Icatsia mera petsewijawa pebubutsijawami, yabara peliwaisi
8
Nexata, Dioso najamatabënapitaa Noéjawabelia penajumeliwaisicajonejawami,b daxita pamonae-ata yajawajunua Dioso pecobecowëwi barcoxanetojawabelia. Bajarapamatacabi, nexataDioso copata jowibo pebubujainexa meramatatsënëwereca, iramatatsënëwereca-ata. Bajarapacuenia mera nexata taxuxuaba petsewanajetarucaejawa. 2 Dioso nacobecowë-acabanua pepitsaparubenaeya-exanaemeranë irabëxëpanawetsina. Bajarapacuenia athëbëwetsica perunae-emaxaneto ajibia-exana. Nexata baja, copata ema perunaejawa. 3 Nexata, mera taxuxuaba petsewanajetarucaejawa be-axayocuenia. Ciento cincuenta pamatacabibeje petaxuxuabicujinae ema perunaejawa, 4 siete pajuametobejejawata, diecisiete matacabita, barcoxaneto bocajopa Ararat-tsutojumatatsia, cinco pajuametobeje Noé pejonecujinae barcomojawabelia. 5 Pewajënaeyabelia orijibia mera tsewanajetaruca. Diez pajuametobeje itsa xaina Noé pejonecujinae, copiayapijimatacabijawata matapania naitajëta pematatsewanubenaejawa pinijitsutojumanë.6 Bajaraxuacujinae, cuarenta pamatacabibeje pinijitsutojumanë pematatsewanubenaecujinae, Noé baupata ventanabaupa, peyapëtaenexa ira petsewijawa. 7 Bajarapaventanabaupajawalia Noé copata cuervowënënëc pepunaenë, xaniawaetsia peyapëtaenexa picani ira petsewijawa. Itsiata, bajaraponëyo aponawiatsi. Saya punaponapona athëbëyo. Ira petsewijawa ewetaponapona. 8 Cuervowënënë pecopatsicujinae, Noé icatsia copatad ucucuto, peyapëtaenexa itsa pepacuene tsewanajetaruca. 9 Nexata, ucucuto nawiata, tsipaji bajaraponë apoxainae itsajota yanonotsijitsia, itsajotanua nacuera-ewetsijitsia. Nexata, bajarapacuenia Noé yapëtane abaxë piawajubuajawa daxitanacua; ira apopejumapitsapaejawa. Ucucuto itsa nawiatanajetaruca, Noé nacobeyolia peyapitsinexa, pecajonenexarena barco-ënëaberena.
10 Noé nexata abaxë, eweta siete pamatacabibeje pematatsënëa. Icatsia, xuacujinae copataba bajarapa-ucucutoyo. 11 Itsa baja caniwiyo tsanajetarucae, ucucuto nawiatanajetaruca. Canajetaruca olivonaemaxëranayo pepumuxotota. Bajarapacuenia Noé yapëtane petsewanajetarucaejawa mera. 12 Nexata, icatsia eweta itsasiete pamatacabibeje pematatsënëa. Icatsia, xuacujinae copataba bajarapa-ucucuto. Nexata baja, ucucuto caewëarena aponawiatsi.
13 Pacujinae Noé xaina seiscientos uno pawaibeje, bajarapawaita baja tsewa pebubutsijawa. Bajarapawai copiayapijijuametojawata, penamataxainaematacabita, bajarapamatacabita Noé bajarapamopijibomatatuyenepana sarana nacua petaenexa. Tane ira pejumapitsapaejawa pebubutsicujinae. 14 Anijajuametobejecujinae, Noé seiscientos uno pawaibeje pexainaecujinae, veinte y siete matacabita bajaraponë tane ira xaniawaetsia petsewijawa. 15-16 Nexata, Dioso jumaitsi Noéjawabelia:
—Papitsapaename baja bajarapamowecua, nijawa, nexi acueyabi ponëbeje yajawa, necopenawaxi-ata yajawa. 17 Capitsapaenamenua daxita pamonae neyajawajonewi, matatsënëwereca pejinawanapaewi, unupijiwi, dajubi, pepunaewi-ata, bajarapacuenia pecotobëxëta penarobobocaewi irajumawereca, jamatejema peponaenexa daxita-irajawa. Paxainaponaename panexi, panemomoxi-ata, ayaibitsaëto panepitsapaponaenexa, paneyacaëjëpaenexa daxitanacuajawa, bajarapijinia pacuenia pamonae-ata paneyajawajonewi barcoxanetojawabelia, penacoxiwiataponaenexa —jai Dioso najumecopatsiaya barcoxanetowecua pepitsapaewijawabelia.
18 Nexata jane baja, Noé, pijawabeje, pexi acueyabi ponëbeje, pecopenaxi-ata barëpitsapa bajarapabarco-ënëwecua. 19 Yajawapitsapanua daxita peyajawajonewi Noé, pacuenia unupijiwi, dajubi, pecotobëxëta penarobobocaewi, pepunaewi-ata. Caewiria canacujitsia matatsënëwereca pejinawanapaewi Noé barëpitsapa bajarapamowecua. 20 Nexata, xuacujinae Noé exananuta altar-jawae Jehová pewënëta. Bajaraxuacujinae, taicapona dajubi, pepunaewi-ata, pamonae itapeta Jehová jiwi petajuitabiabinexa altar-jumata. Taicapona caewirianëyo canacujitsia. Nexata, bajarapamonae daxitanëanë tajuita baja Jehová pewënëta, pesiwajamatabëcuenebarëyaxae. 21 Bajarapacuenia itsa Jehovájawabetsia petajuitsidajubi tuxusipatsia tsitapexaniatuxusitsi.
Nexata, Jehová jumaitsi:
—Pematatsënëa baja ira apobijianaenë tsane jiwi pijaneconijamatabëcuene, pibisiacuene exanabiabi-ata tsane, tsipaji jiwi ëpibisiacuene najamatabëxainabiaba pexanabiabinexa pewëjëatojawawerenacujinae. Bajarapijinia pacuenia baja, pematatsënëa apowerebiabinë tsane daxita pamonae ta-exanaewi tabubutsia-exanaejawata daxita mapanacuaje, pacuenia baja exanajë maxuataje.
22 Nexata, paepatowajëto abaxë mapanacuaje tsitecanucaena, xainaena pijamatacabianë pe-ubijawanë, penotsijawanë-ata. Bajarapijinia pacuenia, tsitecaena piatajucuene, pecainejebicuene, emarapaepijicuene, waicuene, matacabipijicuene, merawipijicuene-ata tsane —jai Jehová najumecapanepaeya Noéjawabelia, daxita pebarëpitsapaewijawabelia-ata.