23
Icatsia, Jehová jumaitsi Moisés-jawabelia:—¡Pëtsa najumetsënëtsiaya pabaracuaicuaijamë itsamonae pacuenetaenejewamë! ¡Pëtsa paxamë caejamatabëcuene paxainame pijaneconi pexainaenëjawabelia paneyapijiwinajumetsënëtsinexa, itsamonae petaenexatsi pianeconijibinëcuenia!
2 »¡Pëtsa panajamatabëcuenejëpame pamonae pibisiacuene pexanawanapaewi, ayaibitsaëtonë jiwi bajarapapibisiacuene pexanabiabixae! ¡Bajarapacuenia daxitajiwi pibisiajamatabëcuenecuenia neconitabiabi-ata pianeconijibinë, pëtsa panajamatabëjëpame, tsipaji pabijianaejitsipame pexaniajaicuenia panecanaëjëtsijawami peneconitsiliwaisi, itsa pajamatabëyanatame papecatsu-ayaibitsaëtoxae pibisiacuene pexanaewi!
3 »¡Pëtsa bepejiobinë itsa natsixaina pijaneconi panayapijiwicuaicuaijamë, nebejiobiataexae bepejiobinëjamatabëcuene yabara! 4-5 […]
6 »Pacuenia payaiyataeyabiabame bitso pexainaewi, bajarapijinia pacuenia payaiyataeyabiabianame bitso bepejiobiwi-ata, najëpaeya pexaniajaicuenia panetocanaëjëtsinexa peneconitsiliwaisitsi. Daxitajiwi najëpaeya pataeyabiabianame panebijianaeyaniwa pexaniajailiwaisi panecanaëjëtsicuenemi. 7 ¡Panayajiwitaema panenaneconitsia-exanaeyaniwa najumetsënëtsiaya! ¡Panayajiwitaemanua panejumeliwaisita panebeyaxuabia-exanaeyaniwa pianeconijibijiwiyo, tsipaji xanë apotaenë tsane aneconijibia pejumeliwaisita pebeyaxuabia-exanaejiwi! 8 ¡Pëtsa patocopatame pijaneconi pexainaenë penayajiwimatamotsinexa penaneconitsia-exanaeyaniwatsi, tsipaji itsa naneconimatamota liwaisi bijianaejitsipa pecanaëjëbiwi, bajarapacuenia juya pianeconijibinëmi petsijumajopaenexatsi penaneconitsinë pijaneconimi! 9 ¡Pëtsa pabejiobia-exaname itsanacuajawawerena pepatsiwi penaponaponaexae paxamëtuatuajëta, tsipaji paxamë panatoyapëtaneme paneyabëjaicuenemi bitso, pacujinae Egipto nacuapijiwi pacabejiobia-exanabiaba bajayatami, itsajota pajinawanapame panepatsiwicuenia! ¡Nexata, pëtsa pacuenejëpame bajarapamonae papecabejiobia-exanaewimi! —jai Jehová Moisés-jawabelia.
Penacuera-ewetsicuene, yabara peliwaisi
10 Icatsia, Jehová jumaitsi:
—!Paxamë panijapabianë panexainabiabiwi pa-ubabiabianame, panotabiabianame pane-ubijawanëmi seis pawaibejecuenia. 11 Itsiata baitsi jane, siete waita pëtsa baja pacanacuenebame. Baitsi, bajarapawaijawata pacopatsianame panacuenebinejewamë panijapabianë, pa-ubinejewamë-ata, pecuai panotsinejewamënua. Bajarapacuenia pacopabianame panenacuenebijawa caewaicuenia pane-ubicuene, bajarapijinia pacuenia, panenotsijawa panija-uvapabianë, panija-olivobacabonë-ata, bajarapawai-epato nacuaitsi-ata. Bajarapacuenia pacopatabuatsianame bajarapa-ira caewaicuenia pacanacuenebinejewamë. Bajarapasietewaita pijacuata nacuaitsi-ata tsane panecopatabuatsicujinae, pëtsa panotame. Patocopare saya penotsinexa bepejiobiwi, bajarapacuenianua pexaenexa unupijiwi xua bepejiobiwi copabapona penotsicujinae. Itsiata, bajarapasietewai pecopiarucaejawata, icatsia bepanacuenebame panijapabianë.
12 »Panacuenebabiabianame seis pamatacabibeje caesemana canacujitsia. Itsiata, siete matacabita itsacuenejawa-ata pëtsa panacuenebame, bajarapacuenia daxita papecatonacuenebawanapaewi, jamatejema penacuera-ewetsinexa penacuenebijawawecua. Nacuera-ewetsijitsia daxita panijajiwi amoneya papecatonacuenebawanapaewi, itsanacuawerena pepatsiwi-ata, pane-itorobiyaniwa papecatonacuenebinexa panematamotsixaejitsia. Bajarapijinia pacuenia, panijadajubi panecanacuenebiwi panacuera-ewetsia-exanaename.
13 »Xaniawaetsia pajumecowënëtawanapaename daxita patacatonajumecopatsiliwaisianë. Pëtsa asiwaya pawajëcame xanëwecua itsacuenejawabelia diosowicuenia, jumapecataeya pexanaenëjawabelia-ata. Pëtsanua pawënëcacuaicuaijamë bajarapamonae! —jai Jehová Moisés-jawabelia.
Itsafiestajawanë pexanabiabinexa israelitawi Jehová pewënëta
Taemanua Éxo. 34:18-26; Deut. 16:1-17
14 Icatsia, Jehová jumaitsi:
—Pacatocaëjëtatsi caewaita acueyabi xuayobeje panepatabiabinexa xanëjawata,a pane-exanabiabinexa acueyabi pafiestabeje tawënëta necuenenajamatabënapitsiaya. 15 Nexata, caewai canacujitsia Abib-juametota papatabiabianame pane-exanabiabinexa copiaya levadurata apopematajërëabipan-pijifiestab siete pamatacabibejecuenia. Daxita patacatocaëjëtsicueniac bajarapafiesta pa-exanabiabianame. Nexata, daxita bajarapafiestapijimatacabianëjawa paxaeyabiabianame panijapan levaduramatajërëabinejewa pexanaepan-jawanë. Bajarapafiesta pa-exanabiabianame Abib-juametota, tsipaji bajarapajuametota papitsapame Egipto nacuawecua. Itsiata, caenë-ata cobesa apobepatsi dajubinejewa, penatajuitsinënexa nerajutsiaya xanëjawaberena. 16 Bajarapijinia pacuenia, caewai canacujitsia pa-exanabiabianame itsacotocaewipijifiesta tawënëta, copiayapijinacuaitsi penotsijawapijifiesta. Bajarapafiesta pa-exanabiabianame panenotsicujinae copiaya papecatonacuaitsijawanë pane-ubijawanëmi. Orijibia, pa-exanabiabianame itsa-acueyabipijifiesta, pecotocaewijawa, daxita pane-ubijawanë panenotsicujinae penaweretsicuaijawanë wai peweretsijawatalia,d bobërëtoxi panenatsi-exanaejawapijifiesta. 17 Nexata, acueyabi xuayobeje caewai canacujitsia panacaetuatabiabianame padaxitamë papebijiwimë xanë Jehová Diosonë tajataxunaejawaberena —jai Jehová Moisés-jawabelia. 18-19 […]
Jehová pija-ángelnë israelitawi matacaponaejitsia Canaán nacuajawabelia
20 Icatsia, Jehová jumaitsi Moisés-jawabelia:
—Xanë raja Jehovánë pacato-itorobianicatsi taja-ángelnë, bajaraponë papeca-ewetsinexa, papecamatacaponaenexa Canaán nacuayabelia, panacuajawabelia tajëwelia baja cajena najumecapanepaeya pacajumaitsitsi patacarajutsinexa. 21 Nexata, taja-ángelnë xaniawaetsia panamuxuna-ewetsianame, panejumecowënëtabiabinexa papeca-itorobicuenia. ¡Pëtsa nexata, pane-ajamatabëcuenetajajawata itsacuenia pa-exaname papeca-itorobicuenewecua, tsipaji itsa paxamë apopajumecowënëtsimë tsipae, bajaraponë apopacasiwajamatabëcuenecaewi tsane panijaneconi, tsipaji bajaraponë papecanamatacaitorobinë xanë tajamatabëcuene! 22 Itsa xaniawaetsia panamuxuna-ewetsianame bajaraponë, panejumecowënëtabiabinexa daxita pataca-itorobiliwaisi bajaraponëta, xanë juya pacayawenonaenatsi. Nexata, pamonae panijawajabitsaëwi tsawanapae, naexanaena tajawajabitsaëwi pijinia. Panijawajabitsaëwi itsa bajarapacuenia jamatabëpacayacaranata panepitsiyaniwa patacarajutsiapaebi-irami, xanë juya pacayapijiwicueneyacaranatsianatsi bajarapamonaemi jamatejema bajarapa-ira panepitsinexa. 23 Nexata, taja-ángelnë pacamatacaponaena bajarapanacuajawabelia itsajota panewajënaetalia aeconoxae jinawanapa amorreowi, heteowi, ferezeowi, cananeowi, heveowi, jebuseowi-ata. Daxita bajarapamonaemi pacawecuawerebiabianatsi. 24 ¡Canaán nacuayabelia panepatsicujinae, pëtsa panajamatabëcuenejëpame bajarapanacuapijiwi asiwaya panenawajëcaenexa pijadiosowi, jumapecataeya pexanaenëanëjawabelia, ponëanëjawabelia bajarapamonae pematabacabëta yaiyataeya wajëcabiaba, pesiwanajamatabëcuenecopabixae bajaraponëanëjawabelia! Pabijianaename daxita pajumapecataenëanëjawabelia bajarapamonae nawajëcabiaba. Bajarapacuenia xuanë-ata nubena jumapecataenëanë pewënëta, patosarababename. 25 Paxamë panematabacabëta ëxanëjawaberena asiwaya, yaiyataeya-ata panewajëcabiabianame daxita panenamatawenonaecuene yabara. Nexata, xanë pexaniacuenia pacayawenonaenatsi, papecatonawitsinexa panexaejawacuene, meranë-ata. Bajarapacuenia pacawecuatixitsianatsinua daxitawiriawitanecuene, jamatejema pane-asaëtsawanapaenexa —jai Jehová Moisés-jawabelia.
26-33 […]