Pacuenia exanaejitsia israelitawi pecoxitëpaeyaniwa
12
Nexata, Jehová cuaicuaijai Egipto nacuajawata Moisés, Aarón-bejejawabelia. Jumaitsi mapacueniaje:2 —Marapajuametoje paxamënexa tsane bitso papecatonamatamotsijuameto itsajuametonëwecua. Caewai canacujitsia pacatocanacopatsiana penamataxainaejuametonexa.a 3 ¡Nexata, pajumaitsimëre daxitabitsaëto Israel-pijinë pemomoxijawabelia mapacueniaje: «Mapajuametotaje, diez matacabita, caebopijiwi canacujitsia natotaicaena oveja pebito pejananë! Nexata, cae-ovejayo caebopijiwi natoxainaena. 4 Itsa caebopijiwi bitso caejiwiyobeje pexaenexa bajarapadajubinëyo, nexata boxainaenë junatsiana imoxoyo penajuajinawanapaewi, penajuaxaenexa bajarapadajubinëyo, xaniawaetsia pewerenijawa pecuenecaëjëpaenexatsi. 5 Bajarapadajubinëyo bexaina caewai. Daxitanë peperabëxanepanaenëyo. Natotaicaena oveja pebitoyo, itsa jume, chivoyo-ata. 6 Nexata, bajaraponëxi xaniawaetanubiana pebenexa catorce matacabijawabelia mapajuametotaje. Nexata, itsa baja ajena juametotabujuniya catorce matacabita, daxita Israel-pijinë pemomoxi caecuenia wësinepecaucubiana tatocaëjëtsicuenia. 7 Pewësinepecaucubicujinae, waxiyota pejana notsiana. Pabojawata xaejitsia, bajarapabopijibaupamatatsënëyo tsautarubiana pejanata. Bajarapijinia pacuenia, baupamuxunenenaejawabeje tsautarubiana bajarapadajubiyomi pejanata. 8 Bajarapamerawi xaena pewisebijawa. Caxaena levadurab apopematajërëabipan-jawanë, bajarapacuenianua piatsaxabaxujawanë. 9 ¡Pëtsa xane caejawa-ata piasiawijawa, merata pesetsiwijawa-ata! Xaena saya daxita dajubinëjawa ëpesebicuenia. 10 Apoxanepanae tsane bajarapawijawa peyajuwënëcopabejebijawa itsamatacabijawabelia pexaenexa. Itsaxuanë yajuwënënacopaba itsabajayacunuajawabelia, nexata bajaraxuanë tajuitsiana isotota. 11 Mapacueniaje pa-exanaename panexaewajënaeya dajubi, paneponaewajënaeya. Panaxatabianame panija-esetoxi. Panataxuxatabianamenua panijazapatonë. Bajarapacuenia panijanaebonë pacobenaxaenubenaename bepijiacuenia bajarapadajubinë. Panaxaename cuenebitsojinaeya, tsipaji jemata papitsapaename. Bajarapacuenia pa-exanaename, tsipaji raja bajarapadajubi panexaejawata panenajamatabënapitabiabianame xanë Jehovánë rowia patacaxenetsijawa. 12 Bajarapamerawi xanë najetarucaenajë daxita Egipto nacuajawa. Nexata, xanë coxibenajetarucaenajë caebopijiwi canacujitsia copiaya penaexanaewi Egipto nacuapijiwi pexi pebijiwi, bajarapacuenia pijadajubijawabelia-ata ponëanë copiayapijicoxi pebitonë tonaexanatsi. !Bajarapacuenia orijibia bijianaenajë daxita pitsinëanëjawabelia Egipto nacuapijiwi nawajëcabiaba diosowicuenia, tsipaji raja xanë Jehovánë pepoDiosonëc bajarapamonaewecua», jamëre! —jai Jehová Moisés-jawabelia.
13 Mapaliwaisije Jehová tonajumecopata Moisés-jawabelia Israel-pijinë pemomoxi yabara. Jumaitsi:
—Nexata, dajubijana pacatoxanepana panebaupatsautarubinexa, paxamë pane-itajëtsinexa itsa pabota pajinawanapame. Bajarapacuenia rowia pacaxenetsianatsi, itsa xanë coxibenajetarucaenajë Egipto nacuapijiwi. Bajarapajana itsa taerutsianajë bopijibaupajawata, rowia xenetsianajë. Caejiwi-ata nexata paxamëyajuwënëjiwi apopacacoxibeyaxuabi tsanetsi. 14 Nexata, mapamatacabijawaweliacujinaeje, caewai canacujitsia daxitamatacabijawabelianexa paxamë, bajarapijinia pacuenia, panexi, panemomoxi-ata tsaponae panajamatabënapitabiabianame patacacapanepaecuene panetëpaejawamiwecua. Bajarapanajamatabënapitsicuene pane-exanabiabijawata tawënëta, xanë Jehovánë tajaPascuawënëfiesta raja —jai Jehová Moisés-jawabelia Israel-pijinë pemomoxi bajarapacuene pecatsitecawanapaenexa.
Israelitawi exanabiabijitsia levadurata apopematajërëabipan-pijifiesta Pascuafiestacujinae
15 Jehová jumaitsi:
—Bajarapafiesta pane-exanaejawata, nexata paxaename levadurata apopematajërëabipan-jawanëd siete pamatacabibejecuenia. Nexata, bajarapafiesta copiayapijimatacabita siete pamatacabibejejawabelia apobepaxainaemë caejawa-ata levadurajawa panijabonëjawa. Nexata, bajarapafiestamatacabianëjawa pajiwi xaena levadura pematajërëabia-exanaejawa, nexata bajarapajiwi baja panawecuacapitsapaename Israel-pijinë papemomoximëwecua, saicaya peponaponaenexa, bajarapijinia pacuenia, apotajajiwiyajuwënënëcuenia panetaenexa. 16 Bajarapafiesta copiayapijimatacabita saicaya patsatsianame patanetocaetuatsinexamë tawënëta, bajarapijinia pacuenia, caesemanacujinae siete matacabita-ata icatsia patanetonacaetuatsinexamë tawënëta. Bajarapamatacabibeje apobepanacuenebimë itsacuenejawanë. Itsiata, xua panamatawenoname panexaejawanexa, panamitsa-exanaename caejiwiyo canacujitsia xuawajëto panacuenecaëjëtame panexaenexa. 17 Bajarapacuenia levadurata apopematajërëabipan-pijifiesta pa-exanabiabianame daxitamatacabijawabelianexa, tsipaji bajarapamatacabita xanë pacajutatsi Egipto nacuawecua. Nexata, bajarapafiesta pataeyabiabianame caewai canacujitsia. Nexata, panexi, panemomoxi tsaponae catsitecawanapaena pijacuenecuenia daxitamatacabijawabelia. 18 Nexata, copiayapijijuametotae paxaeyabiabianame levadurata apopematajërëabipan-jawanë siete pamatacabibejenexa. Nexata, pataxuxuabianame catorce matacabita bitso caniwiyojawabelia levadura panenatsi-atsobijawa, panecopiarutsinexa icatsia veintiuno matacabita bitso caniwiyojawabelia pecowëcuenia. 19 Bajarapamatacabianëjawa apobepaxainaemë levadurajawayo panijabonëjawa siete pamatacabibejecuenia, tsipaji pajiwi xaena itsacuenejawa pematajërëabijawanë levadurata, nexata bajarapajiwi paxamëyajuwënëwi panawecuacapitsapaename paxamëwecua, saicaya peponaponaenexa, bajarapijinia pacuenia, apotajajiwiyajuwënënëcuenia panetaenexa. Bajarapacuenia pa-exanaename paxamëyajuwënëwi, pamonae-ata panijanacuata penapatsiwi. 20 ¡Nexata, pëtsa paxaneme itsacuenejawayo-ata pexainaejawa levadura! Itsajota paxamë pajinawanapame, bajarajota saya paxaewanapaename levadurata apopematajërëabipan-jawanë saya bajarapafiestamatacabianëjawa —jai Jehová Moisés-jawabelia, petsipaebinexa Israel-pijinë pemomoxijawabelia bajarapafiesta yabara.
21 Moisés nexata itoroba pejunatsinexa daxita israelitawi pija-ancianowif pepatsinexa, xua Jehová itorobatsi petsipaebinexa, bajarapamonae petsipaebinexa juya pijamonae. Jumaitsi mapacueniaje:
—Paponaename panetaicaenexa caenë canacujitsia panija-oveja pejananë pebito, itsa jume, chivonëyo panijabopijiwinexa panebenexa Pascuamatacabita.g 22 Nexata, bajarapadajubi panewësinepecaucutaxuabicuenia pabeyaxuabianame. Pejananua pacaewetsianame waxiyota. Nexata, bajaraxuacujinae hisopowirianaemëximaxërana pexanaecunuxita bajarapajanata pabaupatsautsianame panijabonë. Patsautsianame panijabo baupamatatsënëyo, bajarapacuenia pemuxunenenaebeje-ata namata-enetsia. ¡Bajaraxuacujinae, pëtsa caejiwi-ata pitsapa abaxë bajarapabowecua, peyananianaejawabelia, 23 tsipaji Jehová coxibenajetarucaena Egipto nacuapijiwi pexi pepomatapijinëanë! Nexata, itsa taena panetsautsijawa baupamatatsënëyo, pemuxunenenae-atabeje, nexata Jehová rowia xenetsiana bajarapabo, apocoxibeyaxuabinejewa. Nexata, Jehová apocopatsi tsane pejonenexalia pecoxibenajetarucae-ángelnë, papecacoxibenexa panijabonëjawalia. 24 Panenajamatabënapitabiabinexa bajarapaPascuamatacabi, pa-exanawanapaename caewai canacujitsia Jehová pijaPascuafiesta papeca-itorobicuenia. Papecatonajumecopatsixae, bajarapacuenia payapëtaeya-exanaename panemomoxijawabelia, bajarapacuene pecanacopatsinexa daxitamatacabijawabelia. 25 Nexata, tsitecaeya Pascuafiesta pa-exanawanapaename pamatacabi pajonename panejinawanapaenexa Jehová najumecapanepaeya papecarajutsiapaebi-irajawata. 26 Pamatacabi panexi pacayanijobiana: «¿demapitsijamatabëcuene xua pa-exaname?», itsa pacajai tsane, 27 nexata paxamë pajumecanawiatabiabianame mapacueniaje: «Marapadajubinëyoje beyaxuabajë Jehová najamatabënapitsiaya rowia wajanacaxenetsijawa, tsipaji pacujinaemi Jehová Egipto nacuapijiwi coxiwerebiabanajetaruca, bajarapamatacabita israelitawi caejiwi-ata apocoxibeyaxuabitsi. Bajaraxuata, waxaitsi nacacapanepa bajarapatëpaecuenemiwecua», pajamë tsane pewajënaeyabelia panexijawabelia —jai Moisés israelitawi pija-ancianowijawabelia.
Nexata, bajarapacuenia israelitamonae pejumetaecujinae bajarapaliwaisi, yaiyataecuenia irataeya bobena, Jehovájawabelia penajamatabëcuene-itajëtsinexa peyaiyataejawa. 28 Bajaraxuacujinae, pona Israel-pijinë pemomoxi. Exana baja pacuenia Jehová tonajumecopatatsi pexanaenexa Moisés, Aarón-bejejawabelia.
Jehová coxibenajetaruca pepomatapijiwi Egipto nacuapijiwi pexi pebijiwi
29 Pamerawi Jehová tocaëjëta, bajarapamerawituatuajëta baja Jehová coxibenajetaruca pepomatapijinë daxita Egipto nacuapijiwi pexi. Bajarapacuenia nacua-ewetsinë, ponë pe-ecaenë tronojawata, bajaraponë-ata pexënato matapijinëmi tobeyaxuabatsi. Bajarapijinia pacuenia, pamonae-ata naneconitsiaya jinawanapa penaneconitsiwi pejebabiabibojawata, pexënato matapijinëmi tobeyaxuabatsi. Bajarapacuenia pijadajubi-ata copiayapijicoxi pebitonë tobeyaxuabatsi. Apopanepae caejiwiyo-ata copiayapijicoxi Egipto nacuapijiwiyajuwënëwi. 30 Nexata, faraón, daxita peyajawanacuenebiwi, daxita Egipto nacuajawata pejinawanapaewi namatacoba merawituatuajëta bajarapamerawi. Bajarapamonae bitso tocopiapatatsi pinijinajamatabëxainaecuene. Nexata, daxita Egipto nacuapijiwi nawë-aëaëjai ayaicuenia, tsipaji caebopijiwi-ata apowecuapanepae pecoxitëpaejawa bajarapanacuata. 31 Nexata, bajarapamerawi, faraón itoroba pejunatsinexa Moisés, Aarón-beje. Nexata jumaitsitsibeje:
—¡Xanë, tajajiwi yajawa, panewecuanatsare! ¡Paponare baja paxamëbeje daxita Israel-pijinë pemomoxi yajawa, jamatejema asiwaya yaiyataeya-ata paneto-exanawanapaenexa Jehová pejitsipaecuenia, pacuenia panejumaitsimë tsaponae! 32 ¡Pacaponarenua panija-ovejamonae, panijavaca-ata! ¡Pacuenia pajitsipame, paponare baja! Nexata, panetowajëtsianame Jehovájawabelia xanë yabara, bajaraponë juya taneyawenonaenexa pexaniacuenia —jai faraón.
33 Nexata, Egipto nacuapijiwi pecajunawi, bitso ajamatabëcuenesaëya itoroba israelitawi bepijiayo pewecuapitsapaenexatsi, tsipaji bajarapanacuapijiwi jamatabëjumaitsi: «Belia, daxita paxanëmi patëpaenajë, itsa bajarapamonae apopanewecuaponae tsipae», jamatabëjai. 34 Nexata, israelitawi naxatsiayo nota peyajebimatabëanë abaxë levadurata apopematajërëabijawa. Nexata, bajarapamonae yanota peyajebi-itapabocoxita bajarapamatabëanë, peyamatacëbinexa penajuma-acabipanaxita, bajarapacuenia daxita pecobecowë yajawa. Bajarapacuenia nexata wëtacarapona pepitsapaejawata. 35 Pacuenia Moisés itorobatsi pexanaenexa, bajarapamonae pejumaitsicowëya exana baja. Wajëcanajetarubena Egipto nacuapijiwijawabelia palatananitonëta pexanaejawanë, oronanitonëta-ata pexanaejawanë, bajarapacuenia penaxatabijawanënua. 36 Jehová tocopatatsi Egipto nacuapijiwi pexaniajamatabëcuene pexainaenexa israelitawijawabelia. Nexata, xuanë israelitawi wajëcanajetarubena, Egipto nacuapijiwi pexaniajamatabëcuenecuenia rajutapona xuanë wajëcaponatsi. Nexata, bajarapacuenia Israel-pijinë pemomoxi wecuanota pexainaejawanë Egipto nacuapijiwi bepecuene-amoneyabiwicuenia penawajabitsaëtsijawata.
Israel-pijinë pemomoxi wecuapitsapa Egipto nacua
37 Nexata jane baja, israelitawi pitsapa Ramesés tomarawecua peponaenexa Sucot tomarajawabelia. Bajarapamatacabita, bajarapamonae pitsapa bejamatabëcujiru seiscientos mil ponëbeje piajamatabësaëwi penawajabitsaëtsinexa, namata-ëjëtsinejewa petiriawi, pejewaxi, itsamonae pebijiwi penaweretsiwi yajawa. 38 Bajarapamonae yajawapitsapa bitso jiwi ayaibitsaëtoxaneto itsawiriawi-ata. Bajarapacuenia yajawapitsapa ayaibitsaëto pija-oveja, pijavaca-ata. 39 Pamatacabi pitsapa bajarapamonae apocuenecaëjëpaetsi penacuenebaponaenexa pexaejawa pemaruenexa, tsipaji Egipto nacuapijiwi bepijiayo pitsapaeya-exanatsi. Nexata, pamatabëanë yacapona levadurata matajërëabinejewa, namuto-epatua namitsaseba levadura matajërëabinejewa pexanaepan pexaenexa.
40 Pamatacabita israelitawi baja xaina cuatrocientos treinta pawaibejeh pejinawanapaecujinae Egipto nacuata Jacob pijamonae yajawa pepatsicujinae, 41 bajarapamatacabijawa baja tocopiapatatsi. Bajarapawaita pitsapa israelitawi, Jehová pijajiwi, bewajabitsaëwi pexanaecuenia Egipto nacuawecua. 42 Nexata, bajaraxuata bajarapamerawi tocopatatsi Israel-pijinë pemomoxi penajamatabënapitabiabinexa bajarapamatacabita caewai canacujitsia. Pamerawi Jehová jutatsi Egipto nacuawecua, nexata bajarapamerawi Jehová bepijamerawi tsaponaponae. Nexata, bexëajawabelia pamonae naexanapona pemomoxi, bajarapamerawi najamatabënapitsijitsia daxitamatacabijawabelianexa.
Pacuenia israelitawi exanaejitsia Pascuapijifiesta caewai canacujitsia
43 Jehová xuacujinae icatsia jumaitsi Moisés, Aarón-bejejawabelia:
—Mara pecaëjëtsiliwaisije Pascuawënëfiestanexa tsane. Nexata, itsa-apopaxamëwirianë aponaxae tsane bajarapaPascuafiestamatacabi pexaeyajuwënëjawa. 44 Itsiata baitsi jane, ponë pecomuatsinëtsi amoneya paxamëyajuwënënë petonacuenebaponaponaenënexa, itsanacuapijinë-ata, bajaraponë caëjëpa penaxaejawa, itsa baja pewajënaeya nabo-upiperabëcaucutsia-exana. 45 Ponë itsanacuapijinë penanajetarucaenë itsajawabelia paxamëtuatuajëta, ponë-ata peponaponaenë panijabota papecatonacuenebinëcuenia, nexata bajarapitsiwi apocaëjëpae penaxaejawa bajarapaxaeyajuwënëjawa. 46 Nexata, padajubinë seba caebopijiwi canacujitsia, benajuaxane caebojawata. Apobecapitsapae bajarapayajuwënëwijawa wayafuabelia pexaenexa. Bajarapijinia pacuenia, apobesiyajuwënëtsicabiabi. 47 Nexata, daxitabitsaëto pamonae israelitawi bajarapacuenia exanaena Pascuafiesta petaeyabiabijawata. 48 Itsiata baitsi jane, itsa apopaxamëwirianë naponapona paxamëtuatuajëta, itsa jitsipa bajarapaPascuafiesta penataejawa Jehová pewënëta, nexata copiaya penataewajënaeya benabo-upiperabëcaucutsia-exana daxita nacaebopijiwi. Bajarapacuenia nexata toyapëxanepanaenatsi penataejawa. Nexata, bajarapajiwi pataename bepenaexanaejiwi bajarapanacuata israelitawiyajuwënëwicuenia. Itsiata baitsi jane, caenë ponë apopenabo-upiperabëcaucutsia-exanaenë aponaxae tsane bajarapapascuafiestamatacabi pexaeyajuwënëjawa. 49 Nexata, paliwaisi pacatocaëjëtatsi, xanë xainajë caeliwaisi padaxitamënexa, pamonae pepacuene pa-israelitawiriamë, pamonae-ata apopaxamëwiriawi. Nexata, caeliwaisi panajuajumecowënëtsianame Pascuafiesta panetaenexa —jai Jehová Moisés, Aarón-bejejawabelia, Pascuapijifiesta yabara.