Moisés, Diosobeje nacaxitajarababeje icatsia Sinaítsutota
19
Pacujinae Israel-pijinë pemomoxi xaina acueyabi pajuametobeje pepitsapaecujinae Egipto nacuawecua, bajarapamatacabita pata-othopa baja Sinaítusatojawata, patusatota nuca Sinaítsuto. 2 Nexata, bajarapamonae pepitsapaecujinae Refidim-tusatojawawecua, xuacujinae pata-othopa Sinaítsutojawata. Bajarajota, bajarapamonae exananuba baja pijacarpabonë, pijataxunaebo pexanaenexa. Nexata, jinawanapa Sinaítsutotabu imoxoyojawata. 3 Nexata, Moisés junaya petsutojumabetsia pecaxitajarabinexa Dioso, tsipaji Jehová bajarapatsutojumawetsica junatsiajumaitsi:—¡Jumaitsimëre mapacueniaje israelitawijawabelia, Jacob-pijinë pemomoxi: 4 «Paxamë raja pataneme daxitaxua Jehovánë exanajë Egipto nacuapijiwijawabelia patacajutsinexa. Patanemenua pacuenia paca-ewetsiaya pacacaponatsi paxamë maberenaje itsajota pacayajawaponaponatsi maparucaeje. Pexaniacuenia pacacaponatsi maberenaje, jamatejema panepanepaenexa tajatsutojawaberena, pacuenia pinijiwiria pepunaenë becotsalaa pexi ewetsiaya pecorofetojumawetsica capuna pematapenajawabetsia. 5 Daxita bajaraxua ta-exanaecuene pataneme, nexata paxamë daxitaxua panejumetaneme itsa panejumecowënëtsianame, itsa pa-exanawanapaenamenua patacanajumeliwaisicajonecowëya, nexata patajiwimë tsane. Nexata, bitso pataca-asiwawi tsane daxitajiwi mapanacuata pejinawanapaewiwecuaje. Picani daxita mapanacuapijiwi tajajiwije, 6 itsiata baitsi jane, paxamë itapetsiaya pacatsatsianatsi itsawiriawiwecua saicayacuenia panejinawanapaenexa. Paca-itapetatsinua tajasacerdotewicuenia tajacuene patanetonacuenebiwinexamë», jamëre israelitawijawabelia! —jai Jehová Moisés-jawabelia.
7 Nexata, Moisés runaica Sinaítsutojumawetsica. Icatsia xuacujinae, junata daxita ancianowi, pamonae pewetsiwi. Nexata, daxitaliwaisi tsipaeba pacuenia Jehová itorobatsi. 8 Nexata, daxita bajarapamonae bajarapaliwaisi pejumetaecujinaetsi, najuajumecanawiatatsi daxita caejumecuenia. Jumaitsi:
—Je, xanepana rabaja. Pa-exanaenajë rabaja daxita pacuenia Jehová pane-itoroba —jai.
Nexata, bajaraxuacujinae icatsia Moisés caewëa jumeliwaisicajunaya Jehovájawabetsia pejumaitsijume pewetsiwi israelitawi peyapëtaeya-exanaenexa Jehová.
Dioso itaweta Israel-pijinë pemomoxi pimoxoyotsiyaniwa Sinaítsuto
9 Nexata, petsutojumabetsia pepatsicujinae, Jehová jumaitsi Moisés-jawabelia:
—Nexata, xanë cabarëcuaicuaijai tsanetsi pitayaëpajubotuatuajëjawata jiwi pitabëta, bajarapamonae tanejumetaenexa tacabarëcuaicuaijaijawa xamëjawabelia. Nexata, bajarapacuenia bajarapamonae cajumexaniataena nexaniajaitsabiabijawa daxitamatacabijawabelianexa pacujinae nejumewajunupaebabiabianame tacanajumecopatsiliwaisi —jai Jehová Moisés-jawabelia.
Nexata, bajaraxuacujinae Moisés jumewajunupaeba Jehovájawabelia jiwi pejumaitsijume. 10 Nexata, jumaitsi Jehová:
—¡Runaremeca baja, bajarapamonae nejumaitsinexa ajena, merawia-ata, penacuenexaniawaetsinexa pibisiacuene pexanaejawawecua, tsipaji acueyabi matacabita bajarapamonae netonacaetuatsiana yaiyataeya xanë tawënëta! Nexata, bajarapamonae penaxatabijawanë quiatsiana. 11 Bajarapamonae najamatabëcuenexaniawaetsiana pexaniajamatabëcuene pexainaenexa xanëjawaberena, tsipaji raja acueyabi matacabita Jehovánë patsiarecajë bajarapamonae pitabëta Sinaítsutojumabereca. 12 Nexata, bajarapamonae petsuto pimoxoyotsiyaniwa, pejayatsiyaniwanua, parutsianame peyacaranatsijawa petsutotabujawa matatoyorotsia. Jumaitsimë tsane mapatsuto paneyacaranatsicujinae: «¡Pëtsa itsajiwi-ata junua paneyacaranatsi-ënëaberena! ¡Pëtsa pona mapatsutoyenepanajawa-ata! Nexata, pajiwiyo mapatsutoyenepanajawa ponaena, bajarapajiwiyo pepacuene tëpaena», jamë tsane. 13 Nexata, pajiwiyo jonena bajarapayacaranatsi-ënëabelia, bajarapajiwiyo pabeyaxuabianame pajayatsinejewamë, panetseconaejawata ibotonëta, itsa jume, panetseconaejawata cuererebonëta. Bajarapacuenia pa-exanaename jiwitonëjawabelia, dajubijawabelia-ata. Nexata, apobepacopatsimë piasaëtsaponaponaenexa bajaraxua pexanaejiwi. Nexata, itsa pajumetaneme pe-obijume apiaya ayaijumeta ovejamata-eto,b bajarapaepatota matapania cuenecaëjëpa pimoxoyotsinexarena jiwi petsutotabujawaberena, itsiata xenetsinejewa peyacaranatsijawa —jai Jehová.
14-15 Nexata, Moisés baja runaica Sinaítsutowecua, jiwi petsipaebinexa pacuenia Jehová tonajumecopatatsi. Nexata, jumaitsi bajarapamonaejawabelia:
—¡Panaxaniawaetsianame. Panajamatabëcuenexaniawaetsianamenua pamerawiajawabelianexa, tsipaji Jehová nacatsitanaitajëtsianica. Nexata baja, paquiare panija-ese. Pijinia papebijiwimë pëtsa pa-imoxoyotame abaxë panijawajiwi, mapaepatojawaweliacujinaeje Jehová wajanacatsitanaitajëtsijawabelia! —jai Moisés.
16 Nexata baja, acueyabi matacabita bajayacunua, bajarapaepatota piaitayaëpajuboxaneto runaica Sinaítsutojumabetsica, pejuma-acatsinexa. Bajarapaepatota, bitso yamaxë apaxayo. Niwepajunujunua ayaicuenia. Bajarapacuenia ayaicuenia najumetajunujunua. Nexata jane baja, najumeta pinijijumecuenia ovejamata-eto pe-obijawa. Nexata, daxitajiwi pijacarpabonëjawa pejinawanapaewi, bajarajota bitso neconecojai pecajunawi pejumetaejawata bajaraxua. 17 Nexata, Moisés matacapona bajarapamonae pijacarpabonëwecua pecopiapitsinexa Dioso, petonacaetuatsinexa pitabarata Sinaítsutoyenepanajawaberena. Itsiata, nubena-othopa peyacaranatsijawa pënëwelia. 18 Nexata, bajarapatsutojumata pitsapa petsëxëxaneto, tsipaji Jehová runaica pecotia yajawa bajarapatsutojumabetsica. Nexata, petsëxë junaponaya bepetajuitsitsëxëxaneto. Bajarapaepatota, bajarapatsuto najëaba bitso ayaicuenia. 19 Nexata, ovejamata-eto pe-obijawa caenajumetsi canacujitsia bitso ayaijume tsaponae pewajënaeyabelia. Nexata, Moisés jane baja itsa barëcuaicuaijai Diosojawabelia, nexata Dioso jumecanawiataponatsi pejumediridirinaecuenia.
20 Nexata, Jehová perunaecujinae pepoSinaítsutojumabetsica, bajarapatsutojumawetsica junatatsi Moisés petsianexa petsutojumabetsia, pebarëcuaicuaijainexatsi. Moisés nexata junaya bajarapatsutojumabetsia. Bajarajotatsia pepatsicujinae, 21 Jehová jumaitsitsi:
—¡Runaremeca baja icatsia, nemuxujiobinexa bajarapamonaejawabelia pejoneyaniwa mapatsuto matatoyorotsia peyacaranatsi-ënëaberena, pejitsipaexae tanetaenexa, tsipaji raja bajarapacuenia tëpaejitsipa ayaibitsaëto! 22 Bajarapacuenia sacerdotewi-ata apocuenecaëjëpaetsi pimoxoyotsinexa mapatsutoje. Tanetonacuenebawanapaewi-ata tajacuene, acuenebi tsipae tane-imoxoyotsijawa pewajënaeya nacuenexaniawaetsinejewa. Nexata, bajarapamonae itsa yaneconiaya nimoxoyotsipa, belia tananeconitsia-exanaejawata tëpaeya-exanaejitsipajë bajarapamonae pijaneconijamatabëcuene —jai Jehová.
23 Nexata, Moisés jumecanawiata Jehovájawabelia:
—Nexata, bajarapamonae apocuenecaëjëpaetsi pejunaejawa mapatsutojumajawabetsinaje, tsipaji xamë pane-itorobame patacaranatarutsinexa matatoyorotsia mapatsutoje, bajarapacuenianua patanawecuatsatsinexa mapatsuto patacayaiyataexae —jai Moisés.
24 Itsiata baitsi jane, Jehová jumaitsi Moisés-jawabelia:
—¡Jume! ¡Runaremeca baja! Icatsia xuacujinae, junaenimina Aarón yajawa. Nexata, pamonae sacerdotewi, bajarapacuenia daxitajiwi apobeponae bajarapayacaranatsijawawecua, pejunaenexatsina itsajotatsina xanë Jehovánë ponaponajë. Belia, bajarapamonae xanëta pijacuata nawerebiabijitsipa —jai Jehová.
25 Moisés nexata runaica bajarapatsutowetsica. Nexata, tsipaeba xua Jehová jumaitsi bajarapamonae yabara.