Israel-pijinë pemomoxi jejai Jehovájawabelia peto-exanawanapaenexa penajamatabëliwaisicajonecuenia
24
Jehová jumaitsi Moisés-jawabelia:—Junaemina mapatsutojumabetsina, itsajotatsina xanë ponaponajë. Yajawatsinamëre Aarón, Nadab, Abiú, setenta pijinia ponëbeje, penamatacaitorobiwi israelitawituatuajëta, tajëyo xanëwecua bajarapamonae neyaiyataeya pematabacabëta irataeya penubenaenexa. 2 Itsiata, xamë, caenëmë Moisés, newajënaeyabelia nimoxoyotsianimina. Pëtsa nimoxoyota pamonae neyajawaponaewi. Pëtsanua itsamonae israelitawi junaina mapatsutojumabetsina —jai Jehová.
3 Daxita bajarapacuenia Jehová pejumaitsicujinae, Moisés nexata wajunupaeba Israel-pijinë pemomoxijawabelia daxita Jehová petonajumecopatsiliwaisi, pitorobiliwaisianë, petocaëjëbiliwaisianënua. Daxita bajarapaliwaisi pejumetaecujinae, bajarapamonae jumecanawiata mapacueniaje: «Daxita pacuenia Jehová nacatonajumecopata, bajarapacuenia daxita pa-exanaenajë», jai bajarapamonae. 4 Nexata xuacujinae, Moisés yaquina pebaxutojawabelia daxita Jehová petonajumecopatsiliwaisianë, pitorobiliwaisianë-ata. Itsamatacabijawabelia, pepobajayacunua, Moisés namatacota pexananutsinexa altar-jawa petsutomuxuneneta. Nubanua doce pa-ibotobeje,a pewënëta caenë pemomoxibitsaëtonë canacujitsia, Israel-pijinë pexi, doce ponëbeje, pemomoxibitsaëtonë.
5-11 […]
Moisés siwajunaya ibopanabeje Dioso peyaquinaejawa
12 Bajaraxuacujinae, Jehová jumaitsi Moisés-jawabelia:
—Junaimina mapatsutojumabetsinaje, itsajotatsina xanë ponaponajë. Bajarajota, ne-ewetsianame, tsipaji raja carajutsijitsiatsi tayaquinae-ibopanajawabeje, pa-ibopanajawatabeje yaquinarubajë tatocaëjëbiliwaisianë, ta-itorobiliwaisianë, juya xamë neyapëtaeya-exanaenexa israelitamonaejawabelia —jai Jehová.
13 Nexata, Moisés junaya, Dioso pijatsutojumabetsia, peyawenonaenëtsi Josué yajawa. 14 Moisés petsiawajënaeya petsutojumabetsia jumaitsi ancianowijawabelia:
—Bajarajota, paxamë pane-ewetawanapaename icatsia patanawiatsijawabelianexatsicabeje. Tacowëta raja pacayajawanacopatsianabeje Aarón, Hur-beje. Pajiwi xaina itsacueneliwaisianë, nexata pajumaitsimë tsane bajaraponëbejejawabelia —jai Moisés.
15 Bajarapacuenia Moisés pejumaitsicujinae, nexata baja, junaya Sinaítsutojumabetsia, patsuto jumawënëqueca pitayaëpajubo.
16-17 Nexata, Jehová pijapenivenivenaecotia runaica Sinaíjumabetsica, peponaponaenexa. Nexata, seis pamatacabibejecuenia bajarapatsuto bitso jumawënëqueca pitayaëpajubocuene.
Nexata, israelitamonae itsa tane Jehová pijapeniweniwenaecotia, bepetsitatajuenajetarucaetsi pitatsajawicotia bajarapatsutojumajawatatsia. Nexata, siete matacabita jane baja, bajarapapajubotuatuajëwetsica Jehová junatatsi Moisés.
18 Nexata, Moisés pija-epato junaya bajarapapitayaëpajubotuatuajëjawatsia pepatsinexa bajarapatsutojumabetsia. Nexata, bajarajotatsia bajaraponë ponapona cuarenta pamatacabibeje, cuarenta pamerawibeje yajawa.