Israel-pijinë pemomoxi nicaba Mar Rojo manuamene itsapanabelia
14
Jehová nexata xuacujinae, barëcuaicuaijai Moisés-jawabelia pejumaitsinexa:2 —¡Jumaitsimëre Israel-pijinë pemomoxi penawiabinexarena caewëarena, pijataxunaebonë penacuenebanubinexa patusato boca Migdol-jawata,a Mar Rojo manuamenebejetuatuajëjawata, bajarajota cae-epatoyo pejinawanapaenexa manuamene imoxoyojawata, Pi-hahirot-jawa, Baal-Zefón nacuayobeje imoxoyojawata! 3 Nexata, Egipto nacua pewetsinë pacasiwajamatabë-itsi tsane paxamë yabara: «Apoyapëtae tsaena itsabelia ponaejitsia. Nexata, bajarapamonae naxuabawanapa petusatonacuata. Pijataxunaebo nacuenebanuta itsajota to-ayapëbejetsi patanewecuapanepaecuene peyacaranatsixaetsi», pacasiwajamatabëjai tsane. 4 Xanë Jehovánë itsiata faraón jamatabëcuene-atajaya-exanaenajë, bajaraponë papecapëbarajinaenexa. Nexata, bajaraponëjawabelia najamatabëcuene-itajëtsianajë tacuenesaënëcuene, bajarapacuenia pijajiwi wajabitsaëwijawabelia-ata, patacacapanepaejawata. Nexata, bajarapacuenia ta-exanaejamatabëcuene daxitajiwi newënëliwaisicacuaicuaijai tsane. Daxita Egipto nacuapijiwi-ata yapëtaena xanë Jehovánëcuene —jai Jehová Moisés-jawabelia, petsipaebinexa israelitawijawabelia.
Nexata, israelitamonae bajarapacuenia baja exana. Pijataxunaebonë exana Mar Rojo manuamene imoxoyojawata. 5 Bajarapamatacabijawa, Egipto nacua pewetsinë itsa wënëtane israelitamonae pewecuarëcëpecaejawatsi, nexata faraón, pijajiwi peyajawanacuenebiwi-ata, pesiwajamatabëxanepanaejawami israelitawi najamatabëcuenepënëyorota. Nexata, najumaitsi: «¿Detsa xuajitsia waxaitsi copatsipatsi bajarapamonae wajanacawecuaponaenexa amoneya wajanacatonacuenebijawami?», najai.
6 Nexata, bajarapaepatota faraón najamatabëxaina pepëbarajinaenexa israelitamonae, petaicaenexa, amoneya petonacuenebawanapaenexatsi icatsia. Nexata, itoroba petoxaniawaetsinexatsi pijacarrozawënëmonë, pamonë penawajabitsaëtsimatacabi caponabiaba. Caballuanë peyarobotanajetarubenaemonë. Nexata, natsicueyajunata pijanacuapijiwajabitsaëwi pepëbaraponaenexa. 7 Itapetsiaya capona seiscientos pacarrozamobeje pexaniamonë pecanawajabitsaëtsinexa, bajarapacuenia itsacarrozamonë Egipto nacuata pexainaemonë. Nexata, caemo canacujitsia tocopata pecaponaenexa wajabitsaëwi penamatacaitorobinë caebitsaëto canacujitsia. 8 Faraón yapëtae-ata Jehová pinijisaëta pewecuajutsijawatsi israelitawi, itsiata Jehová tocopata faraón piajamatabëcuenetajanexa, pepëbarajinaenexa israelitamonae.
9 Nexata, pitsapa Egipto nacuapijiwajabitsaëwi. Capona daxita pecanawajabitsaëtsimonë, pecanawajabitsaëtsicaballuanë-ata. Nexata, bajarapamonae pëbarajina israelitamonae pecowëwelia. Bajarapamonae pëcaxinatsi israelitamonae pejinawanapaejawata Mar Rojo manuamene imoxoyojawata, Pi-hahirot-beje, Baal-zefón nacuayobeje canacujitsita. 10 Itsa baja faraón barë-imoxoyotanajetaruca, bajarapaepatota wajënaetane israelitamonae pepëbarajinaejawatsi. Nexata, bajarapaepatota ayaicuenia bitso junawa. Nexata, bajarapamonae ayaijumeta wajëca Jehovájawabelia peyawenonaenexatsi. 11 Nexata, xuacujinae bajarapamonae jumaitsi Moisés-jawabelia:
—¿Dexuajitsia patajanejutsimë Egipto nacuawecua? ¿Dexuajitsia nexata bajaraxua patajaneto-exanaemë? ¿Tsipaji tsaja ajibi mëthëanë Egipto nacuajawatalia patanemëthëcaenexamë, patanecajutsimë patatëpaenexa petusatonacuata? 12 Bajarapitsijamatabëcuene patataeyaniwa, Egipto nacuajawatalia itsa abaxë jinawanapatsi pacajumaitsitsi: «¡Panecopare majotaje, patatonacuenebawanapaenexa Egipto nacuapijiwi. Baitsi, matatoxenetsia xanepana amoneya patatonacuenebawanapaejawa patatëpaejawawecua petusatonacuajawabelia!», pacajaitsi picani —jai israelitamonae Moisés-jawabelia.
13 Moisés itsiata bajarapamonaejawabelia jumecanawiata:
—¡Pëtsa pajunawame. Pajamatabëcuenesaëmëre. Pëtsa parëcëpecame panejunawicobexae. Aeconoxae raja pataename Jehová wajanacacapanepaejawa bajarapamonaewecua. Daxita pamonae ajena pataneme Jehová werebiabiana. Pematatsënëa bajarapamonae apotae tsanetsi icatsia. 14 Pëtsa paxamë pajamatabëcuenebëjamë, tsipaji Jehová pacayapijiwinawajabitsaëtsiana panijawajabitsaëwijawabelia, pecuene-amoneyabijawabelia! —jai Moisés israelitamonaejawabelia.
15 Nexata, Jehová jumaitsi Moisés-jawabelia:
—¡Pëtsa abaxë cuenenajematame tanewajëcaenexamë tacayawenonaejawa! ¡Itorobare israelitamonae pewajënaeyabelia peponaenexa! 16 Xamë nijanaebo cobenanamaxëyotsianame menematatsënëalia, bajarapacuenia netsatsinexa anijajawabeje bajarapamanuamene, israelitamonae penicabinexa petaxuta petsewituatuajëjawalia. 17 Xanë itsiata Egipto nacuapijiwi ajamatabëcuenetajaya-exanaenajë, papecapëbarajinaenexa panecowëwelia bajarapatsewijawalia. Bajarajota nexata, najamatabëcuene-itajëtsianajë tanecuenecaëjëpaenëcuene faraón-jawabelia, bajarapacuenia pijajiwi wajabitsaëwijawabelia-ata, pijacarrozamonëta peponaewijawabelia, bajarapacuenia pamonae caballojumanëta peponaewijawabelia-ata. 18 Nexata, Egipto nacuapijiwi yapëtaena Jehovánëcuene, tacuene-amoneyabijawata faraón, bajarapacuenia pijajiwi wajabitsaëwijawabelia, pamonae caballuanë peyarobotanajetarucaecarrozamonëta peponaewi, pamonae-ata caballojumanëta peponaewi —jai Jehová.
19 Nexata, bajarapaepatota Jehová pija-ángelnë, ponë pematacanajetarucaenë israelitawi apiaya piayapësaëpajubocuenia, natixita pijataxunaewecua, juya perucaenexabeje pecowëwetsina. 20 Nexata, bajarapapiapiapajubojawa benaesituruto rucajopa tuatuajëta peyacaranatsicuenia Egipto nacuapijiwi. Nexata, Israel-pijinë pemomoxi yajiwicaranatarucatsi, Egipto nacuapijiwi pepë-imoxoyotsiyaniwatsi. Nexata, Egipto nacuapijiwi apotae itsajota nubena israelitamonae, tsipaji to-aitaquiritsi bitso bajarapapajubo pejamatabëcuene. Itsiata baitsi jane, israelitawi penubenaejawata pë-itayotatsi, xaniawaetsia petaenexa pewajënaeyabelia. Nexata, merawijebi jaitarutsi-ata Egipto nacuapijiwi pepëcaxinaenexa, itsiata apopëcaxinaetsi israelitawi.
21 Nexata, pacuenia itorobatsi Jehová, Moisés namaxëyota baja Mar Rojo manuamenematatsënëalia.b Nexata, Jehová copatsina pinijijowiboxaneto pemutowetsina daxita merawijebi. Nexata, bajarapacuenia mene natsata anijajawabeje. Nexata, bajarapacuenia Jehová tsewia-exana tuatuajëalia Mar Rojo manuamene. 22 Nexata, bajarapatsewijawalia israelitamonae petaxuta nicabicapanepa itsapanabelia bajarapanatsatsimenejawabejetuatuajëalia. Bajarapanatsatsimenejawabeje nuca namata-enetsia anijayenepanacueniabeje. Caejawa nuca petsawenonenia, itsajawa pijinia nuca pecujuanenia.
23 Nexata, faraón, pijajiwi wajabitsaëwi yajawa, pamonae caballuanë peyarobotanajetarucaecarrozamonëta peponaewi, pamonae-ata caballojumanëta peponaewi, pëbarapona pecowëwelia israelitawi bajarapatsewijawalia manuamenetuatuajëalia. 24 Itsa baja naniananajetaruca bajayacunua, nexata Jehová bajarapapiapiapajubojawawetsica, bepetajuenajetarucaenaesiturutowetsica, anaeya naëcotsica Egipto nacuapijiwajabitsaëjawabereca. Bajarajota, Jehová jamatabëcuenena-epatajërërëcaeya-exanatsi, pepëcaxinaeyaniwa Israel-pijinë pemomoxi. 25 Bajarapamonae pijacarrozawënëmonë totaxullantajuepajunujunuatsi. Nexata, bajarapamonae bitso nacuene-epatajërërëca. Nexata, bajarapitsicuene petaejawata, Egipto nacuapijiwi najumaitsi:
—¡Naxatsia! Caewëabelia rëcëpecatsi baja Israel-pijinë pemomoxiwecua, tsipaji raja Jehová yapijiwinawajabitsaëta bajarapamonae waxaitsijawaberena, wajanacawerebiabinexa —najai, penawiabinexa caewëaberena pepanepaenexa picani.
26 Bajarapaepatota, Jehová jumaitsi Moisés-jawabelia:
—¡Nijanaebo cobenanamaxëyore, icatsia caewëalia mene-itaboxojawabelia, penatsatsijawami mera piawajubuanexa icatsia pecowëcuenia! Nexata, Egipto nacuapijiwajabitsaë bubunaejitsia, bajarapacuenia carrozawënëmonëta peponaewi, caballojumanëta peponaewi-ata —jai Jehová Moisés-jawabelia.
27 Nexata, bajarapacuenia Moisés pecowëyabelia mera matatsënëalia pijanaebo cobenanamaxëyota. Bitso pepobajayacunua. Mera icatsia asaëya nacaxinajunua pecowëcuenia. Nexata baja, awajubua. Egipto nacuapijiwajabitsaëmi perëcëpecaewimi picani ya-awajubua tsajone epatua. Nexata, bajarapamonaemi pëcaewa merata. Nexata, bajarapacuenia Jehová bubunaeya-exana Egipto nacuapijiwimi pewerebiabinexa. 28 Nexata, mera baja awajubua, pecowëcuenia penacopatsinexa. Nexata, daxita faraón pijajiwi wajabitsaëwimi, pijacarrozamonëmi, pijacaballonëmi-ata pëcaewa bajarapameneta. Faraón pijajiwiyajuwënënë apo-asaë caenë-ata. 29 Itsiata baitsi jane, israelitawi xaniawaetsia nicabalia menetuatuajëalia petaxuta petsewijawalia, anijapenatsatsimerajawabejetuatuajëjawalia. Bajarapanatsatsimerajawabeje caeyenepana nuca petsawenonenia, itsajawa pijinia nuca pecujuanenia.
30 Bajarapacuenia Jehová capanepa baja israelitawi Egipto nacuapijiwi penamatacaitorobijawamitsiwecua. Nexata, israelitawi tane petëpaewi pebobenaejawa Mar Rojo manuamene-itapayaberena. 31 Bajarapacuenia israelitawi itsa cuenetane Jehová pijapinijisaë petsita-exanaejawa, pewerebiabijawata Egipto nacuapijiwajabitsaëmi, nexata bajarapamonae yaiyatane, itaxutuajamatejema tsawanapaenua Jehová, bajarapacuenia pijajiwitonë Moisés-jawabelia-ata.