Diez paliwaisibeje Dioso tonajumecopata Israel-pijinë pemomoxijawabelia pejumecowënëtawanapaenexa
20
Icatsia Dioso pecuaicuaijaijawata, mapaliwaisianëje Sinaítsutojumawetsica, jumaitsi daxita bajarapamonaejawabelia:2 —Xanë raja Jehovánë panijaDiosonë. Patacajutsinë Egipto nacuawecua, itsajotalia picani amoneya patonacuenebawanapame.
3 »¡Pëtsa panatoxainame itsadiosomonae saicaya xanëwecua, panesiwanajamatabëcuenecopatsinexa bajarapamonaejawabelia! ¡Biji rajane, ëxanëjawaberena pane-itaxutuajamatejemamëre patacayawenonaenexa!
4 »¡Pëtsa pa-exaname itsawiria jumapecataenëanë, asiwaya panesiwanajamatabëcuenecopababiaba bajaraponëanëjawabelia panenamatawenonaejawata xanëwecua panijadiosowicuenia! ¡Daxitaxua xaina athëbëpijicuenejawanë, bajarapacuenia mapanacuata irapijijawanë, xuanë-ata xaina menepijicuenejawanë, daxita bajaraxuanë pëtsa jumapecataeyacuenia pa-exaname! 5 ¡Pëtsa yaiyataecuenia panematabacabëta patonubenabiabame, asiwaya panenawajëcaenexa bajaraxuanëjawabelia, panejumecowënëtabiabixae, tsipaji raja ëxanë Jehovánë panijaDiosonë! Xanë raja tacuenesaënë daxitawecua. Tacueneca-ëbinëa pamonae asiwaya siwanajamatabëcuenecopababiaba jumapecataeya pexanaenëanëjawabelia xanëwecua. Tacuene-asiwanënua jiwi pibisiacuene pexanaeyaniwa, tsipaji tananeconitsia-exanaenë pibisiacuene pexanaewi pesiwanajamatabëcuenecopatsijawata itsacuenejawabelia xanëwecua, penawajëcabiabinexa bajaraxuajawabelia. Pajiwi naneconitsia-exanabiabajë tanewecuasiwanajamatabëcuenecopatsixae, bajarapajiwi pijaneconimi tsijumajopaeya-exanabiabianajë pexijawabelia tananeconitsia-exanaenexa, bajarapijinia pacuenia pemomoxijawabelia, penaexanaponaewi cuatro papemomoxibitsaëtojawabelia, tsipaji bajarapacuenia pexanaejawata nesiwanajamatabëcuene-itajëtabiaba tane-itoyajawa. 6 Itsiata baitsi jane, pamonae netane asiwayacuenia, nejumecowënëtawanapanua ta-itorobiliwaisi, nexata bajarapamonaejawabelia pijinia itaxutotsoniataeyabiabianajë, pewajënaeyabelia tayawenonabiabinexa, bajarapacuenia pexijawabelia, pemomoxijawabelia-ata, orijibia pemomoxi pexijawabelia-ata tsaponae, pepobexëajawabelia ayaibitsaëtoxaneto pemomoxi penaitajëtaponaewijawabelia, tsipaji nesiwanajamatabëcuene-itajëtabiaba tane-asiwajawa.
7 »Xanë raja Jehovánë panijaDiosonë. ¡Nexata, pëtsa jemacuenia panewënëcacuaicuaijamë itsajiwi papecayaiyataenexa! Bajarapacuenia-ata apoxanepanae quenetsiataeyacuenia patanewënëcacuaicuaijaijawamë, tsipaji xanë apocopatsinë tsane naneconitsia-exanaenejewanë pajiwiyo pibisiacuenia newënëcacuaicuaijai.
8 »Panajamatabënapitabiabianame xanë Diosonë ta-itapetsimatacabi, siete matacabi penacuera-ewetsimatacabinexa,b bajarapamatacabi tsatsiaya panexainaenexa itsamatacabianëwecua. 9 Panacuenebabiabianame seis pamatacabibeje daxitaxuanë pajitsipame pane-exanaejawa. 10 Itsiata baitsi jane, siete matacabita, xanë Jehovánë panijaDiosonë tajamatacabi, panacuera-ewetabiabianame asiwaya pataneyaiyataexaemë. ¡Pëtsa bajarapamatacabita caejiwi-ata nacuenebabiaba paxamëyajuwënëjiwi, panexijiwi-ata, panexënatowaxi-ata, bajarapacuenia amoneya papecatonacuenebiwi-ata, bajarapacuenia panijadajubi-ata, bajarapijinia pacuenia pamonae jinawanapa paxamëjawata papecatonacuenebawanapaewi, itsanacuajawawerena penapatsiwi, 11 tsipaji raja xanë Jehovánë seis matacabita daxitacuene weretajë ta-exanaejawa mapanacuaje! Daxita athëbëpijicuene, irapijicuene, manuamenepijicuene-ata, daxita bajaraxuanë exanaeweretajë seis matacabita. Xuacujinae, wemaxënacuera-ewetajë siete matacabita. Bajaraxuata, xanë Jehovánë nato-itapetajë bajarapamatacabi, saicaya daxitamatacabianëwecua, yaiyataeya panenacuera-ewetsimatacabinexa —jai Dioso.
12 Icatsia, Dioso jumaitsi:
—¡Yaiyataema axa, ena-ata, jamatejema bajayajebi niasaëtsaponaponaenexa panacuata xanë Jehovánë panija Diosonë carajutatsi nijamonae yajawa panejinawanapaenexa!
13 »¡Pëtsa beyaxuabame jiwitonë!
14 »¡Pëtsa jaitame pibisiacuene ne-exanaenexa newitota itsajiwiyojawabelia panenapitsijiwibejewecua!
15 »¡Pëtsa nacobetoxotame!
16 »¡Pëtsa itsajiwi-ata baracuaicuaijamë najumetsënëtsiaya apocuenetaenejewamë!
17 »¡Pëtsa to-itaxutuajiname itsanë pijabopijijawa, bajarapacuenia pijawa-ata, bajarapacuenia amoneya petonacuenebiwitsi, pebijiwi, petiriawi-ata, bajarapacuenia pijabueyu, pijaburro-ata; daxitacuene xua xaina baja bajaraponë! —jai Dioso Sinaítsutojawawetsica Israel-pijinë pemomoxijawabelia.
Israel-pijinë pemomoxi bitso cujunawa Dioso
18 Bajarapaliwaisi Dioso pebarëcuaicuaijaijawatatsi, daxita israelitawi jumetaenubena. Taenubenanua yamaxëcuenia pejurujurujaitsaponaejawa, peniwepajonejonejawanua. Jumetanenua penajumetaponaejawa piobijawata ovejamata-eto. Bajarapacuenia-ata tane pematatsëxëpitsapaejawa petsutojumatatsia. Bajarapacuenia itsa tane bajarapamonae, nexata bitso junawa. Pecajunawi tajë wecuanubena. 19 Nexata, xuacujinae bajarapamonae penatixibicujinae, itsajota nubena bajarawerena jumaitsi tsanubenae Moisés-jawabelia:
—Paliwaisianë Dioso jitsipa patanejumaitsijawa patajumecowënëtsinexa, xamëjawabelia cajumaitsi tsabiabi tsane, xamë juya patanetsipaebabiabinexamë Dioso wajanacatonajumecopatsiliwaisi. Nexata, xua panetsipaebabiabianame, pacajumecowënëtsianatsi. ¡Pëtsa jane paxanë panebarëcuaicuaijai Dioso, tsipaji raja icatsia itsa pajumetaejitsipajë belia patëpaejitsipajë! —jai bajarapamonae.
20 Nexata, Moisés jumecanawiata bajarapamonaejawabelia:
—¡Pëtsa pajunawame! Dioso raja patsica papecajamatabëcueneyapëtaenexa, daxitamatacabijawabelia cujunawiaya panejinawanapaenexa bajaraponë paneyaiyataexae, pibisiacuene pane-exanaeyaniwa —jai Moisés.
21 Nexata, itsa abaxë bajarapamonae tajëwecua nubena bajarapatsuto, Moisés juya icatsia junaya pequirijaipajubojawatsia pimoxoyotsinexa itsajotatsia Dioso ponapona.
Dioso tonajumecopata altar-jawa pexanaejawanexa
22 Bajaraxuacujinae, Jehová jumaitsi Moisés-jawabelia:
—¡Jumaitsimëre mapacueniaje israelitawijawabelia: «Jehová pacajumaitsi: Paxamë panejumetaneme athëbëwetsica patacabarëcuaicuaijaijawa paxamëjawabelia! 23 Pëtsa pa-exaname oronanitojawanëta itsacuene jumapecataeya pexanaenëanë, bajarapacuenia palatananitojawanëta, bajaraponëanëjawabelia asiwaya panewajëcabiabinexa xanëwecua panenamatawenonaejawata 24 Nexata, panetonacuenebianame atsa-altar-jawa, bajaraxuajumata panetajuitabiabinexa tawënëta oveja, bajarapacuenia vaca-ata. Bajarapa-altar-jawata, patajuitsianame dajubi daxitanë panijaneconijamatabëcuene. Itsanë pijinia patajuitsianame, caejamatabëcuene wajanajuaxainaexae namata-enetsia patacasiwajamatabëcuenecaewixae panijaneconimi. Nexata, panacuata pajinawanapaejitsiamë, bajarapacuenia pa-exanabiabianame tawënëta, tajitsipaecuenia patanenajamatabënapitabiabinexamë. Nexata, xanë bajarapaepatota pacajamatabëcuene-imoxoyotsianatsi pexaniacuenia patacayawenonaenexa. 25 Itsa jamatabëpa-exaname ibo-altar-jawa, pëtsa paneto-exaname pa-ibotonë penamatajëpaeya-exanaejawa panexanebicuenia Saya panacuenebianame bajarapacuenia iboto paxanebinejewamë, tsipaji itsa paxamë paxanebijitsipame bajarapa-ibotonë panecanacuenebijawanëta, nexata aponetoxanepanae tsipae bajarapa-ibo-altar-jawa. Baitsi, panexanebi-ibotonë itsa pacanacuenebame ibo-altar-nexa, xua panetotajuitsipame bajarapa-altar-jumata aposiwajamatabëcuenebarëyanë tsipae. 26 Itsa panacuenebianame altar-jawa, pëtsa panato-exaname panejunaejawanexa altar-jumata panetajuitanucaenexa dajubi, tsipaji raja itsa pajunaejitsipame belia itsamonae pacatabuwitaejitsipa panetabuwisajinaejawa panenaxatatsijawabëxëpana», jamëre! —jai Jehová Moisés-jawabelia.