4
Nexata, Moisés jumecanawiata:—Bajarapamonae raja aponejumexaniatae tsane. Aponemuxuna-ewetsinua tsane xua jumaitsinë. Biji saya caranata, nejumaitsi tsane: «Jehová raẽta apocatsitanaitajëtsi», nejai tsane —jai Moisés.
2 Nexata, xuacujinae Jehová yanijoba:
—¿Detsa xua canucame necobeta? —jai.
Nexata, Moisés jumecanawiata:
—Tajanaebo raja —jai.
3 Nexata, xuacujinae Jehová itoroba:
—¡Nijanaebo xuare irabelia! —jai.
Nexata, Moisés pijanaebo xuaba irabelia. Bajarapaepatota, bajaraponaemi naexanajunua jomo. Moisés pecowëyabelia najetabijirawa jomowecua pecujunawijawata. 4 Itsiata baitsi jane, icatsia Jehová jumaitsi:
—¡Nacobeyoremelia jomo nebosowaetabinexa! —jai.
Nexata, Moisés jejai. Nacobeyolia pebosowaetabinexa. Pebosowaetabijawata jomo, bajarapaepatota icatsia naebo naexanajunua pecowëcuenia.
5 Nexata, Jehová jumaitsitsi:
—Bajarapacuenia itsa tsita-exanaename nijamonae pija-ancianowijawabelia, cajumexaniataena tacatsitanaitajëtsijawa Jehovánë, nijasalinaiwimi Abraham, Isaac, Jacob-ata pijaDiosonë —jai. 6 Bajaraxuacujinae, icatsia Jehová jumaitsitsi:
—¡Aeconoxae, nacobexataremelia nemipabëjawalia nijacamisa bëxëpana! —jai.
Moisés bajarapacuenia nacobexatalia pemipabëjawalia. Itsa baja nacobejurena, bajaraponë nacobetane bitso pecobetsabanaejawa. Nexata, bajaraponë pecobetsabanaeleprawënëjawa cobeniopona bitso.
7 Nexata, icatsia Jehová jumaitsi:
—¡Icatsia nacobexataremelia nemipabëjawalia! —jai.
Nexata, Moisés icatsia nacobejeya. Itsa baja nacobejurena pemipabëjawawecua, cobexanepana baja icatsia pecowëcuenia. Pacuenia daxitaperabëto perabëxanepana, bajara-icatsia itsi.
8 Xuacujinae, icatsia Jehová jumaitsi:
—Itsa copiayapijicuene netsita-exanaejawata apocajumexaniatae tsane pacuenia jumaitsimë, nexata cotocaewipijicuene netsita-exanaejawata cajumexaniataena. 9 Itsiata baitsi jane, itsa tsitecaeya apocajumexaniatae tsane bajaraxuabeje netsita-exanaejawata, nexata bajaraxuacujinae mera puatsianame menejawawetsina. Bajarapamera epatajarabaxuabianame irabelia. Nexata, meranëmi naexanajonena pejanara —jai Jehová.
10 Nexata, Moisés jumecanawiata:
—Yee, Tajatuxanenë, ¿depacuenia xanë exanaenajë, itsa aponetoyapëxanepanabiabi pexaniacuenia tacuaicuaijaijawa? Bajaraxua aponetocopiapatsi matapania caniwi, ajena-ata. Saya cajena bajayajawawerena bajaraxua itsinë tsaponaponae pejewaxinënëjawawerenacujinae. Nexata, paepatota cuaicuaijanë jiwijawabelia, xanë nejume-arëbabiaba —jai Moisés.
11 Itsiata baitsi jane, Jehová jumecanawiatatsi mapacueniaje:
—¿Jipatsa nexata jiwicuaibowojo exana? ¿Apoxanë tsaja? Xanë raja necuenecaëjëpa tacopatsinexa itsamonae apopenatsipaebiwinexa, bajarapacuenia itsamonae-ata apopejumetaewinexa, bajarapacuenia pitaxutotsëcënaewinexa-ata, bajarapacuenia itsamonae-ata petaewinexa. ¿Denexata pacuenia xamë netaneme? ¿Ponë apopecuenecaëjëpaenëtsicuenia? Xanë raja Jehovánë tanecuenecaëjëpaenë. 12 ¡Nexata, ponare baja! Xanë raja cayajawa tsanetsi. Nexata, paepatota cuaicuaijamëjitsia, cacujarubianatsi xua jumaitsimëjitsia —jai Jehová.
13 Orijibia icatsia Moisés jumaitsi:
—Yee, Tajatuxanenë, xanë baitsi jane cajena taponaejawa apojitsipaenë. Pexaniacuene neto-exanaename. ¡Itsajiwiyo itorobare peponaenexa! —jai.
14 Nexata, xuacujinae Jehová anaepana Moisés-jawabelia. Jumaitsi:
—Xanë raja yapëtaniji nematapijinë Aarón, Leví pemomoxiyajuwënënë, xaniawaetsia pecuaicuaijainë. Bajaraponë cato-itapetatsi pecatocuaicuaijainënexa. Bajaraponë raja najetaruca xamëjawaberena pecacaxitajarabinexa. Nexata, bajaraponë itsa cacaxitajarabiana, pecataexae bitso jamatabëcuenebarëya tsane. 15 Nexata, bajaraponëjawabelia tsipaebianame paliwaisi jumaitsijitsia jiwijawabelia. Nexata, xanë pacayajawa tsanetsibeje paepatota pacuaicuaijamëjitsiabeje. Pacatsitajëtsianatsibejenua pacuenia pa-exanaejitsiamëbeje. 16 Nexata, xamë jumaitsimë tsane Aarón-jawabelia bexanë tacuaicuaijaicuenia pejumetaenexa. Nexata, xamë nejumaitsicowëya, Aarón cuaicuaijai tsane bajarapamonaejawabelia, pacuenia xamë tsipaebame. 17 Nexata, caponaename mapanaeboje, panaebota tsita-exananajetarucaejitsiamë pinijicuenejawanë, jiwi caeto-ata apopetaejawanë, pejamatabëcuenenabenajacaeya-exanaejawanënexa —jai Jehová. Matapania Moisés jejai.
Moisés nawiata baja Egipto nacuayaberena
18 Moisés nexata nawiata paxuyo Jetro pijabojawabelia. Bajarajotalia bajaraponë jumaitsi:
—Maraeta baja nawiatsianajë Egipto nacuajawabeliaje itsajota jinawanapa tajamonaewiriawi. Jitsipajë raja tataejawa bajarapamonae itsa abaxë jinawanapa —jai.
Nexata, Jetro jumecanawiata:
—Ponaename baitsi baja pexaniacuenia —jai.
19 Nexata, itsa abaxë Moisés ponapona Madián nacuatalia, Jehová jumaitsitsi:
—¡Nawiare Egipto nacuajawabelia, tsipaji rabaja, tëpa pamonae picani cabeyaxuabijitsia! —jai.
20 Nexata, Moisés barëpona pijawa, pexi-ata. Tsijumajebaya burrojumabetsia. Bajaraxuacujinae baja, barëpitsapa pebarënawiatsinexa Egipto nacuajawaberena. Bajaraponë cobenanajetaruca Dioso pijanaebo. 21 Bajaraxuacujinae, Jehová jumaitsi Moisés-jawabelia:
—Itsa patsianame Egipto nacuajawata, nexata nucaename faraón pitabarata netsita-exanaenexa daxita papinijicuene cayajawacopatatsi, tacacuenecaëjëpaeya-exanaejawanë tacuenesaëta. Xanë raja juya bajaraponë ajamatabëcuenetajaya-exanaenajë. Nexata, bajaraponë apocopatsi tsane pepitsapaenexa nijamonaewiriawi, Israel-pijinë pemomoxi. 22 Nexata, jumaitsimë tsane faraón-jawabelia: «Cajumaitsi raja Jehová: ‘Israel raja pemomoxi betaxënato matapijinëcuenia taeyabiabajë, asiwaya tayawenonaenexa. 23 Cajumaitsitsi baja necopatsinexa pepitsapaejawa betaxënatomatapijinëcuenia tataewi, jamatejema penajamatabë-itajëtsinexa tane-asiwajawa xanëjawaberena, yaiyataeya-ata taneto-exanawanapaenexa tajitsipaecuenia. Itsa aponetocopatsimë tsane pepitsapaenexa, nexata xanë catobeyaxuabianatsi nexënato matapijinë,’ cajai raja», jamë tsane faraón-jawabelia —jai Jehová Moisés-jawabelia.
24 Bajarapamonae penajetarubenaecujinae namutua, Moisés itsajota barënacopatajopa pebarëmajitsinexa, bajarajota picani Jehová patajopa pebeyaxuabinexa Moisés, pexënato matapijinë apopebo-upiperabëcaucutsixae. 25 Nexata, Moisés pijawa Séfora bajarapaepatota pexiujai-iboto pexanaecusiupa pita. Nexata, pexënato bo-upiperabëcaucuta. Bajaraxuacujinae, bajarapowa bajarapabo-upiperabëtoyo tsitaxuxuaba pamona Moisés petaxujawabelia. Nexata, bajarapowa jumaitsi:
—Xamë cajena tamonamë pepacujiru pejana bitso netaejitsipaenë —jai pexënato pebo-upiperabëto petsitaxuxuabijawata.
26 Itsiata, Jehová apobeyaxuabi Moisés. Copatatsi itsiata peponaenexa Egipto nacuajawabelia. Pacujinae Séfora jumaitsi pamona yabara: «tamona bitso pejana petaejitsipaenë», jai pexënato pebo-upiperabëcaucutsijamatabëcuene.
27 Moisés itsa aponaropotsi abaxë Egipto nacuajawabelia pepatsinexa, bajarapamatacabijawa Jehová jumaitsi Aarón-jawabelia:
—Ponaename petusato nacuajawabelia necaxitajarabinexa Moisés —jai.
Aarón nexata pona bajarabelia pecaxitajarabinexa Moisés. CaxitajarabaDioso pijatsutojawatalia, Horeb-tsutojawata. Bajaraponë bajarajota bajacoba itabaratsutsuniaya. 28 Nexata, Moisés tsipaeba Aarón-jawabelia daxitaxua jumaitsitsi Jehová, pacuenianua tonajumecopatatsi pejumaitsinexa. Bajarapacuenianua tsipaeba daxita papinijicuene itorobatsi pexanaenexa Egipto nacuatalia. 29 Xuacujinae, bajaraponëbeje nawiatabeje Egipto nacuajawaberena. Bajarajota, caetuata daxita pamonae ancianowi, Israel-pijinë pemomoxi pewetsiwi, Jehová pitorobicueniatsibeje petsipaebinexa. 30 Aarón tsipaeba bajarapamonaejawabelia daxitaxua Jehová jumaitsi Moisés-jawabelia. Bajaraxuacujinae, tsita-exana daxita papinijicuene tocopatatsi pexanaenexa bajarapamonae pitabarata. Nexata, daxitajiwi pepocuene tane pija-itaxutocujaya.
31 Nexata, bajarapamonae jumexaniatane Jehová pitorobijawatsibeje. Itsa jumetane Jehová petaeyabiabijawatsi pacuenia Egipto nacuapijiwi bejiobia-exanawanapatsi, itsa jumetanenua pacuenia Jehová najamatabëcuenewereta peyawenonaenexatsi, nexata bajarapamonae yaiyataecuenia nubena nabëxëtsutsiaya pexaniajamatabëcuene perajutsinexa pewajëtsijawata Jehovájawabelia.