6
Nexata, Jehová jumecanawiata Moisés-jawabelia:—Mapamatacabijawa taename pacuenia exanaejitsianë faraón-jawabelia tananeconitsia-exanaenexa, tsipaji petaecujinae tacuenesaë matapania bajaraponë copatsiana pepitsapaenexa Israel-pijinë pemomoxi pijanacuawecua. Baitsi, tacuenesaë petaecujinae nayajiwi-itorobiana pecapitsapaenexa —jai Jehová.
Icatsia Dioso itoroba Moisés petojutsinexa Israel-pijinë pemomoxi Egipto nacuawecua
2 Icatsia xuacujinae, Dioso Moisés-jawabelia jumaitsi:
—Xanë raja Jehovánë. 3 Xanë raja tatsitanaitajëtsinë Abraham, Isaac, Jacob-jawabelia-ata. Bajarapamonaejawabelia naitajëtajë daxitawecua tacuenesaë taxainaeDiosonëcuenia. Itsiata baitsi jane, aponaitajëtsinë bajarapamonaejawabelia pepotawënë, Jehováwënëta. 4 Xanë baja cajena najumeliwaisicajunuajë bajarapamonaejawabelia tarajutsinexa Canaán nacua pijanacuanexa, itsajotalia bajarapamonae copiayami jinawanapa abaxë bepejanapatsiwicuenia itsanacuajawawerena. 5 Aeconoxaeta yapëtaniji Israel-pijinë pemomoxi nabejiobitsiaya pejinawanapaejawa, pacuenianua bitso nacuenebia-exanabiabatsi asaëyata Egipto nacuapijiwi. Nexata, xanë ajenaconoxae apotanacofënëtsixae tanajumeliwaisicajonejawami pijasalinaiwimijawabelia, siwanajamatabëcueneweretajë bajarapacuenia tato-exanaenexa. 6 Bajaraxuata, jumaitsimë tsane Israel-pijinë pemomoxijawabelia: «Marapacuenia pacajumaitsi Diosoje: ‘Xanë raja Jehovánë. Xanë raja pacajutsianatsi, daxita patacacapanepaenexa pinijicuenia amoneya panenacuenebijawamiwecua. Pacacapanepaenatsinua nabejiobitsiaya panejinawanapaejawamiwecua. Pacacapanepaenatsi xanë tacuenesaëta, bajarapacuenia pinijicuenia tananeconitsia-exanaecujinae Egipto nacuapijiwi. 7 Nexata, xanë pacaxainaenatsi Israel papemomoximë patajajiwimëcuenia panejinawanapaenexa. Xanë pijinia panijaDiosonë tsane. Nexata, bajarapacuenia patacacapanepaecujinae Egipto nacuapijiwi papecanacuenebia-exanaejawamiwecua, payapëtaename xanë Jehovánë panijaDiosonë, patacacapanepaenëcuene-ata. 8 Bajaraxuacujinae, pacacaponaenatsi panacuayabelia xanë najumecapanepaeya rajutsiapaebajë Abraham, Isaac, Jacob-jawabelia-ata, papemomoximë panecanacopatsinexa. Nexata, xanë pacarajutsianatsi bajarapa-ira panija-iracuenia panexainaenexa. Xanë raja Jehovánë pacajumaitsitsi,’ pacajai Dioso», jamë tsane Israel-pijinë pemomoxijawabelia —jai Dioso Moisés-jawabelia.
9 Nexata, Moisés tsipaeba bajarapacuenia pejumaitsicowëyatsi Israel-pijinë pemomoxijawabelia. Itsiata baitsi jane, bajarapamonae apojumexaniataetsi, tsipaji bajarapamonae bitso jamatabëcuenecueranawanapa asaëya, amoneyacuenia petonacuenebijawa Egipto nacuapijiwi.
10 Nexata, Jehová jumaitsi Moisés-jawabelia:
11 —¡Ponare Egipto nacua pewetsinëjawabelia, nejumaitsinexa Israel-pijinë pemomoxi pecopatsinexa, Egipto nacuawecua pepitsapaenexa! —jai.
12 Itsiata baitsi jane, Moisés jumecanawiata Jehovájawabelia mapacueniaje:
—Itsa Israel-pijinë pemomoxi aponejumexaniatae pacuenia jumaitsinë, ¿Denexata pacuenia xanë nejumexaniataejitsipa faraón, bijiata tacuaicuaijainë? —jai.