Dioso beyaxuabaponaejitsia pepomatapijinë Egipto nacuapijiwi pexi
11
Bajarapacuenia jumecanawiata, tsipaji peponaewajënaeya Egipto nacua pewetsinëjawabelia, Jehová jumaitsi mapacueniaje Moisés-jawabelia:—Orijibia, icatsia tsi-itorobianajë faraón itsapiayaicuenejawa, bajarapacuenia daxita Egipto nacuapijiwinexa. Bajaraxuacujinae, faraón pacacopatsiana paxamë panepitsapaenexa. Baitsi, bajaraponë pesaëta yajawa pacacapitsapaeya-exanaena majotawecuaje. 2 ¡Nexata, ajenaconoxaeta jumaitsimëre Israel-pijinë pemomoxijawabelia, daxita pebijiwi, petiriawi-ata, pewajëcaenexa pexaniajawanë penajuajinawanapaewijawabelia! Pebijiwi pijinia wajëcaena pewënapebijawabelia, petiriawi pijinia pewajëcaenexa pewënapetiriawijawabelia peyajawajinawanapaewi Egipto nacuapijiwi. Nexata, wajëcaena pexanaejawanë oronanitonëta, pexanaejawanë-ata palatananitonëta —jai Jehová.
3 Pejumaitsicowëya Jehová jamatabëcuenexanepanaeya-exana Egipto nacuapijiwi Israel-pijinë pemomoxijawabelia. Nexata, apowecua-asiwa xua wajëta. Bajarapijinia pacuenia, daxita Egipto nacuapijiwi yaiyataecuenia tane Moisés, bajarapacuenia faraón peyajawanacuenebiwi, daxita Egipto nacuata pejinawanapaewi-ata.
4 Pepitsapaewajënaeya faraón-wecua, Moisés jumaitsi bajaraponëjawabelia:
—Jehová raja mapacuenia cajumaitsije: «Merawituatuajëta najetarucaenajë daxita Egipto nacuajawa. 5 Nexata, tëpaponaena caebo canacujitsia pamonae pebijiwi pepomatapijiwi, daxita Egipto nacuajawata. Bajarapacuenia coxitëpaena pamonae ayaijamatabëcuenewi, pacuenia faraón pe-ecaenë tronojawata pexënato matapijinë. Bajarapijinia pacuenia beweliajamatabëcuenewijawabelia coxitëpaena pacuenia amoneya petonacuenebawanapaewi, powaxi molinota caquiatabiaba. Bajarapacuenia-ata pijadajubi copiayapijicoxi pebitonë tëpaena. 6 Nexata, daxita Egipto nacuajawa bitso wënuena penajamatabëxainaecobexae. Bajarapitsinajamatabëxainaecuene caeto-ata apotocopiapatsitsi abaxë Egipto nacuata pejinawanapaecujinae. Icatsianua, bajarapitsicuene apotae tsane matawëjëa. 7 Itsiata baitsi jane, Israel-pijinë pemomoxi apowënue tsane. Bajarapacuenia awiriyo-ata apo-aëjai tsane. Daxita saya jamatejema tsane. Bajarapacuenia exanaenajë patacayapëtaeya-exanaenexa pacuenia xanë, Jehovánë, saicayacuenia ewetsianajë Israel-pijinë pemomoxi Egipto nacuapijiwiwecua», cajai raja Jehová.
8 »Bajarapa-ayaicuene panetaecujinae, daxita mapamonae neyajawanacuenebiwi Egipto nacuata patsiana xanë Moisés-nëjawaberena. Pematabacabëta nubenaena taitabarata tabarëpitsapaewajënaeya tanejumaitsinexa: «¡Paponare baja pexaniacuenia, daxita pamonae neyajawa-ewetsiwi!», nejai tsane bajarapamonae. Nexata, bajarapacuenia tane-exanaecujinae, matapania xanë barëpitsapaenajë —jai Moisés faraón-jawabelia.
Nexata, bajaraxuacujinae bajaraponë bitso anaeyacuenia pitsapalia faraón pijabowecua. 9 Jehová picani bajarapacuenia yapëtaeya-exana Moisés-jawabelia, peponaewajënaeya Egipto nacuajawabelia: «Faraón cajena xamë apocajumecowënëtsi tsane, tsipaji cajena piayaicuenejawanë nawitsia xainajë tatsita-exanaponaenexa daxita Egipto nacuapijiwijawabelia», jaitsi Jehová.
10 Moisés, Aarón-beje, tsita-exanabeje daxita bajarapa-ayaicuenejawanë faraón pitabarata. Bajarapacuenia tsita-exanae-atatsi faraón, Jehová pecopatsixae piajamatabëcuenetajanexa, nexata bajaraponë apocopatabiabi pepitsapaejawa Israel-pijinë pemomoxi Egipto nacuawecua.