Pacuenia be-eweta amoneya petonacuenebawanapaewitsi
21
Jehová mapaliwaisianëje tonajumecopata Israel-pijinë pemomoxi pejumecowënëtawanapaenexa. Jumaitsi Moisés-jawabelia:2 —Pacuenia pacomuatabiabame dajubinë, bajarapacuenia itsa panatocomuatsianame panijawiriawiyajuwënënë panijabota amoneya papecatonacuenebabiabinënexa, bajaraponë panacuenebia-exanabiabianame saya seis pawaibeje. Nexata, siete waita baja pacopatsianame pepitsapaenexa amoneya papecatonacuenebabiabijawamiwecua.
3-4 »Pajiwi panenatocomuatsiwi itsa pimisiarucaejiwiyo pacapatajopame, nexata imisia wecuapitsapaena pijatuxanenë petonacuenebaponaponaejawamiwecua. Baitsi, ponë panenatocomuatsinë, powa-ata panenatocomuatsiwa amoneya panijabota papecatonacuenebaponaponaejiwiyonexa, itsa napitsia-exanabeje, nexata pamatacabi pebi pitsapaena, apobepayajawacopatsimë pijawa pebarëponaenexa, bajarapijinia pacuenia pexi-ata. Bajarapacuenia apotsicarucaetsi penatocomuatsinë pexanaenexa.
5 »Bajaraponë itsa pacajumaitsi tsane papijatuxanenëmëjawaberena: ‘Asiwanë powa nepitsia-exaname tajawanexa, taxi-ata. Bajarapacuenianua tajatuxanenëmë ca-asiwatsi. ¡Nexata, apojitsipaenë tacawecuapitsapaejawa,’ itsa pacajai tsane, pëtsa pacapitsapame! 6 Nexata, pijajiwitonë pexainaenë caponaena petonajumecopatsiliwaisi pewetsiwijawabelia. Bajarapamonae pitabarata muxuwojorutsiana, peyapëtaenexa daxitajiwi pacuenia pemuxujoronaenëtsi nacopatsijitsia daxitamatacabijawabelia petonacuenebaponaponaenënexa. Bajarapacuenia itsa pa-exanaename, daxitamatacabijawabelianexa panijabota amoneya pacatonacuenebaponaponaena.
7 »¡Itsa panijamonaenë pacacanajetsiana pexënatoyo, amoneya papecatonacuenebaponaponaewanexa, pëtsa pa-exaname bajarapowajawabelia pacuenia pa-exanabiabame panenatocomuatsipebijiwijawabelia! Baitsi, bajarapowa apopacopatsimë tsane siete waita papecawecuapitsapaenexa camatamotsinejewa abaxë. Matapania matamotsiana penacapanepaematamo pexainaenëtsijawabelia wecuapitsapaena petonacuenebijawami seis pawaibeje peweretsicujinae. 8 ¡Ponë comuatsiana petiriwa pijajiwitowanexa, pijabota amoneya petonacuenebaponaponaewanexatsi, itsa penatocomuatsicujinae apotsitaxanepanaetsi, pitsijitsia-ata pijawacuenia picani, pëtsa itsiata pexainaenë canajeta bajarapowa saicaya nacuapijinëjawabelia, pewecuaponaeyaniwa israelitawiwecua! Biji rajane, becopata bajarapowa pijamonaeyajuwënënë petomatamotsinexatsi pewecuapitsapaematamonexa, jamatejema bajarapowa pewecuapitsapaenexa. 9 Ponë pijinia pexënato pitsia-exanaena, pijabota amoneya petonacuenebaponaponaewatsi, taena baja pecopenacuenia. 10-11 Boxainaenë, itsa jume, pexënato, bajarapowa pitsiaya pecaponaponaecujinae cotocaewi pepitsiwacuenia,a acuenebi penawecua-itawetsijawa. Itsamatacabijawabelia boxainaenë, itsa jume, pexënato itsa jaita itsapetiriwa pepopijawanexa, acuenebi penawecua-itawetsijawa copiaya pebarëponaponaewa. Bajarapowa apotae-ata pijawacuenia, itsiata apobewecua-asiwa xua namatawenona. Bajaraxuata, itsa aporajutaponae xuanë namatawenona, nexata apotomatamotsi-atatsi, itsiata bepitsapa pijacujaya, bajarapacuenia pecopatsinexa amoneya petonacuenebaponaponaewacuenemi —jai Jehová Moisés-jawabelia.
Pacuenia be-exana jiwitonë pebeyaxuabinëtsi, pebijiapaitsinëtsijawabelia-ata
12 Icatsia, Jehová jumaitsi:
—Ponë pacayajuwënëbeyaxuabiana, juya pabeyaxuabianame. 13-14 Itsa bajaraponë jiwitonë anaeya beyaxuabiana itsacuenejawayo petonaneconitsixaetsi, juya paxamë pabeyaxuabianame. Taja-altar waetabanucae-ata panebeyaxuabiyaniwa, pacaponaename itsiata taja-altar-jawawecua panebeyaxuabinexa. Itsa aponajamatabëxainae-ata jiwitonë pebeyaxuabinexa, saya jemata beyaxuabiana, nexata bajaraponë wecuanajetabijirawiana patomaraxijawabelia pacatsitajëtsianatsi itsamatacabijawabelia, itsajota jinawanapaejitsia peneconitsiwitsi pewecuapanepaponaponaenexa peyamatamotsiwiwecua.b
15 »Ponë paxa bena, pena-ata bena, bajaraponë-ata pabeyaxuabianame. 16-17 Ponë-ata paxa pibisiacuenia bijataena, pena-ata pibisiacuenia bijataena, pabeyaxuabianame. Pajiwi pacayajuwënënacobetoxotsiana penaxainaeyabinexa, bajarapacuenia pecanajetsinexa-ata, bajarapajiwi pabeyaxuabianame.
18 »Itsanëbeje itsa penabeponaponaejawata, pewënajiwitonë itsa bijiapaita pecobethaitota, itsa jume, ibotota, itsiata bajaraponë itsa apoyabitso, 19 itsa apoyatëpae, nexata ponë bijiapaita aponaneconitsi tsane jiwi pebeyaxuabijawabelianexatsi. Baitsi, pebijiapaitsinë itsa penacacatsubinaeta nucaponapona wayafuabelia, nexata ponë bijiapaita matamotsiana saya pebijiapaitsinëjawabelia penaxuabijamatabëcujiru penacuenebimatacabianë, pewaëbijamatabëcuenetsinua pejamatejemajawabelia.
20 »Ponë peconitaxuabijawata naeboyota yatëpa petonacuenebaponaponaejiwiyo, pebi, petiriwa-ata, bajaraponë naneconita. Juya, pabeyaxuabianame. 21 ¡Itsiata, itsa peconitaxuabijiwiyo namatacota icatsia najuamatacabibejecujinae, pëtsa naneconitsia-exaname, tsipaji pijajiwitonë!
22 »Bajarapacuenia penabejawata, itsa bijiapaita peyacotajinaewa penacueto, bajarapowa itsa wecuajopatsi bajarapanacuetoyo, nexata pebijiapaitsinë matamotsiana pejopaejamatabëcujiru pejewaxijiwiyo. Bematamota pacuenia pijawa pexainaenë tocaëjëtatsi, peyanacua-ewetsiwi-ata. 23-25 Itsiata, bitso itsa bijiapaita ayaicuenia, nexata mapacuenia matamotsianaje: Itsa bajarapowa tëpa, juya bajaraponë pabeyaxuabianame. Itsa itaxutobijianatsi, juya pa-itaxutobijianaename. Itsa wonobijianatsi, juya pawonobijianaename. Itsa cobebijianatsi, juya pacobebijianaename. Itsa taxubijianatsi, juya pataxubijianaename. Itsa bijiapaita isotota, juya patajuitsianame. Itsa wajënë-exanatsi, juya pawajënë-exanaename. Pacuenia bijiapaitatsi, juya bajarapacuenia pabijiapaitsianame.
26 »Panijajiwitonë pane-itorobijawata itsa apopacajumecowënëtsi, bajarapajamatabëcuene itsa paconitsianame, nexata paneconitsijawata itsa pa-itaxutobijianaejitsipame, pane-itaxutobijianaejamatabëcuene pacopatsianame baja papecawecuapitsapaenexa. 27 Itsa pijinia paneconitsijawata itsa pawonobijianaejitsipame, panewonobijianaejamatabëcuene pacopatsianame baja papecawecuapitsapaenexa, amoneya papecatonacuenebaponaponaejawa —jai Jehová Moisés-jawabelia.
Dajubi pianaepanaewi pewetsicuene yabara
28 Icatsia, Jehová jumaitsi:
—Bueyu pemata-etota itsa cacuatatsi pebi, petiriwa-ata, nexata pecacuatsijiwitsi itsa yatëpaena, bajarapabueyu patseconaename piniji-ibotonëta panebeyaxuabinexa. ¡Pëtsa bajarapabueyu pewijawa paxaneme! ¡Pëtsa pananeconitsia-exaname bueyu pexainaenë! 29 Itsiata baitsi jane, pexainaenë yapëtae-ata bajaraponë pianaepanaejawa, itsa apoyacaranatanutsi, nexata itsajiwiyo itsa beyaxuabatsi, pexainaenë bajarapabueyu payajawabeyaxuabianame panetseconaecuenia piniji-ibotonëta, tsipaji yapëtae-ata pijabueyu pianaepanaejawa, apoyacaranatanutsi. 30 Itsiata, itsa petëpaenë pijamonae wajëcaejitsipa petëpaenëmatamo bueyu pexainaenëjawabelia, nexata bematamota petëpaenë pijamonaejawabelia petocaëjëtsicueniatsi pewecuapanepaenexa pebeyaxuabijawaminexatsi. 31 Bajarapacuenia jiwi exanaena dajubinëjawabelia, pexainaenëjawabelia-ata pacujinae bueyu coxibeyaxuabatsi, pexënato, pexënatoyo-ata. 32 Bajarapadajubinë itsa tobeyaxuabatsi itsanë amoneya petonacuenebijiwitsi, petiriwa, itsa jume, pebi-ata, nexata bajarapabueyu pexainaenë bematamota treinta ponëbeje palata, amoneya petonacuenebinëtsi pexainaenëjawabelia. Bueyu-ata bebeyaxuaba, ibotonëta petseconaecuenia.
33 »Pajiwi mëthëxaneto pecueyabuatsicujinae, itsa apowë-acatabuatsi tsane bajarapamëthëxaneto, nexata itsajiwi pijanë bueyu, burro-ata itsa tojopaerecatsi bajarapamëthëareca, 34 pemëthëcueyabuatsijiwi matamotsiana dajubi pexainaenëjawabelia. Nexata, juya rajutsiana pijanë bueyu piasaënë, pijadajubi petotëpaenëtsijawabelia. Nexata, mëthëxaneto pecueyabuatsinë pitsiana bueyu petëpaenë.
35 »Pajiwi pijabueyu tonamaxëwanitatsi, tocacuata itsanë pijanë bueyujawabelia, bajaraponë itsa yatëpa pecacuatsijawatsi, nexata pija bueyu petonamaxëwanitsinëtsi canajetsiana, bajarapamatamo najëpaeya penatsicobetsatsinexabeje bueyu petotëpaenëtsijawabelia. Ponë pijinia pijabueyu totëpatsi, bajaraponë-ata pewi namatajëpaeya natsicobetsatsianabeje. 36 Itsiata, bueyu pexainaenë yapëtae-ata pijanë pianaepanaenëcuene, apopeyacaranatanutsixae, itsa tobeyaxuaba pecacuatsijawata itsanë pijadajubijawabelia matamotsiana. Juya, pijanëmi piasaënë rajutsiana petotëpaenëtsijawabelia. Pajiwi pijanë tonamaxëwanitatsi juya pitsiana petëpaenë —jai Jehová Moisés-jawabelia.