8
—Ponaename icatsia netaenexa faraón. Jumaitsimë tsane: «Cajumaitsi raja Jehová mapacueniaje: ‘Copatsi baja tajajiwi peponaenexa, bajarapamonae penajamatabë-itajëtsinexa tane-asiwajawa xanëjawaberena, yaiyataeya-ata taneto-exanawanapaenexa tajitsipaecuenia.2 Itsa xamë apocopatsimë tsane peponaenexa, nexata xanë tacananeconitsia-exanaecuenia catocopatsianatsi cuaimonae daxita ne-ewetsinacuajawa penawitsinexa.3 Nexata, Nilo mene nawitsiaya capitsapaena bajarapacuaimonae ayaibitsaëtoxaneto. Nexata, catsimaxëpitsapaena menewetsina, peponaenexa ne-ecaebojawabetsia, pabota-ata majitabiabanucame, nijacamajawa-ata pejunaenexa itsajota majitabiabanucame. Bajarapacuenia neyajawanacuenebiwi pijabonëjawata-ata penawitsinexa. Bajarapacuenia pamonae neyanacua-ewetsiwi tsawanapae, bajarapamonaejawa-ata nawitsiana. Itsajotanua panamitsasebabiabame pan-jawanë,a pawaxianëta cajayababiabame pan ne-exanaenexa, bajaraxuayo bajarapamonae enaena.4 Nexata, bajarapacuaimonae xamë catsijunaena, bajarapacuenia neyajawanacuenebiwi, bajarapacuenia neyanacua-ewetsiwijawabelia-ata,’ cajai», jamë tsane —jai Jehová Moisés-jawabelia.
5 Xuacujinae, icatsia Jehová jumaitsi Moisés-jawabelia:
—¡Itorobare Aarón-jawabelia pijanaebo pecobenanamaxëyotsinexa menematatsënëalia, daxita pamenianë bobena Egipto nacuata, bajarapacuenia penajatonë-ata, bajarapacuenia pepitsapaenexa cuaimonae pewënëcaenexa daxita Egipto nacuajawa! —jai Jehová.
6 Jejai. Nexata, Aarón pijanaebo cobenanamaxëyota menematatsënëalia cuaimonae pepitsapaenexa menewetsina, daxita Egipto nacua pewënëcaenexa. 7 Itsiata baitsi jane, petsiyapëtaewi dowathi pejamatabëcueneta pinijicuene pexanaewi, bajarapitsicuene exana. Bajarapamonae nexata capata wajita bajarapitsicuaimonae Egipto nacuata. Nexata, wënëca Egipto nacua bajarapamonae pecapatsiwi. 8 Bajaraxuacujinae, faraón junata Moisés, Aarón-beje. Jumaitsi:
—¡Panetowajërebeje Jehovájawabelia, patanewecua-ajibia-exanaenexa mapacuaimonaeje, bajarapacuenia xanë yabara, tajajiwi yabara-ata! Nexata, xanë copatsianajë panijamonae penaponaenexa, tajuitsiaya perajutsinexa dajubi Jehovájawabelia —jai faraón.
9 Moisés nexata jumecanawiata faraón:
—¡Nejumaitsimëre pacujinae jitsipame tacatowajëtsijawa xamë yabara, neyajawanacuenebiwi, neyanacua-ewetsiwi-ata papecawecua-ajibia-exanaenexa bajarapacuaimonae, penacopatsinexa ëmenejawata! —jai Moisés.
10 Nexata, faraón jumaitsi:
—Merawia tsane —jai.
Nexata, Moisés jumecanawiata icatsia:
—Nexata, bajarapacuenia exanaenajë, pacuenia nejumaitsimë necueneyapëtaenexa Jehová pecawecua-ajibia-exanaejawa, tsipaji ajibi itsanë pecuenecaëjëpaenëtsi pacuenia cuene-itsi patajaDioso Jehová. 11 Nexata, cuaimonae pacawecuaponaena xamë faraón, bajarapacuenia neyajawanacuenebiwi, daxita neyanacua-ewetsiwi-ata, bajarapacuenia daxita panijabonë-atawecua. Bajarapacuenia pematatsënëa baja apopacajamatabë-itonotsi tsane paxamë. Bajarapacuaimonae jinawanapaena ëNilo menejawatareca —jai Moisés.
12 Moisés, Aarón-beje baja, pitsapa faraón pe-ecabiabibowecua. Nexata, Moisés xuacujinae towajëta Jehovájawabelia pewecua-ajibia-exanaenexa bajarapacuaimonae, pamonae tsi-itoroba picani faraón-jawabelia. 13 Nexata, Jehová to-exana pacuenia wajëtatsi Moisés. Nexata, cuaimonae tëpa, pamonae ena bonëjawa, panabojawa, wayafojawa-ata. 14 Bajarapanacuapijiwi caetuata bajarapacuaimonae petëpaewi penajumajebaponaenexa. Daxita Egipto nacua bitso ya-iratuxutsaeba bajarapamatacabijawa. 15 Itsiata baitsi jane, itsa faraón tane pewecuaponaejawatsi cuaimonae, abaxë ajamatabëcuenetaja. Apojumecowënëtsi Moisés, Aarón-beje, pacuenia jumaitsitsibeje picani Jehová bajaraponë yabara.
Dioso tsi-itoroba mapara bitso penawitsinexa
16 Nexata, Jehová icatsia jumaitsi Moisés-jawabelia:
—¡Jumaitsimëre Aarón pijanaebota irajuma peconitaxuabinexa, bajarapa-atsa irajumapërëmi penaexanaenexa wacapeb daxita Egipto nacuajawa! —jai.
17 Bajaraponëbeje bajarapacuenia exanabeje. Aarón namaxëyotsiaya pijanaeboyota conitaxuaba irabelia. Nexata, bajarapa-ira-atsapërëmi naexanajunua wacape daxita Egipto nacuajawa. Nexata, bajarapawacape bitso xanetsi Egipto nacuapijiwimi, bajarapacuenia pijadajubijawabelia-ata. 18 Egipto nacuapijiwi dowathi pejamatabëcueneta pinijicuene pexanaewi cuene-ëjëta picani bajaraxua-ata pexanaenexa, pecapitsapaenexa wacapemonae ira-atsajumapërëjawami. Itsiata baitsi jane, apocuenecaëjëpaetsi pexanaenexa. Bajarapaepatota, bajarapawacapemonae bitso werene jiwimi, bajarapacuenia dajubijawabelia-ata. 19 Nexata, xuacujinae bajarapamonae dowathi pejamatabëcueneta pinijicuene pexanaewi jumaitsi faraón-jawabelia:
—¡Marabaja jane jota yapëtanetsije Dioso pexanaecuene! —jai.
Itsiata baitsi jane, faraón bajarapacuenia tae-ata, ajamatabëcuenetaja abaxë. Itsiata, apojumecowënëtsi Moisés, Aarón-beje, pacuenia Jehová jumaitsi bajaraponë yabara.
20 Xuacujinae, Jehová jumaitsi Moisés-jawabelia:
—Merawia raja namatacotsianame pepobajayacunua. Nexata, ponaename faraón pewajënaeya pepamenejawabereca, bajarajota necaxitajarabinexa mene-itapayabereca peponaenë. Nexata, jumaitsimë tsane: «Jehová raja icatsia cajumaitsi: ‘Copatsianame baja tajajiwi peponaenexa, bajarapamonae penajamatabë-itajëtsinexa tane-asiwajawa xanëjawaberena, yaiyataeya-ata taneto-exanawanapaenexa tajitsipaecuenia. 21 Itsa raja apocopatsimë tsane tajajiwi peponaenexa, nexata xanë catsi-itorobianatsi xamë, faraón, maparamonae pecaxaenexa, bajarapacuenia neyajawanacuenebiwi, neyanacua-ewetsiwijawabelia-ata, daxitajiwi pijabonëjawa-ata pepatsinexa. Bajarapacuenia wënëcaena maparamonae daxita Egipto nacuapijiwi pijabonëjawa. Yacaëjëpaena daxita iranëjawa-ata.
22 »Pamatacabi pacatocapatsianatsi maparamonae, itsiata baitsi jane, xanë tajajiwi apotocopiapatsia-exanaenë tsane Gosén nacuajawatalia pejinawanapaewi. Gosén nacua Egiptoyajuwënë-ira-ata picani, bajarajota caenë-ata maparato aponaitajëtsi tsane, tajajiwi pejinawanapaenacuaxae. Nexata, bajarapacuenia paneyapëtaename xanë, Jehovánë, taponaponaenëcuene mapanacuataje. 23 Nexata, saicaya pacatsatsianatsi paEgiptonacuapijiwimë saicayacuenia pataca-ewetsinexa. Najëpaeya apopacatae tsanetsi tajajiwi pejinawanapaejawa. Merawia bajaraxua pacatocopiapatsia-exanaenatsi, ëpaxamë,’ cajai», jamë tsane faraón-jawabelia —jai Jehová Moisés-jawabelia. Moisés jejai baja. Bajarapacuenia lia petsipaebinexa.
24 Nexata, merawia pitsijawata bajarapacuenia Jehová exana. Nexata jane baja, pata daxitawiria mapara pejamatabë-itonotsinexatsi. Pepunanajetarubenaejawata, bepajubocuenia najetarubena bitso penawitsixae. Nexata, bajarapamaparamonae itsa pata, wënëca faraón peponaponaebojawata, pamonae peyajawanacuenebiwi pijabonëjawa-ata. Daxita Egipto nacuajawa wënëca. Nexata, bitso pepobijianaec pexanianacuajawami.
25 Nexata, bajaraxuacujinae faraón junatsia-exana Moisés, Aarón-beje. Nexata, jumaitsi bajaraponëbejejawabelia:
—¡Paponare baja dajubi panetotajuitsinexa panijaDioso paneyaiyataecuenia, jane baitsi papitsapaenejewamë Egipto nacuawecua. Pëtsa baitsi jane, paponame petusatonacuajawabelia! —jai.
26 Nexata, Moisés jumecanawiata:
—Apoxanepanae bajarapacuenia pata-exanaenexa, tsipaji padajubi paxanë tajuitsiaya parajutsijitsianë Jehová patajaDiosojawabelia, bajarapadajubi raja Egipto nacuapijiwi itajunawabiaba. Nexata, paxanë itsa Egipto nacuapijiwi panecuenetaejitsipa bajarapacuenia pata-exanaejawa, Diosojawabelia patatajuitsijawata bajarapitsidajubi, nexata bajarapamonae panetseconaejitsipa piniji-ibotonëta patanebeyejebinexa. 27 Nexata, bajaraxuata bepaponajë Egipto nacuawecua petusatonacuayabelia acueyabi pamatacabibejecuenia, bajarajotalia patanetoxanepanaenexa tajuitsiaya patarajutsijawa dajubi Jehová patajaDiosojawabelia, pacuenia bajaraPonë pane-itoroba —jai Moisés.
28 Nexata, xuacujinae faraón jumaitsi:
—Je. Pacatocopatsianatsi paneponaenexa petusatonacuayabelia, bajarajotalia panetotajuitsinexa dajubi Jehová pewënëta panijaDioso. ¡Jane baitsi, itsiata pëtsa bitso paponame tajëjawabelia! Bajarajotalia, xanë-ata yabara panetowajëtsianame —jai faraón.
29 Nexata, bajarajota Moisés jumecanawiata:
—Majotaje itsa pitsapaenajë, xanë wajëtsianajë Jehovájawabelia xamë yabara, merawia pecawecua-ajibia-exanaenexa bajarapamaparamonae, bajarapacuenia neyajawanacuenebiwi, neyanacua-ewetsiwi-ata. ¡Itsiata baitsi jane, pëtsa paneyamaxë-itojorobaponame pacuenia exanaponame, orijibia neyacaranatsinexa Israel-pijinë pemomoxi peponaeyaniwa, tajuitsiaya perajutsinexa dajubi Jehovájawabelia! —jai.
30 Nexata, Moisés itsa baja pitsapa faraón pe-ecaebowecua, wajëta Jehovájawabelia. 31 Nexata, Jehová to-exanatsi pacuenia Moisés wajëta. Nexata, daxita maparamonae wecuaponatsi baja faraón, bajarapacuenia peyajawanacuenebiwi, peyanacua-ewetsiwi-ata. Nexata, caenë-ata maparato aponacopatsi. 32 Faraón bajarapacuenia tae-ata, icatsia orijibia abaxë ajamatabëcuenetaja. Apocopatsi pepitsapaejawa Israel-pijinë pemomoxi peponaenexa.