Pacuenia matamotsijitsia pexainaenëjawabelia petonacobetoxotsijamatabëcuene, petobijianaejamatabëcuene-ata
22
1,4 Icatsia, Jehová jumaitsi:—Ponë itsanë pijavaca tonacobetoxotsiana, itsa baja beyaxuabiana, itsa jume, itsa baja canajetsiana, nexata pexainaenëjawabelia juya matamotsiana mapacueniaje: Caenë vaca petonacobetoxotsimatamo, juya rajutsiana cinco ponëbeje pijavacayajuwënëwimi. Ponë pijinia itsanë pija-oveja tonacobetoxotsiana, itsa baja beyaxuabiana, itsa jume, itsa baja canajetsiana, nexata pexainaenë juya matamotsiana mapacueniaje: Caenë oveja petonacobetoxotsimatamo, juya rajutsiana cuatro ponëbeje pija-ovejayajuwënëwimi. Itsa abaxë nucaena pijabota ponë tonacobetoxota, nexata pexainaenëjawabelia tocanawiatsiana. Itsiata, petonacobetoxotsimatamo caenë juya pijanëmi yajawarajutsiana. 2-3,5 […]
6 »Ponë pecobe-isotota toyamatatajuenatsi itsanë pe-ubijawa, itsa jume, penotajebijawanë, nexata pexainaenëjawabelia petotajuitsijamatabëcuene pematamocuenia najëpaeya matamotsiana.
7 »Itsajiwi itsa palata xaniawaetsia-exana boxainaenëjawabelia, itsa jume, bitso penamatamotsijawa-ata, bajarapacuenia dajubinë-ata, nexata petsipuenetsinëtsi itsa wecuanacobetoxotatsi, itsiata itsa penacobetoxotsinë caxitajaraba, nexata bajarapapenacobetoxotsinë bematamota anijajawabeje pematamocuenia penacobetoxotsijamatabëcuene pijajawa pexainaenëjawabelia. 8 Itsa pijinia jaitsi-ata, apocaxitajarabi penacobetoxotsinë, nexata boxainaenë caponaenatsi pijaneconi petocanaëjëtsinexatsi nacua pewetsiwijawabelia, peyapëtaenexa itsa xaniajai nacobetoxota bajaraponë xua tsipuenetatsi. Itsa xaniajai naneconita, bajaraponë bematamota pijajawa pexainaenëjawabelia. 9 […] 10 »Bajarapacuenia itsajiwi itsa tsipueneta pijadajubinë burro, bueyu, oveja-ata itsanëjawabelia, petsipuenetsicujinae itsa tëpa pijacuata, itsa jume, itsajiwiyo taenejewa itsacuenia itsa nabijiapaita, itsa jume, tonacobetoxotatsi, 11 nexata peto-ewetsinë nucaena Jehová pitabarataa xaniajaiya pejumaitsinexa pepacuene apopeyacajërëtsijawa bajarapadajubi. Pexainaenë nexata jamatabëcuenecaewiana pijanë petonaxuabinëtsi yabara. Peto-ewetsinë apotsicarucaetsi tsane pematamotsinexa pexainaenëjawabelia. 12 Itsiata, itsa peto-ewetsinë tonacobetoxota, bajaraponë bematamota pexainaenëjawabelia. 13 Itsa pijinia unupijinë toxanetsi peto-ewetsidajubinë, nexata bajarapadajubinë peyajunuxaejawa becapata petsitajëtsinexa. Nexata, peto-ewetsinë apotsicarucaetsi tsane pematamotsinexa.
14 »Itsajiwiyo itsa nacowaeta dajubinë pecanacuenebinexa, nexata bajarapadajubinë itsa nabijiapaita, itsa jume, itsa tëpa pecowëta pexainaenë, nexata ponë pecowaetsinë bematamota pexainaenëjawabelia. 15 Itsiata baitsi jane, itsa itsacuene bajarapadajubinë pexainaenë peponaponaejawata, apobematamotsi. Matamotsiana saya pamatamo tocaëjëtatsi penacowaetsijamatabëcuene —jai Jehová Moisés-jawabelia.
Jiwi pena-ewetsiliwaisianë
16 Icatsia, Jehová jumaitsi:
—Ponë yamaxë-itojorobiaya natsimaxëjunata pejanawa apopenacojiobiwa, itsa quenetsiataeyaxuaba bajarapapejanawa, beyapita. Bajarapacuenianua caecuenia bematamota pijamonaejawabelia pepitsijamatabëcuene. 17 Itsiata, pejanawa paxa itsa apojitsipae pecopatsinexa pexënatoyo peyapitsijawatsi, nexata caecuenia bematamota pejanawa paxajawabelia imisia pejinawanapaewaxi pijamatamocuenia, xuawajëto piopaxajiwi bamatamota paxuyojawabelia pexënatoyo pepitsijamatabëcuene.
18 »¡Papetiriwa jiwi piawitanenexa, petëpaenexa-ata caxueyatabiaba, bajayajebi pëtsa pacopatame peponaponaenexa! A̱jena̱ pawënëtaneme, pabeyaxuabianame.
19 »Pajiwi dajubinëjawabelia pewitota pibisiacuene exana, bajarapajiwi penaneconitsixae Diosojawabelia pabeyaxuabianame.
20 »Ëxanë Jehovánëjawaberena panematabacabëta pawajëcabiabianame. Paxamëyajuwënëjiwi dajubi itsa beyabiabiana, bajarapawijawa tajuitsiaya perajutabiabinexa jumapecataeya pexanaenëanëjawabelia, bajarapajiwi pabeyaxuabianame.
21 »Itsanacuapijiwi-ata itsa patsiana panijanacuata, xaniawaetsia pataeyabiabianame. ¡Pëtsa itsanacuapijiwi-ata payamaxë-itojorobabiabame! ¡Pëtsanua pabejiobia-exanabiabame, tsipaji raja paxamë-ata pamatacabi pajinawanapame Egipto nacuata, pasaicayanacuapijiwimëcuenia pajinawanapame! Nexata, paxamë bepayapëtaneme xaniawaetsia pane-itaxutotsoniataenexa bajarapamonae.
22 »¡Pëtsa pabejiobia-exanabiabame pamona pewecuatëpaewanëtsi, bajarapacuenia tsonijiwixi-ata! 23 Bajarapamonae panebejiobia-exanaejawa yabara itsa newajëcaena tayawenonaenexa, xanë jumetaenajë tato-exanaenexa tanewajëtsicowëya. 24 Xanë juya pacabara-anaepanaenatsi. Nexata, yamatamotsiaya pacabeyaxuabia-exanaenatsi, panijawajiwi penacopatsinexa pamona pewecuatëpaewatsicuenia, panexi-ata penacopatsinexa tsonijiwicuenia.
25 »¡Paxamëyajuwënëjiwi bepejiobiwi itsa pacacowaetsiana palata, itsa patsicopatsianame, pëtsa pamatamoyanijobame panetsicopatsipalata pematatsënëa papecatocanawiatsinexa! Pacuenia patsicopatsianame, bajarasaya pacuenia pacatocanawiatsiana. 26-27 […]
28 »¡Pëtsa pibisiacuenia panebaracuaicuaijamëb xanëDiosonë! ¡Bajarapacuenianua, pëtsa pibisiacuenia pabaracuaicuaijamë pamonae pacayanacua-ewetawanapa! 29-30 […]
31 »Paxamë raja pataca-itapetsiwi saicayacuenia daxitanacuanëpijiwiwecua panejinawanapaenexa. ¡Nexata, padajubinë jemata pijacuata tëpaena, bajarapacuenia unupijinë ponë beyaxuababuatsiana, bajaraponëwito pëtsa paxaneme! ¡Ponë-ata penacuaibocatarërëtsicuenia tëpa, bajaraponë-ata pëtsa pewito paxaneme! Bajarapawi saya parajutabiabianame awiri pexaeyabiabinexa —jai Jehová.