Jehová rajuta maná Israel-pijinë pemomoxi pexaewanapaenexa
16
Icatsia baja, Israel-pijinë pemomoxi naropoba Elim-wecua, pepatsinexa bajarapamonae Sin petsewinacuatusatojawata. Bajarapatusato boca Elim-beje, Sinaítsutobejetuatuajëta. Bajarapamonae pata bajarabelia quince matacabita, cotocaewipijijuametojawata, pepitsapaecujinae Egipto nacuawecua. 2 Nexata, daxita Israel-pijinë pemomoxi bajarapatsewinacuajawata, icatsia taxuxuaba anaeya penajuacuenebaracuaicuaijaijawa Moisés, Aarón-beje, yabara, pexaejawa petobeweliaxaetsi. 3 Nexata, jumaitsi tsaponae bajaraponëbejejawabelia:—Cajena tsaena Jehová patanebeyejebijawami Egipto nacuajawatalia, paepatota paxanë pamuxunenia-enabiabajë pesetsiwi waxianë pataxaenexa patapenejawabelia. Xamë baitsi jane, itsiata mapanacuayaberenaje panecaponame patayatëpaenexa patajajani —jai bajarapamonae Moisés, Aarón-bejejawabelia.
4 Nexata, Jehová jumaitsi Moisés-jawabelia:
—Xanë copatsianajë perunaejawa athëbëpijipexaejawanë piothopaenexatsica. Nexata, jiwi caematacabi canacujitsia pitsapaena penotabiabinexa saya caematacabicuenia pexaejawanënexa. Nexata, xanë bajarapacuenia yapëtaenajë pamonae nejumecowënëtsiaya jinawanapa ta-itorobicuenia. Pamonae pijinia apojinawanapae tanejumecowënëtsicuenia, tacueneyapëtaenexa. 5 Seis matacabita, itsiata penotsijawanë matatoxenetsia notabiabiana ayaijawanë, anijamatacabibejecuenianexa, penatoxaniawaetsinexa pijabojawata —jai Jehová.
6 Nexata, Moisés, Aarón-beje, jumaitsibeje daxita Israel-pijinë pemomoxijawabelia:
—Caniwiyojawa paxamë pacueneyapëtaename Jehová wajanacajutsinëcuene Egipto nacuawecua. 7 Bajarapijinia pacuenia, bajayacunua pataenamenua Jehová pinijicuenejawanë pexanaenëcuene ayaijamatabëcuenenëxae. Pasiwajamatabënabenajacaename cajena papecatsita-exanaecuene yabara. Bajarapacuenia pacatsita-exanaena, tsipaji raja bajaraPonë pacajumetane paxamë pibisiacuenia panenajuacuenebaranatsipaebijawa jamatabëcuene-anaeya. Paxanëbeje saya pajiwitonënëbeje. Acuenebi patanebara-anaepanaejawamëbeje. Xua siwajamatabëcuene-anaepanaeya pibisiacuenia panebaracuaicuaijamëbeje paxanëbejejawaberena, bajaraxua Jehová natotane bepanecuenebaranatsipaebijawa —jaibeje.
8 Icatsia xuacujinae, Moisés jumaitsi:
—Caniwiyojawabelia rabaja ajena Jehová pacarajutsiana pewi panexaenexa. Bajarapijinia pacuenia, merawia bajayacunua pacarajutsiana pan-cuene, ayaijawanë panexaenexa panepenejawabelia, tsipaji raja pacajumetane Jehová panebaracuaicuaijaijawa siwajamatabëcuene-anaepanaeya. Paxanëbeje tsipaji patajamatabëcuene apopacacaponaetsibeje maberenaje. Paxanëbeje Jehovájamatabëcuene apopaxainaenëbeje patacarajutsinexa panexaejawa. Bajaraxuata, xua panenajuacuenebaranatsipaebamebeje anaeyacuenia, bajaraxua raja apopaneto-exanaemë ëpaxanëbejejawaberena. Bajaraxua bepanejumaitsijawa Jehovájawabelia —jai Moisés Israel-pijinë pemomoxijawabelia.
9 Bajaraxuacujinae, Moisés jumaitsi Aarón-jawabelia:
—¡Itorobare israelitamonae penacaetuatsinexa daxita Jehová pitabarata wajanacaetuatabiabitaxunaebojawata, tsipaji rabaja Jehová jumetane bajarapamonae penajuacuenebaranatsipaebijawa anaeyacuenia! —jai Aarón-jawabelia.
10 Nexata, paepatota Aarón abaxë itorobanuca bajarapamonae penacaetuatsinexa, bajarapaepatota bajarapamonae itsa naëcolia petusatonacuajawabelia, tane jane baja Jehová pijapeniweniwenaecotiaa piapiapajubojawata. Nexata, bajarapapiapiapajubo benaesituruto itayotaruca ayaicuenia. 11 Nexata, bajarapa-itarërëbojawawerena Jehová barëcuaicuaijai Moisés-jawabelia mapacueniaje:
12 —Xanë rabaja jumetaniji Israel-pijinë pemomoxi tanenajuacuenebaranatsipaebijawa anaeyacuenia. ¡Nexata, jumaitsimëre bajarapamonaejawabelia mapacueniaje: «Ajena caniwiyojawabelia paxamë paxaename pewi. Bajayacunua pijinia paxaename pan panepenejawabelia. Bajarapacuenia paneyapëtaename xanë Jehovánë panijaDiosonëcuene», jamëre! —jai Jehová Moisés-jawabelia israelitawi yabara.
13 Nexata baja, itsa caniwiyo, pata jane baja tsacanimonae ayaibitsaëtoxaneto. Yacaëjëpa daxita pijataxunaebojawa. Merawia pijinia, bajayacunua pitsijawata, othopa dono daxita pijataxunaebo matatoyorotsia. 14 Bajaraxuacujinae, dono baja petsewicujinae, nexata jane baja, irajumawereca nacopaba bitso pitafacaepanaxi betsiquiridujuaitsebocotoxi. 15 Israelitamonae apopeyapëtaexae bajaraxua, nexata itsa tane bajarapamonae najumaitsi: «¿Detsa mapitsijawa meta pijabobenaeje?», najai tsaponae. Nexata, Moisés bajaraxuacujinae jumaitsi bajarapamonaejawabelia:
—Maraxuaje jane baja, Jehová nacarajuta wajaxaejawanexa pan-cuenia. 16 Bajaramajane naca-itoroba Jehová waja-exanaenexa mapacueniaje: ¡Panore baja, pacaebopijiwimë canacujitsia, bajaraxuanë papecacaëjëpaecuenia panexaenexa! Pacaetuatsianame pacaebopijiwimë caëjëtsiaya pabitsaëtowajëto payajawajinawanapame panijacarpabonëjawa. Nexata, caejiwiyo canacujitsia bepitapona bejamatabëcujiru anijalitrobejecueniab —jai Moisés.
17 Nexata, israelitamonae pitorobicueniatsi exana. Bajarapamonae caetuata bajaraxuanë. Itsamonae nota ayaijawanë. Itsamonae pijinia nota beweliacuenia, nacaëjëtsiaya caematacabicuenia pexaejawanexa. 18 Nexata, caëjëtapona anijalitrobejecuenia penotsijawanë pijabopijiwi pecaëjëtsicuenia. Nexata, pamonae notapona ayaijawa, apotoyajuwënënacopabi-atatsi. Pamonae pijinia bewelia notapona, apotosajinae-atatsi. Nexata, bajarapamonae notapona pacuenia natonamatawenona pexaenexa.
19 Bajaraxuacujinae, Moisés jumaitsi bajarapamonaejawabelia:
—Caejiwi-ata apobeyajuwënëjebi bajaraxuanë itsamatacabijawabelianexa —jai.
20 Itsiata baitsi jane, itsamonae pijinia apojumecowënëtsi pacuenia Moisés jumaitsi. Nexata, itsamonae pexaeyajuwënëjawanë jebabiaba, itsamatacabijawabelia pexaenexa picani. Itsiata, merawia pitsijawata to-orobenatsi. Totuxutsaebenatsinua. Nexata, Moisés bara-anaepana bajarapamonaejawabelia.
21 Nexata, caebajayacunua canacujitsia notabiaba bajarapamonae caejiwi canacujitsia pexaejawanexa, tsipaji paepatota ataju tsanajetarucae, nexata bajaraxuanë irata pebobenaejawa pepora naexanabiaba. 22 Itsiata baitsi jane, seis-matacabita nota pematatsënëyo. Notapona bejamatabëcujiru cuatro palitrobejecuenia caejiwi canacujitsia. Nexata, itsa cobetane Israel-pijinë pemomoxi pewetsiwi bajarapacuenia pecaetuatsijawa, nexata Moisés-jawabelia pona petsipaebinexa penotaponaejawa bitso ayaijawanë. 23 Nexata, Moisés jumaitsi bajarapapewetsiwijawabelia:
—Bajarapacuenia racajena Jehová nacatonajumecopata, tsipaji merawia penacuera-ewetsimatacabi, pamatacabi Jehová nato-itapeta pijamatacabinexa. Nexata, ajena baja jiwi besetejeba xuanë xaina pesetsinexa. Bajarapijinia pacuenia, besebejeba xuanë xaina pesebinexa. Nexata, daxitaxuanë pacatoyajununacopabiana, bajaraxuanë payajebianame, merawia pitsijawata panexaenexa. Bajarapacuenia pa-exanaename panejayabiyaniwa panexaejawa penacuera-ewetsimatacabi —jai Moisés.
24 Nexata, pacuenia Moisés itoroba pexaniawaetsinexa xuanë peyajuwënënacopabijawanë, itsamatacabijawabelia pexaejawanexa, bajarapacuenia exana. Nexata, bajaraxuanë jebi-ata, apoto-orobenaetsi. Apototuxutsaebenae-atatsi. 25 Nexata, Moisés jumaitsi penacuera-ewetsimatacabita:
—¡Ajena baja paxaema caniwi panesetsijawanëmi, tsipaji raja ajena sábado penacuera-ewetsimatacabi! Ajena raja pamatacabi pajaitsi-atamë tsane wayafuabelia, apopacaxitajarabimë tsane mapapexaejawacuene manáwënëjawa.c 26 Pacacuenecaëjëpa picani caematacabi canacujitsia panecaetuatabiabijawa seis pamatacabibejecuenia. Itsiata baitsi jane, siete matacabita, penacuera-ewetsimatacabi, pajaitsi-atamë tsane, itsacuenejawayo apopacaxitajarabimë tsane —jai picani Moisés israelitawijawabelia.
27 Itsiata, bajarapamonaeyajuwënëwi itsamonae siete matacabita picani pitsapa pejaitsiwi, pecaetuatsinexa. Itsiata baitsi jane, itsacuenejawayo apocaxitajarabi. 28 Bajaraxuacujinae, Jehová jumaitsi Moisés-jawabelia:
—¿Depaepatojawabelia abaxë patajanejumecowënëtsimë tsane pataca-itorobiliwaisi, pacuenia pacatonajumecopatatsi pane-exanabiabinexa? 29 Nexata, maxuaje pacanaëjëtsianame. Xanë Jehovánë pacatocopatatsi siete matacabi panenacuera-ewetsimatacabinexa. Bajaraxuata, seis matacabita pacatocopatatsi panecaetuatsinexa pematatsënëa, anijamatacabibejecuenia panexaejawanexa. Bajaraxuata, siete matacabita caejiwi canacujitsia beponapona pijabojawata. Apobepitsapae itsajawabelia peponaponaenexa —jai Jehová.
30 Nexata, bajarapacujinaeta bajarapamonae nacuera-eweta siete matacabita.
31 Israel-pijinë pemomoxi bajaraxua wënëruba maná, xuanë caetuatabiaba pexaenexa. Bajaraxua raja penioponaejawaxi, becilantroxutoxiwajëto. Bajaraxua tuxujëpa pacuenia jabërata bepitafacaecarëcarënaepan peyajawaxaejawa. Bajaratuxu-itsi maná.
32 Bajaraxuacujinae, Moisés jumaitsi:
—Marapacuenia Jehová nacatonajumecopataje: Pawënëtsianame manájawa caecanalitoyod gomer-wënëjawa, anijalitrobeje pecaëjëpaecanalito. ¡Nexata, bajarapamanáwënëtsicanalitoyo paxaniawaere panemomoxi petaenexa, peyapëtaenexa papexaecuene pacarajutatsi, pamatacabi pajinawanapame petusatonacuajawata, patacajutsicujinae Egipto nacuajawawerena! —jai Moisés petsipaebijawata.
33 Moisés xuacujinae jumaitsi Aarón-jawabelia:
—¡Pire mapacanalitoje, nejenexa anijalitrobejecuenia manájawa! Bajaraxuacujinae, bajarapacanalito etsianame Jehová pitabarata, bajaraxua wajaxaniawaetsinexa, wajamomoxi juya petaeponaenexa —jai Moisés.
34 Nexata, pacuenia Jehová itorobatsi Moisés, bajarapacuenia Aarón xaniawaeta maná pejecanalitoyo Jehová pijajawanë pexaniawaetsibaulajawata,e bajarajota pexaniawaetetsinexa.
35 Nexata, Israel-pijinë pemomoxi xaewanapa manájawa cuarenta pawaibejecuenia, pepatsijawabelia itsamonae pejinawanapaenacuajawabelia, Canaán-wënë nacua,f bajarajotalia pejinawanapaenexa.
36 Caegomer raja diez xuabejeyajuwënëjawa cae-efajawami. Caegomer pijinia junua anijalitrobejecuenia.