Dioso tsi-itoroba dajubi pijadomae petotëpaenexatsi
9
Bajaraxuacujinae, Jehová jumaitsi icatsia Moisés-jawabelia:—Ponaename icatsia netaenexa faraón. Jumaitsimë tsane: «Jehová raja, hebreomonae pijaDioso, icatsia cajumaitsi: ‘Copatsianame baja peponaenexa tajajiwi, bajarapamonae penajamatabë-itajëtsinexa tane-asiwajawa xanëjawaberena, yaiyataeya-ata taneto-exanawanapaenexa tajitsipaecuenia. 2 Itsa apocopatsimë tsane peponaejawa, itsa tsitecaya tajajiwi newecua-asiwamë tsane, 3 nexata Jehovánë tacuenesaëcuene catsitajëtsianatsi. Nexata, tsi-itorobianajë pijadomae Egipto nacuapijiwi pijadajubijawabelia, wayafuabelia pejinawanapaedajubi. Nexata, tëpaena daxita caballomonae, burromonae, camellomonae, vacamonae, ovejamonae-ata. 4 Itsiata baitsi jane, Jehovánë itsacuenia Israel-pijinë pemomoxi pijadajubi to-ewetsianajë Egipto nacuapijiwi pijadajubiwecua. Nexata, Israel-pijinë pemomoxi caenë-ata apotoyajuwënëtëpae tsanetsi,’ cajai», jamë tsane —jai Jehová Moisés-jawabelia.
5 Jehová yapëtaeya-exana Moisés pamatacabi tocaëjëta petsi-itorobinexa pinijidomae dajubijawabelia. Jumaitsi:
—Merawia xanë Jehovánë, bajaraxua exanaenajë —jai.
6 Nexata, itsamatacabi bajayacunua Jehová bajarapacuenia baja exana. Nexata, daxita Egipto nacuapijidajubimia tëpa. Itsiata baitsi jane, Israel-pijinë pemomoxi pijadajubi, caenë-ata apotoyajuwënëtëpaetsi. 7 Faraón nexata itoroba pijajiwi petaenexa Israel-pijinë pemomoxi pijadajubi. Nexata, bajarapamonae petaewi jumaitsi:
—Israel-pijinë pemomoxi pijadajubi caenë-ata apotoyajuwënëtëpaetsi —jai.
Bajarapacuenia tae-ata, itsiata bajaraponë ajamatabëcuenetaja. Apotocopatsi Israel-pijinë pemomoxi peponaenexa.
Dioso tsi-itoroba petsabanaebo pecapunaenexatsi
8 Jehová xuacujinae jumaitsi Moisés, Aarón-bejejawabelia:
—Papitsianamebeje panecobetabeje ipumana hornopijijawa. Nexata, xamë Moisés cayajabiaxuabianame athëbëabelia faraón pitabarata. 9 Nexata, bajarapa-ipumanajawami naexanajonena petsëxë, bajarapacuenia bajarapatsëxë peponaenexa daxita nacuajawa. Nexata, bajarapatsëxëmi petsabanaebo capitsapaena daxitajiwijawabelia, bajarapacuenia dajubijawabelia-ata Egipto nacuata pejinawanapaewi —jai Jehová, Moisés, Aarón-bejejawabelia.
10 Moisés, Aarón-beje nexata pitabeje ipumana hornopijijawa. Nexata, bajarapajiwibeje capona faraón-jawabelia. Nexata, Moisés athëbëabelia cayajabiaxuaba faraón pitabarata. Nexata, bajarajota jiwi capunatsi baja petsabanaebo, bajarapacuenia dajubijawabelia-ata. 11 Pamonae dowathi pejamatabëcueneta pinijicuene pexanaewi apocuenecaëjëpaetsi pepatsinexa faraón pitabarata pecuenecaranatsinexa Moisés, tsipaji bajarapamonae-ata capunatsi bajarapatsabanaebo, bajarapacuenia daxita Egipto nacuapijiwi-ata. 12 Itsiata baitsi jane, Jehová copata faraón piajamatabëcuenetajanexa, pecopatsiyaniwa, pejumecowënëtsiyaniwanua, pacuenia Jehová jumaitsi Moisés-jawabelia bajaraponë yabara.
Dioso tsi-itoroba athëbëwetsica piothopaenexa bitso pecainajebitonë
13 Xuacujinae, Jehová jumaitsi Moisés-jawabelia:
—Merawia bajayacunua namatacotsianame, neponaenexa, nejumaitsinexa faraón-jawabelia. Jumaitsimë tsane: «Jehová raja hebreomonae pijaDioso icatsia cajumaitsi: ‘Copatsianame baja peponaenexa tajajiwi, bajarapamonae penajamatabë-itajëtsinexa tane-asiwajawa xanëjawaberena, yaiyataeya-ata taneto-exanawanapaenexa tajitsipaecuenia. 14 Tsipaji ajena itsa aponejumecowënëtsimë tsane, nexata xanë catsi-itorobianatsi daxita papiayaicuene xainajë pecatsijopaenexa xamë, faraónmë, bajarapacuenia neyajawanacuenebiwijawabelia, neyanacua-ewetsiwijawabelia-ata, neyapëtaenexa ajibi itsanë mapanacuataje tanejamatabëcuenejëpaenë. 15 Xanë picani necuenecaëjëpa patacatsitajëtsinexa tacuenesaëta patacawerebiabijawa piayaicuenejawanëta. Bajarapacuenia itsa pacatsi-itorobijitsipatsi, nexata pacawerebiabijitsipatsi baja mapanacuawecuaje. 16 Itsiata, bajarapacuenia apopacawerebiabitsi, tsipaji picani pacatojitsipatsi paxamë patanecuenetaenexamë tacuenesaëta tanecuenecaëjëpaenëcuene. Bajarapacuenia pacatsitajëtaponatsi daxita nacuapijiwi tanewënëyapëtaenexa tanecuenecaëjëpaenëcuene paxamë patacananeconitsia-exanaejawata piayaicuenejawanëta. 17 Itsiata, bajarapitsicuene necuenetae-atamë, xamë newecua-asiwamë tsaponae tajajiwi pepitsapaeyaniwa mapanacuawecuaje. 18 Bajaraxuata baja, merawia mapaepatotaje pacatsi-itorobianatsi itsajawa piayaicuenejawa. Copatsianajë piothopaenexa athëbëwetsica bitso piarewecainejebitonë. Pacuenia caeto-ata Egipto nacuata apotae abaxë petaxuxuabicujinaerena pejinawanapaejawa ajena pamatacabijawaberena, bajaraxua xanë copatsianajë. 19 ¡Nexata, pa-itorobare papecatocaetuatsinexa bonëjawa panijadajubi, daxitaxuanë paxainame wayafuanëjawa, bajarapacuenia panecapanepaenexa bajarapapiayaicuenewecua! Daxita pamonae wayafota jinawanapa jiwi, dajubi-ata, itsa boyaberena apopacapatsimë tsane, nexata itsa athëbëwetsica othopaenica bajarapa-arewecainejebitonë, bajarapamonaemi beyaxuabianatsi. Nexata, bajarapaepatota pamonae jinawanapaena wayafojawabelia, bajarapamonae apocaëjëpae tsane penacapanepaejawa. Ëpetëpaenexa saya,’ cajai», jamë tsane faraón-jawabelia —jai Jehová Moisés-jawabelia.
20 Itsamonae pijinia faraón peyajawanacuenebiyajuwënëwi itsa bajaraxua jumetane Jehová pejumaitsijawatsi, bitso junawa. Nexata, pona pijajiwi amoneya bedajubiwicuenia petonacuenebiwitsi penacaetuatsinexa, bajarapacuenia pijadajubi-ata pecaetuatsinexa bonëjawaberena petotëpaeyaniwatsi. 21 Itsiata baitsi jane, itsamonae apojumexaniatae xua jumaitsi Jehová. Nexata, bajarapamonae xaina pijajiwi, pijadajubi-ata wayafojawa.
22 Nexata, icatsia Jehová jumaitsi Moisés-jawabelia:
—¡Namaxëyore athëbëabelia daxita Egipto nacuajawa piothopaenexa piarewecainejebijawanë jiwijawabelia, dajubijawabelia-ata, bajarapacuenia daxitaxuanë ajena pejuwijawanë pijapabianëjawa pebijianaenexa Egipto nacuata! —jai Jehová.
23 Moisés nexata cobenanamaxëyota pijanaebo athëbëabetsia. Nexata, bajarapaepatota Jehová itoroba yamaxëmonaenë pejurujurujainexa. Ayaicuenia binepajunujunua. Itsajawa pijinia yamaxë othopa. Othopaeya-exanaica jane baja bitso piarewecainejebitonë irabetsica daxita Egipto nacuajawa. 24 Nexata, othopa piarewecainejebijawanë ayaicuenia Egipto nacuata. Bajarapacuenia yamaxëmonaenë bitso binepajunujunua. Caeto-ata Egipto nacuajawata bajarapitsicuene apocopiapatsi. Apotae-ata abaxë pamonae jinawanapa bajarapanacuata petaxuxuabicujinaerena. 25 Nexata, bajarapapiarewecainejebitonë daxita Egipto nacuajawa pe-othopaejawata tsapabajaraba, pebijianaenexa daxitaxuanë xaina wayafua. Nexata, jiwi tëpa, bajarapacuenia dajubi-ata. Bajarapacuenia daxita naejawanë pemaxëranaxi tsicabajaraba piothopaejawata athëbëwetsica. Bajarapacuenia daxita pejuwijawanë pijapabianëta tobijianatsi. 26 Itsiata, Gosén nacuata itsajota jinawanapa israelitawi, bajarapanacuata apojopae caepiarewecainejebijawa-ata.
27 Nexata, bajaraxua faraón petaejawata, itoroba pejunatsinexa Moisés, Aarón-beje. Nexata jumaitsi:
—Xanë ajena natoyapëtaniji pibisiacuene ta-exanaejawa. Jehová raja aneconijibia peponaponaenë. Paxanë juya pibisiacuene pata-exanaewi, bajaraxuata bajarapapibisiacuene panetsijumajopa. 28 ¡Nexata, paneyajiwiwajëre Jehová patanewecua-ajibia-exanaenexa bajaraPonë patanetsicopatsidiridirijaijawa ayaicuenia, bajarapacuenia piarewecainejebitonë-ata! Nexata baja, xanë apowecua-asiwanë tsane Israel-pijinë pemomoxi. Copatsianajë bajarapamonae peponaenexa —jai faraón.
29 Nexata, Moisés jumecanawiata:
—Je, itsa nexata ajenaconoxae pitsapaenajë mapatomaraweliaje, nexata icatsia xanë daxitamaxëbeje namaxëyotsianajë athëbëabelia Jehovájawabelia tawajëtsinexa. Nexata, bajaraponë pacawecua-ajibia-exanaena piothopaejawa piarewecainejebitonë, pediridirijaijawanua. Bajarapacuenia Jehová pacato-exanaena, paneyapëtaenexa daxita mapanacua bajaraPonë pijanacuacueneje. 30 Itsiata baitsi jane, xanë pacacueneyapëtanetsi. Xamë, neyajawanacuenebiwi, neyanacua-ewetsiwi-ata Jehová Dioso cujunawiaya, yaiyataecuenia-ata abaxë apopacataetsi panejinawanapaejawa —jai Moisés.
31-33 Itsa nexata Moisés pitsapa baja bajarapatomarawecua, faraón-beje pecuaicuaijaicujinaebeje, nexata bajaraponë athëbëabelia namaxëyota daxitamaxëbeje pewajëtsinexa Jehovájawabelia. Nexata, bajarapaepatota copata baja piothopaejawa piarewecainejebijawanë. Bajarapacuenianua copata perunaejawa ema. Ajibinua baja yamaxë pejurujurujaijawa.
Bajarapamatacabi bajarapamonae pe-ubijawa linojawanë, bajarapacuenia cebadabotonë-ata tobijianatsi paepatota piarewecainejebijawanë othopa, tsipaji baja cebadabotonë matonopitsapa. Bajarapijinia pacuenia, linojawa-ata namatonota. Itsiata baitsi jane, trigobotonë, centenobotonëbeje apotobijianaetsi bajarapapiarewecainejebijawa, tsipaji abaxë bajaraxuanë apojuwi, cotocaewi pe-ubixae.
34 Nexata, faraón baja itsa tane pecaewijawa ema, bajarapijinia pacuenia piothopaejawa piarewecainejebijawa, piajibijawanua baja yamaxë, nexata bajaraponë icatsia, orijibia pibisiacuene yajawa-exana daxita peyajawanacuenebiwi. Nexata, tsitecaeya ajamatabëcuenetaja bajarapamonae. 35 Nexata, faraón piajamatabëcuenetajaxae, apocopatsi israelitawi peponaenexa, pacuenia Jehová jumaitsi Moisés-jawabelia bajaraponë yabara.