Moisés, Aarón-beje tsipaebabeje faraón Dioso petonajumecopatsiliwaisi
5
Petsipaebicujinaebeje Israel-pijinë pemomoxipiji-ancianowijawabelia, bajaraxuacujinae jane baja, Moisés, Aarón-beje ponabeje Egipto nacua pewetsinëjawabelia, pejumaitsinexa Dioso petonajumecopatsiliwaisitsi. Jumaitsibeje:—Jehová raja cajumaitsi mapacueniaje, Israel-pijinë pemomoxi PijaDioso: «Copatsiana baja tajajiwi peponaenexa petusatonacuajawabelia, bajarajotalia pexanaenexa fiesta nenajamatabënapitsiaya tawënëta», cajai raja Jehová —jaibeje faraón-jawabelia.
2 Itsiata baitsi jane, Egipto nacua pewetsinë jumecanawiata mapacueniaje:
—¿Detsa ponë pija Jehová tajumecowënëtsinexa, tatocopatsinexanua Israel-pijinë pemomoxi peponaenexa petusato nacuajawabelia? Xanë cajena bajaraponë Jehová apoyapëtaenë. Itsiata, apocopatsinë tsane Israel-pijinë pemomoxi peponaenexa petusato nacuajawabelia —jai faraón.
3 Nexata, bajaraponëbeje jumaitsi:
—Paxanë paHebreomonaenë patajaDioso panetsitanaitajëtabeje. Pane-itorobanua pataponaenexa petusatonacuajawabelia, tajuitsiaya patarajutsinexa dajubi patajaDioso Jehovájawabelia. Nexata, bajaraxuata paponaejitsianë petusatonacuajawabelia, pataponaenexa bejamatabëcujiru acueyabi pamatacabibejecuenia. Bajarajotalia, pa-exanaejitsianë patajaDioso patane-itorobicuenia. Itsa nexata apopato-exanaenë tsipae bajarapacuenia, nexata bajaraPonë caëjëpatsi patanewerebiabijawa wixaeta, itsa jume, wajabitsaëwi panetsi-itorobijitsipa patanewerebiabinexa —jaibeje.
4 Itsiata baitsi jane, Egipto nacua pewetsinë, faraón, jumaitsitsibeje:
—¿Dexuajitsia paxamëbeje maberenaje papatamebeje, mapamonae panecopabia-exanaenexabeje penacuenebijawa? Panawiatsianamebeje icatsia pane-itorobinexabeje bajarapamonae icatsia penacuenebawanapaenexa. 5 Maparucaeje bitso baja ayaibitsaëtoxaneto panijamonae Israel-pijinë pemomoxi amoneya panetonacuenebawanapa picani, itsiata paxamëbeje pacueneyacaranataponamebeje rowia patanetonacuenebawanapaeyaniwa —jai faraón.
Faraón orijibia bejiobia-exana Israel-pijinë pemomoxi
6 Nexata, bajarapamatacabi faraón itoroba pijajiwi peliwaisinamatacaitorobiwi amoneya penacuenebawanapaewijawata, bajarapacuenia pamonae-ata Israel-pijinë pemomoxiyajuwënëwi penamataca-asaëwi pitorobabiabinexa penacuenebibitsaëtonë penacuenebijawata. Nexata jumaitsi:
7 —¡Mapamatacabijawaweliacujinaeje pëtsa bajarapamonae patocapataponame pebacamësi peyajawamatajërëabinexa tsorobo, pexanaenexa adobe, pacuenia pato-exananajetarubename picani copiaya! Bajarapamonae saya pijacujaya pebacamësi natojaitsiana. 8 Itsiata baitsi jane, pa-itorobianame pejutaponaenexa pa-adobewajëto jutabiaba caematacabita copiayami. Apoxanepanae tsane pesajinaejawa cae-adobe-ata. Bajarapamonae tsaena afaetabi, bajaraxuata nejumaitsi tsaponae ajumesaëya mapacueniaje: «Ajenaconoxae paponaenajë petusatonacuajawabelia, bajarajotalia tajuitsiaya patarajutsinexa dajubi patajaDiosojawabelia», nejai tsaponae. 9 ¡Nexata, bajarapamonae bitso asaëyata panacuenebia-exanare, pecuenesajinawanapaeyaniwa, penamuxuna-ewetsiyaniwa, Moisés penajumetsënëtsiliwaisi! —jai faraón pijajiwijawabelia.
10 Jejai bajarapamonae. Nexata, bajarapacujinae pona faraón pijajiwi, peliwaisinamatacaitorobiwi amoneya penacuenebawanapaewi, bajarapacuenia penamataca-asaëwi penacuenebiwibitsaëtonëjawata, pejumaitsinexa Israel-pijinë pemomoxijawabelia:
—Faraón raja panetonajumecopata patacatsipaebinexa patacarajutsiyaniwa pebacamësi. 11 Nexata, ajenaconoxaeta paxamë panijacujaya pebacamësi panatosiwaponabiabianame panejaitsinexa. Itsiata baitsi jane, pebaxumësi apopacatocapatabiabi-atatsi tsane, apopacatotixitsitsirena tsane, tsitecaeya pajucaponaename pa-adobewajëtonë pajutabiabame copiayami, —jai pijajiwi.
12 Nexata, bajarapamonae Israel-pijinë pemomoxi natsaneca daxita Egipto nacuajawa pejaitsiwi ëpo̱namatabacaxi, penacopabijawaxi pejuetsicujinae, pecanacuenebijawami pebacamësi. 13-14 Nexata, caematacabi canacujitsia faraón pijajiwi penamatacaitorobiwi asaëya itorobapona penamataca-asaëwi penacuenebibitsaëtonëjawabelia. Jumaitsi tsaponae:
—¡Paweretabiabare patacatocaëjëtsicuenia panenacuenebijawa, xuawajëto pacatocaëjëtatsi adobe panejutsinexa! Pacuenia picani copiayami pajutaponame, pacujinaeta abaxë pebacamësi pacarajutabiabatsi —jai tsaponae farón pijajiwi. Nexata, itsa Israel-pijinë pemomoxi apojutaponae adobe petocaëjëtsicueniatsi, nexata faraón pijajiwi jumaconibabeponatsi Israel-pijinë pemomoxi pitapetsiwitsi penamataca-asaëwinexa penacuenebibitsaëtonëjawata. Jumaitsinua tsaponae:
—¿Detsa xuajitsia apopaweretsimë pacuenia pacatocaëjëtatsi panenacuenebinexa? Caniwi, ajena-ata apopajutsimë pacuenia copiayami pajutabiabame —jai tsaponae faraón pijajiwi.
15 Nexata, penamataca-asaëwi penacuenebibitsaëtonëjawata Israel-pijinë pemomoxi pona faraón-jawabelia, penajamatabëcuene-itajëtsinexa xua yabara bajarapamonae apotsitaxanepanaetsi bajarapacuenia penacuenebia-exanaejawatatsi. Peyanijobijawata jumaitsi:
—¿Dexuajitsia nexata bitso bajarapacuenia panenacuenebia-exaname, tsipaji picani paxanë panijajiwinë tsawanapae acuenebi bajarapacuenia patane-exanaejawamë? 16 Nijajiwi apopanerajutsi pebacamësi. Itsiata, patsijaitsi-atanë, orijibia panejumaitsi tsaponae patajucaenexa pa-adobewajëto pajutabiabajë pacujinaeta pebaxumësi panetocapatabiaba. Nexata, itsa apopatojutsinë xuawajëto picani bepajutajë, nijajiwi paneconitabiaba apopatajutsijamatabëcuene. Paxanë bajaraxua apopatajamatabëcuene. Bajarapamonae nijajiwi pejamatabëcuene —jai Israel-pijinë pemomoxi, pamonae penamataca-asaëwi penacuenebibitsaëtonëjawata faraón-jawabelia.
17 Nexata, faraón jumecanawiatatsi:
—Paxamë raja saya pane-afaetabiwi, bajaraxuata panajumaitsimë tsaponae: «Ponaenatsi wajarajutsinexa dajubi wajatajuitsijawata Jehovájawabelia», panajamë tsaponae. 18 ¡Paponare baja panenacuenebabiabijawabelia! Apopacarajutsi-ata tsane pebacamësi. Nexata, itsiata pajutaponaename pa-adobebeje caematacabita pacatocaëjëtapona papeca-itorobiwi panejutsinexa —jai faraón.
19 Nexata, pamonae penamataca-asaëwi penacuenebibitsaëtonëjawata Israel-pijinë pemomoxi, bitso jamatabëcuenebëjai paepatota jumetane pejumaitsijawatsi: «Apopacatocopatsitsi bewelia pa-adobebeje-ata panejutsinexa», pejaijawatsi, tsipaji natocanaëjëta peto-ayapëbejejawatsi. 20 Nexata, itsa baja pitsapalia bajarapamonae faraón-jawawelia pebarëcuaicuaijaicujinae, nexata caxitajaraba Moisés, Aarón-beje, tsipaji faraón pijabo pënëwelia ewetanucabeje pejumetaenexa pacuenia faraón jumecanawiatsijitsiatsi bajarapamonae. 21 Nexata jumaitsitsibeje:
—Paxamëbeje neconi panetsi-exanamebeje, tsipaji bitso pibisiacuenia paneto-exanamebeje. Panejamatabëcuenetabeje faraón, pijajiwi yajawa, pibisiacuenia panenaëcota. Patane-itoyajamatabëcuene, bitso patanenacuenebia-exanaejawata jamatabëpanebeyajebapona. Bajaraxuata, paxanë pajitsipajë Jehová papecananeconitsia-exanaejawabeje panijaneconijamatabëcuenebeje —jai Moisés-bejejawabelia Israel-pijinë pemomoxi penamataca-asaëwi penacuenebibitsaëtonëjawata.
Moisés wajëca Diosojawabelia penaneconitsixae pijamonaejawabelia
22 Nexata, Moisés wajëca Jehovájawabelia. Jumaitsi:
—Tajatuxanenë, ¿Dexuajitsia tocopatame petaenexa bitso pebejiobia-exanaecuenetsi mapamonaeje? ¿Dexuajitsia nexata tajanitorobimë mapamonaejawaberenaje? 23 Tane-itorobicujinaemë newënëta tabarëcuaicuaijainexa faraón, bitso bajaraponë ayaicuenia bejiobia-exanapona nijajiwi, Israel-pijinë pemomoxi. Bitso pewajënaeyabelia pibisiacuenia taeponatsi bajarapamonae. Nexata, abaxë xamë apocapanepaemë nijajiwi. Caranata, bitso nacueratsiaya jinawanapa —jai Moisés pewajëtsijawata.