarapa-ibopanayobeje itsajota yaquinaruta Jehová petonajumecopatsiliwaisitsi penajumeliwaisicajonecuenia israelitawijawabelia. Nexata, bajaraponë buata bajaraxuabeje Jehová penajumeliwaisixaniawaetsibaula-ënëta pexaniawaetsinexa. Bajaraxuacujinae, bajaraponë epatajërëatsialia ruliabeje peyawëtacaraponaenaebobejenexa petsiwajënaerubiwojotualia bajarapabaulamuxunenialiabeje. Bajaraxuacujinae pijinia, pematatsënëwereca buata pematapa, Jehová jiwi pijaneconimi pesiwajamatabëcuenecaewimatapanexa. 21 Nexata, xuacujinae jane baja, caponaya Jehová pijabaula carpaboxaneto-ënëabetsia, pebuatsinexa cotocaewi peyatu-ucutsi-ënëjawabetsia. Bajaraxuacujinae, bajaraponë caranataruta pitacaranatsipananexa petsiwajënaenubinaesiturutonëjawata. Bajaraxuacujinae, Jehová penajumeliwaisixaniawaetsibaula buata bajarapayatu-ucutsipana pënëwetsica. Nexata, pacuenia Jehová itoroba, bajarapacuenia Moisés exana.
22 Bajaraxuacujinae, pan pejebabiabimesanexa nuta pecujuaneniaa peya-itacaranatsipanajawa pënëwereca. 23 Mesajumawereca jane baja, jeba pan Jehová pitabarata. Pacuenia baja Jehová itoroba, bajarapacuenia Moisés exana.
24 Bajarapacuenia nuta jane baja pitayotsicandelabrojawa bajarapabo-ënëyenepana ununenia, pan pejebabiabimesa rowialia.
25 Bajaraxuacujinae jane baja, candelabrojawa itayotanuta Jehová pitabarata, pacuenia Moisés itorobatsi bajaraxua pexanaenexa.
26 Oronanitota pexanae-altar-jawa nuta baja bajarapabo-ënëjawalia, peya-itacaranatsipana pënëwetsica. 27 Nexata, bajarapa-altar-jumata tajuita pexaniawiriatuxujuwijawa inciensopërëjawanë pacuenia Jehová tonajumecopatatsi.
28 Bajaraxuacujinae, Moisés ruta bajarapacarpabo pijabaupajawata pitacaranatsipapaëbërëpana. 29 Bajaraxuacujinae nexata, icatsia nuta jane baja dajubi petajuitabiabi-altar-nexa bajarapacarpabo matatoyorotsia peyacaranatsibaupajawata. Bajarapa-altar-jumata Jehová pewënëta dajubi tajuita pijaneconijamatabëcuene. Itsanë pijinia tajuita Jehová pesiwajamatabëcuenecaewixaetsi pijaneconimi. Bajarapacuenia tajuita trigobeno-ata, ofrendacuenia perajutsinexa Jehovájawabelia, pacuenia baja itorobatsi Moisés.
30 Bajaraxuacujinae pijinia, eta jane baja penacobequiatsiwaxixaneto palanganawënëjawa bajarapacarpabopijipanabojawata, altar-beje, carpabobejetuatuajëta. Nexata jane baja, mera wënëtanuta, bajarapamerata penacobequiatabiabinexa.
31 Bajarapapalanganawecua mera puatabiabiana Moisés, Aarón, bajarapacuenia Aarón pexi-ata, bajarapamonae penacobequiatabiabinexa, penataxuquiatabiabinexa-ata. 32 Bajarapamonae paepatota jonejitsia Jehová pijacarpabojawabelia copiaya nataxuquiatsijitsia. Nacobequiatsijitsianua. Bajarapacuenia exanabiabiananua paepatota piniji-altar-jawata dajubi tajuitabiabijitsia. Pacuenia Jehová tonajumecopatatsi Moisés, bajarapacuenia bajarapamonae exana.
33 Xuacujinae, pecopiarucaejawa jane baja, Moisés ruta peyacaranatsilinowiriapana daxita carpabo matatoyorotsia altar yajawa peyacaranatsipananexa, xaniawaetsia bajarapabopanabo penayapëtaenexa peyacaranatsijawa. Nexata, itsaxuayolia joneyabiabijitsia, bajaraxuayolia pijinia itsawiriapanayo ruta baupanexa. Nexata, daxita yamatacaranata. Bajarapacuenia nexata, Moisés wereta daxita bajarapabo penacuenebijawa Jehová pijacarpabonexa.
Dioso piapiapajubota rucabiabica carpabomatatsënëta
Taemanua Núm. 9:15-23
34 Itsa baja, Moisés carpabo wereta, nexata jane baja, Jehová pijapiapiapajubo mata-acata bajarapabo. Bajarapacueneta-ata ënëwënëcanua Jehová pijapenivenivenaecotia. 35 Moisés nexata apocaëjëpaetsi pejonejawa bajarapabo-ënëjawabelia bajarapapajubo pejamatabëcuene, tsipajinua bajarapabo-ënë wënëca bitso Jehová pijapenivenivenaecotia. Nexata, apocaëjëpaetsi bajaraponë pejonejawalia. 36 Nexata, bajarapamatacabijawaweliacujinae, bajarapapajubojawa itsa nayotabiaba bajarapabowecua, nexata bajarapamonae pejinawanapaecarpaboxi saracabiaba pexaniawaetsinexa, pecaponaenexa itsajawabelia. Nexata, bajarapapajubo pënaponabiaba. 37 Paepatota abaxë bajarapapiapiapajubojawa aponayotabiabi, nexata bajarapamonae abaxë jinawanapabiaba bajarajota. Abaxë jamatabëcuene-ewetabiaba bajarapapajubo penayotsijawa icatsia peponaenexa. 38 Nexata, bajarapamonae daxita pijanamuto Canaán nacuajawabelia bajarapacuenia exananajetarubena. Bajarapamonae-ata bajarapacuenia taenajetarubena Jehová peyajawajawatsi pajubota. Nexata, pacujinae pijinia rucajopa, nexata Jehová pajubota rucabiabajopa pijacarpabo matatsënëwetsica daxitamatacabijebi, bajarapacuenia merawi-ata bepetajueyabiabarucaenaesituruto bajarapapajubo. Bajarapacuenia yapëtane bajarapamonae Jehová peyajawacuenetsi.