Jehová itapeta copiaya penaexanaewi pebijiwi, dajubi-ata pijajawacuenia
13
Bajaraxuacujinae, icatsia Jehová jumaitsi Moisés-jawabelia:2 —Nexata, neto-itapetsianame copiaya penaexanaenëxi pebijiwi daxita israelitawi pexi, tajacuene tanetonacuenebiwinexa, bajarapijinia pacuenia, copiayapijicoxi dajubi-ata pebitonë. Xanë raja daxita copiaya penaexanaewi taniji tajanëxicuenia —jai Jehová.
3 Moisés nexata tsipaeba bajarapaliwaisi pijamonaejawabelia:
—¡Panajamatabënapire pamatacabi pinijisaëta Jehová pacacapanepa Egipto nacuapijiwiwecua, papecajutsijawata itsajotalia picani paxamë pajinawanapame amoneya panetonacuenebiwicuenia! Nexata, pamatacabi panajamatabënapitabiabianame Jehová papecajutsijawa, apobepaxaemë levadurata pematajërëabipexaejawanë. 4 Paxamë baja ajena papitsapame Abib-wënë juametota. 5 Bajaraxuata, mapajuametotaje paxamë pa-exanabiabianame itsafiesta, levadurata apopematajërëabipan-wënëfiesta, panenajamatabënapitabiabinexa caewai canacujitsia. Bajayatami, Jehová najumecapanepaeya rajutsiapaeba panijasalinaiwimijawabelia panacuata jinawanapa cananeomonae, hititamonae, amorreomonae, heveomonae, jebuseomonae-ata pijanacuanëmi. Bajarapamonae pijanacua bitso pexanianacua itsajota nawita bitso pexaejawacuene. Nexata, Jehová papecarajutsicujinae pejumaitsicowëya bajarapanacua panejinawanapaenexa, nexata bajarajotalia tobejena pataeyabiabianame bajarapafiesta mapajuametotaje —jai Moisés israelitawijawabelia.
6 Icatsia, Moisés jumaitsi:
—Bajarapalevadurata apopematajërëabipan-pijifiesta pa-exanawanapaename siete pamatacabibejecuenia Jehová pewënëta. Nexata, bajarapafiesta panetaematacabianëjawa paxaename levaduramatajërëabinejewa pexanaepan. Itsiata, siete matacabita patonacaetuatsianame paneto-exanaenexa fiesta Jehová pewënëta. 7 Bajarapasiete pamatacabibeje paxaewanapaename levaduramatajërëabinejewa pexanaepan. Nexata, itsacuenejawayo-ata levadura pexainaejawa apobepaxainaemë paxamëtuatuajëta, panijabonëjawa, bajarapacuenia panijanacuanëjawa-ata. 8 Nexata, bajarapamatacabi patsipaebianame panexijawabelia: «Mapacueniaje xaewanapatsi, tsipaji bajarapamatacabita Jehová paneyawenona baja, patapitsapaenexa Egipto nacuawecua», pajamë tsane panexijawabelia. 9 Bajarapafiesta pacanajamatabënapitsia-exanaena Jehová papecajutsijawa pinijisaëta Egipto nacuajawawerena. Pacuenia meta paxamë pitaneto parutsipame panemaxëta, pane-itapata-ata, papecatsirutsixae panenajamatabënapitabiabinexa, bajarapijinia pacuenia, bajarapafiesta panetaeyabiabijawata pacanajamatabënapitabiabiaya-exanaena, panetsipaebabiabinexa Jehová papecatonajumecopatsiliwaisi. 10 Bajaraxuajitsia, bajarapafiesta bepataeyabiabame, panenajamatabënapitabiabinexa caewai canacujitsia pamatacabi pacatocopiajopa —jai Moisés.
11 Icatsia, itsaliwaisi jumaitsi Moisés israelitamonaejawabelia:
—Bajayata, panijamonaemijawabelia panacua yabara tajëwelia najumecapanepaeya jumaitsi papecarajutsinexa, itsa Jehová pacacapatsiana bajarapanacuajawabelia, cananeomonae pijanacuamijawabelia panejinawanapaenexa, 12 nexata bajarapanacuata paxamë copiaya penaexanaepebinëxi pato-itapetsianame saicaya Jehovánexa, bajarapacuenia-ata copiaya penaexanaepebitoyo panijadajubijawata. Nexata, bajarapacuenia bajarapanacuata pa-exanawanapaename daxita copiaya penaexanaewijawabelia. 13 Itsa burro copiaya xaina pexënato pebitoyo, nexata matamotsiaya pacapanepaename bajarapaburroyo panematamotajuitsijawata oveja pebitoyo. Bajarapacuenia nexata, burroyo asaë tsaponaponae tsane. Itsiata, itsa apopatotajuitsimë tsipae bajaraponëyo pejamatabëcuene, nexata bajarapaburroyo cuaibositanatanaëcaejitsipa. Bajarapijinia pacuenia, panexi copiaya penaexanaepebijiwi matamotsiaya pejamatabëcuene patobeyaxuabianame oveja pebitoyo, paneyapijiwitajuitsinexa Jehovájawabelia. 14 Pamatacabi pacayanijobiana panexi: «¿Demapitsijamatabëcuene yabara pabeyaxuabame ovejayo?», itsa pacajai tsane panexijiwi, nexata pajumaitsimë tsane: «Bajayatami, Egipto nacuata pajinawanapajë amoneya patatonacuenebiwicuenia. Bajarapamatacabimi Jehová pinijisaëta panejuta Egiptowecua. 15 Nexata, pacujinae Egipto nacua pewetsinë ajamatabëcuenetaja tsecae patanecopatsiyaniwa patapitsapaenexa Egipto nacuawecua, bajarapamatacabijawa Jehová daxita copiaya penaexanaepebijiwi coxibepona, caebo canacujitsia Egipto nacuapijiwi pexi. Bajarapacuenia tobeponatsinua copiayapijicoxi pijadajubiwimi pebitonë. Nexata xuata, tajuitaponatsi Jehovájawabeliaa daxita copiaya penaexanaedajubi pebitoxi. Bajarapijinia pacuenia, xamë taxënato matapijinëmë matamotsiaya cayapijiwitajuitatsi oveja pebitonëyo Jehovájawabelia», pajamë tsane panexijawabelia. 16 Pamatacabi payapijiwitajuitame ovejayo nexënato pejamatabëcuene, nexata pacuenia meta itsa panaitanerutsipame panemaxëta, itsa jume, pane-itapata panenacofënëtsiyaniwa. Bajarapacuenia pa-itajëtaponaename pacujinae Jehová pacajuta pinijisaëta Egipto nacuawecua —jai Moisés israelitamonaejawabelia.
Jehová matacapona Israel-pijinë pemomoxi piapiapajubocuenia
17 Pamatacabi faraón copata pepitsapaenexa Israel-pijinë pemomoxi, Dioso apomatacaponaetsi israelitawi panamuto najetaruca filisteomonae pijanacuaya. Bajarapanamuto perowianamuto picani Canaán nacuajawabelia pepatsinexa, itsiata baitsi jane, Dioso siwajamatabë-itsi israelitawi: «Filisteomonae itsa tsimaxëpatsipa pebarënawajabitsaëtsinexa israelitamonae, nexata pecajunawi caewëarena nawiabecaejitsipa icatsia Egipto nacuajawaberena», siwajamatabëjai. 18 Bajaraxuata, bajarapamonae matacaponatsi itsanamutojawa, pematawaquetsinexa filisteo nacua, panamuto najetaruca petusatonacuajawa Mar Rojo manuamenemuxunenialia.
Nexata, israelitawi itsa pitsapa Egipto nacuawecua, bajarapamonae najetarubena bewajabitsaëwi pexanaecuenia. 19 Moisés barëcapona pepitsapaejawata Josépijinëmi pesijawanë cajonita. Bajarapacuenia exana, tsipaji Josépijinëmi petëpaewajënaeya, wajëta Israel-pijinë pemomoxijawabelia bajarapacuenia peto-exanaenexatsi. Bajaraponëmi jumaitsi mapacueniaje: «Xaniajanë cajena. Dioso pacayajawa tsane. Pacayawenonaena papecajutsinexa mapanacuawecuaje. Pacujinae pacajutsiana mapanacuawecuaje, panesicaponaename, patanesimëthëtsinexamëb bajarapanacuajawabelia», jai José petëpaewajënaeya. Nexata, pijamonae najumeliwaisicajunua Joséjawabelia bajarapacuenia peto-exanaenexa.
20 Nexata, israelitawi itsa pitsapa Sucot tomarawecua, pata-othopa Etam nacuajawata, itsajota taxuxuaba bitso petsewinacua. 21 Bajarapamonae itsa najetarubena matacabita, Jehová tsiwajënaenamataxainabiabanajetaruca piapiapajubocuenia benaesituruto pematacaponaenexatsi. Merawi pijinia itsa najetarubena, bajarapapajubojawami naitayotabiaba benaesituruto petajuenajetarucaejawa petsiwajënae-itayotsinexatsi, daxitamerawi peponaenexa. Nexata, bajarapacuenia najetarubena merawijebi, matacabijebi-ata, Jehová petocaëjëtsicuenia. 22 Bajarapapajubojawa tsitecaeya bajarapamonae pewajënaeya najetarucabiaba matacabita. Merawi pijinia penaitayotsipajubo bepetajuenajetarucaenaesituruto najetarucabiaba pewajënaeya.