Pa-ofrendajawanë caetuatsijitsia Dioso pijatabernáculobonexa
(Éxo. 35:4-9)
25
Jehová pebarëcuaicuaijaijawata Sinaítsutojumata, Moisés-jawabelia jumaitsi mapacueniaje:2 —¡Jumaitsimëre israelitamonaejawabelia pecaetuatsinexa ofrendajawanë tawënëta, daxita pamonae ëpejitsipaewi perajutsijawa itsajiwiyo itorobinejewatsi pecapatsinexa. Capatsiana pamonae pejamatabë-ëthëtowetsina pexaniajamatabëcuenia perajutsijitsipaewi. 3 Mapawiria-ofrendajawanëje capatsiana perajutsinexa: oronanijawanë, palatananijawanë, broncenanijawanë, 4 perajejaipananë, pesaëjaipananë,a petsobiapananë, bajarapacuenia linowiriapananë, cabrana̱mi pexanaepananë-ata. 5 Bajarapacuenianua oveja pebitobocotonë, petsobiarata pejabucaebocotonë, itsawiriawi, pexaniawiriawi pebocotonë-ata, bajarapijinia pacuenia, acacianae pexanaetablapanë-ata. 6 Capatsiananua olivacuaipiji-aceiteranë pitayotsiranexa lámpara, bajarapacuenia itsapetuxujuwijawanë pematajërëabinexa itsa aceiterata pexaniatuxudere pexainaeranexa, porata tsimata-epacaejitsia ta-itapetsiwijawabelia. Rajutsiananua petuxujuwipërëtoxi inciensowënëjawa petajuitsinexa. 7 Bajarapacuenia-ata capatsiana ofrendacuenia pitabëtsi-ibotoxi, pacuenia cornalina-ibotoxi, pexaniawiria-ibotonë-ata, ónice-ibotoxi, pa-ibotoxi cataicarubijitsia penajumaxuabicorobëjawata,b bajarapacuenia penatsimipabërutabiabipanajawata pepopenamatacaitorobisacerdotenë penaxatatsijawanëtanexa. 8 Nexata, panecaetuatsicujinae bajarapa-ofrenda, paneto-exanaename tajacarpaboc saicaya ëxanënexa, pabojawata ponaponaejitsianë paxamëtuatuajëta. 9 Nexata, bajarapacarpaboxaneto paneto-exanaename cuenejëpaeya tacatsitajëtsicowëya. Bajaraxuacujinae, xainaena daxitaxuanë-ata bajarapabojawata pa-exanaename cuenejëpaeya tacatsitajëtsijawa! —jai Jehová Moisés-jawabelia.
Pacuenia exanaejitsia Dioso pijabaula
(Éxo. 37:1-9)
10 Bajaraxuacujinae, Jehová yapëtaeya-exana Moisés pacuenia to-exanaejitsiatsi penajumeliwaisixaniawaetsibaula.d Nexata jumaitsi:
—Paneto-exanaename tajabaula acacianaepijitablapanëta. Xainaena piapiajawa caemetro pematatsënëa diez pacentímetrobeje. Pijinia epatajërëatsialia xainaena sesenta y cinco pacentímetrobeje. Pemuxubërë-apiajawa pijinia athëbëabetsina xainaena sesenta y cinco pacentímetrobeje. 11 Paneweretsicujinae bajarapabaula, pa-ënëxatatsianame oronanitota, bajarapacuenia naniawelia-ata. Bajarapacuenia daxita matatoyorotsia bajarapamuxubërë pacataitsia-exanaename ë-oro pexanae-itabëtsipanata. 12 Panacuenebianamenua cuatro patoyororocaewojotobeje bajaraxuayo pecapitsatsinexa naebo. Nexata, bajarapacuatro xuabeje orojawanëta pexanaejawanë caeyenepananenia parutaponaename anijajawabeje. Caeyenepana-upijawata, caejawa parutaponaename namata-enetsia. Bajarapacuenia itsayenepananenia anijajawabeje parutsianame namata-enetsia. 13 Bajarapijinia pacuenia, panacuenebianame acacianaepijinaebobeje. Bajaraponaebobeje pajumaxatatsianame orojawata. 14 Bajaraponaebobeje pacapitsatsianame bajarapatoyororocaewojotonëjawa paneyawëtacaraponaenexa bajarapabaula. 15 ¡Bajaraponaebobeje panecapitsatsicujinae bajarapawojotobejejawa, xuacujinae pëtsa baja pawecuajonotame! 16 Daxita bajarapacuenia paneweretsicujinae, tajabaula-ënëta pajename, panexaniawaetsinexa, tayaquinae-ibopanabeje itsa carajutsianatsi. Bajarapacuenia bajarapabaula nacopatsijitsia pexaniawaetsibaulanexa patacanajumeliwaisicajonejawa pitajëtsi-ibopanabeje.
17 »Tajabaula pematapanexa, pa-exanaename ë-orojawata naniawereca baula panemata-acatsinexa. Bajaraxua pa-exanaename piapiajawa caemetro pematatsënëa diez pacentímetrobeje pexainaejawa, bajarapacuenia epatajërëtsialia sesenta y cinco pacentímetrobeje pexainaejawa. 18 Bajarapabaula pematapajumawereca pa-exananutsianame oronanitota pecorofe pexainae-ángel-nëbeje jumapecataeya querubinenëbeje. Bajarapajumapecataenëbeje namata-enetsia nataenucaeya pa-exananutsianame. Bajarapa-ángel-nëbeje pacanacuenebianame oronanito pe-ucubaponaecuenia martillota. Nexata, bajaraponëbeje namata-enetsia baulamatapa-upijawata panutsianamebeje. 19-20 Nexata, bajarapamatapajumajawawereca pa-exananutsianame bajarapaquerubínejumapecataenëbeje cae-oronanitomijawata, patsatsinejewamë. Nexata, bajaraponëbeje panutsianame daxita-upineniabeje naitabarataenucaeya, bajarapacuenia pejumataenucaenexabeje bajarapabaulamatapajawabereca, jiwi pijaneconimi tasiwajamatabëcuenecaewitaxunaejawanexa. Pecorofetobeje pijinia nacorofe-upicaxinaeya pa-exananutsianame bajarapajumawereca pejumacaranatanucaenexabeje. 21 Nexata, penajumeliwaisixaniawaetsibaula paneweretsicujinae, bajarapabaula-ënëta paxaniawaetsianame pa-ibopanatabeje pacatoyaquinaenatsi daxita paliwaisianë pacanajumeliwaisicajonenatsi. Nexata, bajaraxuacujinae pamata-acatsianame bajarapabaula pematapata, jiwi pijaneconimi tasiwajamatabëcuenecaewitaxunaejawa.e 22 Nexata, xanë naitajëtabiabianajë bajarapamatapajumata penucaequerubinenëbejetuatuajëjawata, bajarawerena xamë tacayapëtaeya-exanabiabinexa daxita paliwaisianë catonajumecopatabiabijitsiatsi, Israel-pijinë pemomoxijawabelia netsipaebabiabinexa —jai Jehová Moisés-jawabelia.
Pacuenia exanaejitsia mesayo pan pejumajebabiabinexa carpabo-ënëta
(Éxo. 37:10-16; Lev. 24:5-8)
23 Icatsia, Jehová jumaitsi Moisés-jawabelia, peyapëtaeya-exanaenexa pacuenia exanaejitsia pan pejebabiabimesayo:
—Paneto-exanaenamenua mesayof acacianaepijitablapanëta. Bajarapamesa piapiajawa pa-exanaename noventa pacentímetrobeje, pijinia epatajërëtsialia cuarenta y cinco pacentímetrobeje. Piapiajawa athëbëabetsia xainaena sesenta y cinco pacentímetrobeje. 24 Nexata, daxita bajarapamesayo pajumaxatatsianame pepopexania-oronanitota. Bajarapacuenia muxubërë-itabëtsiaya itane-exanaena orojawata. 25 Bajarapamesajumawereca pemuxubërëcaranatsijawa matatoyorotsia panutsianame, siete pacentímetrobeje pexainaejawatsina. Bajarapamuxubërëcaranatsijawajumawereca pa-exanaename itabëtsiaya matatoyorotsia oronanitojawata. 26 Panacuenebianamenua cuatro patoyororocaewojotobeje, bajaraxuayo pecapitsatsinexa naebo. Nexata, bajarapacuatro xuabeje, orojawanëta pexanaejawanë, caeyenepananenia parutaponaename anijajawabeje. Caeyenepana-upijawata, caejawa parutaponaename namata-enetsia. Bajarapacuenia itsayenepananenia anijajawabeje parutsianame namata-enetsia, bajarapamesasito yenepana-upijawata panerutsinexa bajarapatoyororocaejawanë, 27 bajarapamuxubërëcaranatsijawa penacopatsinexa pebëxëpanayo, bajarapatoyororocaejawalia panecapitsatsinexa naebobeje, jamatejema panecaponaenexa bajarapamesa itsabelia pawarapame. 28 Panecaponaenaebobejenexa, panacuenebianame acacianaepijinaebobeje. Bajaraponaebobeje pajumaxatatsianame orojawata. 29 Yajawa panacuenebianame bajarapamesa pecanacuenebijawanënexa oronanijawata pexanaejawanë. Nexata, panacuenebianame pijawaxianë, pecajucaejawanë, pecapuanaejawanë, peyajebijawanënexanua peporanë ofrendajawanë. Daxita xuanë panamatawenonaejitsiamë panecanacuenebinexa bajarapamesajawata. 30 Bajarapamesajumata panetojebabiabianame pacopatsinejewamë pan-jawanë taitabarata, pataneto-itapetsipan-jawanëg xanënexa saicaya —jai Jehová.
Pacuenia exanaejitsia pitayotsinaebo candelabrowënëjawa carpabo-ënëta pitayotsinexa
(Éxo. 37:17-24)
31 Icatsia, Jehová jumaitsi Moisés-jawabelia:
—Paneto-exanaenamenua candelabrojawah cae-oronanitomita, pitayotanucaenexa tajacarpabo-ënëjawata. Bajaraxua, martillota pane-ucubicuenia, pa-exanaename petabutoyoroto, peyërëjawanë yajawa, seis pamaxëranabejenua. Bajarapacuenia pemaxërananë-upijawata, patsifera-exanaename lámparabëxi panejebitaxunaenënexa, almendranae pematonoto pejëpaejawanë, pematonobaxujëpaejawanënua, pejanapitsapaetuwitsimatonojawanë-ata. Daxita baitsi, cae-oronanitojawawerena pane-ucubicuenia pepitsapaenexa. 32 Bajarapamaxëranajawanë pitsapaena tuatuajëatsina penucaenaejawata. Xainaena namata-enetsia acueyabi pamaxëranabeje tsaponae caenenia, itsanenia pijinia itsa-acueyabi pamaxëranabeje. 33 Bajarapacuenia caemaxërana canacujitsia xainaponaena acueyabi pamatonotobeje, almendranae pematonojëpaecuenia, pematonobaxutocuenia-ata, pejanapitsapaetuwitsimatonocueniajawanë-ata. 34 Tuatuajëatsina penucaenae xainaena sasawia cuatro pamatonotobeje almendranae pematonotocuenia pexanaejawanë, pematonobaxutocuenianua, pejanapitsapaetuwitsitomatonocueniajawanë-ata. 35 Ponae tuatuajëatsina nuca pexainaematonojawanëtuatuajëta, pamaxëranarubaponaename peyërësajinaejawa, payërëtojawata pitsapa pemaxëranabeje namata-enetsia daxitaneniabeje. Nexata, itsamatonoto beruca pebëxëpanata, bajarapamaxëranabejecujinae. 36 Nexata, bajarapacandelabrojawa pa-exanaename cae-oronanitomita peyërëtojawatacujinae, daxita bajarapamaxërananë, daxita pejanapitsapaetuwitsimatonojawanë yajawa, penaexanaenexa caejawa pane-ucubicuenia martillota. ¡Pëtsa baitsi pacatsanarubame pemaxërananë, pematonotonë-ata peyërëtojawabelia! Pepopexania-oronanitota pacanacuenebianame bajarapa-itayotsicandelabrojawa. 37 Bajarapacuenia pa-exanaename siete pa-itayotsilámparabëyobeje, pane-etaponaenexa panetsiwajënaefera-exanaejawanë pemaxërananë-upijawata, tuatuajëatsina penucaenae-upijawata-ata, jamatejema pitayotsinexai tajacarpabo-ënëta. 38 Pa-exanaenamenua lámpara pijamechajawanë panecawaetabijawanënexa, bajarapacuenia waxianë itsajota pemaë pejebabiabinexa. Daxita bajaraxuanë pa-exanaename oronanitota. 39 Bajarapacandelabro pane-exanaenexa, daxita pecanacuenebijawanënexa yajawa, xainaena oronanito treinta y tres pakilobeje. 40 Xaniawaetsia tacatsitajëtsicuenia mapatsutojumataje, panetonacuenebianame daxita pacuenia catsitajëtatsi —jai Jehová Moisés-jawabelia.