Pamonae Noé pemomoxi, yabara peliwaisi
10
Marapamonae penaexanaponaewije Noé pexi acueyabi ponëbejejawawerena; Sem, Cam, Jafet-banajawawerena. Bajarapamonae pexi xainapona pebubutsicujinae mapanacuaje, barcojawawerena pepitsapaecujinae.2 Jafet pijinia pexi mapamonaeje: Gomer, Magog, Madai, Javán, Tubal, Mesec, pepojuyapijinë pewënë Tiras. 3 Gomer pijinia xaina pexi mapamonaeje: Askenaz, Rifat, Togarma. 4 Javán pijinia xaina pexi mapamonaeje: Elisa, Tarsis, Quitim, Dodanim. 5 Marapamonaeje naexanapona Jafet-jawawerena. Bajarapamonae jinawanapa pebobenae-iranë manuamene-itapajawa. Nexata, caenë canacujitsia, naexanapona saicaya caenacuapijiwinexa, caewiriawi canacujitsianua. Jinawanapa pijanacuaya saicaya pijawiriamaëtocuenia nawecuanatsanaeya. Bajarapijinia pacuenia, xainapona saicaya pijajume.
6 Cam pexi tsaponae mapamonaeje: Cus, Mizraim, Fut, Canaán-ata. 7 Cus pijinia xaina pexi mapamonaeje: Seba, Havila, Sabta, Raama, Sabteca. Raama pijinia xaina pexi mapamonaeje: Seba, Dedán-beje. 8 Itsanë Cus pexënato pewënë Nimrod. Ponë bajayatami piacuenesaëtsaponaponaenë mapanacuataje. 9 Nimrod raja Jehová pitabarata bitso pepopenarujuaitsijitsipaenë. Bajaraxuata, mapajumeyo jiwi capitsapa penarujuaitsijitsipaewi yabaraje: «Pacuenia Nimrod bitso penarujuaitsijitsipaenë Jehová pitabarata,a bajarapacuenia cuenejëpa bajaraponë», pejaijumeyo. 10 Nimrod raja nacua-ewetsinë tsaponaponae. Mapatomaranë ewetaponapona penamatamotsitomaranëje: Babel, Erec, Acad, Calne-ata, Sinar nacuata pe-enaetomaranë. 11 Bajaraxuacujinae, itsamatacabijawabelia warapa Asiria nacuajawabelia. Bajaraponë pijinia nacuenebeta bajarajota mapatomarawënëxije: Nínive, Rehobot, Cala-ata. 12 Itsatomara pijinia bitso pinijitomara, pecuenenamatamotsitomara, nacuenebeta Nínive, Cala tomarabejetuatuajëalia. Bajarapapinijitomara pewënë Resén.
13 Cam pexënato, Mizraim, pemomoxi raja: Ludim-monae, Anamim-monae, Lehabim-monae, Naftuhím-monae, 14 Patrusim-monae, Casluhím-monae, Caftorim-monae-ata. Casluhím-monaejawawerena pitsapapona filisteomonae.b
15 Cam pexënato, Canaán, xaina copiayapijinë pexënato, pewënë Sidón. Itsanë pewënë Het. 16 Canaán-jawawerena pitsapa pijinia jebuseomonae, amorreomonae, gergeseomonae, 17 heveomonae, araceomonae, sineomonae, 18 arvadeomonae, zemareomonae, hamateomonae-ata. Bajarapamonae jinawanapa pijawiriamaëtowicuenia natsanaeya Canaán nacuajawa. 19 Canaán pemomoxi pejinawanapaenacua bitso ayai-iraxaneto. Pijanacua taxuxuaba Sidón nacuamatatujawata matatsënënenia,c pepatsinexa Gaza tomarajawabereca ununenia, Gerar nacuata pe-ecaetomara. Epatajërëtsialia pijinia taxuxuaba Gaza tomarajawata, Lasa tomarajawabelia. Lasa tomara eca Sodoma, Gomorra tomarabejecujinaereca, Adma tomara, Zeboim tomarabejecujinaereca-ata. Bajarapatomarayojawata, copiaruca pija-ira pemutonenia.d 20 Daxita bajarapamonae raja pitsapapona Cam-jawawerena Noé pexënato. Mapamonaeje caenë canacujitsia naexanapona caenacuapijiwinexa saicaya. Caewiriawibitsaëto canacujitsia xainapona saicaya pejinawanapaenacuanexa. Saicaya pijinia xaina pijajume.
21 Sem-pijinë matapijinë Jafet-wecua. Sem-ata xaina pexi. Daxita pamonae Heber pemomoxi tsaponaerena, bajarapamonae raja Sem-pijinë pijawiriawi. 22 Sem pexi pewënëanë mapamonaeje: Matapijinë Elam. Bajaraxuacujinae, naexanapona itsamonae pacuenia, Asur, Arfaxad, Lud, Aram-ata. 23 Aram pijinia pexi mapamonaeje: Uz, Hul, Geter, Mas-ata. 24 Arfaxad pexënato pewënë Sala. Sala pijinia pexënato xaina pewënë Heber. 25 Heber pijinia xaina anijanëbeje pexënato. Caenë pewënë Peleg, tsipaji peponaponaematacabita mapanacuapijiwije nawecuanatsana saicaya penawecuajinawanapaenexa. Itsanë pijinia juyapijinë pewënë Joctán. 26-29 Joctán xaina pexi mapamonaeje: Almodad, Selef, Hazar-mavet, Jera, Adoram, Uzal, Dicla, Obal, Abimael, Seba, Ofir, Havila, Jobab-ata. Daxita mapamonaeje pexi Joctán. 30-31 Daxita bajarapamonae Sem-pijinë pemomoxi tsaponaerena, penaitajëbiwi pijawiriamaëtojawarena. Bajarapamonae pejinawanapaenacuami taxuxuaba Mesa nacuajawata, pepatsinexa Sefar nacuajawabelia, panacuata nawita petsutonë pemutuabereca. Caenë canacujitsia naexanapona caenacuapijiwinexa saicaya. Nexata, natsanaeya cae-iratupayo canacujitsia jinawanapa. Bajarapacuenia xaina saicaya pecuaicuaijaijumenë.
32 Daxita bajarapamonae itsiata caenë Noépijinë pemomoxi tsaponaerena, bajarapacuenia pejinawanapaenacuanë-ata, bajarapacuenia pijawiriamaëtonë-ata. Mapanacua pebubutsicujinae, bajarapamonae natsana daxitanacuajawa pejinawanapaenexa, bajarapacuenia-ata pexanaenexa pijatomaranë pejinawanapaenacuata.