Moisés Israel-pijinë pemomoxi yajawa wënëcanaxëana Dioso pewënëxaniatsinexa
15
7Nexata, Moisés, israelitamonae yajawa Jehová wënëcanaxëana pewënëxaniatsinexa mapacueniaje:—Xanë tonaxëanaenajë Jehová pewënëta, tsipaji pecujirucaëjëpaenëtsi pecuene-amoneyabinexa ayaijamatabëcuenenëcuenia Egipto nacuapijiwajabitsaëwimi, pebubunaeya-exanaejawata pijacaballuanë yajawa.
2 »Tajamatabëcuenebarëyajawata, wënëcanaxëanajë Jehová, ponë tanenasaërajutsinë, tanecapanepaenënua. Bajarapitsinë raja tajaDioso. Bajaraxuata, wënëxaniatabiabianajë pexaniajamatabëcuene tarajutaponaejawata. Bajaraponë raja taxa-ata pijaDioso. Nexata xuata, ayaijamatabëcuenenëxae, wënëca-uranejewanë wënëliwaisipaebabiabianajë.
3 »¡Jehová raja pexanianawajabitsaëtsinë! Bajaraponë raja pewënë Jehová.
4 »Bubunaeya-exana manuamenejawata faraón pijawajabitsaëwi, pijacarrozamonë yajawa, bajarapacuenianua wajabitsaë penamatacaitorobiwi. Pamonae bitso petsiyapëtaewi penawajabitsaëtsinexa bubunaeya-exana.
5 »Bajarapamonae pebubunaejawata pëcaewajoneca menebëxëpanayabereca pacuenia iboto. Nexata, bajarapamonae mata-acatatsi bëpënëa merata.
6 »Jehová Diosomë, necujuasaëtaa cuene-amoneyababiabame nebarënawajabitsaëtsijawata nijawajabitsaëwi.
7 »Nexata, pamonae pecabarënawajabitsaëtsiwimi, bajarapamonae nejamatabëcuene-amoneyabinë nejamatabëcuenesaëta. Paepatota bara-anaepaname necueyawi, tsitajëtame nebara-anaepanaejamatabëcuene newerebiabijawata. Pacuenia isoto baweriajawa petsewinaebaxumi, bajarapacuenia xamë werebiabame.
8 »Bene-uxunijumalita pinijijowibo copatame mera penatsatsinexa, peyenepanacueniabeje namata-enetsia penucaenexa. Bajarapamanuamenetuatuajëalia copatame piatajanexa ira petsewijawa.
9 »Bajarapawajabitsaëwimi panesiwajamatabëcuene-itsi-ata picani: ‘Papëbarajinaenajë patapëcaxinaejawabelia. Nexata, pecobecowëmi panatsicobetsanaenajë. Pajamatabëcuenebarëyanë tsane, patawecuanotsixae. Xuacujinae, pataja-espadanëta pabeyejebianajë,’ panesiwajamatabëjai picani,
10 »Xamë itsiata bene-uxunijumalicuenia pinijijowibo copatame pebubujainexa, bajarapamonae merata nemata-acabiaxuabinexa. Bajarapamonae nexata bubunareca pacuenia plomonanito pinijimalatacaxanetotuatuajëjawareca.
11 »Bajaraxuata, xamëwecua cajena,
»¡Ajibi itsadiosonë pecacuenejëpaenë Jehovámë!
»¡Ajibi itsanë petsita-exanaenë pinijicuenejawanë pacuenia xamë! ¡Xamë baja cajena ëpexaniacuene ne-exanaponaponaenë! Bajaraxuata, netoxanepana tacawënëcanaxëanabiabijawa ayaijamatabëcuenenëmë yabara.
12 »Necujuanenia nenamaxëyotsisaëta, bajarapamonaemi ira quijonetsi baja.
13 »Nitaxutotsoniataejamatabëcueneta matacaponame nijajiwi xua najumecapanepaeya jumaitsimë necapanepaexae Egiptonacuapijiwiwecua. Necuenesaëtanua matacaponame neponaponaetaxunaejawabelia.b
14 »Ne-exanaejawanë pecawënëtaejawata, itsanacuanëpijiwi jamatabëcueneneconecojai tsane. Filisteomonae pijinia yajamatabëcuenebëjai tsane bitso, pecajunawi.
15 »Edom nacuapijiwi penamatacaitorobiwi pecajunawi yajamatabëcuenebëjai tsane. Moab nacuapijiwi penamatacaitorobiwi pecajunawi neconecojai tsane. Canaán nacuapijiwi apo-acuene-itatsaca tsane, pacuenia copiayami acuene-itatsaca tsabiabi.
16 »Xamë, Jehovámë, bajarapanacuanëpijiwi tocopatsianame pejunawijamatabëcuene xamëjawabelia pexainaenexa. Nexata, pecacuenetaejawata niacuenesaënëcuene, bajarapamonae cacujunawiana. Pacuenia iboto caecowëta boca, nacujirutsinejewa, bajarapacuenia pijinia bajarapamonae pejunawicobexae, caecowëta nubenaena, nijajiwi pexenetsijawabelia bajarapamonae pejinawanapaenacuanë. Bajarapacuenia xamë, Jehovámë, nesaëta capanepaejitsiamë, panijajiwinë patane-itapetsiwimë.
17 »Bitso pajitsipajë patanematacaponaejawamë, xamë, Jehovámë, nenato-itapetsitsutojawabelia, imoxoyojawata patajinawanapaenexa, patsutota jiwi nawajëcabiabijitsia xamëjawabelia.
18 »Jehovámë, daxitamatacabijawabelianexa neyanacua-ewetsinë tsaponaponae tsane.
19 »Pacujinae faraón-pijinëmi barëjunua pijamonae caballuanë peyarobotanajetarucaecarrozamonëta peyajawaponaewimi, itsamonae pijinia pijacaballonëmita pejumaponaewi manuamene petsewijawalia, bajarajota Jehová caewëarena mene tsimata-acabiaxuabatsi bajarapamonaemijawaberena pebubunaeya-exanaenexatsi. Itsiata, waxaitsi israelitawitsi jamatejema tsupanepatsi bajarapamenetsewijawalia itsapanabelia —jai israelitawi Jehová pexaniacuenia pewënëcanaxëanaejawata.
20 Bajarapacuenianua Diosojumepaebiwa María, Aarón pematapijiwa, pecueneyapëtaexae Jehová pecuene-amoneyabijawa faraón, pita pijapandereta pecanaxëanaenexa. Natsicueyajunatanua pewënapetiriawi penajuatonaxëananajetarubenaenexa Jehová. Nexata, bajarapapetiriawi-ata nota pijapanderetanë, canaxëanaeya, yawajibiaya-ata pewënëxaniatsinexa Jehová pexanaecuene 21 Penaxëanaejawata jumaitsi:
—¡Patonaxëanare Jehová pewënëta, tsipaji najamatabëcuene-itajëta ayaijamatabëcuenenëcuene, pebubunaeya-exanaejawata faraón, pijacaballuanëmi, pamonaemi-ata caballojumata peyaponaewimi! —jai petiriawi penaxëanaejawata.
Piatsaxamera matathaibë pecaxitajarabijawa Maratusatojawata, yabara peliwaisi
22 Moisés barëpona israelitamonae Mar Rojo manuamenewecua. Nexata, bajaraponë barëpona Shur-tusatojawa, bitso petsewinacuajawa. Najetarubena acueyabi pamatacabibejecuenia mera caxitajarabinejewa. 23 Acueyabi pamatacabibejecujinae, bajarapamonae pata-othopa Maratusatojawata. Bajarajota picani, caxitajaraba meramatathaibë, itsiata apocaëjëpaetsi piapaejawa, tsipaji bajarapamera atsaxa. Bajaraxuata, bajarapanacuayo wënëruba Mara.c
24 Nexata, bajarapaepatota Israel-pijinë pemomoxi Moisés-jawabelia siwajamatabëcuene-anaepanaeya pibisiacuenia najuabaracuaicuaijai tsaponae. Nexata, xuacujinae cuenebijataeya jumaitsi:
—¿Denexata pitsimera pataja-apae tsane? —jai tsaponaetsi. 25 Nexata, Moisés bajarapaepatota wajëta Jehovájawabelia peyawenonaenexatsi. Bajarapaepatota, Jehová tsitajëtatsi naejawayo. Nexata, Moisés bajaraponaejawa tsitaxuaba merajawabelia. Bajarapamera baja ajibi piatsaxajawami. Nexata, pexanepanaera naexana jiwi piapaenexa. Nexata, bajarajota Jehová cuene-ëjëta Israel-pijinë pemomoxi. Tonajumecopatatsinua pacuenia exanawanapaejitsia, pacuenianua jumecowënëtawanapaejitsia. 26 Nexata, Jehová jumaitsi:
—Paxamë itsa daxita panejumecowënëtsianame, xaniawaetsia itsa panenamuxuna-ewetabiabianamenua xua xanë Jehovánë panijaDiosonënë pacajumaitsitsi, itsa pa-exanawanapaename xua netsita pexaniacuene, itsanua panejumecowënëtawanapame pataca-itorobiliwaisi pane-exanawanapaenexa, nexata apopacatsi-itorobi tsanetsi pitsipiayaicuene tsi-itorobajë Egipto nacuapijiwi, tsipaji raja xanë Jehovánë patacajamatejemaya-exanaenë tsaponaponae —jai Jehová.
27 Nexata, xuacujinae Moisés barënaropota israelitawi pepatsinexa Elim nacuata. Bajarajota, xaina doce pameramëthëbeje pepitsaparubenaemeranë irajawawetsina. Itsajotanua xaina setenta pabotobeje dátil-botonë. Nexata, bajarajota pepatsicujinae, icatsia exananuba pijacarpabonë pejinawanapaenexa bajarapameranë imoxoyojawata.