Dioso tocopata Aarón petocuaicuaijainënexa Moisés
7
Nexata, Jehová jumaitsi Moisés-jawabelia:—¡Nejumetaema xaniawaetsia! Xanë raja tajamatabëcuene cacopatsianatsi tajajiwitonëcueniamë faraón-jawabelia. Nematapijinë Aarón pijinia xamë pecajumewajunupaebinë tsane. 2 Xamë raja jumaitsimë tsane Aarón-jawabelia daxitaxua xanë ca-itorobatsi ne-exanaenexa. Nexata, Aarón cuaicuaijai tsane faraón-jawabelia, pecopatsinexa pepitsapaejawa Israel-pijinë pemomoxi Egipto nacuawecua. 3 Itsiata baitsi jane, xanë copatsianajë faraón piajamatabëcuenetajanëcuenia papecajumecowënëtsiyaniwabeje. Nexata, xanë tsita-exanaenajë bitso pinijicuenejawanë Egipto nacuapijiwi pejamatabëcuenenabenajacabiabinexa. 4 Bajarapacuenia tsita-exanae-atanë tsane, faraón apopacajumecowënëtsibeje tsane. Itsiata baitsi jane, xanë najamatabëcuenecapitsapaenajë tacuenesaëjawa tanacuene-itajëtsijawata Egipto nacuapijiwijawabelia. Nexata, capitsapaenajë wajabitsaëwicuenia taxainaewi tajajiwi, Israel-pijinë pemomoxi, pinijicuenia tananeconitsia-exanaecujinae faraón pijajiwijawabelia. 5 Bajarapacuenia matapania Egipto nacuapijiwi necueneyapëtaena xanë Jehovánëcuene, pacujinae jutajë Israel-pijinë pemomoxi tacuenesaëta bajarapamonaewecua —jai Jehová Moisés-jawabelia.
6 Moisés, Aarón-beje exanabeje pacuenia baja Jehová tonajumecopatatsi pexanaenexa. 7 Moisés bajarapacujinaeta xaina ochenta y tres pawaibeje, pacujinaeta barëcuaicuaijaibeje Faraón.
Pacuenia Aarón pijanaebomi jomo naexana, yabara peliwaisi
8 Xuacujinae, Jehová jumaitsi Moisés, Aarón-bejejawabelia:
9 —Itsa faraón papecajumecanawiatsijawata pacajumaitsibeje tsane: «¡Panetsita-exanarebeje pinijicuenejawa», itsa pacajaibeje, nexata jumaitsimë tsane Aarón-jawabelia: «Panaebo cobenanucame, tsitaxuare irabelia faraón pitabarata, bajarapacuenia nijanaebomi jomo penaexanaenexa», jamë tsane! —jai Jehová Moisés-jawabelia.a
10 Bajaraxuacujinae, Moisés, Aarón-beje, ponabeje baja faraón-jawabelia. Exanabeje pacuenia Jehová itorobatsibeje. Nexata, Aarón pijanaebo faraón tsitabaraxuaba irabelia, bajarapacuenia peyajawanacuenebiwi-ata pitabarata. Nexata, bajaraponaemi jomo naexanajunua. 11 Faraón pijinia junata pijajiwi peyapëtaewi, petsiyapëtaewinuab pexanaecuene pinijicuenejawanë dowathi pejamatabëcueneta. Nexata, bajarapaEgipto nacuapijiwi caejiwi canacujitsia exanapona bajarapacuenia pematawajibicuenia. 12 Nexata, caenë canacujitsia pijanaebo irabelia buatajarabapona. Bajaraponaebonëmi jomo naexanaxuababiaba. Itsiata baitsi jane, Aarón pijanaebo toquijoba daxita bajarapamonae pijanaebonëmi. 13 Bajarapacuenia faraón cuenetae-ata petsita-exanaejawatsi, abaxë ajamatabëcuenetaja. Apojumecowënëtsitsibeje, Moisés, Aarón-beje, pejumaitsicowëya Jehová bajaraponë yabara.
Dioso tsi-itoroba Egipto nacuapijimenianë pejana penaexanaenexa
14 Bajaraxuacujinae, Jehová jumaitsi Moisés-jawabelia:
—Faraón raja ajamatabëcuenetaja tsecae. Nexata, bajaraxuata apocopatsi Israel-pijinë pemomoxi pepitsapaenexa Egipto nacuawecua. 15 Itsiata baitsi jane, merawia bajayacunua ponaename faraón-jawabelia paepatota bajaraponë pona pepamene-itapayabereca. Bajarajotareca, xamë ewetanucaename. Nexata, xamë caponaename nijanaebo, panaebo netsi-itabaraxuabijawata jomo naexanajunua. 16 Bajarapaepatota, jumaitsimë tsane bajaraponëjawabelia: «Jehová raja hebreowi pijaDioso nitoroba xamëjawaberena tacajumaitsinexa: ‘Copatsiana baja tajajiwi peponaenexa, bajarapamonae penajamatabë-itajëtsinexa tane-asiwajawa xanëjawaberena,c yaiyataeya taneto-exanawanapaejawata tajitsipaecuenia petusatonacuajawatalia,’ nitoroba tacajainexa. Itsiata baitsi jane, catsipaebi-atatsi, abaxë mapamatacabijawaweliaje apojumecowënëtsimë bajaraPonë. 17 Marapacueniaje nexata, orijibia cajumaitsi Jehová: ‘Maraeta xuataje xanë tacatsita-exanaejawatanexa, matapania necueneyapëtaename Jehovánëcuene,’ cajai raja Dioso. Bajaraxuata, ajenaconoxae xanë itameneconitaxuabianajë ponaebo cobenanucajë mapaNilo menejawabeliaje. Nexata, bajarapamene naexanaena pejana. 18 Nexata, daxita dujuai tëpaena bajarapameneta pejinawanapaewi. Bajarapacuenianua amenebeje tsane. Egipto nacuata pejinawanapaewi janijunawiana bajarapamera piapaenexa», jamë tsane faraón-jawabelia —jai Jehová Moisés-jawabelia.
19 Bajaraxuacujinae, icatsia Jehová jumaitsi Moisés-jawabelia:
—¡Jumaitsimëre Aarón-jawabelia, pepitsinexa pijanaebo, pecobenanamaxëyotsinexa menematatsënëalia, bajarapacuenia daxita Egipto nacuapijimenianë, penajatonë, pucanë, pecaetuatejebimeranë-ata penaexanaenexa pejana, bajarapacuenia canalitonëta peyajebimeranë-ata, bajaraxuanëjawa daxita Egipto nacuata pejana penaexanaenexa! —jai Jehová.
20 Nexata, Moisés, Aarón-beje, bajarapacuenia exanabeje. Nexata, Aarón naebota itameneconitaxuaba menejawabelia faraón pitabëta, pijajiwi-ata peyajawanacuenebiwi. Nexata, bajarapaepatota daxita meranë bijiana. Naexananua baja pejana. 21 Nexata, daxita dujuai bajarapameneta pejinawanapaewimi tëpa. Nexata, bajarapaepatota mera baja bitso abeje. Apoxanepanae piapaenexa Egipto nacuata pejinawanapaewi. Daxita Egipto nacuajawa pameranë xaina, pejana naexana.
22 Itsiata baitsi jane, Egipto nacuata pejinawanapaewi petsiyapëtaewi pexanaenexa pinijicuenejawanë dowathi pejamatabëcueneta, nexata bajarapamonae-ata exana wajita pematawajibicuenia Moisés, Araón-beje pexanaecowëya. Baitsi, itsamera bijiana pejana penaexanaenexa. Nexata, faraón bajarapacuene itsa tane, bajaraponë tsitecaeya ajamatabëcuenetaja. Apojumecowënëtsi Moisés, Aarón-beje, pacuenia Jehová jumaitsi picani bajaraponë yabara. 23 Nexata, faraón nawiataponaya pijabojawabetsia. Bajaraponë cuenetae-ata bajarapacuenia, apotsitanamatamotsitsi. 24 Nexata, daxita Egipto nacuapijiwi cuepona meramëthëanë mene-itapajawa pecaxibajarabinexa pexaniameranë piapaeranënexa, tsipaji bajarapamenepijimera apocaëjëpae piapaejawa.
Dioso tsi-itoroba cuaimonae pepitsapaenexa menewetsina
25 Siete pamatacabibeje baja itsa xaina Jehová mera pejana pexanaecujinae, bajaraxuacujinae Jehová jumaitsi Moisés-jawabelia: