Moisés paxuyo, Jetro, siwaxainatsi
18
Moisés paxuyo, Jetro,a sacerdotenëcuenia nacuenebaponapona Madián nacuapijiwituatuajëta. Bajaraponë wënëtane Moisés daxita pacuenia Dioso to-exanatsi, Israel-pijinë pemomoxi-ata. Wënëtanenua pacuenia Jehová Egipto nacuawecua juta Israel-pijinë pemomoxi. 2 Moisés peponaewajënaeya Egipto nacuajawabelia, caewëarena itorobab pijawa Séfora, penawiatsinexa paxa Jetro pijabojawaberena. Bajaraxuata, bajarapowa ponapona paxa pijabota, pexënatobeje yajawa. 3 Caenë pewënë Gersón. Bajarapacuenia Moisés wënëruta, tsipaji jumaitsi: «Xanë raja taponaenë itsanacuajawawerena, tawarapaenëcuenia taponaponaenënexa apotayapëtaenacuata», pejaiwënëcuenia. 4 Itsanë pijinia Moisés wënëruba Eliezer, tsipaji jumaitsi: «Taxa pijaDioso neyawenona. Necapanepanua faraón pecobewecua», pejaiwënëcuenia.5 Pamatacabi Moisés, Israel-pijinë pemomoxi-ata, exana pijataxunaebo papenamatajëpae-ira boca Dioso pijatsutoc imoxoyojawata, bajarapamatacabi Jetro, Moisés paxuyo, tobarëpatajopatsi Moisés pijawa, pexënatobeje-ata yajawa. 6 Nexata pepatsiwajënaeya, Jetro tonajume-itoroba Moisés-jawabelia mapacueniaje: «Xanë raja, Jetronë, axuyonë, patajopajë tacataenexa. Bajarapacuenia yajawapatajë nijawa, nexënatobeje yajawa», pejailiwaisi.
7 Nexata Moisés itsa jumetane bajarapaliwaisi, pitsapa pecopiapitsinexa paxuyo. Bajaraponë yaiyataeya pitabarata nabëxëtsutsiaya nuca. Bajaraxuacujinae, bajacoba itabaratsutsuniaya. Nayanijobabeje peponaponaecuenebeje yabara. Bajarapacuenia penabajacobicujinaebeje, joneyabeje Moisés pijacarpabojawabelia. 8 Moisés nexata tsipaeba paxuyojawabelia daxita pacuenejawanë Jehová exana faraón-jawabelia, Egipto nacuapijiwijawabelia-ata, pexaniacuenia peyawenonaejawatatsi israelitawi. Tsipaebanua pacuenia Jehová yawenonaponatsi, paepatota to-ayapëbejetsi namutua penajetarubenaejawata.
9 Jetro nexata bitso siwajamatabëcuenebarëya Jehová, pexaniacuenia peyawenonaponaexae israelitawijawabelia, pecapanepaexaenua Egipto nacuapijiwi pesaëwecua. 10 Nexata Jetro bajarapaepatota, jumaitsi:
—¡Bitso ayaijamatabëcuenenë Jehová! BajaraPonë pacacapanepa Egipto nacuapijiwi pesaëwecua, bajarapacuenia faraón pecobewecua-ata. 11 Aeconoxae matapania yapëtaniji Jehová bitso ayaijamatabëcuenenëcuene daxita diosowiwecua, tsipaji capanepa pijajiwi Egipto nacuapijiwi pesaëwecua, paepatota ayaijamatabëcuene nataeya bejiobia-exanaponatsi —jai Jetro Moisés-jawabelia cuenewënëxaniatsiaya Jehová yabara.
12 Bajaraxuacujinae, Jetro, Moisés paxuyo, capata dajubi petajuitsia-exanaenexa altar-jumata, Dioso pewënëta. Itsadajubi pijinia pewiyajuwënëjawa tajuitsia-exana, penajamatabëcuene-itajëtsinexa asiwaya peyaiyataejawa Dioso. Nexata Aarón, daxita pamonae penamatacaitorobiwi-ata israelitawituatuajëta, pona Jetrojawabelia, penacopabiwi penajuaxaenexa Dioso pitabarata, penajamatabëcuene-itajëtsinexa caejamatabëcuene penajuaxainaejawa Diosojawabelia.
Jetro muxujioba piopaxa Moisés
13 Itsamatacabijawabelia, Moisés eca liwaisi petocanaëjëtsitaxunaejawata. Nexata, Israel-pijinë pemomoxi, liwaisi penatsixainaewi, patapona petsipaebinexatsi paliwaisi natsixaina. Bajarapamonae nubena Moisés pitabarata, bajayacunuajawawerenacujinae caniwiyojawabelia. 14 Nexata, paxuyo, pecuenetaejawatatsi bajarapacuenia, caenë pexanaejawa, yanijobatsi:
—¿Detsa xuajitsia xamë nijanatsicarucaeya exanae daxita mapacueneje? ¿Detsa xuajitsia xamë nija-ecae caenëmë jiwi liwaisi netoxanebinexa, itsajiwi cayawenonaenejewa? Bajarapacuenia nexanaexae, jiwi ayaibitsaëto nacueratanubena xamë nitabarata daxitamatacabijebi —jai Jetro.
15 Nexata Moisés jumecanawiata paxuyo:
—Bajarapacuenia exanajë, tsipaji bajarapamonae pata xanëjawaberena, tayapëtaeya-exanaenexa Dioso pewënëta pijaliwaisi yabara. 16 Pacujinae namata-enetsia liwaisi natsixaina anijajiwibeje, patabiababeje xanëjawaberena. Nexata xanë tsipaebabiabajë Dioso pitorobiliwaisianë, pemuxujiobiliwaisianë-ata, bajarapaliwaisi pejumecowënëtsinexa —jai.
17 Nexata Jetro muxujiobiaya Moisés-jawabelia jumaitsi:
—Apoxanepanae cajena, bajarapacuenia nexanaejawa. 18 Bajarapacuenia nexanaejawata cueranaename. Pamonae-ata xamëjawata nacaetuatabiabiana, cuerananubenaena. Bajarapaliwaisicanaëjëbicuene bitso cajena piayapëbejeliwaisi, ayaibitsaëto liwaisi penatsixainaewi nexanebinexa. Nexata, xamë caenëmë apocacuenecaëjëpae bajarapacuenia ne-exanaejawa. 19 Ajenaconoxae, jitsipajë tanenamuxuna-ewetsijawamë tacamuxujiobijawa. Dioso raja cayajawa tsane xamë, pecayawenonaenexa. Catoxanepana picani caenëmë, xamë, nenucaejawa Dioso pitabarata, netocuaicuaijainexa israelitawi. Nexata, Diosojawabelia tsitajëtsianame bajarapamonae penatsixainaeliwaisianë. 20 Xuacujinae, Dioso pecatonajumecopatsiliwaisi, juya cujarubianame bajarapamonae pacuenia jinawanapaejitsia, pacuenianua exanawanapaejitsia bajaraPonë pejitsipaecuenia. 21 Itsiata baitsi jane, orijibia natsicueya-itapetsianame itsamonae pecacueneyawenonaewinexa, jiwi pijaliwasianë petoxanebiwinexa. Mapitsicuene pexainaewi nato-itapere: Pamonae pecuenecaëjëpaewitsi liwaisi pexanebijawa. Pexaniajamatabëcuenewi. Caeliwaisi pexainaewi. Peyaiyataewi Dioso. Pexaniajaiwi. Pamonae-ata apopejitsipaewi ayaijawa pecobecowë penotsinexa, yamaxë-itojorobiaya liwaisi pexanebijawata. Nexata, bajarapamonae tsicopatsianame peliwaisixanebiwinexa caebitsaëto canacujitsia. Itsamonae ewetsiana mil pajiwibeje, itsamonae cien pajiwibeje, itsamonae cincuenta pajiwibeje, itsamonae-ata diez pajiwibeje. 22 Nexata, bajarapamonae toxanebabiabiana paepatota itsamonae liwaisi natsixaina bajarapabitsaëtonëtuatuajëta. Matapania, bitso pinijipiayapëbejeliwaisi itsa natsixaina, nexata xamëjawaberena liwaisi capatabiabiana netoxanebinexa. Itsiata, xuanë bewelialiwaisijawanë, pamonae nitapetsiwi toxanebabiabiana. Nexata, xamë bajarapacuenia bewelia catsicarucaena nexanaejawa. Apocato-ayaicuene tsane, bajarapamonae neyajawanacuenebabiabixae. 23 Bajarapacuenia xamë itsa exanaename, Dioso itsa ca-itorobanua tacamuxujiobicuenia nexanaenexa, nexata xamë bitso apocatsicarucae tsane ayaicuenia nexanaejawa. Bepijiayo-ata apoyabaracueranaemë tsane. Nexata, daxita liwaisi pecapatsiwimi nawiababiabiana jamatabëcuenebarëyaya pijacarpabonëjawabelia —jai Jetro.
24 Moisés exana paxuyo pemuxujiobicueniatsi. 25 Itapeta israelitawituatuajëta pamonae pecuenecaëjëpaewitsi bajarapitsicuene pexanaenexa itsamonaewecua. Xuacujinae, bajaraponë tsicopata pewetsinexa bajarapamonae caebitsaëto canacujitsia; itsamonae pewetsinexa mil pajiwibeje, itsamonae cien pajiwibeje, itsamonae cincuenta pajiwibeje, bajarapacuenia itsamonae-ata diez pajiwibeje. 26 Nexata, bajarapamonae canacopata liwaisi petocanaëjëbiwinexa caematacabi canacujitsia, petoxanebinexa jiwi paliwaisi natsixaina, pexaniajailiwaisicuenia. Paliwaisianë beweliapiayapëbejeliwaisianë, toxanebabiaba pijacujaya. Moisés pijinia canacopata piayapëbejeliwaisianë, pepopenamatamotsiliwaisianë-ata, petoxanebabiabinexa.
27 Bajaraxuacujinae, Moisés baja paxuyo Jetro napëjiobatsi. Nexata nawiata baja, pijanacuayaberena.