Dioso tsi-itoroba bosese pewereninexa daxitawiria naejawanë
10
Bajaraxuacujinae, Jehová jumaitsi Moisés-jawabelia:—¡Ponare netaenexa faraón! Xanë raja picani bajaraponë, daxita pijajiwinua peyajawanacuenebiwi tocopatajë piajamatabëcuenetajanexa, bajarapacuenia tatsitajëtsinexa daxita papinijicuene xanë tsita-exananajetarucajë ta-exanaejawanëta. 2 Bajarapacuenia tocopatajë paxamë juya panetsipaebinexa panexijawabelia, panemomoxijawabelia-ata daxita xua tajitsipaecuenia exanaponajë Egipto nacuapijiwijawabelia capo̱capo̱naeya, xuanë-ata daxita papinijicuenejawanë tsita-exanajë bajarapamonaetuatuajëta. Nexata, bajarapacuenia payapëtaename xanë patacatsita-exanaejawata Jehovánëcuene —jai Jehová.
3 Nexata, Moisés, Aarón-beje, ponabeje Egipto nacua pewetsinëjawabelia petsipaebinexa pacuenia Jehová tonajumecopatatsi. Bajaraponëbeje jumaitsi:
—Jehová hebreomonae pijaDioso cajumaitsi: «¿Detsa paepatota baja copatsianame be-ayaijamatabëcuenenë nenataejawa, bewelianëcuenia nenataenexa xanë taitabarata? Nexata, copatsianame baja peponaenexa tajajiwi, bajarapamonae penajamatabë-itajëtsinexa tane-asiwajawa xanëjawaberena, yaiyataeya-ata taneto-exanawanapaenexa tajitsipaecuenia. 4 Itsa tobejena xamë apocopataponaemë tsane peponaenexa, nexata merawia xanë catsicapatsianatsi bosesemonaenë pepatsinexa daxita Egipto nacuajawa. 5 Bajarapamonae yacaëjëpaena daxita Egipto iranacuajawa piapaxayonexa. Itsa patsiana jiwi apocaëjëpae tsane irajuma petaejawa, irajuma pewënëcaexae. Nexata, bajarapamonae tsimaxëpatsiana pexaenexa daxitaxuaxi asaë tsanubenae abaxë piothopaecujinae pecainejebitonë. Nexata, wereniana daxitaxuanë pane-ubijawanë abaxë asaë tsanubenae. Bajarapacuenianua naejawanë-ata baxuwereniana. 6 Panejinawanapaebota yacaëjëpaena, bajarapacuenia neyajawanacuenebabiabiwi pijabonëjawa-ata. Nexata, daxita Egipto nacuapijiwi pijabonë-ata yacaëjëpaena bajarapabosese. Bajarapabosese pa-itaxutuanabenajacaename panetaejawata, tsipaji pane-axajiwi, pane-amojiwimi-ata pejinawanapaematacabianë bajarapitsicuene apotae bajaya matacabijawawerenacujinae ajena pamatacabijawaberena-ata», cajai Dioso —jai Moisés faraón-jawabelia Jehová pitorobicueniatsi.
Nexata baja, bajaraponë itsa najumewereta pecuaicuaijaijawa, Moisés nexata napënëyorotsiaya pitsapalia faraón peponaponaebowecua.
7 Nexata, faraón peyajawanacuenebiwi jumaitsi mapacueniaje pecanaëjëtsia-exanaenexatsi:
—¿Detsa pamatacabijawabelia maponëje copatajopaena wajanacajamatabë-itonotsijawa? ¡Taema pacuenia bitso nacatobijianapona wajaEgiptonacua! ¡Patajatuxanenë, xamë baja rowialia tocopare bajarapamonae peponaenexa, jamatejema bajarapamonae yaiyataecuenia peto-exanaenexa Jehová pijaDioso pejitsipaecuenia! —jaitsi faraón peyajawanacuenebiwi.
8 Nexata, faraón itoroba pejunatsinexa icatsia Moisés, Aarón-beje. Jumaitsi bajaraponëbejejawabelia:
—Je. Paponaename baja, Jehová panijaDioso paneto-exanawanapaenexa pejitsipaecuenia. ¡Jane baitsi, paneponaewajënaeya, panejumaitsimëre pamonae paponaejitsiamë! —jai faraón.
9 Nexata, Moisés jumecanawiata:
—Cajena panamatawenonajë patacaponaenexa daxita pataxi, pebinëxi, petiriwaxi, penaweretsiwaxi, bajarapacuenia patajadajubi, oveja, vaca-ata patacaponaenexa, tsipaji paxanënexa panetopinijinajamatabënapitsifiestaxaneto Jehovánexa —jai Moisés.
10 Icatsia, faraón jumaitsitsibeje:
—Xaniawaetsia paxanë payapëtaniji pibisiajamatabëcuenecuenia patanewecuapitsapaejawanexamë. Nexata, paxamë pacatsita tsabiabi-ata Jehová papecayajawajawa papecayawenonaenexa, itsiata xanë apopacayajawacopatsi tsanetsi paneyajawaponaenexa pejewaxi. 11 Bajarapacuenia apoxanepanae pane-exanaenexa. Apopaponaemë tsane daxita panexi yajawa. ¡Paxamë saya ëpanenaweretsiwi papebijiwimë paponare, jamatejema paneto-exanaenexa Jehová pejitsipaecuenia, tsipaji paxamë bajaraxua panewajëcaponame pane-exanaenexa! —jai faraón.
Nexata, faraón itoroba pijajiwi pecapitsapaenexatsibeje bajaraponëwecua. 12 Nexata, Jehová jumaitsi Moisés-jawabelia:
—¡Nexata, nijanaebo cobenanamaxëyore daxita Egipto ira matatsënëwereca, pepatsinexa bosesemonae, piapaxayonexa, daxita Egipto nacuajawa pewereninexa daxitaxuaxi nacopaba piarewecainejebitonë daxita pebijianaecujinae, bajaraxuanëmi pewereninexa! —jai.
13 Moisés nexata pijanaebo cobenanamaxëyota Egipto nacuamatatsënëwereca. Nexata, Jehová jowibo copatsina pemutowetsinaa pebubujainexa bajarapanacuayabetsina. Daxitamatacabijebi, daxitamerawijebi-ata bitso bubujaitsina. Nexata, bajayacunua itsamatacabijawabelia pemutowetsina capona jane baja bosesemonae jowibota. 14 Pata jane baja daxitanacuajawa, peyacaëjëpaenexa Egipto nacua. Nexata, bosesemonae wënëca daxita Egipto nacua. Bajarapamatacabiwajënaeya bajarapitsibosesecuene piapaxayojawa apotae abaxë caeto-ata. Bajarapamatacabicujinae, icatsia apotae tsane pematatsënëa. 15 Bajarapabosese ira bitso wënëca daxitanacuajawa. Piapaxayoxae ira apocaëjëpae jiwi petaejawa. Ya-iratsaejai. Nexata, bajarapamonae jane baja xaenajetarubena daxita naebaxucuene, daxita naecuai, daxita pe-ubijawanë-ata xua nacopaba pamatacabi piarewecainejebijawa piothopaecujinae. Nexata, ajibia-exanapona daxita pejuwijawanë Egipto nacuajawata.
16 Nexata, faraón bepijiayo itoroba bajarapaepatota Moisés, Aarón-bejejawabelia pejunatsinexatsibeje. Nexata, faraón jumaitsi:
—Xanë cajena pibisiacuene exanajë Jehová pitabarata panijaDioso, bajarapacuenia paxamëbejejawabelia-ata. 17 Itsiata baitsi jane, xanë pacajumaitsitsibeje tsane baja caeto patanesiwajamatabëcuenecaewinexamë bajarapapibisiacuene ta-exanaejawa. ¡Nexata, panetowajëre Jehová panijaDiosojawabelia, patanewecua-ajibia-exanaenexa bajarapapiayaicuene! Itsa bajarapapiayaicuene apopanewecua-ajibia-exanae tsane panijaDioso, nexata panetëpaeya-exanaena —jai.
18 Nexata, Moisés itsa pitsapalia faraón pe-ecaebowecua, wajëta baja Jehovájawabelia. 19 Nexata, Jehová icatsia pinijijowibo pebubujaijawa copatsica waëwetsica, pemutuabereca juya pebubujainexa. Nexata, bajarapabosesemonaemi caponatsi icatsia baja pemutuabereca Mar Rojo manuamenejawabereca. Bubunaeya-exana daxita bajarapabosesemonaemi. Nexata, aponacopatsi caenë-ata boseseto bajarapaEgipto nacuata. 20 Itsiata baitsi jane, Jehová abaxë ajamatabëcuenetajaya-exana faraón. Nexata, apocopatsi peponaenexa Israel-pijinë pemomoxi.
Dioso tsi-itoroba Egipto nacuapijiwi peto-aitaquiria-exanaenexa pijanacua
21 Icatsia xuacujinae, Jehová jumaitsi Moisés-jawabelia:
—¡Nijanaebo yore athëbëabelia, bajarapacuenia daxita Egipto nacua bitso ayaicuenia piaitaquirinexa!b Itajara bepecuenecaëjëpaecuenetsi tsane pejayatsinexa —jai.
22 Moisés nexata itsa pijanaebo cobenanamaxëyota athëbëabelia. Nexata, bajarapaepatota bitso piniji-aitaquirijawa tocopiapatatsi daxita Egipto nacuata acueyabi pamatacabibejecuenia. 23 Apocaëjëpae petaejawa penajuajinawanapaewi. Bajarapacuenia apopitsapae itsajawabelia peponaenexa acueyabi pamatacabibejecuenia. Itsiata baitsi jane, Israel-pijinë pemomoxi pejinawanapaebonëjawa tonapebetatsi. Apoto-aitaquiritsi.
24 Nexata, faraón itoroba pejunatsinexa Moisés. Jumaitsi:
—¡Paponare baja paneto-exanawanapaenexa Jehová pejitsipaecuenia! ¡Nexata, pacaponare daxita panexi, itsiata baitsi jane, pacopabanubianame panija-ovejamonae, panijavaca-ata! —jai faraón.
25 Nexata, Moisés jumecanawiata:
—¡Jume raja! Panetocopatsianame patajadajubi patacaponaponaenexa, patatajuitsinexa pewënëta Jehová patajaDioso. 26 Tsitecaeya cajena paxanë pacaponaenajë patajadajubixi. Caenë-ata mapanacuataje apotaxucowënacopatsi tsane pataxainaenëxi, tsipaji panamatawenonajë pata-itapetsijawa bajarajotalia, patatajuitsinexa bajarapadajubi yaiyataecuenia Jehová patajaDiosojawabelia, asiwaya patajumecowënëtsixae. Itsa abaxë apopapatsinëlia tsane bajarabelia, apopayapëtaenë ponëxi panamatawenonaejitsianë Jehovájawabelia patarajutsinëxinexa —jai Moisés faraón-jawabelia.
27 Itsiata baitsi jane, icatsia Jehová ajamatabëcuenetajaya-exana faraón. Nexata, apocopatsi peponaejawa Israel-pijinë pemomoxi. 28 Faraón icatsia jumaitsi Moisés-jawabelia:
—¡Baja newecuapitsaparemelia majotawecuaje! ¡Pëtsa baja patame pematatsënëa icatsia maberena tanetaenexamë, tsipaji pamatacabi icatsia patsianame maberenaje xanëjawaberena, nexata xanë cabeyaxuabia-exanaenatsi! —jai faraón.
29 Nexata, Moisés jumecanawiata:
—Je, xanepana. Xaniajamë pacuenia jumaitsimë. Pematatsënëa baja apocataetsirena tsane —jai Moisés.