Dioso najumeliwaisicajunua Noéjawabelia
9
Nexata, Dioso pexaniacuenia cuenecaëjëpaeya-exana Noéjawabelia, penacoxiwiataponaenexa, acueyabi ponëbeje pexijawabelia-ata. Jumaitsi:—Pacayawenonaponaenatsi, panexainaponaenexa panemomoxi, paneyacaëjëpaenexa daxitanacuajawa. 2 Daxitacuenewirianëxi ta-exanaewi mapanacuataje, bajarapamonae paxamë papecacujunawiwi tsane. Nexata, daxita pamonae pepunaewi, daxita pamonae-ata irajumawereca pejinawanapaewi, pamonae-ata menejawata pejinawanapaewi, daxita bajarapamonae panejamatabëcuenematatoxenetawanapaewi tsane. Nexata, pacatocopatatsi pane-ewetsinexa bajarapamonae. 3 Pacatocopatatsinua panexaewinexa daxitacuenewiriawi ta-exanaewi. Bajayata picani pacarajutatsi pejuwijawanë panexaenexa. Itsiata, maparucaeje pematatsënëa pacarajutatsi daxitacuenewiriawi panexaewinexa. 4 Itsiata baitsi jane, ponë pabeyaxuabame panexaenexa, pacajani-itawetatsi panexaeyaniwa penajatotonaewi, peja-ata. Bajaraxua apobepaxaemë, tsipaji daxitacuenewiriawi asaë tsawanapae pejana pejamatabëcueneta.
5 »Paca-itawetatsi panewënajiwitonë panebeyaxuabiyaniwa. Nexata, daxita jiwibewi naneconitsiana xanëjawaberena. Nexata, ponë beyaxuabiana pewënajiwitonë, juya bajarapajiwi pabeyaxuabianame. Bajarapacuenia pa-exanaenamenua unupijiwi piayaiwijawabelia, dajubijawabelia-ata, tsipaji bajarapamonae-ata netonaneconitsiana xanëjawaberena, jiwitonë pebeyaxuabixae tsane. 6 Nexata, pajiwiyo beyaxuabiana pewënajiwitonë, juya bajarapajiwi beyaxuabianatsi pewënajiwitonë, tsipaji xanë Diosonë exanajë jiwitonë nacuenecataeya.
7 »Itsiata, paxamë pacatocopatatsi ayaibitsaëtonë panexainaponaenexa panexi, panemomoxi-ata, mapanacuaje pewënëcaenexa panemomoxita, paneyacaëjëpaejawabelia daxitanacuajawa —jai Dioso.
8 Dioso icatsia jumaitsi Noéjawabelia, pexi acueyabi ponëbejejawabelia-ata:
9 —¡Panejumetaema mapacueneje! Xanë pacanaliwaisicajunuatsi paxamëjawabelia, daxita panexijawabelia, panemomoxijawabelianexa-ata tsaponae, 10 bajarapacuenia daxita pamonae payajawapitsapame barcojawawerena, pepunaewi, pamonae irajumawereca pejinawanapaewi, unupijiwi, dajubijawabelia-ata. 11 Xanë najumecapanepaeya patacanaliwaisicajonejawa paxamëjawabelia aponajumecowëxanetsinë tsane. Pematatsënëa apowerebiabinë tsane daxita mapanacuapijiwi merata, apowerebiabinë tsanenua pebubutsicuenia daxitanacua —jai Dioso Noéjawabelia, peyajawapitsapaewijawabelia-ata.
12 Icatsia, Dioso jumaitsi:
—Daxitamatacabijawabelianexa paneyapëtaeponaenexa pexaniajaicuene patacanaliwaisicajonejawa, peneta paxamë pacatsitarutsianatsi, daxita pamonae paneyajawa-asaëtsawanapaewi mapanacuataje. 13 Pacatsitarutsianatsi peneta taja-arawalibo itaboxojawata. Nexata, pacujinae pataneme, panajamatabënapitsianame pacuenia najumecapanepaeya pacanaliwaisicajunuatsi icatsia merata tawerebiabiyaniwa mapanacuaje. 14 Nexata, paepatota xanë copatsianajë pajubo penacaetuatsijawa emanexa, bajarapaepatota, naitajëtsiana taja-arawalibo pajubotuatuajëta. 15 Nexata, bajarapaepatota xanë-ata najamatabënapitsianajë patacanaliwaisicajonejawami ajena pamatacabi paxamëjawabelia, daxitacuenewiriawi ta-exanaewijawabelia-ata, pematatsënëa apotawerebiabijawanexa daxita mapanacuapijiwije icatsia tabubutsia-exanaecuenia merata. 16 Paepatota taja-arawalibo naitajëtarucaena pajubotuatuajëta, bajarajota xanë itsa taeyabiabianajë, nexata najamatabënapitabiabianajë daxitamatacabijawabelianexa patacanaliwaisicajonejawa paxamëjawabelia, bajarapacuenia daxitacuenewiriawi irajumawereca pejinawanapaewijawabelia-ata. 17 Bajaraxuata raja, pacatsitarutabiabianatsi peneta, panenajamatabënapitabiabinexa patacanaliwaisicajonejawa paxamëjawabelia, daxitajiwijawabelia-ata mapanacuata pejinawanapaewinexa —jai Dioso penajumeliwaisicajonejawata Noéjawabelia, daxita peyajawajonewi pewecuapitsapaecujinae barcoxaneto-ënëwecua.
Pacujinae Noé naitajibiaxuaba, yabara peliwaisi
18 Noé pexi barëpitsapa barcojawawerena mapamonaeje: Sem, Cam, Jafet. Cam-jawawerena pepitsapaewi Canaán nacuapijiwinexa; Canaán-wënënë pexënato pemomoxi. 19 Bajarapamonae Noé pexi acueyabi ponëbeje, xainapona pexi, pemomoxi-ata. Nexata, bajarapamonaejawawerena pitsapa daxitajiwi mapanacuapijiwinexa.
20 Nexata, Noé taxuxuaba irajawata penacuenebijawa pe-ubicuene. Xaina uvapabi. 21 Nexata, itsamatacabi bajaraponë uvayajuwënëcuaira nato-exana piatanevinora.a Nexata, bajaraponë piapaejawata bajarapavinora, naitajibiaxuaba. Jumasanë boca irata pitajibinë pijacarpabo-ënëtuatuajëta. 22 Nexata, Cam pejonejawata carpabo-ënëalia, tane paxa jumasanë pebocaejawa. Nexata, pitsatabijirawa, pijamonaenëbejejawabelia petsipaebinexa, wayafotalia penucaenëbeje. (Cam raja Canaán paxa). 23 Nexata, pijamonaenëbeje, Sem, Jafet-beje, pita pepana pewëtacarajawawereca peperabëcaranatsinexabeje, jumasa bitso jiwi petaeyabuatsiyaniwatsi. Nexata, bajarapajiwibeje joneya pematabëxëpanenia, paxa jumasanë peperabëtaeyaniwabeje.
24 Noé baja itsa naëcota piaitajibijawawecua, jumetane xua pexënato juyapijinë exanatsi. 25 Nexata, Noé cuenetsitajëta pibisiacuene petocopiapatsijawanexatsi Cam pemomoxijawabelia. Jumaitsi:
—Canaán, xamë pibisiacuenia pecatocopiapatsinë tsane. Daxitajiwiwecua bitso beweliajamatabëcuenenë nenataeponaponaenë tsane, tsipaji raja nijamonaenëbejenexa amoneya netonacuenebaponaponaenë tsane. Bajarapijinia pacuenia, panemomoxijawabelia-ata bajarapacuene tsitecaeya canacopataponaena —jai Noé, Cam pemomoxi yabara. 26 Icatsia, pexaniacuene tsitajëtatsibeje petocopiapatsinexatsi pexënatobeje matapijinëbejejawabelia, Dioso pewënëta. Jumaitsi:
—Xamë pijinia Sem, catojitsipatsi pexaniacuenia tajaDioso Jehová pecayawenonaenënexa tsane Canaán-wecua. Canaán juya amoneya pecatonacuenebaponaponaenë tsane. Bajarapijinia pacuenia, panemomoxijawabelia-ata bajarapacuene tsitecaeya canacopataponaena.
27 »Xamë, Jafet, catsitajëtatsi pexaniacuenia Dioso pecayawenonaenexa ayaibitsaëto nemomoxi nexainaponaenexa, pinijinacua bajarapamonae peyacaëjëpaenexa. Itsamatacabijawabelianua nemomoxi jinawanapaena Sem pijataxunaejawata. Bajarapijinia pacuenia, Canaán amoneya pecatonacuenebaponaponaenë tsane. Bajarapijinia pacuenia, panemomoxijawabelia-ata bajarapacuene tsitecaeya canacopataponaena —jai Noé pexaniacuene petocopiapatsinexatsibeje pexënatobeje, pemomoxijawabelia-ata.