Dioso pitsapaeya-exana mera ibotojawawerena
17
Daxita israelitamonae pitsapa pijataxunaewecua Sin petsewinacuata, peponaenexa Sinaítsutojawabelia. Be-axayocuenia najetarubena bajarapanacuajawa, caematacabi canacujitsia pacuenia itorobatsi Jehová. Penajetarubenaejawata, pata-othopa Refidim-tusatojawata. Itsiata baitsi jane, bajarapanacuajawata ajibi mera bajarapamonae piapaenexa. 2 Nexata, bajarapamonae jamatabëcuene-anaeya jumaitsi Moisés-jawabelia:—¡Mera panerajure pata-apaenexa! —jai tsaponae.
Nexata, Moisés jumaitsi bajarapamonaejawabelia:
—¿Detsa xuajitsia paxamë pajamatabëcuene-anaepaname xanëjawaberena? ¡Pëtsa pajamatabëcuene-ëjëbaponame Jehová panejumaitsitsaponaejawata bajarapacuenia! —jai jumecanawiatsiaya.
3 Nexata, bajarajota bajarapamonae bitso mera jitsipa, bajaraxuata jamatabë-anaepana Moisés-jawabelia. Nexata, bajaraponëjawabelia cuenecarapuabatsi mapacueniaje:
—¿Detsa xuajitsia nexata patajanejutsimë Egipto nacuawecua, patanecaponaenexamë mapatsewinacuajawaberenaje? ¿Patanebenexamë tsaja, pataxi yajawa, bajarapacuenia patajadajubi yajawa-ata mera patajitsipaecuenia? —jai Moisés-jawabelia.
4 Nexata, Moisés wajëca Jehovájawabelia:
—¿Detsa xua xanë exanaenajë mapamonaejawabeliaje? Imoxoyo raja bajarapamonae tanebeyaxuabi tanetseconaecuenia ibotonëta —jai pewajëtsijawata.
5 Nexata, Jehová jumecanawiata Moisés-jawabelia:
—Xamë pewajënaeta nucaename bajarapamonae pitabarata. ¡Natsicueyajunarenua itsamonae pija-ancianowi pewetsiwiyajuwënëwi Israel-pijinë pemomoxi, ëneyajawaponaenexa ibotojawabelia! Caponaename panaebota mene-itaconitaxuabamea Nilo mene. 6 Xanë raja cawajënae-ewetsianatsi bajarajotalia, Horeb-tsutojawataliab ibotojawata. Nexata, itsa jumaconitaxuabianame bajarapa-iboto, bajarawerena pitsapaena mera, piapaenexa daxita bajarapamonae —jai Jehová.
Moisés nexata jejai. Bajarapacuenia exana daxita pamonae pija-ancianowic Israel-pijinë pemomoxi pitabarata. Mera baja nawotsiaya pitsaparena ibotojawawerena. 7 Bajarapataxunaeyo Moisés wënëruba Masah, itsawënë Meribad pejaiwënë, tsipaji bajarajota Israel-pijinë pemomoxi jumaitsi tsaponae Moisés-jawabelia jamatabëcuene-anaepanaeya, Jehovánua jamatabëcuene-ëjëbiaya jumaitsi tsaponae mapacueniaje: «¿Waxaitsi tsaja nacayajawa picani Jehová, itsa jume meta, aponacayajawa?», najai tsaponae. Bajaraxuata, wënëruba bajarapawënëbejecuenia.
Amalecitawi barënawajabitsaëta Israel-pijinë pemomoxijawabelia
8 Pacujinae Israel-pijinë pemomoxi xaina pijataxunae Refidim-nacuajawata, nexata amalecitawi tsimaxëpata pebarënabenexa Israel-pijinë pemomoxijawabelia. 9 Moisés nexata jumaitsi Josuéjawabelia:
—¡Itapere itsamonae pebijiwi, merawia nebarëponaenexa panebarënabenexa amalecitawijawabelia! Merawia raja pijinia bajayacunua xanë ponaenajë petsutojumabelia. Bajarajotalia, cobenanucaenajë Dioso pijanaebo, baitsi ponaebota Dioso nitoroba ta-exanabiabinexa pinijicuenejawanë —jai Moisés.
10 Nexata, Josué bajarapacuenia exana, pacuenia Moisés jumaitsitsi. Nexata, Josué barënabia amalecitawijawabelia. Moisés pijinia Aarón, Hur-bana pona petsutojumabetsia. 11 Nexata, paepatota Israel-pijinë pemomoxi barënabia amalecitawijawabelia, bajarapaepatota Moisés itsa pijanaebo cobenanamaxëyotabiabanuca athëbëabetsia, bajarapaepatota, Israel-pijinë pemomoxi acuene-itatsaca tsabiabi amalecitawijawabelia. Paepatota pijinia Moisés namaxëbuatabiabica, bajarapaepatota pijinia, amalecitawi acuene-itatsaca tsabiabi. 12 Moisés belia bitso maxëcuerana penamaxëyotabiabanucaejawa, tsipaji bajayajebi nawajabitsaëtawanapa bajarapamonae. Bajaraxuacujinae nexata, Aarón, Hur-beje, pitabeje iboto. Nexata, tsiwajënaebuatatsi Moisés pe-ecaenexa. Bajaraponë nexata bajarapa-ibotojumata eca. Aarón pijinia Hur-beje caecuenia najuamaxëyotanucabeje athëbëabetsia. Caenë canacujitsia caemaxënenia maxëyotanuca. Nexata, bajarapacuenia bajaraponë bajayajebi ajamatabësaë penamaxëyotecaenexa. Bajarapacuenia exana caniwiyojawabelia, juameto pepëcaewijawabetsia. 13 Josué nexata cuene-amoneyaba daxita amalecitawimi pijawajabitsaëwi, pebecuenia espadata.
14 Nexata, Jehová jumaitsi Moisés-jawabelia:
—Mapaliwaisije yaquinarutsianame cuyalatobaxutojawabelia, Israel-pijinë pemomoxi penacofënëtsiyaniwa patacayawenonaejawa ajena panecuene-amoneyabinexa bajarapamonae. ¡Bajarapacuenianua, jumaitsimëre Josuéjawabelia, bajaraponë peyapëtaenexa, tsipaji xanë itsamatacabi amalecitawi werebiabianajë daxitamatacabijawabelianexa! Nexata, tawerebiabicujinae itsamonae apocuenenajamatabënapitsi tsane bajarapa-amalecitawimi —jai Jehová Moisés-jawabelia.
15 Moisés nexata bajarajota nacuenebanuta altar-jawa Jehová pewënëta. Bajarapa-altar-jawa wënëruba Jehová-nisi,e tsipaji bajaraPonë matacapona Israel-pijinë pemomoxi pacuenia bandera. 16 Bajaraxuacujinae, jumaitsi:
—Amalecitawi pecuenenamataxainaexae pebarënawajabitsaëtsinexa Jehová pijajiwijawabelia, nexata Jehová najumecapanepaeya jumaitsi juya pecuenecanawiatsinexa amalecitawi pebarënabenexa, pijajiwi petsimaxëpatsixae. Bajarapacuenia, tsitecaeya bajaraponë barënabeponaena pemomoxijawabelia tsaponae —jai Moisés.